| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. দুতিযঅঞ্ঞতরভিক্খুসুত্তং
7. Dutiyaaññatarabhikkhusuttaṃ
৭. সাৰত্থিনিদানং। অথ খো অঞ্ঞতরো ভিক্খু যেন ভগৰা তেনুপসঙ্কমি…পে॰… একমন্তং নিসিন্নো খো সো ভিক্খু ভগৰন্তং এতদৰোচ –
7. Sāvatthinidānaṃ. Atha kho aññataro bhikkhu yena bhagavā tenupasaṅkami…pe… ekamantaṃ nisinno kho so bhikkhu bhagavantaṃ etadavoca –
‘‘‘রাগৰিনযো দোসৰিনযো মোহৰিনযো’তি, ভন্তে, ৰুচ্চতি। কিস্স নু খো এতং, ভন্তে, অধিৰচনং – ‘রাগৰিনযো দোসৰিনযো মোহৰিনযো’’’তি? ‘‘নিব্বানধাতুযা খো এতং, ভিক্খু, অধিৰচনং – ‘রাগৰিনযো দোসৰিনযো মোহৰিনযো’তি। আসৰানং খযো তেন ৰুচ্চতী’’তি।
‘‘‘Rāgavinayo dosavinayo mohavinayo’ti, bhante, vuccati. Kissa nu kho etaṃ, bhante, adhivacanaṃ – ‘rāgavinayo dosavinayo mohavinayo’’’ti? ‘‘Nibbānadhātuyā kho etaṃ, bhikkhu, adhivacanaṃ – ‘rāgavinayo dosavinayo mohavinayo’ti. Āsavānaṃ khayo tena vuccatī’’ti.
এৰং ৰুত্তে সো ভিক্খু ভগৰন্তং এতদৰোচ – ‘‘‘অমতং, অমত’ন্তি, ভন্তে, ৰুচ্চতি। কতমং নু খো, ভন্তে, অমতং, কতমো অমতগামিমগ্গো’’তি? ‘‘যো খো, ভিক্খু, রাগক্খযো দোসক্খযো মোহক্খযো – ইদং ৰুচ্চতি অমতং। অযমেৰ অরিযো অট্ঠঙ্গিকো মগ্গো অমতগামিমগ্গো, সেয্যথিদং – সম্মাদিট্ঠি…পে॰… সম্মাসমাধী’’তি। সত্তমং।
Evaṃ vutte so bhikkhu bhagavantaṃ etadavoca – ‘‘‘amataṃ, amata’nti, bhante, vuccati. Katamaṃ nu kho, bhante, amataṃ, katamo amatagāmimaggo’’ti? ‘‘Yo kho, bhikkhu, rāgakkhayo dosakkhayo mohakkhayo – idaṃ vuccati amataṃ. Ayameva ariyo aṭṭhaṅgiko maggo amatagāmimaggo, seyyathidaṃ – sammādiṭṭhi…pe… sammāsamādhī’’ti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. দুতিযঅঞ্ঞতরভিক্খুসুত্তৰণ্ণনা • 7. Dutiyaaññatarabhikkhusuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. দুতিযঅঞ্ঞতরভিক্খুসুত্তৰণ্ণনা • 7. Dutiyaaññatarabhikkhusuttavaṇṇanā
