| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. দুতিযঅপরিজাননসুত্তৰণ্ণনা
5. Dutiyaaparijānanasuttavaṇṇanā
২৭. চক্খুৰিঞ্ঞাণৰিঞ্ঞাতব্বধম্মো নাম রূপাযতনমেৰাতি আহ ‘‘হেট্ঠা গহিতরূপমেৰা’’তি। ইধ অনাপাথগতং ‘‘চক্খুৰিঞ্ঞাণৰিঞ্ঞাতব্বা ধম্মা’’তি ৰুত্তত্তা। হেট্ঠা আপাথগতম্পি অনাপাথগতম্পি গহিতমেৰ ‘‘যে চ রূপা’’তি অনৰসেসতো ৰুত্তত্তা। তে হি ৰেদনাসঞ্ঞাসঙ্খারক্খন্ধা সহ চক্খুৰিঞ্ঞাণেন ৰিঞ্ঞাতব্বত্তা। তথা হি চক্খুৰিঞ্ঞাণং তেহি একুপ্পাদং একৰত্থুকং একনিরোধং একারম্মণমেৰ। সেসপদেসূতি সেসেসু ‘‘যঞ্চ সোতং যে চ সদ্দা’’তিআদিনা আগতেসু কণ্হপক্খে পঞ্চসু, সুক্কপক্খে ছসুপি পদেসু। এসেৰ নযোতি য্ৰাযং ‘‘হেট্ঠা গহিতরূপমেৰ গণ্হিত্ৰা’’তি অত্থো ৰুত্তো। এসো এৰ তত্থপি অত্থৰণ্ণনানযো।
27. Cakkhuviññāṇaviññātabbadhammo nāma rūpāyatanamevāti āha ‘‘heṭṭhā gahitarūpamevā’’ti. Idha anāpāthagataṃ ‘‘cakkhuviññāṇaviññātabbā dhammā’’ti vuttattā. Heṭṭhā āpāthagatampi anāpāthagatampi gahitameva ‘‘ye ca rūpā’’ti anavasesato vuttattā. Te hi vedanāsaññāsaṅkhārakkhandhā saha cakkhuviññāṇena viññātabbattā. Tathā hi cakkhuviññāṇaṃ tehi ekuppādaṃ ekavatthukaṃ ekanirodhaṃ ekārammaṇameva. Sesapadesūti sesesu ‘‘yañca sotaṃ ye ca saddā’’tiādinā āgatesu kaṇhapakkhe pañcasu, sukkapakkhe chasupi padesu. Eseva nayoti yvāyaṃ ‘‘heṭṭhā gahitarūpameva gaṇhitvā’’ti attho vutto. Eso eva tatthapi atthavaṇṇanānayo.
দুতিযঅপরিজাননসুত্তৰণ্ণনা নিট্ঠিতা।
Dutiyaaparijānanasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. দুতিযঅপরিজাননসুত্তং • 5. Dutiyaaparijānanasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. দুতিযঅপরিজাননসুত্তৰণ্ণনা • 5. Dutiyaaparijānanasuttavaṇṇanā
