| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. দুতিযবাহিরফস্সনানত্তসুত্তং
10. Dutiyabāhiraphassanānattasuttaṃ
৯৪. সাৰত্থিযং ৰিহরতি…পে॰… ‘‘ধাতুনানত্তং, ভিক্খৰে, পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং , ফস্স… ৰেদনা… ছন্দ… পরিল়াহ… পরিযেসনানানত্তং পটিচ্চ উপ্পজ্জতি লাভনানত্তং; নো লাভনানত্তং পটিচ্চ উপ্পজ্জতি পরিযেসনানানত্তং, নো পরিযেসনানানত্তং পটিচ্চ উপ্পজ্জতি পরিল়াহনানত্তং, নো পরিল়াহনানত্তং পটিচ্চ উপ্পজ্জতি…পে॰… ছন্দ… ৰেদনা… ফস্স… সঙ্কপ্প… সঞ্ঞানানত্তং , নো সঞ্ঞানানত্তং পটিচ্চ উপ্পজ্জতি ধাতুনানত্তং। কতমঞ্চ, ভিক্খৰে, ধাতুনানত্তং? রূপধাতু…পে॰… ধম্মধাতু – ইদং ৰুচ্চতি, ভিক্খৰে, ধাতুনানত্তং’’।
94. Sāvatthiyaṃ viharati…pe… ‘‘dhātunānattaṃ, bhikkhave, paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ , phassa… vedanā… chanda… pariḷāha… pariyesanānānattaṃ paṭicca uppajjati lābhanānattaṃ; no lābhanānattaṃ paṭicca uppajjati pariyesanānānattaṃ, no pariyesanānānattaṃ paṭicca uppajjati pariḷāhanānattaṃ, no pariḷāhanānattaṃ paṭicca uppajjati…pe… chanda… vedanā… phassa… saṅkappa… saññānānattaṃ , no saññānānattaṃ paṭicca uppajjati dhātunānattaṃ. Katamañca, bhikkhave, dhātunānattaṃ? Rūpadhātu…pe… dhammadhātu – idaṃ vuccati, bhikkhave, dhātunānattaṃ’’.
‘‘কথঞ্চ, ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং? ফস্স… ৰেদনা… ছন্দ… পরিল়াহ… পরিযেসনা… লাভ… নো লাভনানত্তং পটিচ্চ উপ্পজ্জতি পরিযেসনানানত্তং, নো পরিযেসনানানত্তং পটিচ্চ উপ্পজ্জতি পরিল়াহ… ছন্দ… ৰেদনা… ফস্স… নো সঙ্কপ্পনানত্তং পটিচ্চ উপ্পজ্জতি সঞ্ঞানানত্তং, নো সঞ্ঞানানত্তং পটিচ্চ উপ্পজ্জতি ধাতুনানত্তং?
‘‘Kathañca, bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ? Phassa… vedanā… chanda… pariḷāha… pariyesanā… lābha… no lābhanānattaṃ paṭicca uppajjati pariyesanānānattaṃ, no pariyesanānānattaṃ paṭicca uppajjati pariḷāha… chanda… vedanā… phassa… no saṅkappanānattaṃ paṭicca uppajjati saññānānattaṃ, no saññānānattaṃ paṭicca uppajjati dhātunānattaṃ?
‘‘রূপধাতুং, ভিক্খৰে, পটিচ্চ উপ্পজ্জতি রূপসঞ্ঞা…পে॰… ধম্মধাতুং পটিচ্চ উপ্পজ্জতি ধম্মসঞ্ঞা, ধম্মসঞ্ঞং পটিচ্চ উপ্পজ্জতি…পে॰… ধম্মপরিযেসনা, ধম্মপরিযেসনং পটিচ্চ উপ্পজ্জতি ধম্মলাভো; নো ধম্মলাভং পটিচ্চ উপ্পজ্জতি ধম্মপরিযেসনা, নো ধম্মপরিযেসনং পটিচ্চ উপ্পজ্জতি ধম্মপরিল়াহো , নো ধম্মপরিল়াহং পটিচ্চ উপ্পজ্জতি ধম্মচ্ছন্দো, নো ধম্মচ্ছন্দং পটিচ্চ উপ্পজ্জতি ধম্মসম্ফস্সজা ৰেদনা, নো ধম্মসম্ফস্সজং ৰেদনং পটিচ্চ উপ্পজ্জতি ধম্মসম্ফস্সো, নো ধম্মসম্ফস্সং পটিচ্চ উপ্পজ্জতি ধম্মসঙ্কপ্পো, নো ধম্মসঙ্কপ্পং পটিচ্চ উপ্পজ্জতি ধম্মসঞ্ঞা, নো ধম্মসঞ্ঞং পটিচ্চ উপ্পজ্জতি ধম্মধাতু।
‘‘Rūpadhātuṃ, bhikkhave, paṭicca uppajjati rūpasaññā…pe… dhammadhātuṃ paṭicca uppajjati dhammasaññā, dhammasaññaṃ paṭicca uppajjati…pe… dhammapariyesanā, dhammapariyesanaṃ paṭicca uppajjati dhammalābho; no dhammalābhaṃ paṭicca uppajjati dhammapariyesanā, no dhammapariyesanaṃ paṭicca uppajjati dhammapariḷāho , no dhammapariḷāhaṃ paṭicca uppajjati dhammacchando, no dhammacchandaṃ paṭicca uppajjati dhammasamphassajā vedanā, no dhammasamphassajaṃ vedanaṃ paṭicca uppajjati dhammasamphasso, no dhammasamphassaṃ paṭicca uppajjati dhammasaṅkappo, no dhammasaṅkappaṃ paṭicca uppajjati dhammasaññā, no dhammasaññaṃ paṭicca uppajjati dhammadhātu.
‘‘এৰং খো, ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি…পে॰… সঙ্কপ্প… ফস্স… ৰেদনা… ছন্দ… পরিল়াহ… পরিযেসনা… লাভ… নো লাভনানত্তং পটিচ্চ উপ্পজ্জতি পরিযেসনানানত্তং, নো পরিযেসনানানত্তং পটিচ্চ উপ্পজ্জতি পরিল়াহনানত্তং, নো পরিল়াহনানত্তং পটিচ্চ উপ্পজ্জতি ছন্দনানত্তং, নো ছন্দনানত্তং পটিচ্চ উপ্পজ্জতি ৰেদনানানত্তং, নো ৰেদনানানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি সঙ্কপ্পনানত্তং, নো সঙ্কপ্পনানত্তং পটিচ্চ উপ্পজ্জতি সঞ্ঞানানত্তং, নো সঞ্ঞানানত্তং পটিচ্চ উপ্পজ্জতি ধাতুনানত্ত’’ন্তি। দসমং।
‘‘Evaṃ kho, bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati…pe… saṅkappa… phassa… vedanā… chanda… pariḷāha… pariyesanā… lābha… no lābhanānattaṃ paṭicca uppajjati pariyesanānānattaṃ, no pariyesanānānattaṃ paṭicca uppajjati pariḷāhanānattaṃ, no pariḷāhanānattaṃ paṭicca uppajjati chandanānattaṃ, no chandanānattaṃ paṭicca uppajjati vedanānānattaṃ, no vedanānānattaṃ paṭicca uppajjati phassanānattaṃ, no phassanānattaṃ paṭicca uppajjati saṅkappanānattaṃ, no saṅkappanānattaṃ paṭicca uppajjati saññānānattaṃ, no saññānānattaṃ paṭicca uppajjati dhātunānatta’’nti. Dasamaṃ.
নানত্তৰগ্গো পঠমো।
Nānattavaggo paṭhamo.
তস্সুদ্দানং –
Tassuddānaṃ –
ধাতুফস্সঞ্চ নো চেতং, ৰেদনা অপরে দুৰে।
Dhātuphassañca no cetaṃ, vedanā apare duve;
এতং অজ্ঝত্তপঞ্চকং, ধাতুসঞ্ঞঞ্চ নো চেতং।
Etaṃ ajjhattapañcakaṃ, dhātusaññañca no cetaṃ;
ফস্সস্স অপরে দুৰে, এতং বাহিরপঞ্চকন্তি॥
Phassassa apare duve, etaṃ bāhirapañcakanti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. বাহিরফস্সনানত্তসুত্তাদিৰণ্ণনা • 9. Bāhiraphassanānattasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. বাহিরফস্সনানত্তসুত্তাদিৰণ্ণনা • 9. Bāhiraphassanānattasuttādivaṇṇanā
