| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. ဒုတိယအသ္သာဒသုတ္တံ
3. Dutiyaassādasuttaṃ
၁၀၆. ‘‘နော စေဒံ 1, ဘိက္ခဝေ, လောကေ အသ္သာဒော အဘဝိသ္သ, နယိဒံ သတ္တာ လောကေ သာရဇ္ဇေယ္ယုံ။ ယသ္မာ စ ခော, ဘိက္ခဝေ, အတ္ထိ လောကေ အသ္သာဒော, တသ္မာ သတ္တာ လောကေ သာရဇ္ဇန္တိ။ နော စေဒံ, ဘိက္ခဝေ, လောကေ အာဒီနဝော အဘဝိသ္သ, နယိဒံ သတ္တာ လောကေ နိဗ္ဗိန္ဒေယ္ယုံ။ ယသ္မာ စ ခော, ဘိက္ခဝေ, အတ္ထိ လောကေ အာဒီနဝော, တသ္မာ သတ္တာ လောကေ နိဗ္ဗိန္ဒန္တိ။ နော စေဒံ, ဘိက္ခဝေ, လောကေ နိသ္သရဏံ အဘဝိသ္သ, နယိဒံ သတ္တာ လောကမ္ဟာ 2 နိသ္သရေယ္ယုံ။ ယသ္မာ စ ခော, ဘိက္ခဝေ, အတ္ထိ လောကေ နိသ္သရဏံ, တသ္မာ သတ္တာ လောကမ္ဟာ နိသ္သရန္တိ။ ယာဝကီဝဉ္စ, ဘိက္ခဝေ, သတ္တာ လောကသ္သ အသ္သာဒဉ္စ အသ္သာဒတော အာဒီနဝဉ္စ အာဒီနဝတော နိသ္သရဏဉ္စ နိသ္သရဏတော ယထာဘူတံ နာဗ္ဘညာသုံ 3, နေဝ တာဝ, ဘိက္ခဝေ, သတ္တာ သဒေဝကာ လောကာ သမာရကာ သဗ္ရဟ္မကာ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ နိသ္သဋာ ဝိသံယုတ္တာ ဝိပ္ပမုတ္တာ 4 ဝိမရိယာဒီကတေန 5 စေတသာ ဝိဟရိံသု။ ယတော စ ခော, ဘိက္ခဝေ, သတ္တာ လောကသ္သ အသ္သာဒဉ္စ အသ္သာဒတော အာဒီနဝဉ္စ အာဒီနဝတော နိသ္သရဏဉ္စ နိသ္သရဏတော ယထာဘူတံ အဗ္ဘညာသုံ, အထ, ဘိက္ခဝေ, သတ္တာ သဒေဝကာ လောကာ သမာရကာ သဗ္ရဟ္မကာ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ နိသ္သဋာ ဝိသံယုတ္တာ ဝိပ္ပမုတ္တာ ဝိမရိယာဒီကတေန စေတသာ ဝိဟရန္တီ’’တိ။ တတိယံ။
106. ‘‘No cedaṃ 6, bhikkhave, loke assādo abhavissa, nayidaṃ sattā loke sārajjeyyuṃ. Yasmā ca kho, bhikkhave, atthi loke assādo, tasmā sattā loke sārajjanti. No cedaṃ, bhikkhave, loke ādīnavo abhavissa, nayidaṃ sattā loke nibbindeyyuṃ. Yasmā ca kho, bhikkhave, atthi loke ādīnavo, tasmā sattā loke nibbindanti. No cedaṃ, bhikkhave, loke nissaraṇaṃ abhavissa, nayidaṃ sattā lokamhā 7 nissareyyuṃ. Yasmā ca kho, bhikkhave, atthi loke nissaraṇaṃ, tasmā sattā lokamhā nissaranti. Yāvakīvañca, bhikkhave, sattā lokassa assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññāsuṃ 8, neva tāva, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā 9 vimariyādīkatena 10 cetasā vihariṃsu. Yato ca kho, bhikkhave, sattā lokassa assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññāsuṃ, atha, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā vimariyādīkatena cetasā viharantī’’ti. Tatiyaṃ.
Footnotes:
Related texts:
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၃. ပုဗ္ဗေဝသမ္ဗောဓသုတ္တာဒိဝဏ္ဏနာ • 1-3. Pubbevasambodhasuttādivaṇṇanā
