| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၂. ဒုတိယအသ္သုတဝာသုတ္တဝဏ္ဏနာ
2. Dutiyaassutavāsuttavaṇṇanā
၆၂. ဒုတိယေ သုခဝေဒနိယန္တိ သုခဝေဒနာယ ပစ္စယံ။ ဖသ္သန္တိ စက္ခုသမ္ဖသ္သာဒိံ။ နနု စ စက္ခုသမ္ဖသ္သော သုခဝေဒနာယ ပစ္စယော န ဟောတီတိ? သဟဇာတပစ္စယေန န ဟောတိ, ဥပနိသ္သယပစ္စယေန ပန ဇဝနဝေဒနာယ ဟောတိ , တံ သန္ဓာယေတံ ဝုတ္တံ။ သောတသမ္ဖသ္သာဒီသုပိ ဧသေဝ နယော။ တဇ္ဇန္တိ တဇ္ဇာတိကံ တသ္သာရုပ္ပံ, တသ္သ ဖသ္သသ္သ အနုရူပန္တိ အတ္ထော။ ဒုက္ခဝေဒနိယန္တိအာဒိ ဝုတ္တနယေနေဝ ဝေဒိတဗ္ဗံ။ သင္ဃဋ္ဋနသမောဓာနာတိ သင္ဃဋ္ဋနေန စေဝ သမောဓာနေန စ, သင္ဃဋ္ဋနသမ္ပိဏ္ဍနေနာတိ အတ္ထော။ ဥသ္မာတိ ဥဏ္ဟာကာရော။ တေဇော အဘိနိဗ္ဗတ္တတီတိ အဂ္ဂိစုဏ္ဏော နိက္ခမတီတိ န ဂဟေတဗ္ဗံ, ဥသ္မာကာရသ္သေဝ ပန ဧတံ ဝေဝစနံ။ တတ္ထ ဒ္ဝိန္နံ ကဋ္ဌာနန္တိ ဒ္ဝိန္နံ အရဏီနံ။ တတ္ထ အဓောအရဏီ ဝိယ ဝတ္ထု, ဥတ္တရာရဏီ ဝိယ အာရမ္မဏံ, သင္ဃဋ္ဋနံ ဝိယ ဖသ္သော, ဥသ္မာဓာတု ဝိယ ဝေဒနာ။ ဒုတိယံ။
62. Dutiye sukhavedaniyanti sukhavedanāya paccayaṃ. Phassanti cakkhusamphassādiṃ. Nanu ca cakkhusamphasso sukhavedanāya paccayo na hotīti? Sahajātapaccayena na hoti, upanissayapaccayena pana javanavedanāya hoti , taṃ sandhāyetaṃ vuttaṃ. Sotasamphassādīsupi eseva nayo. Tajjanti tajjātikaṃ tassāruppaṃ, tassa phassassa anurūpanti attho. Dukkhavedaniyantiādi vuttanayeneva veditabbaṃ. Saṅghaṭṭanasamodhānāti saṅghaṭṭanena ceva samodhānena ca, saṅghaṭṭanasampiṇḍanenāti attho. Usmāti uṇhākāro. Tejo abhinibbattatīti aggicuṇṇo nikkhamatīti na gahetabbaṃ, usmākārasseva pana etaṃ vevacanaṃ. Tattha dvinnaṃ kaṭṭhānanti dvinnaṃ araṇīnaṃ. Tattha adhoaraṇī viya vatthu, uttarāraṇī viya ārammaṇaṃ, saṅghaṭṭanaṃ viya phasso, usmādhātu viya vedanā. Dutiyaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. ဒုတိယအသ္သုတဝာသုတ္တံ • 2. Dutiyaassutavāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. ဒုတိယအသ္သုတဝာသုတ္တဝဏ္ဏနာ • 2. Dutiyaassutavāsuttavaṇṇanā
