| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. দুতিযঅঞ্ঞতরভিক্খুসুত্তং
4. Dutiyaaññatarabhikkhusuttaṃ
৩৬. সাৰত্থিনিদানং । অথ খো অঞ্ঞতরো ভিক্খু যেন ভগৰা…পে॰… একমন্তং নিসিন্নো খো সো ভিক্খু ভগৰন্তং এতদৰোচ – ‘‘সাধু মে, ভন্তে , ভগৰা সংখিত্তেন ধম্মং দেসেতু যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি। ‘‘যং খো, ভিক্খু, অনুসেতি তং অনুমীযতি; যং অনুমীযতি তেন সঙ্খং গচ্ছতি। যং নানুসেতি ন তং অনুমীযতি; যং নানুমীযতি ন তেন সঙ্খং গচ্ছতী’’তি। ‘‘অঞ্ঞাতং, ভগৰা; অঞ্ঞাতং, সুগতা’’তি।
36. Sāvatthinidānaṃ . Atha kho aññataro bhikkhu yena bhagavā…pe… ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante , bhagavā saṃkhittena dhammaṃ desetu yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti. ‘‘Yaṃ kho, bhikkhu, anuseti taṃ anumīyati; yaṃ anumīyati tena saṅkhaṃ gacchati. Yaṃ nānuseti na taṃ anumīyati; yaṃ nānumīyati na tena saṅkhaṃ gacchatī’’ti. ‘‘Aññātaṃ, bhagavā; aññātaṃ, sugatā’’ti.
‘‘যথা কথং পন ত্ৰং, ভিক্খু, মযা সংখিত্তেন ভাসিতস্স ৰিত্থারেন অত্থং আজানাসী’’তি? ‘‘রূপং চে, ভন্তে, অনুসেতি তং অনুমীযতি; যং অনুমীযতি তেন সঙ্খং গচ্ছতি। ৰেদনং চে অনুসেতি… সঞ্ঞং চে অনুসেতি… সঙ্খারে চে অনুসেতি… ৰিঞ্ঞাণং চে অনুসেতি তং অনুমীযতি; যং অনুমীযতি তেন সঙ্খং গচ্ছতি। রূপং চে, ভন্তে, নানুসেতি ন তং অনুমীযতি; যং নানুমীযতি ন তেন সঙ্খং গচ্ছতি। ৰেদনং চে নানুসেতি… সঞ্ঞং চে নানুসেতি… সঙ্খারে চে নানুসেতি… ৰিঞ্ঞাণং চে নানুসেতি ন তং অনুমীযতি; যং নানুমীযতি ন তেন সঙ্খং গচ্ছতি। ইমস্স খ্ৰাহং, ভন্তে, ভগৰতা সংখিত্তেন ভাসিতস্স এৰং ৰিত্থারেন অত্থং আজানামী’’তি।
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ ce, bhante, anuseti taṃ anumīyati; yaṃ anumīyati tena saṅkhaṃ gacchati. Vedanaṃ ce anuseti… saññaṃ ce anuseti… saṅkhāre ce anuseti… viññāṇaṃ ce anuseti taṃ anumīyati; yaṃ anumīyati tena saṅkhaṃ gacchati. Rūpaṃ ce, bhante, nānuseti na taṃ anumīyati; yaṃ nānumīyati na tena saṅkhaṃ gacchati. Vedanaṃ ce nānuseti… saññaṃ ce nānuseti… saṅkhāre ce nānuseti… viññāṇaṃ ce nānuseti na taṃ anumīyati; yaṃ nānumīyati na tena saṅkhaṃ gacchati. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘সাধু সাধু, ভিক্খু! সাধু খো ত্ৰং, ভিক্খু, মযা সংখিত্তেন ভাসিতস্স ৰিত্থারেন অত্থং আজানাসি। রূপং চে, ভিক্খু, অনুসেতি তং অনুমীযতি; যং অনুমীযতি তেন সঙ্খং গচ্ছতি। ৰেদনং চে, ভিক্খু… সঞ্ঞং চে, ভিক্খু… সঙ্খারে চে, ভিক্খু… ৰিঞ্ঞাণং চে, ভিক্খু, অনুসেতি তং অনুমীযতি; যং অনুমীযতি তেন সঙ্খং গচ্ছতি। রূপং চে, ভিক্খু, নানুসেতি ন তং অনুমীযতি; যং নানুমীযতি ন তেন সঙ্খং গচ্ছতি। ৰেদনং চে নানুসেতি… সঞ্ঞং চে নানুসেতি… সঙ্খারে চে নানুসেতি… ৰিঞ্ঞাণং চে নানুসেতি ন তং অনুমীযতি; যং নানুমীযতি ন তেন সঙ্খং গচ্ছতি। ইমস্স খো, ভিক্খু, মযা সংখিত্তেন ভাসিতস্স এৰং ৰিত্থারেন অত্থো দট্ঠব্বো’’তি…পে॰… অঞ্ঞতরো চ পন সো ভিক্খু অরহতং অহোসীতি। চতুত্থং।
‘‘Sādhu sādhu, bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ ce, bhikkhu, anuseti taṃ anumīyati; yaṃ anumīyati tena saṅkhaṃ gacchati. Vedanaṃ ce, bhikkhu… saññaṃ ce, bhikkhu… saṅkhāre ce, bhikkhu… viññāṇaṃ ce, bhikkhu, anuseti taṃ anumīyati; yaṃ anumīyati tena saṅkhaṃ gacchati. Rūpaṃ ce, bhikkhu, nānuseti na taṃ anumīyati; yaṃ nānumīyati na tena saṅkhaṃ gacchati. Vedanaṃ ce nānuseti… saññaṃ ce nānuseti… saṅkhāre ce nānuseti… viññāṇaṃ ce nānuseti na taṃ anumīyati; yaṃ nānumīyati na tena saṅkhaṃ gacchati. Imassa kho, bhikkhu, mayā saṃkhittena bhāsitassa evaṃ vitthārena attho daṭṭhabbo’’ti…pe… aññataro ca pana so bhikkhu arahataṃ ahosīti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. দুতিযঅঞ্ঞতরভিক্খুসুত্তৰণ্ণনা • 4. Dutiyaaññatarabhikkhusuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. দুতিযঅঞ্ঞতরভিক্খুসুত্তৰণ্ণনা • 4. Dutiyaaññatarabhikkhusuttavaṇṇanā
