Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

༣. དུཏིཡཨསྶཱདསུཏྟཾ

3. Dutiyaassādasuttaṃ

༡༠༦. ‘‘ནོ ཙེདཾ ¹, བྷིཀྑཝེ, ལོཀེ ཨསྶཱདོ ཨབྷཝིསྶ, ནཡིདཾ སཏྟཱ ལོཀེ སཱརཛྫེཡྻུཾ། ཡསྨཱ ཙ ཁོ, བྷིཀྑཝེ, ཨཏྠི ལོཀེ ཨསྶཱདོ, ཏསྨཱ སཏྟཱ ལོཀེ སཱརཛྫནྟི། ནོ ཙེདཾ, བྷིཀྑཝེ, ལོཀེ ཨཱདཱིནཝོ ཨབྷཝིསྶ, ནཡིདཾ སཏྟཱ ལོཀེ ནིབྦིནྡེཡྻུཾ། ཡསྨཱ ཙ ཁོ, བྷིཀྑཝེ, ཨཏྠི ལོཀེ ཨཱདཱིནཝོ, ཏསྨཱ སཏྟཱ ལོཀེ ནིབྦིནྡནྟི། ནོ ཙེདཾ, བྷིཀྑཝེ, ལོཀེ ནིསྶརཎཾ ཨབྷཝིསྶ, ནཡིདཾ སཏྟཱ ལོཀམྷཱ ² ནིསྶརེཡྻུཾ། ཡསྨཱ ཙ ཁོ, བྷིཀྑཝེ, ཨཏྠི ལོཀེ ནིསྶརཎཾ, ཏསྨཱ སཏྟཱ ལོཀམྷཱ ནིསྶརནྟི། ཡཱཝཀཱིཝཉྩ, བྷིཀྑཝེ, སཏྟཱ ལོཀསྶ ཨསྶཱདཉྩ ཨསྶཱདཏོ ཨཱདཱིནཝཉྩ ཨཱདཱིནཝཏོ ནིསྶརཎཉྩ ནིསྶརཎཏོ ཡཐཱབྷཱུཏཾ ནཱབྦྷཉྙཱསུཾ ³, ནེཝ ཏཱཝ, བྷིཀྑཝེ, སཏྟཱ སདེཝཀཱ ལོཀཱ སམཱརཀཱ སབྲཧྨཀཱ སསྶམཎབྲཱཧྨཎིཡཱ པཛཱཡ སདེཝམནུསྶཱཡ ནིསྶཊཱ ཝིསཾཡུཏྟཱ ཝིཔྤམུཏྟཱ ⁴ ཝིམརིཡཱདཱིཀཏེན ⁵ ཙེཏསཱ ཝིཧརིཾསུ། ཡཏོ ཙ ཁོ, བྷིཀྑཝེ, སཏྟཱ ལོཀསྶ ཨསྶཱདཉྩ ཨསྶཱདཏོ ཨཱདཱིནཝཉྩ ཨཱདཱིནཝཏོ ནིསྶརཎཉྩ ནིསྶརཎཏོ ཡཐཱབྷཱུཏཾ ཨབྦྷཉྙཱསུཾ, ཨཐ, བྷིཀྑཝེ, སཏྟཱ སདེཝཀཱ ལོཀཱ སམཱརཀཱ སབྲཧྨཀཱ སསྶམཎབྲཱཧྨཎིཡཱ པཛཱཡ སདེཝམནུསྶཱཡ ནིསྶཊཱ ཝིསཾཡུཏྟཱ ཝིཔྤམུཏྟཱ ཝིམརིཡཱདཱིཀཏེན ཙེཏསཱ ཝིཧརནྟཱི’’ཏི། ཏཏིཡཾ།

106. ‘‘No cedaṃ ⁶, bhikkhave, loke assādo abhavissa, nayidaṃ sattā loke sārajjeyyuṃ. Yasmā ca kho, bhikkhave, atthi loke assādo, tasmā sattā loke sārajjanti. No cedaṃ, bhikkhave, loke ādīnavo abhavissa, nayidaṃ sattā loke nibbindeyyuṃ. Yasmā ca kho, bhikkhave, atthi loke ādīnavo, tasmā sattā loke nibbindanti. No cedaṃ, bhikkhave, loke nissaraṇaṃ abhavissa, nayidaṃ sattā lokamhā ⁷ nissareyyuṃ. Yasmā ca kho, bhikkhave, atthi loke nissaraṇaṃ, tasmā sattā lokamhā nissaranti. Yāvakīvañca, bhikkhave, sattā lokassa assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññāsuṃ ⁸, neva tāva, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā ⁹ vimariyādīkatena ¹⁰ cetasā vihariṃsu. Yato ca kho, bhikkhave, sattā lokassa assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññāsuṃ, atha, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā vimariyādīkatena cetasā viharantī’’ti. Tatiyaṃ.

Next: ༤. སམཎབྲཱཧྨཎསུཏྟཾ • 4. Samaṇabrāhmaṇasuttaṃ

Footnotes:

1. ནོ ཙེཏཾ (སྱཱ॰ ཀཾ॰ པཱི॰ ཀ॰) སཾ॰ ནི॰ ༣.༢༨ པསྶིཏབྦཾ

2. ལོཀེ (ཀ॰)

3. ནཱབྦྷཉྙཾསུ (སཾ॰ ནི॰ ༣.༢༨

4. ཝིཔྤཡུཏྟཱ (ཀ॰)

5. ཝིམརིཡཱདིཀཏེན (སཱི॰ པཱི॰ ཀ॰)

6. no cetaṃ (syā. kaṃ. pī. ka.) saṃ. ni. 3.28 passitabbaṃ

7. loke (ka.)

8. nābbhaññaṃsu (saṃ. ni. 3.28

9. vippayuttā (ka.)

10. vimariyādikatena (sī. pī. ka.)

Related texts:

ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༣. པུབྦེཝསམྦོདྷསུཏྟཱདིཝཎྞནཱ • 1-3. Pubbevasambodhasuttādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact