| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. து³தியஅஸ்ஸாத³ஸுத்தங்
6. Dutiyaassādasuttaṃ
27. ஸாவத்தி²னிதா³னங் . ‘‘ரூபஸ்ஸாஹங், பி⁴க்க²வே, அஸ்ஸாத³பரியேஸனங் அசரிங். யோ ரூபஸ்ஸ அஸ்ஸாதோ³ தத³ஜ்ஜ²க³மங். யாவதா ரூபஸ்ஸ அஸ்ஸாதோ³ பஞ்ஞாய மே ஸோ ஸுதி³ட்டோ². ரூபஸ்ஸாஹங், பி⁴க்க²வே, ஆதீ³னவபரியேஸனங் அசரிங். யோ ரூபஸ்ஸ ஆதீ³னவோ தத³ஜ்ஜ²க³மங். யாவதா ரூபஸ்ஸ ஆதீ³னவோ பஞ்ஞாய மே ஸோ ஸுதி³ட்டோ². ரூபஸ்ஸாஹங், பி⁴க்க²வே, நிஸ்ஸரணபரியேஸனங் அசரிங். யங் ரூபஸ்ஸ நிஸ்ஸரணங் தத³ஜ்ஜ²க³மங். யாவதா ரூபஸ்ஸ நிஸ்ஸரணங் பஞ்ஞாய மே தங் ஸுதி³ட்ட²ங். வேத³னாயாஹங், பி⁴க்க²வே… ஸஞ்ஞாயாஹங், பி⁴க்க²வே… ஸங்கா²ரானாஹங் , பி⁴க்க²வே… விஞ்ஞாணஸ்ஸாஹங், பி⁴க்க²வே, அஸ்ஸாத³பரியேஸனங் அசரிங். யோ விஞ்ஞாணஸ்ஸ அஸ்ஸாதோ³ தத³ஜ்ஜ²க³மங். யாவதா விஞ்ஞாணஸ்ஸ அஸ்ஸாதோ³ பஞ்ஞாய மே ஸோ ஸுதி³ட்டோ². விஞ்ஞாணஸ்ஸாஹங், பி⁴க்க²வே, ஆதீ³னவபரியேஸனங் அசரிங். யோ விஞ்ஞாணஸ்ஸ ஆதீ³னவோ தத³ஜ்ஜ²க³மங். யாவதா விஞ்ஞாணஸ்ஸ ஆதீ³னவோ பஞ்ஞாய மே ஸோ ஸுதி³ட்டோ². விஞ்ஞாணஸ்ஸாஹங், பி⁴க்க²வே, நிஸ்ஸரணபரியேஸனங் அசரிங். யங் விஞ்ஞாணஸ்ஸ நிஸ்ஸரணங் தத³ஜ்ஜ²க³மங். யாவதா விஞ்ஞாணஸ்ஸ நிஸ்ஸரணங் பஞ்ஞாய மே தங் ஸுதி³ட்ட²ங். யாவகீவஞ்சாஹங், பி⁴க்க²வே, இமேஸங் பஞ்சன்னங் உபாதா³னக்க²ந்தா⁴னங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தங் நாப்³ப⁴ஞ்ஞாஸிங்…பே॰… அப்³ப⁴ஞ்ஞாஸிங். ஞாணஞ்ச பன மே த³ஸ்ஸனங் உத³பாதி³ – ‘அகுப்பா மே விமுத்தி 1; அயமந்திமா ஜாதி; நத்தி² தா³னி புனப்³ப⁴வோ’’’தி. ச²ட்ட²ங்.
27. Sāvatthinidānaṃ . ‘‘Rūpassāhaṃ, bhikkhave, assādapariyesanaṃ acariṃ. Yo rūpassa assādo tadajjhagamaṃ. Yāvatā rūpassa assādo paññāya me so sudiṭṭho. Rūpassāhaṃ, bhikkhave, ādīnavapariyesanaṃ acariṃ. Yo rūpassa ādīnavo tadajjhagamaṃ. Yāvatā rūpassa ādīnavo paññāya me so sudiṭṭho. Rūpassāhaṃ, bhikkhave, nissaraṇapariyesanaṃ acariṃ. Yaṃ rūpassa nissaraṇaṃ tadajjhagamaṃ. Yāvatā rūpassa nissaraṇaṃ paññāya me taṃ sudiṭṭhaṃ. Vedanāyāhaṃ, bhikkhave… saññāyāhaṃ, bhikkhave… saṅkhārānāhaṃ , bhikkhave… viññāṇassāhaṃ, bhikkhave, assādapariyesanaṃ acariṃ. Yo viññāṇassa assādo tadajjhagamaṃ. Yāvatā viññāṇassa assādo paññāya me so sudiṭṭho. Viññāṇassāhaṃ, bhikkhave, ādīnavapariyesanaṃ acariṃ. Yo viññāṇassa ādīnavo tadajjhagamaṃ. Yāvatā viññāṇassa ādīnavo paññāya me so sudiṭṭho. Viññāṇassāhaṃ, bhikkhave, nissaraṇapariyesanaṃ acariṃ. Yaṃ viññāṇassa nissaraṇaṃ tadajjhagamaṃ. Yāvatā viññāṇassa nissaraṇaṃ paññāya me taṃ sudiṭṭhaṃ. Yāvakīvañcāhaṃ, bhikkhave, imesaṃ pañcannaṃ upādānakkhandhānaṃ assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññāsiṃ…pe… abbhaññāsiṃ. Ñāṇañca pana me dassanaṃ udapādi – ‘akuppā me vimutti 2; ayamantimā jāti; natthi dāni punabbhavo’’’ti. Chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4-9. ச²ந்த³ராக³ஸுத்தாதி³வண்ணனா • 4-9. Chandarāgasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4-9. ச²ந்த³ராக³ஸுத்தாதி³வண்ணனா • 4-9. Chandarāgasuttādivaṇṇanā
