| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. දුතියඅවිජ්‌ජාපහානසුත්‌තං
7. Dutiyaavijjāpahānasuttaṃ
80. අථ ඛො අඤ්‌ඤතරො භික්‌ඛු…පෙ.… එතදවොච – ‘‘අත්‌ථි නු ඛො, භන්‌තෙ, එකො ධම්‌මො යස්‌ස පහානා භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති?
80. Atha kho aññataro bhikkhu…pe… etadavoca – ‘‘atthi nu kho, bhante, eko dhammo yassa pahānā bhikkhuno avijjā pahīyati, vijjā uppajjatī’’ti?
‘‘අත්‌ථි ඛො, භික්‌ඛු, එකො ධම්‌මො යස්‌ස පහානා භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති.
‘‘Atthi kho, bhikkhu, eko dhammo yassa pahānā bhikkhuno avijjā pahīyati, vijjā uppajjatī’’ti.
‘‘කතමො පන, භන්‌තෙ, එකො ධම්‌මො යස්‌ස පහානා භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති?
‘‘Katamo pana, bhante, eko dhammo yassa pahānā bhikkhuno avijjā pahīyati, vijjā uppajjatī’’ti?
‘‘අවිජ්‌ජා ඛො, භික්‌ඛු, එකො ධම්‌මො යස්‌ස පහානා භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති.
‘‘Avijjā kho, bhikkhu, eko dhammo yassa pahānā bhikkhuno avijjā pahīyati, vijjā uppajjatī’’ti.
‘‘කථං පන, භන්‌තෙ, ජානතො, කථං පස්‌සතො අවිජ්‌ජා පහීයති, විජ්‌ජා උප්‌පජ්‌ජතී’’ති?
‘‘Kathaṃ pana, bhante, jānato, kathaṃ passato avijjā pahīyati, vijjā uppajjatī’’ti?
‘‘ඉධ, භික්‌ඛු, භික්‌ඛුනො සුතං හොති – ‘සබ්‌බෙ ධම්‌මා නාලං අභිනිවෙසායා’ති. එවඤ්‌චෙතං, භික්‌ඛු, භික්‌ඛුනො සුතං හොති – ‘සබ්‌බෙ ධම්‌මා නාලං අභිනිවෙසායා’ති. සො සබ්‌බං ධම්‌මං අභිජානාති, සබ්‌බං ධම්‌මං අභිඤ්‌ඤාය සබ්‌බං ධම්‌මං පරිජානාති, සබ්‌බං ධම්‌මං පරිඤ්‌ඤාය සබ්‌බනිමිත්‌තානි අඤ්‌ඤතො පස්‌සති, චක්‌ඛුං අඤ්‌ඤතො පස්‌සති , රූපෙ… චක්‌ඛුවිඤ්‌ඤාණං… චක්‌ඛුසම්‌ඵස්‌සං… යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අඤ්‌ඤතො පස්‌සති…පෙ.… මනං අඤ්‌ඤතො පස්‌සති, ධම්‌මෙ… මනොවිඤ්‌ඤාණං… මනොසම්‌ඵස්‌සං… යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අඤ්‌ඤතො පස්‌සති. එවං ඛො, භික්‌ඛු, ජානතො එවං පස්‌සතො භික්‌ඛුනො අවිජ්‌ජා පහීයති, විජ්‌ජා උප්‌පජ්‌ජතී’’ති. සත්‌තමං.
‘‘Idha, bhikkhu, bhikkhuno sutaṃ hoti – ‘sabbe dhammā nālaṃ abhinivesāyā’ti. Evañcetaṃ, bhikkhu, bhikkhuno sutaṃ hoti – ‘sabbe dhammā nālaṃ abhinivesāyā’ti. So sabbaṃ dhammaṃ abhijānāti, sabbaṃ dhammaṃ abhiññāya sabbaṃ dhammaṃ parijānāti, sabbaṃ dhammaṃ pariññāya sabbanimittāni aññato passati, cakkhuṃ aññato passati , rūpe… cakkhuviññāṇaṃ… cakkhusamphassaṃ… yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aññato passati…pe… manaṃ aññato passati, dhamme… manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aññato passati. Evaṃ kho, bhikkhu, jānato evaṃ passato bhikkhuno avijjā pahīyati, vijjā uppajjatī’’ti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. දුතියඅවිජ්‌ජාපහානසුත්‌තවණ්‌ණනා • 7. Dutiyaavijjāpahānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. දුතියඅවිජ්‌ජාපහානසුත්‌තවණ්‌ණනා • 7. Dutiyaavijjāpahānasuttavaṇṇanā
