| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. දුතියඅප්‌පියසුත්‌තං
4. Dutiyaappiyasuttaṃ
4. ‘‘අට්‌ඨහි, භික්‌ඛවෙ, ධම්‌මෙහි සමන්‌නාගතො භික්‌ඛු සබ්‍රහ්‌මචාරීනං අප්‌පියො ච හොති අමනාපො ච අගරු ච අභාවනීයො ච. කතමෙහි අට්‌ඨහි? ඉධ, භික්‌ඛවෙ, භික්‌ඛු ලාභකාමො ච හොති, සක්‌කාරකාමො ච, අනවඤ්‌ඤත්‌තිකාමො ච, අකාලඤ්‌ඤූ ච, අමත්‌තඤ්‌ඤූ ච, අසුචි ච, බහුභාණී ච, අක්‌කොසකපරිභාසකො ච සබ්‍රහ්‌මචාරීනං. ඉමෙහි ඛො, භික්‌ඛවෙ, අට්‌ඨහි ධම්‌මෙහි සමන්‌නාගතො භික්‌ඛු සබ්‍රහ්‌මචාරීනං අප්‌පියො ච හොති අමනාපො ච අගරු ච අභාවනීයො ච.
4. ‘‘Aṭṭhahi, bhikkhave, dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca. Katamehi aṭṭhahi? Idha, bhikkhave, bhikkhu lābhakāmo ca hoti, sakkārakāmo ca, anavaññattikāmo ca, akālaññū ca, amattaññū ca, asuci ca, bahubhāṇī ca, akkosakaparibhāsako ca sabrahmacārīnaṃ. Imehi kho, bhikkhave, aṭṭhahi dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca.
‘‘අට්‌ඨහි, භික්‌ඛවෙ, ධම්‌මෙහි සමන්‌නාගතො භික්‌ඛු සබ්‍රහ්‌මචාරීනං පියො ච හොති මනාපො ච ගරු ච භාවනීයො ච. කතමෙහි අට්‌ඨහි? ඉධ, භික්‌ඛවෙ, භික්‌ඛු න ලාභකාමො ච හොති, න සක්‌කාරකාමො ච, න අනවඤ්‌ඤත්‌තිකාමො ච, කාලඤ්‌ඤූ ච, මත්‌තඤ්‌ඤූ ච, සුචි ච, න බහුභාණී ච, අනක්‌කොසකපරිභාසකො ච සබ්‍රහ්‌මචාරීනං. ඉමෙහි ඛො, භික්‌ඛවෙ, අට්‌ඨහි ධම්‌මෙහි සමන්‌නාගතො භික්‌ඛු සබ්‍රහ්‌මචාරීනං පියො ච හොති මනාපො ච ගරු ච භාවනීයො චා’’ති. චතුත්‌ථං.
‘‘Aṭṭhahi, bhikkhave, dhammehi samannāgato bhikkhu sabrahmacārīnaṃ piyo ca hoti manāpo ca garu ca bhāvanīyo ca. Katamehi aṭṭhahi? Idha, bhikkhave, bhikkhu na lābhakāmo ca hoti, na sakkārakāmo ca, na anavaññattikāmo ca, kālaññū ca, mattaññū ca, suci ca, na bahubhāṇī ca, anakkosakaparibhāsako ca sabrahmacārīnaṃ. Imehi kho, bhikkhave, aṭṭhahi dhammehi samannāgato bhikkhu sabrahmacārīnaṃ piyo ca hoti manāpo ca garu ca bhāvanīyo cā’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3-4. අප්‌පියසුත්‌තද්‌වයවණ්‌ණනා • 3-4. Appiyasuttadvayavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2-4. පඤ්‌ඤාසුත්‌තාදිවණ්‌ණනා • 2-4. Paññāsuttādivaṇṇanā
