| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
2. து³தியபா⁴ணவாரோ
2. Dutiyabhāṇavāro
411. அத² கோ² ப⁴க³வா வேஸாலியங் யதா²பி⁴ரந்தங் விஹரித்வா யேன ஸாவத்தி² தேன சாரிகங் பக்காமி. அனுபுப்³பே³ன சாரிகங் சரமானோ யேன ஸாவத்தி² தத³வஸரி. தத்ர ஸுத³ங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே . தேன கோ² பன ஸமயேன ச²ப்³ப³க்³கி³யா பி⁴க்கூ² பி⁴க்கு²னியோ கத்³த³மோத³கேன ஓஸிஞ்சந்தி – அப்பேவ நாம அம்ஹேஸு ஸாரஜ்ஜெய்யுந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னா பி⁴க்கு²னியோ கத்³த³மோத³கேன ஓஸிஞ்சிதப்³பா³. யோ ஓஸிஞ்செய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, தஸ்ஸ பி⁴க்கு²னோ த³ண்ட³கம்மங் காது’’ந்தி. அத² கோ² பி⁴க்கூ²னங் ஏதத³ஹோஸி – ‘‘கிங் நு கோ² த³ண்ட³கம்மங் காதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். ‘‘அவந்தி³யோ ஸோ, பி⁴க்க²வே, பி⁴க்கு² பி⁴க்கு²னிஸங்கே⁴ன காதப்³போ³’’தி.
411. Atha kho bhagavā vesāliyaṃ yathābhirantaṃ viharitvā yena sāvatthi tena cārikaṃ pakkāmi. Anupubbena cārikaṃ caramāno yena sāvatthi tadavasari. Tatra sudaṃ bhagavā sāvatthiyaṃ viharati jetavane anāthapiṇḍikassa ārāme . Tena kho pana samayena chabbaggiyā bhikkhū bhikkhuniyo kaddamodakena osiñcanti – appeva nāma amhesu sārajjeyyunti. Bhagavato etamatthaṃ ārocesuṃ. ‘‘Na, bhikkhave, bhikkhunā bhikkhuniyo kaddamodakena osiñcitabbā. Yo osiñceyya, āpatti dukkaṭassa. Anujānāmi, bhikkhave, tassa bhikkhuno daṇḍakammaṃ kātu’’nti. Atha kho bhikkhūnaṃ etadahosi – ‘‘kiṃ nu kho daṇḍakammaṃ kātabba’’nti? Bhagavato etamatthaṃ ārocesuṃ. ‘‘Avandiyo so, bhikkhave, bhikkhu bhikkhunisaṅghena kātabbo’’ti.
தேன கோ² பன ஸமயேன ச²ப்³ப³க்³கி³யா பி⁴க்கூ² காயங் விவரித்வா பி⁴க்கு²னீனங் த³ஸ்ஸெந்தி …பே॰… ஊருங் விவரித்வா பி⁴க்கு²னீனங் த³ஸ்ஸெந்தி, அங்க³ஜாதங் விவரித்வா பி⁴க்கு²னீனங் த³ஸ்ஸெந்தி, பி⁴க்கு²னியோ ஓபா⁴ஸெந்தி, பி⁴க்கு²னீஹி ஸத்³தி⁴ங் ஸம்பயோஜெந்தி – அப்பேவ நாம அம்ஹேஸு ஸாரஜ்ஜெய்யுந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னா காயோ விவரித்வா பி⁴க்கு²னீனங் த³ஸ்ஸேதப்³போ³, ந ஊரு விவரித்வா பி⁴க்கு²னீனங் த³ஸ்ஸேதப்³போ³, ந அங்க³ஜாதங் விவரித்வா பி⁴க்கு²னீனங் த³ஸ்ஸேதப்³ப³ங், ந பி⁴க்கு²னியோ ஓபா⁴ஸிதப்³பா³, ந பி⁴க்கு²னீஹி ஸத்³தி⁴ங் ஸம்பயோஜேதப்³ப³ங். யோ ஸம்பயோஜெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, தஸ்ஸ பி⁴க்கு²னோ த³ண்ட³கம்மங் காது’’ந்தி. அத² கோ² பி⁴க்கூ²னங் ஏதத³ஹோஸி – ‘‘கிங் நு கோ² த³ண்ட³கம்மங் காதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். ‘‘அவந்தி³யோ ஸோ, பி⁴க்க²வே, பி⁴க்கு² பி⁴க்கு²னிஸங்கே⁴ன காதப்³போ³’’தி.
Tena kho pana samayena chabbaggiyā bhikkhū kāyaṃ vivaritvā bhikkhunīnaṃ dassenti …pe… ūruṃ vivaritvā bhikkhunīnaṃ dassenti, aṅgajātaṃ vivaritvā bhikkhunīnaṃ dassenti, bhikkhuniyo obhāsenti, bhikkhunīhi saddhiṃ sampayojenti – appeva nāma amhesu sārajjeyyunti. Bhagavato etamatthaṃ ārocesuṃ. ‘‘Na, bhikkhave, bhikkhunā kāyo vivaritvā bhikkhunīnaṃ dassetabbo, na ūru vivaritvā bhikkhunīnaṃ dassetabbo, na aṅgajātaṃ vivaritvā bhikkhunīnaṃ dassetabbaṃ, na bhikkhuniyo obhāsitabbā, na bhikkhunīhi saddhiṃ sampayojetabbaṃ. Yo sampayojeyya, āpatti dukkaṭassa. Anujānāmi, bhikkhave, tassa bhikkhuno daṇḍakammaṃ kātu’’nti. Atha kho bhikkhūnaṃ etadahosi – ‘‘kiṃ nu kho daṇḍakammaṃ kātabba’’nti? Bhagavato etamatthaṃ ārocesuṃ. ‘‘Avandiyo so, bhikkhave, bhikkhu bhikkhunisaṅghena kātabbo’’ti.
தேன கோ² பன ஸமயேன ச²ப்³ப³க்³கி³யா பி⁴க்கு²னியோ பி⁴க்கு²ங் கத்³த³மோத³கேன ஓஸிஞ்சந்தி – அப்பேவ நாம அம்ஹேஸு ஸாரஜ்ஜெய்யுந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா பி⁴க்கு² கத்³த³மோத³கேன ஓஸிஞ்சிதப்³போ³. யா ஓஸிஞ்செய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, தஸ்ஸா பி⁴க்கு²னியா த³ண்ட³கம்மங் காது’’ந்தி. அத² கோ² பி⁴க்கூ²னங் ஏதத³ஹோஸி – ‘‘கிங் நு கோ² த³ண்ட³கம்மங் காதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். ‘‘அனுஜானாமி பி⁴க்க²வே, ஆவரணங் காது’’ந்தி. ஆவரணே கதே ந ஆதி³யந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஓவாத³ங் ட²பேது’’ந்தி.
Tena kho pana samayena chabbaggiyā bhikkhuniyo bhikkhuṃ kaddamodakena osiñcanti – appeva nāma amhesu sārajjeyyunti. Bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhu kaddamodakena osiñcitabbo. Yā osiñceyya, āpatti dukkaṭassa. Anujānāmi, bhikkhave, tassā bhikkhuniyā daṇḍakammaṃ kātu’’nti. Atha kho bhikkhūnaṃ etadahosi – ‘‘kiṃ nu kho daṇḍakammaṃ kātabba’’nti? Bhagavato etamatthaṃ ārocesuṃ. ‘‘Anujānāmi bhikkhave, āvaraṇaṃ kātu’’nti. Āvaraṇe kate na ādiyanti. Bhagavato etamatthaṃ ārocesuṃ. ‘‘Anujānāmi, bhikkhave, ovādaṃ ṭhapetu’’nti.
தேன கோ² பன ஸமயேன ச²ப்³ப³க்³கி³யா பி⁴க்கு²னியோ காயங் விவரித்வா பி⁴க்கூ²னங் த³ஸ்ஸெந்தி, த²னங் விவரித்வா பி⁴க்கூ²னங் த³ஸ்ஸெந்தி, ஊருங் விவரித்வா பி⁴க்கூ²னங் த³ஸ்ஸெந்தி, அங்க³ஜாதங் விவரித்வா பி⁴க்கூ²னங் த³ஸ்ஸெந்தி, பி⁴க்கூ² ஓபா⁴ஸெந்தி, பி⁴க்கூ²ஹி ஸத்³தி⁴ங் ஸம்பயோஜெந்தி – அப்பேவ நாம அம்ஹேஸு ஸாரஜ்ஜெய்யுந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா காயோ விவரித்வா பி⁴க்கூ²னங் த³ஸ்ஸேதப்³போ³…பே॰… ந த²னோ விவரித்வா பி⁴க்கூ²னங் த³ஸ்ஸேதப்³போ³, ந ஊரு விவரித்வா பி⁴க்கூ²னங் த³ஸ்ஸேதப்³போ³, ந அங்க³ஜாதங் விவரித்வா பி⁴க்கூ²னங் த³ஸ்ஸேதப்³ப³ங், ந பி⁴க்கூ² ஓபா⁴ஸிதப்³பா³, ந பி⁴க்கூ²ஹி ஸத்³தி⁴ங் ஸம்பயோஜேதப்³ப³ங். யா ஸம்பயோஜெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, தஸ்ஸா பி⁴க்கு²னியா த³ண்ட³கம்மங் காது’’ந்தி. அத² கோ² பி⁴க்கூ²னங் ஏதத³ஹோஸி – ‘‘கிங் நு கோ² த³ண்ட³கம்மங் காதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஆவரணங் காது’’ந்தி. ஆவரணே கதே ந ஆதி³யந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஓவாத³ங் ட²பேது’’ந்தி. அத² கோ² பி⁴க்கூ²னங் ஏதத³ஹோஸி – ‘‘கப்பதி நு கோ² ஓவாத³ட்ட²பிதாய 1 பி⁴க்கு²னியா ஸத்³தி⁴ங் உபோஸத²ங் காதுங், ந நு கோ² கப்பதீ’’தி? ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஓவாத³ட்ட²பிதாய பி⁴க்கு²னியா ஸத்³தி⁴ங் உபோஸதோ² காதப்³போ³, யாவ ந தங் அதி⁴கரணங் வூபஸந்தங் ஹோதீ’’தி.
Tena kho pana samayena chabbaggiyā bhikkhuniyo kāyaṃ vivaritvā bhikkhūnaṃ dassenti, thanaṃ vivaritvā bhikkhūnaṃ dassenti, ūruṃ vivaritvā bhikkhūnaṃ dassenti, aṅgajātaṃ vivaritvā bhikkhūnaṃ dassenti, bhikkhū obhāsenti, bhikkhūhi saddhiṃ sampayojenti – appeva nāma amhesu sārajjeyyunti. Bhagavato etamatthaṃ ārocesuṃ. ‘‘Na, bhikkhave, bhikkhuniyā kāyo vivaritvā bhikkhūnaṃ dassetabbo…pe… na thano vivaritvā bhikkhūnaṃ dassetabbo, na ūru vivaritvā bhikkhūnaṃ dassetabbo, na aṅgajātaṃ vivaritvā bhikkhūnaṃ dassetabbaṃ, na bhikkhū obhāsitabbā, na bhikkhūhi saddhiṃ sampayojetabbaṃ. Yā sampayojeyya, āpatti dukkaṭassa. Anujānāmi, bhikkhave, tassā bhikkhuniyā daṇḍakammaṃ kātu’’nti. Atha kho bhikkhūnaṃ etadahosi – ‘‘kiṃ nu kho daṇḍakammaṃ kātabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, āvaraṇaṃ kātu’’nti. Āvaraṇe kate na ādiyanti. Bhagavato etamatthaṃ ārocesuṃ. ‘‘Anujānāmi, bhikkhave, ovādaṃ ṭhapetu’’nti. Atha kho bhikkhūnaṃ etadahosi – ‘‘kappati nu kho ovādaṭṭhapitāya 2 bhikkhuniyā saddhiṃ uposathaṃ kātuṃ, na nu kho kappatī’’ti? Bhagavato etamatthaṃ ārocesuṃ. ‘‘Na, bhikkhave, ovādaṭṭhapitāya bhikkhuniyā saddhiṃ uposatho kātabbo, yāva na taṃ adhikaraṇaṃ vūpasantaṃ hotī’’ti.
412. தேன கோ² பன ஸமயேன ஆயஸ்மா உதா³யீ ஓவாத³ங் ட²பெத்வா சாரிகங் பக்காமி. பி⁴க்கு²னியோ உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யோ உதா³யீ ஓவாத³ங் ட²பெத்வா சாரிகங் பக்கமிஸ்ஸதீ’’தி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஓவாத³ங் ட²பெத்வா சாரிகா பக்கமிதப்³பா³. யோ பக்கமெய்ய, ஆபத்தி து³க்கடஸ்ஸா’’தி.
412. Tena kho pana samayena āyasmā udāyī ovādaṃ ṭhapetvā cārikaṃ pakkāmi. Bhikkhuniyo ujjhāyanti khiyyanti vipācenti – ‘‘kathañhi nāma ayyo udāyī ovādaṃ ṭhapetvā cārikaṃ pakkamissatī’’ti! Bhagavato etamatthaṃ ārocesuṃ. ‘‘Na, bhikkhave, ovādaṃ ṭhapetvā cārikā pakkamitabbā. Yo pakkameyya, āpatti dukkaṭassā’’ti.
தேன கோ² பன ஸமயேன 3 பா³லா அப்³யத்தா ஓவாத³ங் ட²பெந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பா³லேன அப்³யத்தேன ஓவாதோ³ ட²பேதப்³போ³. யோ ட²பெய்ய, ஆபத்தி து³க்கடஸ்ஸா’’தி.
Tena kho pana samayena 4 bālā abyattā ovādaṃ ṭhapenti. Bhagavato etamatthaṃ ārocesuṃ. ‘‘Na, bhikkhave, bālena abyattena ovādo ṭhapetabbo. Yo ṭhapeyya, āpatti dukkaṭassā’’ti.
தேன கோ² பன ஸமயேன பி⁴க்கூ² அவத்து²ஸ்மிங் அகாரணே ஓவாத³ங் ட²பெந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, அவத்து²ஸ்மிங் அகாரணே ஓவாதோ³ ட²பேதப்³போ³. யோ ட²பெய்ய, ஆபத்தி து³க்கடஸ்ஸா’’தி.
Tena kho pana samayena bhikkhū avatthusmiṃ akāraṇe ovādaṃ ṭhapenti. Bhagavato etamatthaṃ ārocesuṃ. ‘‘Na, bhikkhave, avatthusmiṃ akāraṇe ovādo ṭhapetabbo. Yo ṭhapeyya, āpatti dukkaṭassā’’ti.
தேன கோ² பன ஸமயேன பி⁴க்கூ² ஓவாத³ங் ட²பெத்வா வினிச்ச²யங் ந தெ³ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஓவாத³ங் ட²பெத்வா வினிச்ச²யோ ந தா³தப்³போ³. யோ ந த³தெ³ய்ய, ஆபத்தி து³க்கடஸ்ஸா’’தி.
Tena kho pana samayena bhikkhū ovādaṃ ṭhapetvā vinicchayaṃ na denti. Bhagavato etamatthaṃ ārocesuṃ. ‘‘Na, bhikkhave, ovādaṃ ṭhapetvā vinicchayo na dātabbo. Yo na dadeyya, āpatti dukkaṭassā’’ti.
413. 5 தேன கோ² பன ஸமயேன பி⁴க்கு²னியோ ஓவாத³ங் ந க³ச்ச²ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா ஓவாதோ³ ந க³ந்தப்³போ³. யா ந க³ச்செ²ய்ய, யதா²த⁴ம்மோ காரேதப்³போ³’’தி.
413.6 Tena kho pana samayena bhikkhuniyo ovādaṃ na gacchanti. Bhagavato etamatthaṃ ārocesuṃ. ‘‘Na, bhikkhave, bhikkhuniyā ovādo na gantabbo. Yā na gaccheyya, yathādhammo kāretabbo’’ti.
தேன கோ² பன ஸமயேன ஸப்³போ³ பி⁴க்கு²னிஸங்கோ⁴ ஓவாத³ங் க³ச்ச²தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘ஜாயாயோ இமா இமேஸங், ஜாரியோ இமா இமேஸங், இதா³னி இமே இமாஹி ஸத்³தி⁴ங் அபி⁴ரமிஸ்ஸந்தீ’’தி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஸப்³பே³ன பி⁴க்கு²னிஸங்கே⁴ன ஓவாதோ³ க³ந்தப்³போ³. க³ச்செ²ய்ய சே, ஆபத்தி து³க்கடஸ்ஸ. அனுஜானாமி, பி⁴க்க²வே, சதூஹி பஞ்சஹி பி⁴க்கு²னீஹி ஓவாத³ங் க³ந்து’’ந்தி.
Tena kho pana samayena sabbo bhikkhunisaṅgho ovādaṃ gacchati. Manussā ujjhāyanti khiyyanti vipācenti – ‘‘jāyāyo imā imesaṃ, jāriyo imā imesaṃ, idāni ime imāhi saddhiṃ abhiramissantī’’ti! Bhagavato etamatthaṃ ārocesuṃ. ‘‘Na, bhikkhave, sabbena bhikkhunisaṅghena ovādo gantabbo. Gaccheyya ce, āpatti dukkaṭassa. Anujānāmi, bhikkhave, catūhi pañcahi bhikkhunīhi ovādaṃ gantu’’nti.
தேன கோ² பன ஸமயேன சதஸ்ஸோ பஞ்ச பி⁴க்கு²னியோ ஓவாத³ங் க³ச்ச²ந்தி. மனுஸ்ஸா ததே²வ உஜ்ஜா²யந்தி கி²ய்யந்தி விபாசெந்தி – ‘‘ஜாயாயோ இமா இமேஸங், ஜாரியோ இமா இமேஸங், இதா³னி இமே இமாஹி ஸத்³தி⁴ங் அபி⁴ரமிஸ்ஸந்தீ’’தி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, சதூஹி பஞ்சஹி பி⁴க்கு²னீஹி ஓவாதோ³ க³ந்தப்³போ³. க³ச்செ²ய்யுங் சே, ஆபத்தி து³க்கடஸ்ஸ. அனுஜானாமி, பி⁴க்க²வே, த்³வே திஸ்ஸோ பி⁴க்கு²னியோ 7 ஓவாத³ங் க³ந்துங். ஏகங் பி⁴க்கு²ங் உபஸங்கமித்வா ஏகங்ஸங் உத்தராஸங்க³ங் கரித்வா பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘பி⁴க்கு²னிஸங்கோ⁴, அய்ய, பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி; லப⁴து கிர, அய்ய, பி⁴க்கு²னிஸங்கோ⁴ ஓவாதூ³பஸங்கமன’ந்தி. தேன பி⁴க்கு²னா பாதிமொக்கு²த்³தே³ஸகோ உபஸங்கமித்வா ஏவமஸ்ஸ வசனீயோ – ‘பி⁴க்கு²னீஸங்கோ⁴, ப⁴ந்தே, பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி; லப⁴து கிர, ப⁴ந்தே, பி⁴க்கு²னிஸங்கோ⁴ ஓவாதூ³பஸங்கமன’ந்தி. பாதிமொக்கு²த்³தே³ஸகேன வத்தப்³போ³ – ‘அத்தி² கோசி பி⁴க்கு² பி⁴க்கு²னோவாத³கோ ஸம்மதோ’தி? ஸசே ஹோதி கோசி பி⁴க்கு² பி⁴க்கு²னோவாத³கோ ஸம்மதோ, பாதிமொக்கு²த்³தே³ஸகேன வத்தப்³போ³ – ‘இத்த²ன்னாமோ பி⁴க்கு² பி⁴க்கு²னோவாத³கோ ஸம்மதோ, தங் பி⁴க்கு²னிஸங்கோ⁴ உபஸங்கமதூ’தி. ஸசே ந ஹோதி கோசி பி⁴க்கு² பி⁴க்கு²னோவாத³கோ ஸம்மதோ, பாதிமொக்கு²த்³தே³ஸகேன வத்தப்³போ³ – ‘கோ ஆயஸ்மா உஸ்ஸஹதி பி⁴க்கு²னியோ ஓவதி³து’ந்தி? ஸசே கோசி உஸ்ஸஹதி பி⁴க்கு²னியோ ஓவதி³துங், ஸோ ச ஹோதி அட்ட²ஹங்கே³ஹி ஸமன்னாக³தோ, ஸம்மன்னித்வா வத்தப்³போ³ – ‘இத்த²ன்னாமோ பி⁴க்கு² பி⁴க்கு²னோவாத³கோ ஸம்மதோ, தங் பி⁴க்கு²னிஸங்கோ⁴ உபஸங்கமதூ’தி. ஸசே ந கோசி உஸ்ஸஹதி பி⁴க்கு²னியோ ஓவதி³துங், பாதிமொக்கு²த்³தே³ஸகேன வத்தப்³போ³ – ‘நத்தி² கோசி பி⁴க்கு² பி⁴க்கு²னோவாத³கோ ஸம்மதோ, பாஸாதி³கேன பி⁴க்கு²னிஸங்கோ⁴ ஸம்பாதே³தூ’’தி.
Tena kho pana samayena catasso pañca bhikkhuniyo ovādaṃ gacchanti. Manussā tatheva ujjhāyanti khiyyanti vipācenti – ‘‘jāyāyo imā imesaṃ, jāriyo imā imesaṃ, idāni ime imāhi saddhiṃ abhiramissantī’’ti! Bhagavato etamatthaṃ ārocesuṃ. ‘‘Na, bhikkhave, catūhi pañcahi bhikkhunīhi ovādo gantabbo. Gaccheyyuṃ ce, āpatti dukkaṭassa. Anujānāmi, bhikkhave, dve tisso bhikkhuniyo 8 ovādaṃ gantuṃ. Ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘bhikkhunisaṅgho, ayya, bhikkhusaṅghassa pāde vandati, ovādūpasaṅkamanañca yācati; labhatu kira, ayya, bhikkhunisaṅgho ovādūpasaṅkamana’nti. Tena bhikkhunā pātimokkhuddesako upasaṅkamitvā evamassa vacanīyo – ‘bhikkhunīsaṅgho, bhante, bhikkhusaṅghassa pāde vandati, ovādūpasaṅkamanañca yācati; labhatu kira, bhante, bhikkhunisaṅgho ovādūpasaṅkamana’nti. Pātimokkhuddesakena vattabbo – ‘atthi koci bhikkhu bhikkhunovādako sammato’ti? Sace hoti koci bhikkhu bhikkhunovādako sammato, pātimokkhuddesakena vattabbo – ‘itthannāmo bhikkhu bhikkhunovādako sammato, taṃ bhikkhunisaṅgho upasaṅkamatū’ti. Sace na hoti koci bhikkhu bhikkhunovādako sammato, pātimokkhuddesakena vattabbo – ‘ko āyasmā ussahati bhikkhuniyo ovaditu’nti? Sace koci ussahati bhikkhuniyo ovadituṃ, so ca hoti aṭṭhahaṅgehi samannāgato, sammannitvā vattabbo – ‘itthannāmo bhikkhu bhikkhunovādako sammato, taṃ bhikkhunisaṅgho upasaṅkamatū’ti. Sace na koci ussahati bhikkhuniyo ovadituṃ, pātimokkhuddesakena vattabbo – ‘natthi koci bhikkhu bhikkhunovādako sammato, pāsādikena bhikkhunisaṅgho sampādetū’’ti.
414. தேன கோ² பன ஸமயேன பி⁴க்கூ² ஓவாத³ங் ந க³ண்ஹந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஓவாதோ³ ந க³ஹேதப்³போ³. யோ ந க³ண்ஹெய்ய, ஆபத்தி து³க்கடஸ்ஸா’’தி.
414. Tena kho pana samayena bhikkhū ovādaṃ na gaṇhanti. Bhagavato etamatthaṃ ārocesuṃ. ‘‘Na, bhikkhave, ovādo na gahetabbo. Yo na gaṇheyya, āpatti dukkaṭassā’’ti.
தேன கோ² பன ஸமயேன அஞ்ஞதரோ பி⁴க்கு² பா³லோ ஹோதி. தங் பி⁴க்கு²னியோ உபஸங்கமித்வா ஏதத³வோசுங் – ‘‘ஓவாத³ங், அய்ய, க³ண்ஹாஹீ’’தி . ‘‘அஹஞ்ஹி, ப⁴கி³னீ, பா³லோ; கதா²ஹங் ஓவாத³ங் க³ண்ஹாமீ’’தி? ‘‘க³ண்ஹாஹய்ய , ஓவாத³ங்; ஏவஞ்ஹி ப⁴க³வதா பஞ்ஞத்தங் – பி⁴க்கூ²ஹி பி⁴க்கு²னீனங் ஓவாதோ³ க³ஹேதப்³போ³’’தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ட²பெத்வா பா³லங், அவஸேஸேஹி ஓவாத³ங் க³ஹேது’’ந்தி.
Tena kho pana samayena aññataro bhikkhu bālo hoti. Taṃ bhikkhuniyo upasaṅkamitvā etadavocuṃ – ‘‘ovādaṃ, ayya, gaṇhāhī’’ti . ‘‘Ahañhi, bhaginī, bālo; kathāhaṃ ovādaṃ gaṇhāmī’’ti? ‘‘Gaṇhāhayya , ovādaṃ; evañhi bhagavatā paññattaṃ – bhikkhūhi bhikkhunīnaṃ ovādo gahetabbo’’ti. Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā bālaṃ, avasesehi ovādaṃ gahetu’’nti.
தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தங் பி⁴க்கு²னியோ உபஸங்கமித்வா ஏதத³வோசுங் – ‘‘ஓவாத³ங், அய்ய க³ண்ஹாஹீ’’தி. ‘‘அஹஞ்ஹி, ப⁴கி³னீ, கி³லானோ; கதா²ஹங் ஓவாத³ங் க³ண்ஹாமீ’’தி? ‘‘க³ண்ஹாஹய்ய, ஓவாத³ங்; ஏவஞ்ஹி ப⁴க³வதா பஞ்ஞத்தங் – ட²பெத்வா பா³லங், அவஸேஸேஹி ஓவாதோ³ க³ஹேதப்³போ³’’தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ட²பெத்வா பா³லங், ட²பெத்வா கி³லானங், அவஸேஸேஹி ஓவாத³ங் க³ஹேது’’ந்தி.
Tena kho pana samayena aññataro bhikkhu gilāno hoti. Taṃ bhikkhuniyo upasaṅkamitvā etadavocuṃ – ‘‘ovādaṃ, ayya gaṇhāhī’’ti. ‘‘Ahañhi, bhaginī, gilāno; kathāhaṃ ovādaṃ gaṇhāmī’’ti? ‘‘Gaṇhāhayya, ovādaṃ; evañhi bhagavatā paññattaṃ – ṭhapetvā bālaṃ, avasesehi ovādo gahetabbo’’ti. Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā bālaṃ, ṭhapetvā gilānaṃ, avasesehi ovādaṃ gahetu’’nti.
தேன கோ² பன ஸமயேன அஞ்ஞதரோ பி⁴க்கு² க³மிகோ ஹோதி. தங் பி⁴க்கு²னியோ உபஸங்கமித்வா ஏதத³வோசுங் – ‘‘ஓவாத³ங், அய்ய, க³ண்ஹாஹீ’’தி. ‘‘அஹஞ்ஹி, ப⁴கி³னீ, க³மிகோ; கதா²ஹங் ஓவாத³ங் க³ண்ஹாமீ’’தி? ‘‘க³ண்ஹாஹய்ய, ஓவாத³ங்; ஏவஞ்ஹி ப⁴க³வதா பஞ்ஞத்தங் – ட²பெத்வா பா³லங், ட²பெத்வா கி³லானங், அவஸேஸேஹி ஓவாதோ³ க³ஹேதப்³போ³’’தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ட²பெத்வா பா³லங், ட²பெத்வா கி³லானங், ட²பெத்வா க³மிகங், அவஸேஸேஹி ஓவாத³ங் க³ஹேது’’ந்தி.
Tena kho pana samayena aññataro bhikkhu gamiko hoti. Taṃ bhikkhuniyo upasaṅkamitvā etadavocuṃ – ‘‘ovādaṃ, ayya, gaṇhāhī’’ti. ‘‘Ahañhi, bhaginī, gamiko; kathāhaṃ ovādaṃ gaṇhāmī’’ti? ‘‘Gaṇhāhayya, ovādaṃ; evañhi bhagavatā paññattaṃ – ṭhapetvā bālaṃ, ṭhapetvā gilānaṃ, avasesehi ovādo gahetabbo’’ti. Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā bālaṃ, ṭhapetvā gilānaṃ, ṭhapetvā gamikaṃ, avasesehi ovādaṃ gahetu’’nti.
தேன கோ² பன ஸமயேன அஞ்ஞதரோ பி⁴க்கு² அரஞ்ஞே விஹரதி. தங் பி⁴க்கு²னியோ உபஸங்கமித்வா ஏதத³வோசுங் – ‘‘ஓவாத³ங், அய்ய, க³ண்ஹாஹீ’’தி. ‘‘அஹஞ்ஹி, ப⁴கி³னீ, அரஞ்ஞே விஹராமி; கதா²ஹங் ஓவாத³ங் க³ண்ஹாமீ’’தி? ‘‘க³ண்ஹாஹய்ய , ஓவாத³ங்; ஏவஞ்ஹி ப⁴க³வதா பஞ்ஞத்தங் – ட²பெத்வா பா³லங், ட²பெத்வா கி³லானங், ட²பெத்வா க³மிகங், அவஸேஸேஹி ஓவாதோ³ க³ஹேதப்³போ³’’தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஆரஞ்ஞிகேன பி⁴க்கு²னா ஓவாத³ங் க³ஹேதுங், ஸங்கேதஞ்ச காதுங் – அத்ர பதிஹரிஸ்ஸாமீ’’தி.
Tena kho pana samayena aññataro bhikkhu araññe viharati. Taṃ bhikkhuniyo upasaṅkamitvā etadavocuṃ – ‘‘ovādaṃ, ayya, gaṇhāhī’’ti. ‘‘Ahañhi, bhaginī, araññe viharāmi; kathāhaṃ ovādaṃ gaṇhāmī’’ti? ‘‘Gaṇhāhayya , ovādaṃ; evañhi bhagavatā paññattaṃ – ṭhapetvā bālaṃ, ṭhapetvā gilānaṃ, ṭhapetvā gamikaṃ, avasesehi ovādo gahetabbo’’ti. Bhagavato etamatthaṃ ārocesuṃ. ‘‘Anujānāmi, bhikkhave, āraññikena bhikkhunā ovādaṃ gahetuṃ, saṅketañca kātuṃ – atra patiharissāmī’’ti.
415. தேன கோ² பன ஸமயேன பி⁴க்கூ² ஓவாத³ங் க³ஹெத்வா ந ஆரோசெந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஓவாதோ³ ந ஆரோசேதப்³போ³. யோ ந ஆரோசெய்ய, ஆபத்தி து³க்கடஸ்ஸா’’தி.
415. Tena kho pana samayena bhikkhū ovādaṃ gahetvā na ārocenti. Bhagavato etamatthaṃ ārocesuṃ. ‘‘Na, bhikkhave, ovādo na ārocetabbo. Yo na āroceyya, āpatti dukkaṭassā’’ti.
தேன கோ² பன ஸமயேன பி⁴க்கூ² ஓவாத³ங் க³ஹெத்வா ந பச்சாஹரந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஓவாதோ³ ந பச்சாஹரிதப்³போ³. யோ ந பச்சாஹரெய்ய, ஆபத்தி து³க்கடஸ்ஸா’’தி.
Tena kho pana samayena bhikkhū ovādaṃ gahetvā na paccāharanti. Bhagavato etamatthaṃ ārocesuṃ. ‘‘Na, bhikkhave, ovādo na paccāharitabbo. Yo na paccāhareyya, āpatti dukkaṭassā’’ti.
தேன கோ² பன ஸமயேன பி⁴க்கு²னியோ ஸங்கேதங் ந க³ச்ச²ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா ஸங்கேதங் ந க³ந்தப்³ப³ங். யா ந க³ச்செ²ய்ய, ஆபத்தி து³க்கடஸ்ஸா’’தி.
Tena kho pana samayena bhikkhuniyo saṅketaṃ na gacchanti. Bhagavato etamatthaṃ ārocesuṃ. ‘‘Na, bhikkhave, bhikkhuniyā saṅketaṃ na gantabbaṃ. Yā na gaccheyya, āpatti dukkaṭassā’’ti.
416. தேன கோ² பன ஸமயேன பி⁴க்கு²னியோ தீ³கா⁴னி காயப³ந்த⁴னானி தா⁴ரெந்தி, தேஹேவ பா²ஸுகா நாமெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹினீ காமபோ⁴கி³னியோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா தீ³க⁴ங் காயப³ந்த⁴னங் தா⁴ரேதப்³ப³ங். யா தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, பி⁴க்கு²னியா ஏகபரியாகதங் 9 காயப³ந்த⁴னங், ந ச தேன பா²ஸுகா நாமேதப்³பா³. யா நாமெய்ய, ஆபத்தி து³க்கடஸ்ஸா’’தி.
416. Tena kho pana samayena bhikkhuniyo dīghāni kāyabandhanāni dhārenti, teheva phāsukā nāmenti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā dīghaṃ kāyabandhanaṃ dhāretabbaṃ. Yā dhāreyya, āpatti dukkaṭassa. Anujānāmi, bhikkhave, bhikkhuniyā ekapariyākataṃ 10 kāyabandhanaṃ, na ca tena phāsukā nāmetabbā. Yā nāmeyya, āpatti dukkaṭassā’’ti.
தேன கோ² பன ஸமயேன பி⁴க்கு²னியோ விலீவேன 11 பட்டேன பா²ஸுகா நாமெந்தி…பே॰… சம்மபட்டேன பா²ஸுகா நாமெந்தி. து³ஸ்ஸபட்டேன பா²ஸுகா நாமெந்தி. து³ஸ்ஸவேணியா பா²ஸுகா நாமெந்தி. து³ஸ்ஸவட்டியா பா²ஸுகா நாமெந்தி. சோளபட்டேன பா²ஸுகா நாமெந்தி. சோளவேணியா பா²ஸுகா நாமெந்தி. சோளவட்டியா பா²ஸுகா நாமெந்தி. ஸுத்தவேணியா பா²ஸுகா நாமெந்தி. ஸுத்தவட்டியா பா²ஸுகா நாமெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹினீ காமபோ⁴கி³னியோதி. ப⁴க³வதோ ஏதமத்த²ங் ஆரோசேஸுங் . ‘‘ந, பி⁴க்க²வே, பி⁴க்கு²னியா விலீவேன பட்டேன பா²ஸுகா நாமேதப்³பா³…பே॰… ந ஸுத்தவட்டியா பா²ஸுகா நாமேதப்³பா³. யா நாமெய்ய ஆபத்தி து³க்கடஸ்ஸா’’தி.
Tena kho pana samayena bhikkhuniyo vilīvena 12 paṭṭena phāsukā nāmenti…pe… cammapaṭṭena phāsukā nāmenti. Dussapaṭṭena phāsukā nāmenti. Dussaveṇiyā phāsukā nāmenti. Dussavaṭṭiyā phāsukā nāmenti. Coḷapaṭṭena phāsukā nāmenti. Coḷaveṇiyā phāsukā nāmenti. Coḷavaṭṭiyā phāsukā nāmenti. Suttaveṇiyā phāsukā nāmenti. Suttavaṭṭiyā phāsukā nāmenti. Manussā ujjhāyanti khiyyanti vipācenti – seyyathāpi gihinī kāmabhoginiyoti. Bhagavato etamatthaṃ ārocesuṃ . ‘‘Na, bhikkhave, bhikkhuniyā vilīvena paṭṭena phāsukā nāmetabbā…pe… na suttavaṭṭiyā phāsukā nāmetabbā. Yā nāmeyya āpatti dukkaṭassā’’ti.
தேன கோ² பன ஸமயேன பி⁴க்கு²னியோ அட்டி²ல்லேன ஜக⁴னங் க⁴ங்ஸாபெந்தி…பே॰… கோ³ஹனுகேன ஜக⁴னங் கொட்டாபெந்தி, ஹத்த²ங் கொட்டாபெந்தி, ஹத்த²கொச்ச²ங் கொட்டாபெந்தி, பாத³ங் கொட்டாபெந்தி, பாத³கொச்ச²ங் கொட்டாபெந்தி, ஊருங் கொட்டாபெந்தி, முக²ங் கொட்டாபெந்தி, த³ந்தமங்ஸங் கொட்டாபெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹினீ காமபோ⁴கி³னியோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா அட்டி²ல்லேன ஜக⁴னங் க⁴ங்ஸாபேதப்³ப³ங்…பே॰… ந த³ந்தமங்ஸங் கொட்டாபேதப்³ப³ங். யா கொட்டாபெய்ய, ஆபத்தி து³க்கடஸ்ஸா’’தி.
Tena kho pana samayena bhikkhuniyo aṭṭhillena jaghanaṃ ghaṃsāpenti…pe… gohanukena jaghanaṃ koṭṭāpenti, hatthaṃ koṭṭāpenti, hatthakocchaṃ koṭṭāpenti, pādaṃ koṭṭāpenti, pādakocchaṃ koṭṭāpenti, ūruṃ koṭṭāpenti, mukhaṃ koṭṭāpenti, dantamaṃsaṃ koṭṭāpenti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā aṭṭhillena jaghanaṃ ghaṃsāpetabbaṃ…pe… na dantamaṃsaṃ koṭṭāpetabbaṃ. Yā koṭṭāpeyya, āpatti dukkaṭassā’’ti.
417. தேன கோ² பன ஸமயேன ச²ப்³ப³க்³கி³யா பி⁴க்கு²னியோ முக²ங் ஆலிம்பந்தி…பே॰… முக²ங் உம்மத்³தெ³ந்தி, முக²ங் சுண்ணெந்தி, மனோஸிலிகாய முக²ங் லஞ்செ²ந்தி, அங்க³ராக³ங் கரொந்தி, முக²ராக³ங் கரொந்தி, அங்க³ராக³முக²ராக³ங் கரொந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹினீ காமபோ⁴கி³னியோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே , பி⁴க்கு²னியா முக²ங் ஆலிம்பிதப்³ப³ங்…பே॰… ந முக²ங் உம்மத்³தி³தப்³ப³ங், ந முக²ங் சுண்ணேதப்³ப³ங், ந மனோஸிலிகாய முக²ங் லஞ்சி²தப்³ப³ங், ந அங்க³ராகோ³ காதப்³போ³, ந முக²ராகோ³ காதப்³போ³, ந அங்க³ராக³முக²ராகோ³ காதப்³போ³. யா கரெய்ய, ஆபத்தி து³க்கடஸ்ஸா’’தி.
417. Tena kho pana samayena chabbaggiyā bhikkhuniyo mukhaṃ ālimpanti…pe… mukhaṃ ummaddenti, mukhaṃ cuṇṇenti, manosilikāya mukhaṃ lañchenti, aṅgarāgaṃ karonti, mukharāgaṃ karonti, aṅgarāgamukharāgaṃ karonti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave , bhikkhuniyā mukhaṃ ālimpitabbaṃ…pe… na mukhaṃ ummadditabbaṃ, na mukhaṃ cuṇṇetabbaṃ, na manosilikāya mukhaṃ lañchitabbaṃ, na aṅgarāgo kātabbo, na mukharāgo kātabbo, na aṅgarāgamukharāgo kātabbo. Yā kareyya, āpatti dukkaṭassā’’ti.
தேன கோ² பன ஸமயேன ச²ப்³ப³க்³கி³யா பி⁴க்கு²னியோ அவங்க³ங் 13 கரொந்தி…பே॰… விஸேஸகங் கரொந்தி, ஓலோகனகேன ஓலோகெந்தி, ஸாலோகே திட்ட²ந்தி; நச்சங் 14 காராபெந்தி, வேஸிங் வுட்டா²பெந்தி, பானாகா³ரங் ட²பெந்தி, ஸூனங் ட²பெந்தி, ஆபணங் பஸாரெந்தி, வட்³டி⁴ங் பயோஜெந்தி, வணிஜ்ஜங் பயோஜெந்தி, தா³ஸங் உபட்டா²பெந்தி, தா³ஸிங் உபட்டா²பெந்தி, கம்மகாரங் உபட்டா²பெந்தி, கம்மகாரிங் உபட்டா²பெந்தி, திரச்சா²னக³தங் உபட்டா²பெந்தி, ஹரீதகபக்கிகங் 15 பகிணந்தி, நமதகங் தா⁴ரெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹினீ காமபோ⁴கி³னியோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா அவங்க³ங் காதப்³ப³ங்…பே॰… ந விஸேஸகங் காதப்³ப³ங், ந ஓலோகனகேன ஓலோகேதப்³ப³ங், ந ஸாலோகே டா²தப்³ப³ங், ந நச்சங் காராபேதப்³ப³ங், ந வேஸீ வுட்டா²பேதப்³பா³, ந பானாகா³ரங் ட²பேதப்³ப³ங், ந ஸூனா ட²பேதப்³பா³, ந ஆபணோ பஸாரேதப்³போ³, ந வட்³டி⁴ பயோஜேதப்³பா³, ந வணிஜ்ஜா பயோஜேதப்³பா³, ந தா³ஸோ உபட்டா²பேதப்³போ³, ந தா³ஸீ உபட்டா²பேதப்³பா³, ந கம்மகாரோ உபட்டா²பேதப்³போ³, ந கம்மகாரீ உபட்டா²பேதப்³பா³, ந திரச்சா²னக³தோ உபட்டா²பேதப்³போ³, ந ஹரீதகபக்கிகங் பகிணிதப்³ப³ங், ந நமதகங் தா⁴ரேதப்³ப³ங். யா தா⁴ரெய்ய, ஆபத்தி து³க்கடஸ்ஸா’’தி.
Tena kho pana samayena chabbaggiyā bhikkhuniyo avaṅgaṃ 16 karonti…pe… visesakaṃ karonti, olokanakena olokenti, sāloke tiṭṭhanti; naccaṃ 17 kārāpenti, vesiṃ vuṭṭhāpenti, pānāgāraṃ ṭhapenti, sūnaṃ ṭhapenti, āpaṇaṃ pasārenti, vaḍḍhiṃ payojenti, vaṇijjaṃ payojenti, dāsaṃ upaṭṭhāpenti, dāsiṃ upaṭṭhāpenti, kammakāraṃ upaṭṭhāpenti, kammakāriṃ upaṭṭhāpenti, tiracchānagataṃ upaṭṭhāpenti, harītakapakkikaṃ 18 pakiṇanti, namatakaṃ dhārenti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā avaṅgaṃ kātabbaṃ…pe… na visesakaṃ kātabbaṃ, na olokanakena oloketabbaṃ, na sāloke ṭhātabbaṃ, na naccaṃ kārāpetabbaṃ, na vesī vuṭṭhāpetabbā, na pānāgāraṃ ṭhapetabbaṃ, na sūnā ṭhapetabbā, na āpaṇo pasāretabbo, na vaḍḍhi payojetabbā, na vaṇijjā payojetabbā, na dāso upaṭṭhāpetabbo, na dāsī upaṭṭhāpetabbā, na kammakāro upaṭṭhāpetabbo, na kammakārī upaṭṭhāpetabbā, na tiracchānagato upaṭṭhāpetabbo, na harītakapakkikaṃ pakiṇitabbaṃ, na namatakaṃ dhāretabbaṃ. Yā dhāreyya, āpatti dukkaṭassā’’ti.
418. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ஸப்³ப³னீலகானி சீவரானி தா⁴ரெந்தி…பே॰… ஸப்³ப³பீதகானி சீவரானி தா⁴ரெந்தி, ஸப்³ப³லோஹிதகானி சீவரானி தா⁴ரெந்தி, ஸப்³ப³மஞ்ஜிட்டி²கானி சீவரானி தா⁴ரெந்தி, ஸப்³ப³கண்ஹானி சீவரானி தா⁴ரெந்தி, ஸப்³ப³மஹாரங்க³ரத்தானி சீவரானி தா⁴ரெந்தி, ஸப்³ப³மஹானாமரத்தானி சீவரானி தா⁴ரெந்தி, அச்சி²ன்னத³ஸானி சீவரானி தா⁴ரெந்தி, தீ³க⁴த³ஸானி சீவரானி தா⁴ரெந்தி, புப்ப²த³ஸானி சீவரானி தா⁴ரெந்தி, ப²லத³ஸானி சீவரானி தா⁴ரெந்தி, கஞ்சுகங் தா⁴ரெந்தி, திரீடகங் தா⁴ரெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹினீ காமபோ⁴கி³னியோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா ஸப்³ப³னீலகானி சீவரானி தா⁴ரேதப்³பா³னி…பே॰… ந திரீடகங் தா⁴ரேதப்³ப³ங். யா தா⁴ரெய்ய, ஆபத்தி து³க்கடஸ்ஸா’’தி.
418. Tena kho pana samayena chabbaggiyā bhikkhuniyo sabbanīlakāni cīvarāni dhārenti…pe… sabbapītakāni cīvarāni dhārenti, sabbalohitakāni cīvarāni dhārenti, sabbamañjiṭṭhikāni cīvarāni dhārenti, sabbakaṇhāni cīvarāni dhārenti, sabbamahāraṅgarattāni cīvarāni dhārenti, sabbamahānāmarattāni cīvarāni dhārenti, acchinnadasāni cīvarāni dhārenti, dīghadasāni cīvarāni dhārenti, pupphadasāni cīvarāni dhārenti, phaladasāni cīvarāni dhārenti, kañcukaṃ dhārenti, tirīṭakaṃ dhārenti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā sabbanīlakāni cīvarāni dhāretabbāni…pe… na tirīṭakaṃ dhāretabbaṃ. Yā dhāreyya, āpatti dukkaṭassā’’ti.
419. தேன கோ² பன ஸமயேன அஞ்ஞதரா பி⁴க்கு²னீ காலங் கரொந்தீ ஏவமாஹ – ‘‘மமச்சயேன மய்ஹங் பரிக்கா²ரோ ஸங்க⁴ஸ்ஸ ஹோதூ’’தி. தத்த² பி⁴க்கூ² ச பி⁴க்கு²னியோ ச விவத³ந்தி – ‘‘அம்ஹாகங் ஹோதி, அம்ஹாகங் ஹோதீ’’தி. ப⁴க³வதோ ஏதமத்த²ங் ஆரோசேஸுங். ‘‘பி⁴க்கு²னீ சே, பி⁴க்க²வே , காலங் கரொந்தீ ஏவங் வதெ³ய்ய – ‘மமச்சயேன மய்ஹங் பரிக்கா²ரோ ஸங்க⁴ஸ்ஸ ஹோதூ’தி, அனிஸ்ஸரோ தத்த² பி⁴க்கு²ஸங்கோ⁴, பி⁴க்கு²னிஸங்க⁴ஸ்ஸேவேதங். ஸிக்க²மானா சே, பி⁴க்க²வே…பே॰… ஸாமணேரீ சே, பி⁴க்க²வே, காலங் கரொந்தீ ஏவங் வதெ³ய்ய – ‘மமச்சயேன மய்ஹங் பரிக்கா²ரோ ஸங்க⁴ஸ்ஸ ஹோதூ’தி, அனிஸ்ஸரோ தத்த² பி⁴க்கு²ஸங்கோ⁴, பி⁴க்கு²னிஸங்க⁴ஸ்ஸேவேதங். பி⁴க்கு² சே, பி⁴க்க²வே, காலங் கரொந்தோ ஏவங் வதெ³ய்ய – ‘மமச்சயேன மய்ஹங் பரிக்கா²ரோ ஸங்க⁴ஸ்ஸ ஹோதூ’தி, அனிஸ்ஸரோ தத்த² பி⁴க்கு²னிஸங்கோ⁴, பி⁴க்கு²ஸங்க⁴ஸ்ஸேவேதங். ஸாமணேரோ சே, பி⁴க்க²வே…பே॰… உபாஸகோ சே, பி⁴க்க²வே…பே॰… உபாஸிகா சே, பி⁴க்க²வே…பே॰… அஞ்ஞோ சே, பி⁴க்க²வே, கோசி காலங் கரொந்தோ ஏவங் வதெ³ய்ய – ‘மமச்சயேன மய்ஹங் பரிக்கா²ரோ ஸங்க⁴ஸ்ஸ ஹோதூ’தி, அனிஸ்ஸரோ தத்த² பி⁴க்கு²னிஸங்கோ⁴, பி⁴க்கு²ஸங்க⁴ஸ்ஸேவேத’’ந்தி.
419. Tena kho pana samayena aññatarā bhikkhunī kālaṃ karontī evamāha – ‘‘mamaccayena mayhaṃ parikkhāro saṅghassa hotū’’ti. Tattha bhikkhū ca bhikkhuniyo ca vivadanti – ‘‘amhākaṃ hoti, amhākaṃ hotī’’ti. Bhagavato etamatthaṃ ārocesuṃ. ‘‘Bhikkhunī ce, bhikkhave , kālaṃ karontī evaṃ vadeyya – ‘mamaccayena mayhaṃ parikkhāro saṅghassa hotū’ti, anissaro tattha bhikkhusaṅgho, bhikkhunisaṅghassevetaṃ. Sikkhamānā ce, bhikkhave…pe… sāmaṇerī ce, bhikkhave, kālaṃ karontī evaṃ vadeyya – ‘mamaccayena mayhaṃ parikkhāro saṅghassa hotū’ti, anissaro tattha bhikkhusaṅgho, bhikkhunisaṅghassevetaṃ. Bhikkhu ce, bhikkhave, kālaṃ karonto evaṃ vadeyya – ‘mamaccayena mayhaṃ parikkhāro saṅghassa hotū’ti, anissaro tattha bhikkhunisaṅgho, bhikkhusaṅghassevetaṃ. Sāmaṇero ce, bhikkhave…pe… upāsako ce, bhikkhave…pe… upāsikā ce, bhikkhave…pe… añño ce, bhikkhave, koci kālaṃ karonto evaṃ vadeyya – ‘mamaccayena mayhaṃ parikkhāro saṅghassa hotū’ti, anissaro tattha bhikkhunisaṅgho, bhikkhusaṅghasseveta’’nti.
420. தேன கோ² பன ஸமயேன அஞ்ஞதரா இத்தீ² புராணமல்லீ பி⁴க்கு²னீஸு பப்³ப³ஜிதா ஹோதி. ஸா ரதி²காய து³ப்³ப³லகங் பி⁴க்கு²ங் பஸ்ஸித்வா அங்ஸகூடேன பஹாரங் த³த்வா பாதேஸி 19. பி⁴க்கூ² உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம, பி⁴க்கு²னீ, பி⁴க்கு²ஸ்ஸ பஹாரங் த³ஸ்ஸதீ’’தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா பி⁴க்கு²ஸ்ஸ பஹாரோ தா³தப்³போ³. யா த³தெ³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, பி⁴க்கு²னியா பி⁴க்கு²ங் பஸ்ஸித்வா தூ³ரதோவ ஓக்கமித்வா மக்³க³ங் தா³து’’ந்தி.
420. Tena kho pana samayena aññatarā itthī purāṇamallī bhikkhunīsu pabbajitā hoti. Sā rathikāya dubbalakaṃ bhikkhuṃ passitvā aṃsakūṭena pahāraṃ datvā pātesi 20. Bhikkhū ujjhāyanti khiyyanti vipācenti – ‘‘kathañhi nāma, bhikkhunī, bhikkhussa pahāraṃ dassatī’’ti. Bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhussa pahāro dātabbo. Yā dadeyya, āpatti dukkaṭassa. Anujānāmi, bhikkhave, bhikkhuniyā bhikkhuṃ passitvā dūratova okkamitvā maggaṃ dātu’’nti.
தேன கோ² பன ஸமயேன அஞ்ஞதரா இத்தீ² பவுத்த²பதிகா ஜாரேன க³ப்³பி⁴னீ ஹோதி. ஸா க³ப்³ப⁴ங் பாதெத்வா குலூபிகங் பி⁴க்கு²னிங் ஏதத³வோச – ‘‘ஹந்த³ய்யே, இமங் க³ப்³ப⁴ங் பத்தேன நீஹரா’’தி. அத² கோ² ஸா பி⁴க்கு²னீ தங் க³ப்³ப⁴ங் பத்தே பக்கி²பித்வா ஸங்கா⁴டியா படிச்சா²தெ³த்வா அக³மாஸி. தேன கோ² பன ஸமயேன அஞ்ஞதரேன பிண்ட³சாரிகேன பி⁴க்கு²னா ஸமாதா³னங் கதங் ஹோதி – ‘யாஹங் பட²மங் பி⁴க்க²ங் லபி⁴ஸ்ஸாமி, ந தங் அத³த்வா பி⁴க்கு²ஸ்ஸ வா பி⁴க்கு²னியா வா பரிபு⁴ஞ்ஜிஸ்ஸாமீ’தி. அத² கோ² ஸோ பி⁴க்கு² தங் பி⁴க்கு²னிங் பஸ்ஸித்வா ஏதத³வோச – ‘‘ஹந்த³, ப⁴கி³னி, பி⁴க்க²ங் படிக்³க³ண்ஹா’’தி. ‘‘அலங் அய்யா’’தி. து³தியம்பி கோ²…பே॰… ததியம்பி கோ² ஸோ பி⁴க்கு² தங் பி⁴க்கு²னிங் ஏதத³வோச – ‘‘ஹந்த³, ப⁴கி³னி, பி⁴க்க²ங் படிக்³க³ண்ஹா’’தி. ‘‘அலங் அய்யா’’தி. ‘‘மயா கோ², ப⁴கி³னி, ஸமாதா³னங் கதங் – ‘யாஹங் பட²மங் பி⁴க்க²ங் லபி⁴ஸ்ஸாமி, ந தங் அத³த்வா பி⁴க்கு²ஸ்ஸ வா பி⁴க்கு²னியா வா பரிபு⁴ஞ்ஜிஸ்ஸாமீ’தி. ஹந்த³ , ப⁴கி³னி, பி⁴க்க²ங் படிக்³க³ண்ஹா’’தி. அத² கோ² ஸா பி⁴க்கு²னீ தேன பி⁴க்கு²னா நிப்பீளியமானா நீஹரித்வா பத்தங் த³ஸ்ஸேஸி – ‘‘பஸ்ஸ, அய்ய, பத்தே க³ப்³ப⁴ங்; மா ச கஸ்ஸசி ஆரோசேஸீ’’தி. அத² கோ² ஸோ பி⁴க்கு² உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னீ பத்தேன க³ப்³ப⁴ங் நீஹரிஸ்ஸதீ’’தி! அத² கோ² ஸோ பி⁴க்கு² பி⁴க்கூ²னங் ஏதமத்த²ங் ஆரோசேஸி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னீ பத்தேன க³ப்³ப⁴ங் நீஹரிஸ்ஸதீ’’தி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா பத்தேன க³ப்³போ⁴ நீஹரிதப்³போ³. யா நீஹரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, பி⁴க்கு²னியா பி⁴க்கு²ங் பஸ்ஸித்வா நீஹரித்வா பத்தங் த³ஸ்ஸேது’’ந்தி.
Tena kho pana samayena aññatarā itthī pavutthapatikā jārena gabbhinī hoti. Sā gabbhaṃ pātetvā kulūpikaṃ bhikkhuniṃ etadavoca – ‘‘handayye, imaṃ gabbhaṃ pattena nīharā’’ti. Atha kho sā bhikkhunī taṃ gabbhaṃ patte pakkhipitvā saṅghāṭiyā paṭicchādetvā agamāsi. Tena kho pana samayena aññatarena piṇḍacārikena bhikkhunā samādānaṃ kataṃ hoti – ‘yāhaṃ paṭhamaṃ bhikkhaṃ labhissāmi, na taṃ adatvā bhikkhussa vā bhikkhuniyā vā paribhuñjissāmī’ti. Atha kho so bhikkhu taṃ bhikkhuniṃ passitvā etadavoca – ‘‘handa, bhagini, bhikkhaṃ paṭiggaṇhā’’ti. ‘‘Alaṃ ayyā’’ti. Dutiyampi kho…pe… tatiyampi kho so bhikkhu taṃ bhikkhuniṃ etadavoca – ‘‘handa, bhagini, bhikkhaṃ paṭiggaṇhā’’ti. ‘‘Alaṃ ayyā’’ti. ‘‘Mayā kho, bhagini, samādānaṃ kataṃ – ‘yāhaṃ paṭhamaṃ bhikkhaṃ labhissāmi, na taṃ adatvā bhikkhussa vā bhikkhuniyā vā paribhuñjissāmī’ti. Handa , bhagini, bhikkhaṃ paṭiggaṇhā’’ti. Atha kho sā bhikkhunī tena bhikkhunā nippīḷiyamānā nīharitvā pattaṃ dassesi – ‘‘passa, ayya, patte gabbhaṃ; mā ca kassaci ārocesī’’ti. Atha kho so bhikkhu ujjhāyati khiyyati vipāceti – ‘‘kathañhi nāma bhikkhunī pattena gabbhaṃ nīharissatī’’ti! Atha kho so bhikkhu bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhunī pattena gabbhaṃ nīharissatī’’ti! Bhagavato etamatthaṃ ārocesuṃ. ‘‘Na, bhikkhave, bhikkhuniyā pattena gabbho nīharitabbo. Yā nīhareyya, āpatti dukkaṭassa. Anujānāmi, bhikkhave, bhikkhuniyā bhikkhuṃ passitvā nīharitvā pattaṃ dassetu’’nti.
தேன கோ² பன ஸமயேன ச²ப்³ப³க்³கி³யா பி⁴க்கு²னியோ பி⁴க்கு²ங் பஸ்ஸித்வா பரிவத்தெத்வா பத்தமூலங் த³ஸ்ஸெந்தி. பி⁴க்கூ² உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ பி⁴க்கு²ங் பஸ்ஸித்வா பரிவத்தெத்வா பத்தமூலங் த³ஸ்ஸெஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா பி⁴க்கு²ங் பஸ்ஸித்வா பரிவத்தெத்வா பத்தமூலங் த³ஸ்ஸேதப்³ப³ங். யா த³ஸ்ஸெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, பி⁴க்கு²னியா பி⁴க்கு²ங் பஸ்ஸித்வா உக்குஜ்ஜித்வா பத்தங் த³ஸ்ஸேதுங். யஞ்ச பத்தே ஆமிஸங் ஹோதி, தேன ச பி⁴க்கு² நிமந்தேதப்³போ³’’தி.
Tena kho pana samayena chabbaggiyā bhikkhuniyo bhikkhuṃ passitvā parivattetvā pattamūlaṃ dassenti. Bhikkhū ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo bhikkhuṃ passitvā parivattetvā pattamūlaṃ dassessantī’’ti! Atha kho te bhikkhū bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhuṃ passitvā parivattetvā pattamūlaṃ dassetabbaṃ. Yā dasseyya, āpatti dukkaṭassa. Anujānāmi, bhikkhave, bhikkhuniyā bhikkhuṃ passitvā ukkujjitvā pattaṃ dassetuṃ. Yañca patte āmisaṃ hoti, tena ca bhikkhu nimantetabbo’’ti.
தேன கோ² பன ஸமயேன ஸாவத்தி²யங் ரதி²காய புரிஸப்³யஞ்ஜனங் ச²ட்³டி³தங் ஹோதி. தங் பி⁴க்கு²னியோ ஸக்கச்சங் உபனிஜ்ஜா²யிங்ஸு. மனுஸ்ஸா உக்குட்டி²ங் அகங்ஸு. தா பி⁴க்கு²னியோ மங்கூ அஹேஸுங். அத² கோ² தா பி⁴க்கு²னியோ உபஸ்ஸயங் க³ந்த்வா பி⁴க்கு²னீனங் ஏதமத்த²ங் ஆரோசேஸுங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ புரிஸப்³யஞ்ஜனங் உபனிஜ்ஜா²யிஸ்ஸந்தீ’’தி! அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங். பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா புரிஸப்³யஞ்ஜனங் உபனிஜ்ஜா²யிதப்³ப³ங். யா உபனிஜ்ஜா²யெய்ய, ஆபத்தி து³க்கடஸ்ஸா’’தி.
Tena kho pana samayena sāvatthiyaṃ rathikāya purisabyañjanaṃ chaḍḍitaṃ hoti. Taṃ bhikkhuniyo sakkaccaṃ upanijjhāyiṃsu. Manussā ukkuṭṭhiṃ akaṃsu. Tā bhikkhuniyo maṅkū ahesuṃ. Atha kho tā bhikkhuniyo upassayaṃ gantvā bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo purisabyañjanaṃ upanijjhāyissantī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. ‘‘Na, bhikkhave, bhikkhuniyā purisabyañjanaṃ upanijjhāyitabbaṃ. Yā upanijjhāyeyya, āpatti dukkaṭassā’’ti.
421. தேன கோ² பன ஸமயேன மனுஸ்ஸா பி⁴க்கூ²னங் ஆமிஸங் தெ³ந்தி. பி⁴க்கூ² பி⁴க்கு²னீனங் தெ³ந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ப⁴த³ந்தா அத்தனோ பரிபோ⁴க³த்தா²ய தி³ன்னங் அஞ்ஞேஸங் த³ஸ்ஸந்தி! மயம்பி ந ஜானாம தா³னங் தா³து’’ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, அத்தனோ பரிபோ⁴க³த்தா²ய தி³ன்னங் அஞ்ஞேஸங் தா³தப்³ப³ங். யோ த³தெ³ய்ய, ஆபத்தி து³க்கடஸ்ஸா’’தி.
421. Tena kho pana samayena manussā bhikkhūnaṃ āmisaṃ denti. Bhikkhū bhikkhunīnaṃ denti. Manussā ujjhāyanti khiyyanti vipācenti – ‘‘kathañhi nāma bhadantā attano paribhogatthāya dinnaṃ aññesaṃ dassanti! Mayampi na jānāma dānaṃ dātu’’nti. Bhagavato etamatthaṃ ārocesuṃ. ‘‘Na, bhikkhave, attano paribhogatthāya dinnaṃ aññesaṃ dātabbaṃ. Yo dadeyya, āpatti dukkaṭassā’’ti.
தேன கோ² பன ஸமயேன பி⁴க்கூ²னங் ஆமிஸங் உஸ்ஸன்னங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸங்க⁴ஸ்ஸ தா³து’’ந்தி. பா³ள்ஹதரங் உஸ்ஸன்னங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, புக்³க³லிகம்பி தா³து’’ந்தி.
Tena kho pana samayena bhikkhūnaṃ āmisaṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, saṅghassa dātu’’nti. Bāḷhataraṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, puggalikampi dātu’’nti.
தேன கோ² பன ஸமயேன மனுஸ்ஸா பி⁴க்கு²னீனங் ஆமிஸங் தெ³ந்தி. பி⁴க்கு²னியோ பி⁴க்கூ²னங் தெ³ந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ அத்தனோ பரிபோ⁴க³த்தா²ய தி³ன்னங் அஞ்ஞேஸங் த³ஸ்ஸந்தி! மயம்பி ந ஜானாம தா³னங் தா³து’’ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா அத்தனோ பரிபோ⁴க³த்தா²ய தி³ன்னங் அஞ்ஞேஸங் தா³தப்³ப³ங். யா த³தெ³ய்ய, ஆபத்தி து³க்கடஸ்ஸா’’தி.
Tena kho pana samayena manussā bhikkhunīnaṃ āmisaṃ denti. Bhikkhuniyo bhikkhūnaṃ denti. Manussā ujjhāyanti khiyyanti vipācenti – ‘‘kathañhi nāma bhikkhuniyo attano paribhogatthāya dinnaṃ aññesaṃ dassanti! Mayampi na jānāma dānaṃ dātu’’nti. Bhagavato etamatthaṃ ārocesuṃ. ‘‘Na, bhikkhave, bhikkhuniyā attano paribhogatthāya dinnaṃ aññesaṃ dātabbaṃ. Yā dadeyya, āpatti dukkaṭassā’’ti.
தேன கோ² பன ஸமயேன பி⁴க்கு²னீனங் ஆமிஸங் உஸ்ஸன்னங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸங்க⁴ஸ்ஸ தா³து’’ந்தி. பா³ள்ஹதரங் உஸ்ஸன்னங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, புக்³க³லிகம்பி தா³து’’ந்தி.
Tena kho pana samayena bhikkhunīnaṃ āmisaṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, saṅghassa dātu’’nti. Bāḷhataraṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, puggalikampi dātu’’nti.
தேன கோ² பன ஸமயேன பி⁴க்கு²னீனங் ஸன்னிதி⁴கதங் ஆமிஸங் உஸ்ஸன்னங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பி⁴க்கு²னீனங் ஸன்னிதி⁴ங் பி⁴க்கூ²ஹி பி⁴க்கு²னீஹி 25 படிக்³கா³ஹாபெத்வா பரிபு⁴ஞ்ஜிது’’ந்தி.
Tena kho pana samayena bhikkhunīnaṃ sannidhikataṃ āmisaṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhunīnaṃ sannidhiṃ bhikkhūhi bhikkhunīhi 26 paṭiggāhāpetvā paribhuñjitu’’nti.
422. தேன கோ² பன ஸமயேன பி⁴க்கூ²னங் ஸேனாஸனங் உஸ்ஸன்னங் ஹோதி, பி⁴க்கு²னீனங் 27 ந ஹோதி. பி⁴க்கு²னியோ பி⁴க்கூ²னங் ஸந்திகே தூ³தங் பாஹேஸுங் – ‘ஸாது⁴, ப⁴ந்தே, அய்யா அம்ஹாகங் ஸேனாஸனங் தெ³ந்து தாவகாலிக’ந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பி⁴க்கு²னீனங் ஸேனாஸனங் தா³துங் தாவகாலிக’’ந்தி.
422. Tena kho pana samayena bhikkhūnaṃ senāsanaṃ ussannaṃ hoti, bhikkhunīnaṃ 28 na hoti. Bhikkhuniyo bhikkhūnaṃ santike dūtaṃ pāhesuṃ – ‘sādhu, bhante, ayyā amhākaṃ senāsanaṃ dentu tāvakālika’nti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhunīnaṃ senāsanaṃ dātuṃ tāvakālika’’nti.
தேன கோ² பன ஸமயேன உதுனியோ பி⁴க்கு²னியோ ஓனத்³த⁴மஞ்சங் ஓனத்³த⁴பீட²ங் அபி⁴னிஸீத³ந்திபி அபி⁴னிபஜ்ஜந்திபி. ஸேனாஸனங் லோஹிதேன மக்கி²ய்யதி . ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா ஓனத்³த⁴மஞ்சங் ஓனத்³த⁴பீட²ங் அபி⁴னிஸீதி³தப்³ப³ங் அபி⁴னிபஜ்ஜிதப்³ப³ங். யா அபி⁴னிஸீதெ³ய்ய வா அபி⁴னிபஜ்ஜெய்ய வா ஆபத்தி து³க்கடஸ்ஸ. அனுஜானாமி, பி⁴க்க²வே, ஆவஸத²சீவர’’ந்தி. ஆவஸத²சீவரங் லோஹிதேன மக்கி²ய்யதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி , பி⁴க்க²வே, ஆணிசோளக’’ந்தி. சோளகங் நிபததி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸுத்தகேன ப³ந்தி⁴த்வா ஊருயா ப³ந்தி⁴து’’ந்தி . ஸுத்தங் சி²ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸங்வேல்லியங், கடிஸுத்தக’’ந்தி.
Tena kho pana samayena utuniyo bhikkhuniyo onaddhamañcaṃ onaddhapīṭhaṃ abhinisīdantipi abhinipajjantipi. Senāsanaṃ lohitena makkhiyyati . Bhagavato etamatthaṃ ārocesuṃ. ‘‘Na, bhikkhave, bhikkhuniyā onaddhamañcaṃ onaddhapīṭhaṃ abhinisīditabbaṃ abhinipajjitabbaṃ. Yā abhinisīdeyya vā abhinipajjeyya vā āpatti dukkaṭassa. Anujānāmi, bhikkhave, āvasathacīvara’’nti. Āvasathacīvaraṃ lohitena makkhiyyati. Bhagavato etamatthaṃ ārocesuṃ. ‘‘Anujānāmi , bhikkhave, āṇicoḷaka’’nti. Coḷakaṃ nipatati. Bhagavato etamatthaṃ ārocesuṃ. ‘‘Anujānāmi, bhikkhave, suttakena bandhitvā ūruyā bandhitu’’nti . Suttaṃ chijjati. Bhagavato etamatthaṃ ārocesuṃ. ‘‘Anujānāmi, bhikkhave, saṃvelliyaṃ, kaṭisuttaka’’nti.
தேன கோ² பன ஸமயேன ச²ப்³ப³க்³கி³யா பி⁴க்கு²னியோ ஸப்³ப³காலங் கடிஸுத்தகங் தா⁴ரெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹினீ காமபோ⁴கி³னியோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பி⁴க்கு²னியா ஸப்³ப³காலங் கடிஸுத்தகங் தா⁴ரேதப்³ப³ங். யா தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, உதுனியா கடிஸுத்தக’’ந்தி.
Tena kho pana samayena chabbaggiyā bhikkhuniyo sabbakālaṃ kaṭisuttakaṃ dhārenti. Manussā ujjhāyanti khiyyanti vipācenti – seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā sabbakālaṃ kaṭisuttakaṃ dhāretabbaṃ. Yā dhāreyya, āpatti dukkaṭassa. Anujānāmi, bhikkhave, utuniyā kaṭisuttaka’’nti.
து³தியபா⁴ணவாரோ நிட்டி²தோ.
Dutiyabhāṇavāro niṭṭhito.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பி⁴க்கு²னீஉபஸம்பதா³னுஜானநகதா² • Bhikkhunīupasampadānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பி⁴க்கு²னீஉபஸம்பன்னானுஜானநகதா²வண்ணனா • Bhikkhunīupasampannānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பி⁴க்கு²னீஉபஸம்பதா³னுஜானநகதா²வண்ணனா • Bhikkhunīupasampadānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பி⁴க்கு²னீஉபஸம்பதா³னுஜானநகதா²வண்ணனா • Bhikkhunīupasampadānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / பி⁴க்கு²னீஉபஸம்பதா³னுஜானநகதா² • Bhikkhunīupasampadānujānanakathā
