| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१०. दुतियआयुसुत्तं
10. Dutiyaāyusuttaṃ
१४६. एवं मे सुतं – एकं समयं भगवा राजगहे विहरति वेळुवने कलन्दकनिवापे। तत्र खो भगवा…पे॰… एतदवोच –
146. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tatra kho bhagavā…pe… etadavoca –
‘‘अप्पमिदं, भिक्खवे, मनुस्सानं आयु। गमनीयो सम्परायो, कत्तब्बं कुसलं, चरितब्बं ब्रह्मचरियं। नत्थि जातस्स अमरणं। यो, भिक्खवे, चिरं जीवति, सो वस्ससतं अप्पं वा भिय्यो’’ति।
‘‘Appamidaṃ, bhikkhave, manussānaṃ āyu. Gamanīyo samparāyo, kattabbaṃ kusalaṃ, caritabbaṃ brahmacariyaṃ. Natthi jātassa amaraṇaṃ. Yo, bhikkhave, ciraṃ jīvati, so vassasataṃ appaṃ vā bhiyyo’’ti.
अथ खो मारो पापिमा येन भगवा तेनुपसङ्कमि; उपसङ्कमित्वा भगवन्तं गाथाय अज्झभासि –
Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘नाच्चयन्ति अहोरत्ता, जीवितं नूपरुज्झति।
‘‘Nāccayanti ahorattā, jīvitaṃ nūparujjhati;
आयु अनुपरियायति, मच्चानं नेमीव रथकुब्बर’’न्ति॥
Āyu anupariyāyati, maccānaṃ nemīva rathakubbara’’nti.
‘‘अच्चयन्ति अहोरत्ता, जीवितं उपरुज्झति।
‘‘Accayanti ahorattā, jīvitaṃ uparujjhati;
आयु खीयति मच्चानं, कुन्नदीनंव ओदक’’न्ति॥
Āyu khīyati maccānaṃ, kunnadīnaṃva odaka’’nti.
अथ खो मारो पापिमा ‘‘जानाति मं भगवा, जानाति मं सुगतो’’ति दुक्खी दुम्मनो तत्थेवन्तरधायीति।
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
पठमो वग्गो।
Paṭhamo vaggo.
तस्सुद्दानं –
Tassuddānaṃ –
तपोकम्मञ्च नागो च, सुभं पासेन ते दुवे।
Tapokammañca nāgo ca, subhaṃ pāsena te duve;
सप्पो सुपति नन्दनं, आयुना अपरे दुवेति॥
Sappo supati nandanaṃ, āyunā apare duveti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १०. दुतियआयुसुत्तवण्णना • 10. Dutiyaāyusuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १०. दुतियआयुसुत्तवण्णना • 10. Dutiyaāyusuttavaṇṇanā
