| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৩. দুতিযঅস্সাদসুত্তং
3. Dutiyaassādasuttaṃ
১০৬. ‘‘নো চেদং 1, ভিক্খৰে, লোকে অস্সাদো অভৰিস্স, নযিদং সত্তা লোকে সারজ্জেয্যুং। যস্মা চ খো, ভিক্খৰে, অত্থি লোকে অস্সাদো, তস্মা সত্তা লোকে সারজ্জন্তি। নো চেদং, ভিক্খৰে, লোকে আদীনৰো অভৰিস্স, নযিদং সত্তা লোকে নিব্বিন্দেয্যুং। যস্মা চ খো, ভিক্খৰে, অত্থি লোকে আদীনৰো, তস্মা সত্তা লোকে নিব্বিন্দন্তি। নো চেদং, ভিক্খৰে, লোকে নিস্সরণং অভৰিস্স, নযিদং সত্তা লোকম্হা 2 নিস্সরেয্যুং। যস্মা চ খো, ভিক্খৰে, অত্থি লোকে নিস্সরণং, তস্মা সত্তা লোকম্হা নিস্সরন্তি। যাৰকীৰঞ্চ, ভিক্খৰে, সত্তা লোকস্স অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং নাব্ভঞ্ঞাসুং 3, নেৰ তাৰ, ভিক্খৰে, সত্তা সদেৰকা লোকা সমারকা সব্রহ্মকা সস্সমণব্রাহ্মণিযা পজায সদেৰমনুস্সায নিস্সটা ৰিসংযুত্তা ৰিপ্পমুত্তা 4 ৰিমরিযাদীকতেন 5 চেতসা ৰিহরিংসু। যতো চ খো, ভিক্খৰে, সত্তা লোকস্স অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং অব্ভঞ্ঞাসুং, অথ, ভিক্খৰে, সত্তা সদেৰকা লোকা সমারকা সব্রহ্মকা সস্সমণব্রাহ্মণিযা পজায সদেৰমনুস্সায নিস্সটা ৰিসংযুত্তা ৰিপ্পমুত্তা ৰিমরিযাদীকতেন চেতসা ৰিহরন্তী’’তি। ততিযং।
106. ‘‘No cedaṃ 6, bhikkhave, loke assādo abhavissa, nayidaṃ sattā loke sārajjeyyuṃ. Yasmā ca kho, bhikkhave, atthi loke assādo, tasmā sattā loke sārajjanti. No cedaṃ, bhikkhave, loke ādīnavo abhavissa, nayidaṃ sattā loke nibbindeyyuṃ. Yasmā ca kho, bhikkhave, atthi loke ādīnavo, tasmā sattā loke nibbindanti. No cedaṃ, bhikkhave, loke nissaraṇaṃ abhavissa, nayidaṃ sattā lokamhā 7 nissareyyuṃ. Yasmā ca kho, bhikkhave, atthi loke nissaraṇaṃ, tasmā sattā lokamhā nissaranti. Yāvakīvañca, bhikkhave, sattā lokassa assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññāsuṃ 8, neva tāva, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā 9 vimariyādīkatena 10 cetasā vihariṃsu. Yato ca kho, bhikkhave, sattā lokassa assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññāsuṃ, atha, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā vimariyādīkatena cetasā viharantī’’ti. Tatiyaṃ.
Footnotes:
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৩. পুব্বেৰসম্বোধসুত্তাদিৰণ্ণনা • 1-3. Pubbevasambodhasuttādivaṇṇanā
