| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. து³தியஅஞ்ஞதரபி⁴க்கு²ஸுத்தங்
4. Dutiyaaññatarabhikkhusuttaṃ
36. ஸாவத்தி²னிதா³னங் . அத² கோ² அஞ்ஞதரோ பி⁴க்கு² யேன ப⁴க³வா…பே॰… ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘ஸாது⁴ மே, ப⁴ந்தே , ப⁴க³வா ஸங்கி²த்தேன த⁴ம்மங் தே³ஸேது யமஹங் ப⁴க³வதோ த⁴ம்மங் ஸுத்வா ஏகோ வூபகட்டோ² அப்பமத்தோ ஆதாபீ பஹிதத்தோ விஹரெய்ய’’ந்தி. ‘‘யங் கோ², பி⁴க்கு², அனுஸேதி தங் அனுமீயதி; யங் அனுமீயதி தேன ஸங்க²ங் க³ச்ச²தி. யங் நானுஸேதி ந தங் அனுமீயதி; யங் நானுமீயதி ந தேன ஸங்க²ங் க³ச்ச²தீ’’தி. ‘‘அஞ்ஞாதங், ப⁴க³வா; அஞ்ஞாதங், ஸுக³தா’’தி.
36. Sāvatthinidānaṃ . Atha kho aññataro bhikkhu yena bhagavā…pe… ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante , bhagavā saṃkhittena dhammaṃ desetu yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti. ‘‘Yaṃ kho, bhikkhu, anuseti taṃ anumīyati; yaṃ anumīyati tena saṅkhaṃ gacchati. Yaṃ nānuseti na taṃ anumīyati; yaṃ nānumīyati na tena saṅkhaṃ gacchatī’’ti. ‘‘Aññātaṃ, bhagavā; aññātaṃ, sugatā’’ti.
‘‘யதா² கத²ங் பன த்வங், பி⁴க்கு², மயா ஸங்கி²த்தேன பா⁴ஸிதஸ்ஸ வித்தா²ரேன அத்த²ங் ஆஜானாஸீ’’தி? ‘‘ரூபங் சே, ப⁴ந்தே, அனுஸேதி தங் அனுமீயதி; யங் அனுமீயதி தேன ஸங்க²ங் க³ச்ச²தி. வேத³னங் சே அனுஸேதி… ஸஞ்ஞங் சே அனுஸேதி… ஸங்கா²ரே சே அனுஸேதி… விஞ்ஞாணங் சே அனுஸேதி தங் அனுமீயதி; யங் அனுமீயதி தேன ஸங்க²ங் க³ச்ச²தி. ரூபங் சே, ப⁴ந்தே, நானுஸேதி ந தங் அனுமீயதி; யங் நானுமீயதி ந தேன ஸங்க²ங் க³ச்ச²தி. வேத³னங் சே நானுஸேதி… ஸஞ்ஞங் சே நானுஸேதி… ஸங்கா²ரே சே நானுஸேதி… விஞ்ஞாணங் சே நானுஸேதி ந தங் அனுமீயதி; யங் நானுமீயதி ந தேன ஸங்க²ங் க³ச்ச²தி. இமஸ்ஸ க்²வாஹங், ப⁴ந்தே, ப⁴க³வதா ஸங்கி²த்தேன பா⁴ஸிதஸ்ஸ ஏவங் வித்தா²ரேன அத்த²ங் ஆஜானாமீ’’தி.
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ ce, bhante, anuseti taṃ anumīyati; yaṃ anumīyati tena saṅkhaṃ gacchati. Vedanaṃ ce anuseti… saññaṃ ce anuseti… saṅkhāre ce anuseti… viññāṇaṃ ce anuseti taṃ anumīyati; yaṃ anumīyati tena saṅkhaṃ gacchati. Rūpaṃ ce, bhante, nānuseti na taṃ anumīyati; yaṃ nānumīyati na tena saṅkhaṃ gacchati. Vedanaṃ ce nānuseti… saññaṃ ce nānuseti… saṅkhāre ce nānuseti… viññāṇaṃ ce nānuseti na taṃ anumīyati; yaṃ nānumīyati na tena saṅkhaṃ gacchati. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘ஸாது⁴ ஸாது⁴, பி⁴க்கு²! ஸாது⁴ கோ² த்வங், பி⁴க்கு², மயா ஸங்கி²த்தேன பா⁴ஸிதஸ்ஸ வித்தா²ரேன அத்த²ங் ஆஜானாஸி. ரூபங் சே, பி⁴க்கு², அனுஸேதி தங் அனுமீயதி; யங் அனுமீயதி தேன ஸங்க²ங் க³ச்ச²தி. வேத³னங் சே, பி⁴க்கு²… ஸஞ்ஞங் சே, பி⁴க்கு²… ஸங்கா²ரே சே, பி⁴க்கு²… விஞ்ஞாணங் சே, பி⁴க்கு², அனுஸேதி தங் அனுமீயதி; யங் அனுமீயதி தேன ஸங்க²ங் க³ச்ச²தி. ரூபங் சே, பி⁴க்கு², நானுஸேதி ந தங் அனுமீயதி; யங் நானுமீயதி ந தேன ஸங்க²ங் க³ச்ச²தி. வேத³னங் சே நானுஸேதி… ஸஞ்ஞங் சே நானுஸேதி… ஸங்கா²ரே சே நானுஸேதி… விஞ்ஞாணங் சே நானுஸேதி ந தங் அனுமீயதி; யங் நானுமீயதி ந தேன ஸங்க²ங் க³ச்ச²தி. இமஸ்ஸ கோ², பி⁴க்கு², மயா ஸங்கி²த்தேன பா⁴ஸிதஸ்ஸ ஏவங் வித்தா²ரேன அத்தோ² த³ட்ட²ப்³போ³’’தி…பே॰… அஞ்ஞதரோ ச பன ஸோ பி⁴க்கு² அரஹதங் அஹோஸீதி. சதுத்த²ங்.
‘‘Sādhu sādhu, bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ ce, bhikkhu, anuseti taṃ anumīyati; yaṃ anumīyati tena saṅkhaṃ gacchati. Vedanaṃ ce, bhikkhu… saññaṃ ce, bhikkhu… saṅkhāre ce, bhikkhu… viññāṇaṃ ce, bhikkhu, anuseti taṃ anumīyati; yaṃ anumīyati tena saṅkhaṃ gacchati. Rūpaṃ ce, bhikkhu, nānuseti na taṃ anumīyati; yaṃ nānumīyati na tena saṅkhaṃ gacchati. Vedanaṃ ce nānuseti… saññaṃ ce nānuseti… saṅkhāre ce nānuseti… viññāṇaṃ ce nānuseti na taṃ anumīyati; yaṃ nānumīyati na tena saṅkhaṃ gacchati. Imassa kho, bhikkhu, mayā saṃkhittena bhāsitassa evaṃ vitthārena attho daṭṭhabbo’’ti…pe… aññataro ca pana so bhikkhu arahataṃ ahosīti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. து³தியஅஞ்ஞதரபி⁴க்கு²ஸுத்தவண்ணனா • 4. Dutiyaaññatarabhikkhusuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. து³தியஅஞ்ஞதரபி⁴க்கு²ஸுத்தவண்ணனா • 4. Dutiyaaññatarabhikkhusuttavaṇṇanā
