| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
২. দুতিযঅনিযতসিক্খাপদৰণ্ণনা
2. Dutiyaaniyatasikkhāpadavaṇṇanā
৪৫৩. দুতিযে কেসুচি পোত্থকেসু ‘‘ন হেৰ খো পন পটিচ্ছন্নং আসনং হোতি আসন’’ন্তি লিখিতং। ‘‘আসনন্তি অধিকং, উদ্ধরিতানুরূপ’’ন্তি লিখিতং। দ্ৰেপি রহা ইধ অধিপ্পেতা কাযসংসগ্গদুট্ঠুল্লৰাচারহোনিসজ্জগ্গহণতো। যদি এৰং ‘‘মাতুগামো নাম ৰিঞ্ঞূ পটিবলা’’তি কিমত্থং ৰুত্তন্তি? অযমেৰ হি মাতুগামো দ্ৰিন্নম্পি কাযসংসগ্গদুট্ঠুল্লৰাচানং একতো ৰত্থুভূতো, তস্মা ৰুত্তং। কাযসংসগ্গস্স ৰত্থুভূতো দস্সিতো, ন ইতরস্সাতি কত্ৰা দুট্ঠুল্লৰাচমেৰ সন্ধায তস্সা ৰত্থুং দস্সেন্তো এৰমাহ।
453. Dutiye kesuci potthakesu ‘‘na heva kho pana paṭicchannaṃ āsanaṃ hoti āsana’’nti likhitaṃ. ‘‘Āsananti adhikaṃ, uddharitānurūpa’’nti likhitaṃ. Dvepi rahā idha adhippetā kāyasaṃsaggaduṭṭhullavācārahonisajjaggahaṇato. Yadi evaṃ ‘‘mātugāmo nāma viññū paṭibalā’’ti kimatthaṃ vuttanti? Ayameva hi mātugāmo dvinnampi kāyasaṃsaggaduṭṭhullavācānaṃ ekato vatthubhūto, tasmā vuttaṃ. Kāyasaṃsaggassa vatthubhūto dassito, na itarassāti katvā duṭṭhullavācameva sandhāya tassā vatthuṃ dassento evamāha.
এত্থাহ – যথা পঠমে অনধিপ্পেতাপি দুট্ঠুল্লৰাচা সম্ভৰৰিসেসদস্সনত্থং ৰুত্তা, ইধাপি কাযসংসগ্গো, কস্মা ন তস্স ৰসেন চক্খুস্স রহো গহেতব্বোতি? আম ন গহেতব্বো, ন চ গহিতো, গহিতো এৰ পন নিসজ্জৰসেন, ন হি অঙ্গস্স নিসজ্জা ৰিসেসোতি। অপ্পটিচ্ছন্নে সতি কথং চক্খুস্স রহোতি চে? দূরত্তা। পঠমে কস্মা ইত্থিসতম্পি অনাপত্তিং ন করোতি, ইধ কস্মা একাপি করোতীতি চে? নো ৰুচ্চতি সিদ্ধত্তা। সিদ্ধং হোতি, যদিদং অঞ্ঞতরো ভিক্খু ৰেসালিযং মহাৰনে…পে॰… দ্ৰারং ৰিৰরিত্ৰা নিপন্নো হোতি…পে॰… সম্বহুলা ইত্থিযো যাৰদত্থং কত্ৰা পক্কমিংসূতি (পারা॰ ৭৭)। তস্মা ন মেথুনস্স মাতুগামো দুতিযো হোতি। ইত্থিযো হি অঞ্ঞমঞ্ঞিস্সা ৰজ্জং পটিচ্ছাদেন্তি, তেনেৰ ভিক্খুনীনং ৰজ্জপটিচ্ছাদনে পারাজিকং পঞ্ঞত্তং। তথা ‘‘আযস্মা উদাযী তা ইত্থিযো ৰিহারং পেক্খাপেত্ৰা তাসং ইত্থীনং ৰচ্চমগ্গ’’ন্তি (পারা॰ ২৮৩) এত্থ ‘‘যা পন তা ইত্থিযো হিরিমনা, তা নিক্খমিত্ৰা ভিক্খূ উজ্ঝাপেন্তী’’তি (পারা॰ ২৮৩) ৰচনতো দুট্ঠুল্লস্স মাতুগামো দুতিযো হোতীতি সিদ্ধন্তি অধিপ্পাযো। উভযত্থাপি উম্মত্তকাদিকম্মিকানং অনাপত্তীতি তেসং পাটেক্কং নিদানে আগতং, আদিকম্মিকানং অনাপত্তীতি অত্থো। অনুগণ্ঠিপদে পন ‘‘অচেলকৰগ্গে রহোপটিচ্ছন্নাসনসিক্খাপদে ‘ৰিঞ্ঞূ পুরিসো দুতিযো হোতী’তি (পাচি॰ ২৮৮) ইমস্স অনুরূপতো ‘ইত্থীনং সতম্পি অনাপত্তিং ন করোতী’তি ৰুত্ত’’ন্তি চ, ‘‘দুতিযানিযতে ‘ইত্থীপি পুরিসোপী’তি ইদং ভিক্খুনীৰগ্গে ওসানসিক্খাপদস্স, অচেলকৰগ্গে অপ্পটিচ্ছন্নাসনসিক্খাপদস্স চ অনাপত্তিৰারে ‘যো কোচি ৰিঞ্ঞূ পুরিসো দুতিযো’তি ৰুত্তং। ইমেসং অনুরূপতো ৰুত্তন্তি ৰেদিতব্ব’’ন্তি চ ৰুত্তং।
Etthāha – yathā paṭhame anadhippetāpi duṭṭhullavācā sambhavavisesadassanatthaṃ vuttā, idhāpi kāyasaṃsaggo, kasmā na tassa vasena cakkhussa raho gahetabboti? Āma na gahetabbo, na ca gahito, gahito eva pana nisajjavasena, na hi aṅgassa nisajjā visesoti. Appaṭicchanne sati kathaṃ cakkhussa rahoti ce? Dūrattā. Paṭhame kasmā itthisatampi anāpattiṃ na karoti, idha kasmā ekāpi karotīti ce? No vuccati siddhattā. Siddhaṃ hoti, yadidaṃ aññataro bhikkhu vesāliyaṃ mahāvane…pe… dvāraṃ vivaritvā nipanno hoti…pe… sambahulā itthiyo yāvadatthaṃ katvā pakkamiṃsūti (pārā. 77). Tasmā na methunassa mātugāmo dutiyo hoti. Itthiyo hi aññamaññissā vajjaṃ paṭicchādenti, teneva bhikkhunīnaṃ vajjapaṭicchādane pārājikaṃ paññattaṃ. Tathā ‘‘āyasmā udāyī tā itthiyo vihāraṃ pekkhāpetvā tāsaṃ itthīnaṃ vaccamagga’’nti (pārā. 283) ettha ‘‘yā pana tā itthiyo hirimanā, tā nikkhamitvā bhikkhū ujjhāpentī’’ti (pārā. 283) vacanato duṭṭhullassa mātugāmo dutiyo hotīti siddhanti adhippāyo. Ubhayatthāpi ummattakādikammikānaṃ anāpattīti tesaṃ pāṭekkaṃ nidāne āgataṃ, ādikammikānaṃ anāpattīti attho. Anugaṇṭhipade pana ‘‘acelakavagge rahopaṭicchannāsanasikkhāpade ‘viññū puriso dutiyo hotī’ti (pāci. 288) imassa anurūpato ‘itthīnaṃ satampi anāpattiṃ na karotī’ti vutta’’nti ca, ‘‘dutiyāniyate ‘itthīpi purisopī’ti idaṃ bhikkhunīvagge osānasikkhāpadassa, acelakavagge appaṭicchannāsanasikkhāpadassa ca anāpattivāre ‘yo koci viññū puriso dutiyo’ti vuttaṃ. Imesaṃ anurūpato vuttanti veditabba’’nti ca vuttaṃ.
দুতিযঅনিযতসিক্খাপদৰণ্ণনা নিট্ঠিতা।
Dutiyaaniyatasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ২. দুতিযঅনিযতসিক্খাপদং • 2. Dutiyaaniyatasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. দুতিযঅনিযতসিক্খাপদৰণ্ণনা • 2. Dutiyaaniyatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. দুতিযঅনিযতসিক্খাপদৰণ্ণনা • 2. Dutiyaaniyatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. দুতিযঅনিযতসিক্খাপদৰণ্ণনা • 2. Dutiyaaniyatasikkhāpadavaṇṇanā
