| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๖. ทุติยอสฺสาทสุตฺตํ
6. Dutiyaassādasuttaṃ
๒๗. สาวตฺถินิทานํ ฯ ‘‘รูปสฺสาหํ, ภิกฺขเว, อสฺสาทปริเยสนํ อจริํฯ โย รูปสฺส อสฺสาโท ตทชฺฌคมํฯ ยาวตา รูปสฺส อสฺสาโท ปญฺญาย เม โส สุทิโฎฺฐฯ รูปสฺสาหํ, ภิกฺขเว, อาทีนวปริเยสนํ อจริํฯ โย รูปสฺส อาทีนโว ตทชฺฌคมํฯ ยาวตา รูปสฺส อาทีนโว ปญฺญาย เม โส สุทิโฎฺฐฯ รูปสฺสาหํ, ภิกฺขเว, นิสฺสรณปริเยสนํ อจริํฯ ยํ รูปสฺส นิสฺสรณํ ตทชฺฌคมํฯ ยาวตา รูปสฺส นิสฺสรณํ ปญฺญาย เม ตํ สุทิฎฺฐํฯ เวทนายาหํ, ภิกฺขเว… สญฺญายาหํ, ภิกฺขเว… สงฺขารานาหํ , ภิกฺขเว… วิญฺญาณสฺสาหํ, ภิกฺขเว, อสฺสาทปริเยสนํ อจริํฯ โย วิญฺญาณสฺส อสฺสาโท ตทชฺฌคมํฯ ยาวตา วิญฺญาณสฺส อสฺสาโท ปญฺญาย เม โส สุทิโฎฺฐฯ วิญฺญาณสฺสาหํ, ภิกฺขเว, อาทีนวปริเยสนํ อจริํฯ โย วิญฺญาณสฺส อาทีนโว ตทชฺฌคมํฯ ยาวตา วิญฺญาณสฺส อาทีนโว ปญฺญาย เม โส สุทิโฎฺฐฯ วิญฺญาณสฺสาหํ, ภิกฺขเว, นิสฺสรณปริเยสนํ อจริํฯ ยํ วิญฺญาณสฺส นิสฺสรณํ ตทชฺฌคมํฯ ยาวตา วิญฺญาณสฺส นิสฺสรณํ ปญฺญาย เม ตํ สุทิฎฺฐํฯ ยาวกีวญฺจาหํ, ภิกฺขเว, อิเมสํ ปญฺจนฺนํ อุปาทานกฺขนฺธานํ อสฺสาทญฺจ อสฺสาทโต อาทีนวญฺจ อาทีนวโต นิสฺสรณญฺจ นิสฺสรณโต ยถาภูตํ นาพฺภญฺญาสิํ…เป.… อพฺภญฺญาสิํฯ ญาณญฺจ ปน เม ทสฺสนํ อุทปาทิ – ‘อกุปฺปา เม วิมุตฺติ 1; อยมนฺติมา ชาติ; นตฺถิ ทานิ ปุนพฺภโว’’’ติฯ ฉฎฺฐํฯ
27. Sāvatthinidānaṃ . ‘‘Rūpassāhaṃ, bhikkhave, assādapariyesanaṃ acariṃ. Yo rūpassa assādo tadajjhagamaṃ. Yāvatā rūpassa assādo paññāya me so sudiṭṭho. Rūpassāhaṃ, bhikkhave, ādīnavapariyesanaṃ acariṃ. Yo rūpassa ādīnavo tadajjhagamaṃ. Yāvatā rūpassa ādīnavo paññāya me so sudiṭṭho. Rūpassāhaṃ, bhikkhave, nissaraṇapariyesanaṃ acariṃ. Yaṃ rūpassa nissaraṇaṃ tadajjhagamaṃ. Yāvatā rūpassa nissaraṇaṃ paññāya me taṃ sudiṭṭhaṃ. Vedanāyāhaṃ, bhikkhave… saññāyāhaṃ, bhikkhave… saṅkhārānāhaṃ , bhikkhave… viññāṇassāhaṃ, bhikkhave, assādapariyesanaṃ acariṃ. Yo viññāṇassa assādo tadajjhagamaṃ. Yāvatā viññāṇassa assādo paññāya me so sudiṭṭho. Viññāṇassāhaṃ, bhikkhave, ādīnavapariyesanaṃ acariṃ. Yo viññāṇassa ādīnavo tadajjhagamaṃ. Yāvatā viññāṇassa ādīnavo paññāya me so sudiṭṭho. Viññāṇassāhaṃ, bhikkhave, nissaraṇapariyesanaṃ acariṃ. Yaṃ viññāṇassa nissaraṇaṃ tadajjhagamaṃ. Yāvatā viññāṇassa nissaraṇaṃ paññāya me taṃ sudiṭṭhaṃ. Yāvakīvañcāhaṃ, bhikkhave, imesaṃ pañcannaṃ upādānakkhandhānaṃ assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññāsiṃ…pe… abbhaññāsiṃ. Ñāṇañca pana me dassanaṃ udapādi – ‘akuppā me vimutti 2; ayamantimā jāti; natthi dāni punabbhavo’’’ti. Chaṭṭhaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๔-๙. ฉนฺทราคสุตฺตาทิวณฺณนา • 4-9. Chandarāgasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๔-๙. ฉนฺทราคสุตฺตาทิวณฺณนา • 4-9. Chandarāgasuttādivaṇṇanā
