| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. து³தியஅரியாவாஸஸுத்தவண்ணனா
10. Dutiyaariyāvāsasuttavaṇṇanā
20. த³ஸமங் யஸ்மா குருரட்ட²வாஸினோ பி⁴க்கூ² க³ம்பீ⁴ரபஞ்ஞாகாரகா யுத்தப்பயுத்தா, தஸ்மா யதா² தேஸங் தீ³க⁴னிகாயாதீ³ஸு மஹானிதா³னாதீ³னி கதி²தானி, ஏவமித³ம்பி க³ம்பீ⁴ரங் ஸுகு²மங் திலக்க²ணாஹதங் ஸுத்தங் தத்தே²வ அவோச. தத்த² பஞ்சங்க³விப்பஹீனோதி பஞ்சஹி அங்கே³ஹி விப்பயுத்தோ ஹுத்வா கீ²ணாஸவோ அவஸி வஸதி வஸிஸ்ஸதி. தஸ்மா அயங் பஞ்சங்க³விப்பஹீனதா அரியாவாஸோதி வுத்தோ. ஏஸ நயோ ஸப்³ப³த்த². ஏவங் கோ², பி⁴க்க²வே, பி⁴க்கு² ச²ளங்க³ஸமன்னாக³தோ ஹோதீதி ச²ளங்கு³பெக்கா²ய ஸமன்னாக³தோ ஹோதி. ச²ளங்கு³பெக்கா² த⁴ம்மா நாம கேதி? ஞாணாத³யோ. ‘‘ஞாண’’ந்தி வுத்தே கிரியதோ சத்தாரி ஞாணஸம்பயுத்தசித்தானி லப்³ப⁴ந்தி, ‘‘ஸததவிஹாரோ’’தி வுத்தே அட்ட² மஹாசித்தானி, ‘‘ரஜ்ஜனது³ஸ்ஸனங் நத்தீ²’’தி வுத்தே த³ஸ சித்தானி லப்³ப⁴ந்தி. ஸோமனஸ்ஸங் ஆஸேவனவஸேன லப்³ப⁴தி. ஸதாரக்கே²ன சேதஸாதி கீ²ணாஸவஸ்ஸ ஹி தீஸு த்³வாரேஸு ஸப்³ப³காலே ஸதி ஆரக்க²கிச்சங் ஸாதே⁴தி. தேனேவஸ்ஸ சரதோ ச திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங் ஸமிதங் ஞாணத³ஸ்ஸனங் பச்சுபட்டி²தங் ஹோதீதி வுச்சதி.
20. Dasamaṃ yasmā kururaṭṭhavāsino bhikkhū gambhīrapaññākārakā yuttappayuttā, tasmā yathā tesaṃ dīghanikāyādīsu mahānidānādīni kathitāni, evamidampi gambhīraṃ sukhumaṃ tilakkhaṇāhataṃ suttaṃ tattheva avoca. Tattha pañcaṅgavippahīnoti pañcahi aṅgehi vippayutto hutvā khīṇāsavo avasi vasati vasissati. Tasmā ayaṃ pañcaṅgavippahīnatā ariyāvāsoti vutto. Esa nayo sabbattha. Evaṃ kho, bhikkhave, bhikkhu chaḷaṅgasamannāgato hotīti chaḷaṅgupekkhāya samannāgato hoti. Chaḷaṅgupekkhā dhammā nāma keti? Ñāṇādayo. ‘‘Ñāṇa’’nti vutte kiriyato cattāri ñāṇasampayuttacittāni labbhanti, ‘‘satatavihāro’’ti vutte aṭṭha mahācittāni, ‘‘rajjanadussanaṃ natthī’’ti vutte dasa cittāni labbhanti. Somanassaṃ āsevanavasena labbhati. Satārakkhena cetasāti khīṇāsavassa hi tīsu dvāresu sabbakāle sati ārakkhakiccaṃ sādheti. Tenevassa carato ca tiṭṭhato ca suttassa ca jāgarassa ca satataṃ samitaṃ ñāṇadassanaṃ paccupaṭṭhitaṃ hotīti vuccati.
புது²ஸமணப்³ராஹ்மணானந்தி ப³ஹூனங் ஸமணப்³ராஹ்மணானங். எத்த² ஸமணாதி பப்³ப³ஜ்ஜூபக³தா, ப்³ராஹ்மணாதி போ⁴வாதி³னோ. புது²பச்சேகஸச்சானீதி ப³ஹூனி பாடேக்கஸச்சானி. ‘‘இத³மேவ த³ஸ்ஸனங் ஸச்சங், இத³மேவ ஸச்ச’’ந்தி ஏவங் பாடியேக்கங் க³ஹிதானி ப³ஹூனி ஸச்சானீதி அத்தோ². நுண்ணானீதி நீஹடானி. பனுண்ணானீதி ஸுட்டு² நீஹடானி. சத்தானீதி விஸ்ஸட்டா²னி. வந்தானீதி வமிதானி. முத்தானீதி சி²ன்னப³ந்த⁴னானி கதானி. பஹீனானீதி பஜஹிதானி. படினிஸ்ஸட்டா²னீதி யதா² ந புன சித்தங் ஆரோஹந்தி, ஏவங் படினிஸ்ஸஜ்ஜிதானி. ஸப்³பா³னேவ தானி க³ஹிதக்³க³ஹணஸ்ஸ விஸ்ஸட்ட²பா⁴வவேவசனானி.
Puthusamaṇabrāhmaṇānanti bahūnaṃ samaṇabrāhmaṇānaṃ. Ettha samaṇāti pabbajjūpagatā, brāhmaṇāti bhovādino. Puthupaccekasaccānīti bahūni pāṭekkasaccāni. ‘‘Idameva dassanaṃ saccaṃ, idameva sacca’’nti evaṃ pāṭiyekkaṃ gahitāni bahūni saccānīti attho. Nuṇṇānīti nīhaṭāni. Panuṇṇānīti suṭṭhu nīhaṭāni. Cattānīti vissaṭṭhāni. Vantānīti vamitāni. Muttānīti chinnabandhanāni katāni. Pahīnānīti pajahitāni. Paṭinissaṭṭhānīti yathā na puna cittaṃ ārohanti, evaṃ paṭinissajjitāni. Sabbāneva tāni gahitaggahaṇassa vissaṭṭhabhāvavevacanāni.
ஸமவயஸட்டே²ஸனோதி எத்த² அவயாதி அனூனா, ஸட்டா²தி விஸ்ஸட்டா². ஸம்மா அவயா ஸட்டா² ஏஸனா அஸ்ஸாதி ஸமவயஸட்டே²ஸனோ, ஸுட்டு²விஸ்ஸட்ட²ஸப்³ப³ஏஸனோதி அத்தோ². ராகா³ சித்தங் விமுத்தந்திஆதீ³ஹி மக்³க³ஸ்ஸ கிச்சனிப்ப²த்தி கதி²தா. ராகோ³ மே பஹீனோதிஆதீ³ஹி பச்சவெக்க²ணப²லங் கதி²தங். ஸேஸங் ஸப்³ப³த்த² உத்தானத்த²மேவாதி.
Samavayasaṭṭhesanoti ettha avayāti anūnā, saṭṭhāti vissaṭṭhā. Sammā avayā saṭṭhā esanā assāti samavayasaṭṭhesano, suṭṭhuvissaṭṭhasabbaesanoti attho. Rāgā cittaṃ vimuttantiādīhi maggassa kiccanipphatti kathitā. Rāgo me pahīnotiādīhi paccavekkhaṇaphalaṃ kathitaṃ. Sesaṃ sabbattha uttānatthamevāti.
நாத²வக்³கோ³ து³தியோ.
Nāthavaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. து³தியஅரியாவாஸஸுத்தங் • 10. Dutiyaariyāvāsasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. து³தியஅரியாவாஸஸுத்தவண்ணனா • 10. Dutiyaariyāvāsasuttavaṇṇanā
