| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៨. ទុតិយពលសុត្តវណ្ណនា
8. Dutiyabalasuttavaṇṇanā
២៨. អដ្ឋមេ ពលានីតិ ញាណពលានិ។ អាសវានំ ខយំ បដិជានាតីតិ អរហត្តំ បដិជានាតិ។ អនិច្ចតោតិ ហុត្វា អភាវាការេន។ យថាភូតន្តិ យថាសភាវតោ។ សម្មប្បញ្ញាយាតិ សហវិបស្សនាយ មគ្គបញ្ញាយ។ អង្គារកាសូបមាតិ សន្តាបនដ្ឋេន អង្គារកាសុយា ឧបមិតា ឥមេ កាមាតិ។ វិវេកនិន្នន្តិ ផលសមាបត្តិវសេន និព្ពាននិន្នំ។ វិវេកដ្ឋន្តិ កិលេសេហិ វជ្ជិតំ ទូរីភូតំ វា។ នេក្ខម្មាភិរតន្តិ បព្ពជ្ជាភិរតំ។ ព្យន្តិភូតន្តិ វិគតន្តភូតំ ឯកទេសេនាបិ អនល្លីនំ វិសំយុត្តំ វិសំសដ្ឋំ។ អាសវដ្ឋានិយេហីតិ សម្បយោគវសេន អាសវានំ ការណភូតេហិ, កិលេសធម្មេហីតិ អត្ថោ។ អថ វា ព្យន្តិភូតន្តិ វិគតវាយន្តិ អត្ថោ។ កុតោ? សព្ពសោ អាសវដ្ឋានិយេហិ ធម្មេហិ, សព្ពេហិ តេភូមកធម្មេហីតិ អត្ថោ។ ឥមស្មិំ សុត្តេ អរិយមគ្គោ លោកិយលោកុត្តរោ កថិតោ។
28. Aṭṭhame balānīti ñāṇabalāni. Āsavānaṃ khayaṃ paṭijānātīti arahattaṃ paṭijānāti. Aniccatoti hutvā abhāvākārena. Yathābhūtanti yathāsabhāvato. Sammappaññāyāti sahavipassanāya maggapaññāya. Aṅgārakāsūpamāti santāpanaṭṭhena aṅgārakāsuyā upamitā ime kāmāti. Vivekaninnanti phalasamāpattivasena nibbānaninnaṃ. Vivekaṭṭhanti kilesehi vajjitaṃ dūrībhūtaṃ vā. Nekkhammābhiratanti pabbajjābhirataṃ. Byantibhūtanti vigatantabhūtaṃ ekadesenāpi anallīnaṃ visaṃyuttaṃ visaṃsaṭṭhaṃ. Āsavaṭṭhāniyehīti sampayogavasena āsavānaṃ kāraṇabhūtehi, kilesadhammehīti attho. Atha vā byantibhūtanti vigatavāyanti attho. Kuto? Sabbaso āsavaṭṭhāniyehi dhammehi, sabbehi tebhūmakadhammehīti attho. Imasmiṃ sutte ariyamaggo lokiyalokuttaro kathito.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៨. ទុតិយពលសុត្តំ • 8. Dutiyabalasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៨. ទុតិយពលសុត្តវណ្ណនា • 8. Dutiyabalasuttavaṇṇanā
