| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. து³தியஅபுத்தகஸுத்தவண்ணனா
10. Dutiyaaputtakasuttavaṇṇanā
131. த³ஸமே பிண்ட³பாதேன படிபாதே³ஸீதி பிண்ட³பாதேன ஸத்³தி⁴ங் ஸங்யோஜேஸி, பிண்ட³பாதங் அதா³ஸீதி அத்தோ². பக்காமீதி கேனசிதே³வ ராஜுபட்டா²னாதி³னா கிச்சேன க³தோ. பச்சா² விப்படிஸாரீ அஹோஸீதி ஸோ கிர அஞ்ஞேஸுபி தி³வஸேஸு தங் பச்சேகஸம்பு³த்³த⁴ங் பஸ்ஸதி, தா³துங் பனஸ்ஸ சித்தங் ந உப்பஜ்ஜதி. தஸ்மிங் பன தி³வஸே அயங் பது³மவதிதே³வியா ததியபுத்தோ தக்³க³ரஸிகீ² பச்சேகபு³த்³தோ⁴ க³ந்த⁴மாத³னபப்³ப³தே ப²லஸமாபத்திஸுகே²ன வீதினாமெத்வா புப்³ப³ண்ஹஸமயே வுட்டா²ய அனோதத்தத³ஹே முக²ங் தோ⁴வித்வா மனோஸிலாதலே நிவாஸெத்வா காயப³ந்த⁴னங் ப³ந்தி⁴த்வா பத்தசீவரமாதா³ய அபி⁴ஞ்ஞாபாத³கங் சதுத்த²ஜ்ஜா²னங் ஸமாபஜ்ஜித்வா இத்³தி⁴யா வேஹாஸங் அப்³பு⁴க்³க³ந்த்வா நக³ரத்³வாரே ஓருய்ஹ சீவரங் பாருபித்வா பத்தமாதா³ய நக³ரவாஸீனங் க⁴ரத்³வாரேஸு ஸஹஸ்ஸப⁴ண்டி³கங் ட²பெந்தோ விய பாஸாதி³கேஹி அபி⁴க்கந்தாதீ³ஹி அனுபுப்³பே³ன ஸெட்டி²னோ க⁴ரத்³வாரங் ஸம்பத்தோ. தங்தி³வஸஞ்ச ஸெட்டி² பாதோவ உட்டா²ய பணீதபோ⁴ஜனங் பு⁴ஞ்ஜித்வா, க⁴ரத்³வாரகொட்ட²கே ஆஸனங் பஞ்ஞாபெத்வா, த³ந்தந்தரானி ஸோதெ⁴ந்தோ நிஸின்னோ ஹோதி. ஸோ பச்சேகபு³த்³த⁴ங் தி³ஸ்வா, தங்தி³வஸங் பாதோ பு⁴த்வா நிஸின்னத்தா தா³னசித்தங் உப்பாதெ³த்வா, ப⁴ரியங் பக்கோஸாபெத்வா, ‘‘இமஸ்ஸ ஸமணஸ்ஸ பிண்ட³பாதங் தே³ஹீ’’தி வத்வா பக்காமி.
131. Dasame piṇḍapātena paṭipādesīti piṇḍapātena saddhiṃ saṃyojesi, piṇḍapātaṃ adāsīti attho. Pakkāmīti kenacideva rājupaṭṭhānādinā kiccena gato. Pacchā vippaṭisārī ahosīti so kira aññesupi divasesu taṃ paccekasambuddhaṃ passati, dātuṃ panassa cittaṃ na uppajjati. Tasmiṃ pana divase ayaṃ padumavatideviyā tatiyaputto taggarasikhī paccekabuddho gandhamādanapabbate phalasamāpattisukhena vītināmetvā pubbaṇhasamaye vuṭṭhāya anotattadahe mukhaṃ dhovitvā manosilātale nivāsetvā kāyabandhanaṃ bandhitvā pattacīvaramādāya abhiññāpādakaṃ catutthajjhānaṃ samāpajjitvā iddhiyā vehāsaṃ abbhuggantvā nagaradvāre oruyha cīvaraṃ pārupitvā pattamādāya nagaravāsīnaṃ gharadvāresu sahassabhaṇḍikaṃ ṭhapento viya pāsādikehi abhikkantādīhi anupubbena seṭṭhino gharadvāraṃ sampatto. Taṃdivasañca seṭṭhi pātova uṭṭhāya paṇītabhojanaṃ bhuñjitvā, gharadvārakoṭṭhake āsanaṃ paññāpetvā, dantantarāni sodhento nisinno hoti. So paccekabuddhaṃ disvā, taṃdivasaṃ pāto bhutvā nisinnattā dānacittaṃ uppādetvā, bhariyaṃ pakkosāpetvā, ‘‘imassa samaṇassa piṇḍapātaṃ dehī’’ti vatvā pakkāmi.
ஸெட்டி²ப⁴ரியா சிந்தேஸி – ‘‘மயா எத்தகேன காலேன இமஸ்ஸ ‘தே³தா²’தி வசனங் ந ஸுதபுப்³ப³ங், தா³பெந்தோபி ச அஜ்ஜ ந யஸ்ஸ வா தஸ்ஸ வா தா³பேதி, வீதராக³தோ³ஸமோஹஸ்ஸ வந்தகிலேஸஸ்ஸ ஓஹிதபா⁴ரஸ்ஸ பச்சேகபு³த்³த⁴ஸ்ஸ தா³பேதி, யங் வா தங் வா அத³த்வா பணீதங் பிண்ட³பாதங் த³ஸ்ஸாமீ’’தி, க⁴ரா நிக்க²ம்ம பச்சேகபு³த்³த⁴ங் பஞ்சபதிட்டி²தேன வந்தி³த்வா பத்தங் ஆதா³ய அந்தோனிவேஸனே பஞ்ஞத்தாஸனே நிஸீதா³பெத்வா ஸுபரிஸுத்³தே⁴ஹி ஸாலிதண்டு³லேஹி ப⁴த்தங் ஸம்பாதெ³த்வா தத³னுரூபங் கா²த³னீயங் ப்³யஞ்ஜனங் ஸுபெய்யஞ்ச ஸல்லக்கெ²த்வா பத்தங் பூரெத்வா ப³ஹி க³ந்தே⁴ஹி ஸமலங்கரித்வா பச்சேகபு³த்³த⁴ஸ்ஸ ஹத்தே²ஸு பதிட்ட²பெத்வா வந்தி³. பச்சேகபு³த்³தோ⁴ – ‘‘அஞ்ஞேஸம்பி பச்சேகபு³த்³தா⁴னங் ஸங்க³ஹங் கரிஸ்ஸாமீ’’தி அபரிபு⁴ஞ்ஜித்வாவ அனுமோத³னங் கத்வா பக்காமி. ஸோபி கோ² ஸெட்டி² பா³ஹிரதோ ஆக³ச்ச²ந்தோ பச்சேகபு³த்³த⁴ங் தி³ஸ்வா மயங் ‘‘தும்ஹாகங் பிண்ட³பாதங் தே³தா²’’தி வத்வா பக்கந்தா, அபி வோ லத்³தோ⁴தி? ஆம, ஸெட்டி² லத்³தோ⁴தி. ‘‘பஸ்ஸாமீ’’தி கீ³வங் உக்கி²பித்வா ஓலோகேஸி. அத²ஸ்ஸ பிண்ட³பாதக³ந்தோ⁴ உட்ட²ஹித்வா நாஸாபுடங் பஹரி. ஸோ சித்தங் ஸங்யமேதுங் அஸக்கொந்தோ பச்சா² விப்படிஸாரீ ஆஹோஸீதி.
Seṭṭhibhariyā cintesi – ‘‘mayā ettakena kālena imassa ‘dethā’ti vacanaṃ na sutapubbaṃ, dāpentopi ca ajja na yassa vā tassa vā dāpeti, vītarāgadosamohassa vantakilesassa ohitabhārassa paccekabuddhassa dāpeti, yaṃ vā taṃ vā adatvā paṇītaṃ piṇḍapātaṃ dassāmī’’ti, gharā nikkhamma paccekabuddhaṃ pañcapatiṭṭhitena vanditvā pattaṃ ādāya antonivesane paññattāsane nisīdāpetvā suparisuddhehi sālitaṇḍulehi bhattaṃ sampādetvā tadanurūpaṃ khādanīyaṃ byañjanaṃ supeyyañca sallakkhetvā pattaṃ pūretvā bahi gandhehi samalaṅkaritvā paccekabuddhassa hatthesu patiṭṭhapetvā vandi. Paccekabuddho – ‘‘aññesampi paccekabuddhānaṃ saṅgahaṃ karissāmī’’ti aparibhuñjitvāva anumodanaṃ katvā pakkāmi. Sopi kho seṭṭhi bāhirato āgacchanto paccekabuddhaṃ disvā mayaṃ ‘‘tumhākaṃ piṇḍapātaṃ dethā’’ti vatvā pakkantā, api vo laddhoti? Āma, seṭṭhi laddhoti. ‘‘Passāmī’’ti gīvaṃ ukkhipitvā olokesi. Athassa piṇḍapātagandho uṭṭhahitvā nāsāpuṭaṃ pahari. So cittaṃ saṃyametuṃ asakkonto pacchā vippaṭisārī āhosīti.
வரமேதந்திஆதி³ விப்படிஸாரஸ்ஸ உப்பன்னாகாரத³ஸ்ஸனங். பா⁴து ச பன ஏகபுத்தகங் ஸாபதெய்யஸ்ஸ காரணா ஜீவிதா வோரோபேஸீதி ததா³ கிரஸ்ஸ அவிப⁴த்தேயேவ குடும்பே³ மாதாபிதரோ ச ஜெட்ட²பா⁴தா ச காலமகங்ஸு. ஸோ பா⁴துஜாயாய ஸத்³தி⁴ங்யேவ ஸங்வாஸங் கப்பேஸி. பா⁴து பனஸ்ஸ ஏகோ புத்தோ ஹோதி, தங் வீதி²யா கீளந்தங் மனுஸ்ஸா வத³ந்தி – ‘‘அயங் தா³ஸோ அயங் தா³ஸீ இத³ங் யானங் இத³ங் த⁴னங் தவ ஸந்தக’’ந்தி. ஸோ தேஸங் கத²ங் க³ஹெத்வா – ‘‘அயங் தா³ஸோ மய்ஹங் ஸந்தக’’ந்திஆதீ³னி கதே²தி.
Varametantiādi vippaṭisārassa uppannākāradassanaṃ. Bhātu ca pana ekaputtakaṃ sāpateyyassa kāraṇā jīvitā voropesīti tadā kirassa avibhatteyeva kuṭumbe mātāpitaro ca jeṭṭhabhātā ca kālamakaṃsu. So bhātujāyāya saddhiṃyeva saṃvāsaṃ kappesi. Bhātu panassa eko putto hoti, taṃ vīthiyā kīḷantaṃ manussā vadanti – ‘‘ayaṃ dāso ayaṃ dāsī idaṃ yānaṃ idaṃ dhanaṃ tava santaka’’nti. So tesaṃ kathaṃ gahetvā – ‘‘ayaṃ dāso mayhaṃ santaka’’ntiādīni katheti.
அத²ஸ்ஸ சூளபிதா சிந்தேஸி – ‘‘அயங் தா³ரகோ இதா³னேவ ஏவங் கதே²ஸி, மஹல்லககாலே குடும்ப³ங் மஜ்ஜே² பி⁴ந்தா³பெய்ய, இதா³னேவஸ்ஸ கத்தப்³ப³ங் கரிஸ்ஸாமீ’’தி ஏகதி³வஸங் வாஸிங் ஆதா³ய – ‘‘ஏஹி புத்த, அரஞ்ஞங் க³ச்சா²மா’’தி தங் அரஞ்ஞங் நெத்வா விரவந்தங் விரவந்தங் மாரெத்வா ஆவாடே பக்கி²பித்வா பங்ஸுனா படிச்சா²தே³ஸி. இத³ங் ஸந்தா⁴யேதங் வுத்தங். ஸத்தக்க²த்துந்தி ஸத்தவாரே. புப்³ப³பச்சி²மசேதனாவஸேன செத்த² அத்தோ² வேதி³தப்³போ³. ஏகபிண்ட³பாததா³னஸ்மிஞ்ஹி ஏகாவ சேதனா த்³வே படிஸந்தி⁴யோ ந தே³தி, புப்³ப³பச்சி²மசேதனாஹி பனேஸ ஸத்தக்க²த்துங் ஸக்³கே³, ஸத்தக்க²த்துங் ஸெட்டி²குலே நிப்³ப³த்தோ. புராணந்தி பச்சேகஸம்பு³த்³த⁴ஸ்ஸ தி³ன்னபிண்ட³பாதசேதனாகம்மங்.
Athassa cūḷapitā cintesi – ‘‘ayaṃ dārako idāneva evaṃ kathesi, mahallakakāle kuṭumbaṃ majjhe bhindāpeyya, idānevassa kattabbaṃ karissāmī’’ti ekadivasaṃ vāsiṃ ādāya – ‘‘ehi putta, araññaṃ gacchāmā’’ti taṃ araññaṃ netvā viravantaṃ viravantaṃ māretvā āvāṭe pakkhipitvā paṃsunā paṭicchādesi. Idaṃ sandhāyetaṃ vuttaṃ. Sattakkhattunti sattavāre. Pubbapacchimacetanāvasena cettha attho veditabbo. Ekapiṇḍapātadānasmiñhi ekāva cetanā dve paṭisandhiyo na deti, pubbapacchimacetanāhi panesa sattakkhattuṃ sagge, sattakkhattuṃ seṭṭhikule nibbatto. Purāṇanti paccekasambuddhassa dinnapiṇḍapātacetanākammaṃ.
பரிக்³க³ஹந்தி பரிக்³க³ஹிதவத்து². அனுஜீவினோதி ஏகங் மஹாகுலங் நிஸ்ஸாய பண்ணாஸம்பி ஸட்டி²பி குலானி ஜீவந்தி, தே மனுஸ்ஸே ஸந்தா⁴யேதங் வுத்தங். ஸப்³ப³ங் நாதா³ய க³ந்தப்³ப³ந்தி ஸப்³ப³மேதங் ந ஆதி³யித்வா க³ந்தப்³ப³ங். ஸப்³ப³ங் நிக்கி²ப்பகா³மினந்தி ஸப்³ப³மேதங் நிக்கி²ப்பஸபா⁴வங், பரிச்சஜிதப்³ப³ஸபா⁴வமேவாதி அத்தோ². த³ஸமங்.
Pariggahanti pariggahitavatthu. Anujīvinoti ekaṃ mahākulaṃ nissāya paṇṇāsampi saṭṭhipi kulāni jīvanti, te manusse sandhāyetaṃ vuttaṃ. Sabbaṃ nādāya gantabbanti sabbametaṃ na ādiyitvā gantabbaṃ. Sabbaṃ nikkhippagāminanti sabbametaṃ nikkhippasabhāvaṃ, pariccajitabbasabhāvamevāti attho. Dasamaṃ.
து³தியோ வக்³கோ³.
Dutiyo vaggo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. து³தியஅபுத்தகஸுத்தங் • 10. Dutiyaaputtakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. து³தியஅபுத்தகஸுத்தவண்ணனா • 10. Dutiyaaputtakasuttavaṇṇanā
