| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
༢. དུཏིཡབྷཱཎཝཱརོ
2. Dutiyabhāṇavāro
༤༥༣. ཨསྶོསུཾ ཁོ ཝེསཱལིཀཱ ཝཛྫིཔུཏྟཀཱ བྷིཀྑཱུ – ‘‘ཡསོ ཀིར ཀཱཀཎྜཀཔུཏྟོ ཨིདཾ ཨདྷིཀརཎཾ ཨཱདིཡིཏུཀཱམོ པཀྑཾ པརིཡེསཏི, ལབྷཏི ཙ ཀིར པཀྑ’’ནྟི། ཨཐ ཁོ ཝེསཱལིཀཱནཾ ཝཛྫིཔུཏྟཀཱནཾ བྷིཀྑཱུནཾ ཨེཏདཧོསི – ‘‘ཨིདཾ ཁོ ཨདྷིཀརཎཾ ཀཀྑལ༹ཉྩ ཝཱལ༹ཉྩ། ཀཾ ནུ ཁོ མཡཾ པཀྑཾ ལབྷེཡྻཱམ, ཡེན མཡཾ ཨིམསྨིཾ ཨདྷིཀརཎེ བལཝནྟཏརཱ ཨསྶཱམཱ’’ཏི།
453. Assosuṃ kho vesālikā vajjiputtakā bhikkhū – ‘‘yaso kira kākaṇḍakaputto idaṃ adhikaraṇaṃ ādiyitukāmo pakkhaṃ pariyesati, labhati ca kira pakkha’’nti. Atha kho vesālikānaṃ vajjiputtakānaṃ bhikkhūnaṃ etadahosi – ‘‘idaṃ kho adhikaraṇaṃ kakkhaḷañca vāḷañca. Kaṃ nu kho mayaṃ pakkhaṃ labheyyāma, yena mayaṃ imasmiṃ adhikaraṇe balavantatarā assāmā’’ti.
ཨཐ ཁོ ཝེསཱལིཀཱནཾ ཝཛྫིཔུཏྟཀཱནཾ བྷིཀྑཱུནཾ ཨེཏདཧོསི – ‘‘ཨཡཾ ཁོ ཨཱཡསྨཱ རེཝཏོ བཧུསྶུཏོ ཨཱགཏཱགམོ དྷམྨདྷརོ ཝིནཡདྷརོ མཱཏིཀཱདྷརོ པཎྜིཏོ ཝིཡཏྟོ མེདྷཱཝཱི ལཛྫཱི ཀུཀྐུཙྩཀོ སིཀྑཱཀཱམོ། སཙེ མཡཾ ཨཱཡསྨནྟཾ རེཝཏཾ པཀྑཾ ལབྷེཡྻཱམ, ཨེཝཾ མཡཾ ཨིམསྨིཾ ཨདྷིཀརཎེ བལཝནྟཏརཱ ཨསྶཱམཱ’’ཏི།
Atha kho vesālikānaṃ vajjiputtakānaṃ bhikkhūnaṃ etadahosi – ‘‘ayaṃ kho āyasmā revato bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. Sace mayaṃ āyasmantaṃ revataṃ pakkhaṃ labheyyāma, evaṃ mayaṃ imasmiṃ adhikaraṇe balavantatarā assāmā’’ti.
ཨཐ ཁོ ཝེསཱལིཀཱ ཝཛྫིཔུཏྟཀཱ བྷིཀྑཱུ པཧཱུཏཾ སཱམཎཀཾ པརིཀྑཱརཾ པཊིཡཱདེསུཾ – པཏྟམྤི, ཙཱིཝརམྤི, ནིསཱིདནམྤི, སཱུཙིགྷརམྤི, ཀཱཡབནྡྷནམྤི, པརིསྶཱཝནམྤི, དྷམྨཀརཎམྤི། ཨཐ ཁོ ཝེསཱལིཀཱ ཝཛྫིཔུཏྟཀཱ བྷིཀྑཱུ ཏཾ སཱམཎཀཾ པརིཀྑཱརཾ ཨཱདཱཡ ནཱཝཱཡ སཧཛཱཏིཾ ཨུཛྫཝིཾསུ; ནཱཝཱཡ པཙྩོརོཧིཏྭཱ ཨཉྙཏརསྨིཾ རུཀྑམཱུལེ བྷཏྟཝིསྶགྒཾ ཀརོནྟི། ཨཐ ཁོ ཨཱཡསྨཏོ སཱལ༹ྷསྶ རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི – ‘‘ཀེ ནུ ཁོ དྷམྨཝཱདིནོ – པཱཙཱིནཀཱ ཝཱ བྷིཀྑཱུ, པཱཝེཡྻཀཱ ཝཱ’’ཏི? ཨཐ ཁོ ཨཱཡསྨཏོ སཱལ༹ྷསྶ, དྷམྨཉྩ ཝིནཡཉྩ ཙེཏསཱ པཙྩཝེཀྑནྟསྶ, ཨེཏདཧོསི – ‘‘ཨདྷམྨཝཱདིནོ པཱཙཱིནཀཱ བྷིཀྑཱུ, དྷམྨཝཱདིནོ པཱཝེཡྻཀཱ 1 བྷིཀྑཱུ’’ཏི།
Atha kho vesālikā vajjiputtakā bhikkhū pahūtaṃ sāmaṇakaṃ parikkhāraṃ paṭiyādesuṃ – pattampi, cīvarampi, nisīdanampi, sūcigharampi, kāyabandhanampi, parissāvanampi, dhammakaraṇampi. Atha kho vesālikā vajjiputtakā bhikkhū taṃ sāmaṇakaṃ parikkhāraṃ ādāya nāvāya sahajātiṃ ujjaviṃsu; nāvāya paccorohitvā aññatarasmiṃ rukkhamūle bhattavissaggaṃ karonti. Atha kho āyasmato sāḷhassa rahogatassa paṭisallīnassa evaṃ cetaso parivitakko udapādi – ‘‘ke nu kho dhammavādino – pācīnakā vā bhikkhū, pāveyyakā vā’’ti? Atha kho āyasmato sāḷhassa, dhammañca vinayañca cetasā paccavekkhantassa, etadahosi – ‘‘adhammavādino pācīnakā bhikkhū, dhammavādino pāveyyakā 2 bhikkhū’’ti.
ཨཐ ཁོ ཨཉྙཏརཱ སུདྡྷཱཝཱསཀཱཡིཀཱ དེཝཏཱ ཨཱཡསྨཏོ སཱལ༹ྷསྶ ཙེཏསཱ ཙེཏོཔརིཝིཏཀྐམཉྙཱཡ – སེཡྻཐཱཔི ནཱམ བལཝཱ པུརིསོ སམིཉྫིཏཾ ཝཱ བཱཧཾ པསཱརེཡྻ, པསཱརིཏཾ ཝཱ བཱཧཾ སམྨིཉྫེཡྻ, ཨེཝམེཝ སུདྡྷཱཝཱསེསུ དེཝེསུ ཨནྟརཧིཏཱ – ཨཱཡསྨཏོ སཱལ༹ྷསྶ སམྨུཁེ པཱཏུརཧོསི། ཨཐ ཁོ སཱ དེཝཏཱ ཨཱཡསྨནྟཾ སཱལ༹ྷཾ ཨེཏདཝོཙ – ‘‘སཱདྷུ, བྷནྟེ སཱལ༹ྷ, ཨདྷམྨཝཱདཱི པཱཙཱིནཀཱ བྷིཀྑཱུ, དྷམྨཝཱདཱི པཱཝེཡྻཀཱ བྷིཀྑཱུ། ཏེན ཧི, བྷནྟེ སཱལ༹ྷ, ཡཐཱདྷམྨོ ཏཐཱ ཏིཊྛཱཧཱི’’ཏི། ‘‘པུབྦེཔི ཙཱཧཾ, དེཝཏེ, ཨེཏརཧི ཙ ཡཐཱདྷམྨོ ཏཐཱ ཋིཏོ ; ཨཔི ཙཱཧཾ ན ཏཱཝ དིཊྛིཾ ཨཱཝི ཀརོམི, ཨཔྤེཝ ནཱམ མཾ ཨིམསྨིཾ ཨདྷིཀརཎེ སམྨནྣེཡྻཱ’’ཏི།
Atha kho aññatarā suddhāvāsakāyikā devatā āyasmato sāḷhassa cetasā cetoparivitakkamaññāya – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ sammiñjeyya, evameva suddhāvāsesu devesu antarahitā – āyasmato sāḷhassa sammukhe pāturahosi. Atha kho sā devatā āyasmantaṃ sāḷhaṃ etadavoca – ‘‘sādhu, bhante sāḷha, adhammavādī pācīnakā bhikkhū, dhammavādī pāveyyakā bhikkhū. Tena hi, bhante sāḷha, yathādhammo tathā tiṭṭhāhī’’ti. ‘‘Pubbepi cāhaṃ, devate, etarahi ca yathādhammo tathā ṭhito ; api cāhaṃ na tāva diṭṭhiṃ āvi karomi, appeva nāma maṃ imasmiṃ adhikaraṇe sammanneyyā’’ti.
༤༥༤. ཨཐ ཁོ ཝེསཱལིཀཱ ཝཛྫིཔུཏྟཀཱ བྷིཀྑཱུ ཏཾ སཱམཎཀཾ པརིཀྑཱརཾ ཨཱདཱཡ ཡེནཱཡསྨཱ རེཝཏོ ཏེནུཔསངྐམིཾསུ, ཨུཔསངྐམིཏྭཱ ཨཱཡསྨནྟཾ རེཝཏཾ ཨེཏདཝོཙུཾ – ‘‘པཊིགྒཎྷཱཏུ, བྷནྟེ, ཐེརོ སཱམཎཀཾ པརིཀྑཱརཾ – པཏྟམྤི, ཙཱིཝརམྤི, ནིསཱིདནམྤི, སཱུཙིགྷརམྤི, ཀཱཡབནྡྷནམྤི, པརིསྶཱཝནམྤི, དྷམྨཀརཎམྤཱི’’ཏི། ‘‘ཨལཾ, ཨཱཝུསོ, པརིཔུཎྞཾ མེ པཏྟཙཱིཝར’’ནྟི ན ཨིཙྪི པཊིགྒཧེཏུཾ།
454. Atha kho vesālikā vajjiputtakā bhikkhū taṃ sāmaṇakaṃ parikkhāraṃ ādāya yenāyasmā revato tenupasaṅkamiṃsu, upasaṅkamitvā āyasmantaṃ revataṃ etadavocuṃ – ‘‘paṭiggaṇhātu, bhante, thero sāmaṇakaṃ parikkhāraṃ – pattampi, cīvarampi, nisīdanampi, sūcigharampi, kāyabandhanampi, parissāvanampi, dhammakaraṇampī’’ti. ‘‘Alaṃ, āvuso, paripuṇṇaṃ me pattacīvara’’nti na icchi paṭiggahetuṃ.
ཏེན ཁོ པན སམཡེན ཨུཏྟརོ ནཱམ བྷིཀྑུ ཝཱིསཏིཝསྶོ ཨཱཡསྨཏོ རེཝཏསྶ ཨུཔཊྛཱཀོ ཧོཏི། ཨཐ ཁོ ཝེསཱལིཀཱ ཝཛྫིཔུཏྟཀཱ བྷིཀྑཱུ ཡེནཱཡསྨཱ ཨུཏྟརོ ཏེནུཔསངྐམིཾསུ, ཨུཔསངྐམིཏྭཱ ཨཱཡསྨནྟཾ ཨུཏྟརཾ ཨེཏདཝོཙུཾ – ‘‘པཊིགྒཎྷཱཏུ ཨཱཡསྨཱ ཨུཏྟརོ སཱམཎཀཾ པརིཀྑཱརཾ – པཏྟམྤི, ཙཱིཝརམྤི, ནིསཱིདནམྤི, སཱུཙིགྷརམྤི, ཀཱཡབནྡྷནམྤི, པརིསྶཱཝནམྤི, དྷམྨཀརཎམྤཱི’’ཏི། ‘‘ཨལཾ, ཨཱཝུསོ, པརིཔུཎྞཾ མེ པཏྟཙཱིཝར’’ནྟི ན ཨིཙྪི པཊིགྒཧེཏུཾ། ‘‘མནུསྶཱ ཁོ, ཨཱཝུསོ ཨུཏྟར, བྷགཝཏོ སཱམཎཀཾ པརིཀྑཱརཾ ཨུཔནཱམེནྟི། སཙེ བྷགཝཱ པཊིགྒཎྷཱཏི, ཏེནེཝ ཏེ ཨཏྟམནཱ ཧོནྟི། ནོ ཙེ བྷགཝཱ པཊིགྒཎྷཱཏི, ཨཱཡསྨཏོ 3 ཨཱནནྡསྶ ཨུཔནཱམེནྟི – པཊིགྒཎྷཱཏུ, བྷནྟེ, ཐེརོ སཱམཎཀཾ པརིཀྑཱརཾ། ཡཐཱ བྷགཝཏཱ པཊིགྒཧིཏོ, ཨེཝམེཝ སོ བྷཝིསྶཏཱིཏི། པཊིགྒཎྷཱཏུ ཨཱཡསྨཱ ཨུཏྟརོ སཱམཎཀཾ པརིཀྑཱརཾ། ཡཐཱ ཐེརེན པཊིགྒཧིཏོ, ཨེཝམེཝ སོ བྷཝིསྶཏཱི’’ཏི། ཨཐ ཁོ ཨཱཡསྨཱ ཨུཏྟརོ ཝེསཱལིཀེཧི ཝཛྫིཔུཏྟེཧི བྷིཀྑཱུཧི ནིཔྤཱིལི༹ཡམཱནོ ཨེཀཾ ཙཱིཝརཾ ཨགྒཧེསི། ‘‘ཝདེཡྻཱཐ, ཨཱཝུསོ, ཡེན ཨཏྠོ’’ཏི། ‘‘ཨེཏྟཀཾ ཨཱཡསྨཱ ཨུཏྟརོ ཐེརཾ ཝདེཏུ; ཨེཏྟཀཉྩ, བྷནྟེ, ཐེརོ སངྒྷམཛ྄ཛྷེ ཝདེཏུ – ‘པུརཏྠིམེསུ ཛནཔདེསུ བུདྡྷཱ བྷགཝནྟོ ཨུཔྤཛྫནྟི། དྷམྨཝཱདཱི པཱཙཱིནཀཱ བྷིཀྑཱུ, ཨདྷམྨཝཱདཱི པཱཝེཡྻཀཱ བྷིཀྑཱུ’’’ཏི། ‘‘ཨེཝམཱཝུསོ’’ཏི ཁོ ཨཱཡསྨཱ ཨུཏྟརོ ཝེསཱལིཀཱནཾ ཝཛྫིཔུཏྟཀཱནཾ བྷིཀྑཱུནཾ པཊིསྶུཏྭཱ ཡེནཱཡསྨཱ རེཝཏོ ཏེནུཔསངྐམི, ཨུཔསངྐམིཏྭཱ ཨཱཡསྨནྟཾ རེཝཏཾ ཨེཏདཝོཙ – ‘‘ཨེཏྟཀཾ, བྷནྟེ, ཐེརོ སངྒྷམཛ྄ཛྷེ ཝདེཏུ – ‘པུརཏྠིམེསུ ཛནཔདེསུ བུདྡྷཱ བྷགཝནྟོ ཨུཔྤཛྫནྟི ། དྷམྨཝཱདཱི པཱཙཱིནཀཱ བྷིཀྑཱུ, ཨདྷམྨཝཱདཱི པཱཝེཡྻཀཱ བྷིཀྑཱུ’’’ཏི། ‘‘ཨདྷམྨེ མཾ ཏྭཾ, བྷིཀྑུ, ནིཡོཛེསཱི’’ཏི ཐེརོ ཨཱཡསྨནྟཾ ཨུཏྟརཾ པཎཱམེསི།
Tena kho pana samayena uttaro nāma bhikkhu vīsativasso āyasmato revatassa upaṭṭhāko hoti. Atha kho vesālikā vajjiputtakā bhikkhū yenāyasmā uttaro tenupasaṅkamiṃsu, upasaṅkamitvā āyasmantaṃ uttaraṃ etadavocuṃ – ‘‘paṭiggaṇhātu āyasmā uttaro sāmaṇakaṃ parikkhāraṃ – pattampi, cīvarampi, nisīdanampi, sūcigharampi, kāyabandhanampi, parissāvanampi, dhammakaraṇampī’’ti. ‘‘Alaṃ, āvuso, paripuṇṇaṃ me pattacīvara’’nti na icchi paṭiggahetuṃ. ‘‘Manussā kho, āvuso uttara, bhagavato sāmaṇakaṃ parikkhāraṃ upanāmenti. Sace bhagavā paṭiggaṇhāti, teneva te attamanā honti. No ce bhagavā paṭiggaṇhāti, āyasmato 4 ānandassa upanāmenti – paṭiggaṇhātu, bhante, thero sāmaṇakaṃ parikkhāraṃ. Yathā bhagavatā paṭiggahito, evameva so bhavissatīti. Paṭiggaṇhātu āyasmā uttaro sāmaṇakaṃ parikkhāraṃ. Yathā therena paṭiggahito, evameva so bhavissatī’’ti. Atha kho āyasmā uttaro vesālikehi vajjiputtehi bhikkhūhi nippīḷiyamāno ekaṃ cīvaraṃ aggahesi. ‘‘Vadeyyātha, āvuso, yena attho’’ti. ‘‘Ettakaṃ āyasmā uttaro theraṃ vadetu; ettakañca, bhante, thero saṅghamajjhe vadetu – ‘puratthimesu janapadesu buddhā bhagavanto uppajjanti. Dhammavādī pācīnakā bhikkhū, adhammavādī pāveyyakā bhikkhū’’’ti. ‘‘Evamāvuso’’ti kho āyasmā uttaro vesālikānaṃ vajjiputtakānaṃ bhikkhūnaṃ paṭissutvā yenāyasmā revato tenupasaṅkami, upasaṅkamitvā āyasmantaṃ revataṃ etadavoca – ‘‘ettakaṃ, bhante, thero saṅghamajjhe vadetu – ‘puratthimesu janapadesu buddhā bhagavanto uppajjanti . Dhammavādī pācīnakā bhikkhū, adhammavādī pāveyyakā bhikkhū’’’ti. ‘‘Adhamme maṃ tvaṃ, bhikkhu, niyojesī’’ti thero āyasmantaṃ uttaraṃ paṇāmesi.
ཨཐ ཁོ ཝེསཱལིཀཱ ཝཛྫིཔུཏྟཀཱ བྷིཀྑཱུ ཨཱཡསྨནྟཾ ཨུཏྟརཾ ཨེཏདཝོཙུཾ – ‘‘ཀིཾ, ཨཱཝུསོ ཨུཏྟར, ཐེརོ ཨཱཧཱ’’ཏི? ‘‘པཱཔིཀཾ ནོ, ཨཱཝུསོ, ཀཏཾ། ‘ཨདྷམྨེ མཾ ཏྭཾ, བྷིཀྑུ, ནིཡོཛེསཱི’’’ཏི ཐེརོ མཾ པཎཱམེསཱིཏི། ‘‘ནནུ ཏྭཾ, ཨཱཝུསོ 5, ཝུཌྜྷོ ཝཱིསཏིཝསྶོསཱི’’ཏི? ‘‘ཨཱམཱཝུསོ, ཨཔི ཙ མཡཾ གརུནིསྶཡཾ གཎྷཱམཱ’’ཏི།
Atha kho vesālikā vajjiputtakā bhikkhū āyasmantaṃ uttaraṃ etadavocuṃ – ‘‘kiṃ, āvuso uttara, thero āhā’’ti? ‘‘Pāpikaṃ no, āvuso, kataṃ. ‘Adhamme maṃ tvaṃ, bhikkhu, niyojesī’’’ti thero maṃ paṇāmesīti. ‘‘Nanu tvaṃ, āvuso 6, vuḍḍho vīsativassosī’’ti? ‘‘Āmāvuso, api ca mayaṃ garunissayaṃ gaṇhāmā’’ti.
༤༥༥. ཨཐ ཁོ སངྒྷོ ཏཾ ཨདྷིཀརཎཾ ཝིནིཙྪིནིཏུཀཱམོ སནྣིཔཏི། ཨཐ ཁོ ཨཱཡསྨཱ རེཝཏོ སངྒྷཾ ཉཱཔེསི –
455. Atha kho saṅgho taṃ adhikaraṇaṃ vinicchinitukāmo sannipati. Atha kho āyasmā revato saṅghaṃ ñāpesi –
‘‘སུཎཱཏུ མེ, ཨཱཝུསོ, སངྒྷོ། སཙེ མཡཾ ཨིམཾ ཨདྷིཀརཎཾ ཨིདྷ ཝཱུཔསམེསྶཱམ, སིཡཱཔི མཱུལཱདཱཡཀཱ 7 བྷིཀྑཱུ པུནཀམྨཱཡ ཨུཀྐོཊེཡྻུཾ། ཡདི སངྒྷསྶ པཏྟཀལླཾ, ཡཏྠེཝིམཾ ཨདྷིཀརཎཾ སམུཔྤནྣཾ, སངྒྷོ ཏཏྠེཝིམཾ ཨདྷིཀརཎཾ ཝཱུཔསམེཡྻཱ’’ཏི།
‘‘Suṇātu me, āvuso, saṅgho. Sace mayaṃ imaṃ adhikaraṇaṃ idha vūpasamessāma, siyāpi mūlādāyakā 8 bhikkhū punakammāya ukkoṭeyyuṃ. Yadi saṅghassa pattakallaṃ, yatthevimaṃ adhikaraṇaṃ samuppannaṃ, saṅgho tatthevimaṃ adhikaraṇaṃ vūpasameyyā’’ti.
ཨཐ ཁོ ཐེརཱ བྷིཀྑཱུ ཝེསཱལིཾ ཨགམཾསུ – ཏཾ ཨདྷིཀརཎཾ ཝིནིཙྪིནིཏུཀཱམཱ།
Atha kho therā bhikkhū vesāliṃ agamaṃsu – taṃ adhikaraṇaṃ vinicchinitukāmā.
ཏེན ཁོ པན སམཡེན སབྦཀཱམཱི ནཱམ པཐབྱཱ སངྒྷཏྠེརོ ཝཱིསཝསྶསཏིཀོ ཨུཔསམྤདཱཡ, ཨཱཡསྨཏོ ཨཱནནྡསྶ སདྡྷིཝིཧཱརིཀོ, ཝེསཱལིཡཾ པཊིཝསཏི། ཨཐ ཁོ ཨཱཡསྨཱ རེཝཏོ ཨཱཡསྨནྟཾ སམྦྷཱུཏཾ སཱཎཝཱསིཾ ཨེཏདཝོཙ – ‘‘ཨཧཾ, ཨཱཝུསོ, ཡསྨིཾ ཝིཧཱརེ སབྦཀཱམཱི ཐེརོ ཝིཧརཏི, ཏཾ ཝིཧཱརཾ ཨུཔགཙྪཱམི། སོ ཏྭཾ ཀཱལསྶེཝ ཨཱཡསྨནྟཾ སབྦཀཱམིཾ ཨུཔསངྐམིཏྭཱ ཨིམཱནི དས ཝཏྠཱུནི པུཙྪེཡྻཱསཱི’’ཏི།
Tena kho pana samayena sabbakāmī nāma pathabyā saṅghatthero vīsavassasatiko upasampadāya, āyasmato ānandassa saddhivihāriko, vesāliyaṃ paṭivasati. Atha kho āyasmā revato āyasmantaṃ sambhūtaṃ sāṇavāsiṃ etadavoca – ‘‘ahaṃ, āvuso, yasmiṃ vihāre sabbakāmī thero viharati, taṃ vihāraṃ upagacchāmi. So tvaṃ kālasseva āyasmantaṃ sabbakāmiṃ upasaṅkamitvā imāni dasa vatthūni puccheyyāsī’’ti.
‘‘ཨེཝཾ བྷནྟེ’’ཏི ཁོ ཨཱཡསྨཱ སམྦྷཱུཏོ སཱཎཝཱསཱི ཨཱཡསྨཏོ རེཝཏསྶ པཙྩསྶོསི། ཨཐ ཁོ ཨཱཡསྨཱ རེཝཏོ, ཡསྨིཾ ཝིཧཱརེ སབྦཀཱམཱི ཐེརོ ཝིཧརཏི, ཏཾ ཝིཧཱརཾ ཨུཔགཙྪི། གབྦྷེ ཨཱཡསྨཏོ སབྦཀཱམིསྶ སེནཱསནཾ པཉྙཏྟཾ ཧོཏི, གབྦྷཔྤམུཁེ ཨཱཡསྨཏོ རེཝཏསྶ། ཨཐ ཁོ ཨཱཡསྨཱ རེཝཏོ – ཨཡཾ ཐེརོ མཧལླཀོ ན ནིཔཛྫཏཱིཏི – ན སེཡྻཾ ཀཔྤེསི། ཨཱཡསྨཱ སབྦཀཱམཱི – ཨཡཾ བྷིཀྑུ ཨཱགནྟུཀོ ཀིལནྟོ ན ནིཔཛྫཏཱིཏི – ན སེཡྻཾ ཀཔྤེསི། ཨཐ ཁོ ཨཱཡསྨཱ སབྦཀཱམཱི རཏྟིཡཱ པཙྩཱུསསམཡཾ པཙྩུཊྛཱཡ ཨཱཡསྨནྟཾ རེཝཏཾ ཨེཏདཝོཙ – ‘‘ཀཏམེན ཏྭཾ བྷཱུམི ཝིཧཱརེན ཨེཏརཧི བཧུལཾ ཝིཧརསཱི’’ཏི? ‘‘མེཏྟཱཝིཧཱརེན ཁོ ཨཧཾ , བྷནྟེ, ཨེཏརཧི བཧུལཾ ཝིཧརཱམཱི’’ཏི། ‘‘ཀུལླཀཝིཧཱརེན ཀིར ཏྭཾ བྷཱུམི ཨེཏརཧི བཧུལཾ ཝིཧརསི ། ཀུལླཀཝིཧཱརོ ཨེསོ 9 བྷཱུམི ཡདིདཾ མེཏྟཱ’’ཏི། ‘‘པུབྦེཔི མེ, བྷནྟེ, གིཧིབྷཱུཏསྶ ཨཱཙིཎྞཱ མེཏྟཱ། ཏེནཱཧཾ ཨེཏརཧིཔི མེཏྟཱཝིཧཱརེན བཧུལཾ ཝིཧརཱམི, ཨཔི ཙ ཁོ མཡཱ ཙིརཔྤཏྟཾ ཨརཧཏྟ’’ནྟི། ‘‘ཐེརོ པན, བྷནྟེ, ཀཏམེན ཝིཧཱརེན ཨེཏརཧི བཧུལཾ ཝིཧརཏཱི’’ཏི? ‘‘སུཉྙཏཱཝིཧཱརེན ཁོ ཨཧཾ བྷཱུམི ཨེཏརཧི བཧུལཾ ཝིཧརཱམཱི’’ཏི། ‘‘མཧཱཔུརིསཝིཧཱརེན ཀིར, བྷནྟེ, ཐེརོ ཨེཏརཧི བཧུལཾ ཝིཧརཏི། མཧཱཔུརིསཝིཧཱརོ ཨེསོ, བྷནྟེ, ཡདིདཾ སུཉྙཏཱ’’ཏི། ‘‘པུབྦེཔི མེ བྷཱུམི གིཧིབྷཱུཏསྶ ཨཱཙིཎྞཱ སུཉྙཏཱ། ཏེནཱཧཾ ཨེཏརཧིཔི སུཉྙཏཱཝིཧཱརེན བཧུལཾ ཝིཧརཱམི, ཨཔི ཙ མཡཱ ཙིརཔྤཏྟཾ ཨརཧཏྟ’’ནྟི། ཨཡཉྩརཧི ཐེརཱནཾ བྷིཀྑཱུནཾ ཨནྟརཱཀཐཱ ཝིཔྤཀཏཱ, ཨཐཱཡསྨཱ སམྦྷཱུཏོ སཱཎཝཱསཱི ཏསྨིཾ ཨནུཔྤཏྟོ ཧོཏི། ཨཐ ཁོ ཨཱཡསྨཱ སམྦྷཱུཏོ སཱཎཝཱསཱི ཡེནཱཡསྨཱ སབྦཀཱམཱི ཏེནུཔསངྐམི, ཨུཔསངྐམིཏྭཱ ཨཱཡསྨནྟཾ སབྦཀཱམིཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ སམྦྷཱུཏོ སཱཎཝཱསཱི ཨཱཡསྨནྟཾ སབྦཀཱམིཾ ཨེཏདཝོཙ – ‘‘ཨིམེ, བྷནྟེ, ཝེསཱལིཀཱ ཝཛྫིཔུཏྟཀཱ བྷིཀྑཱུ ཝེསཱལིཡཾ དས ཝཏྠཱུནི དཱིཔེནྟི – ཀཔྤཏི སིངྒིལོཎཀཔྤོ, ཀཔྤཏི དྭངྒུལཀཔྤོ, ཀཔྤཏི གཱམནྟརཀཔྤོ, ཀཔྤཏི ཨཱཝཱསཀཔྤོ, ཀཔྤཏི ཨནུམཏིཀཔྤོ, ཀཔྤཏི ཨཱཙིཎྞཀཔྤོ, ཀཔྤཏི ཨམཐིཏཀཔྤོ, ཀཔྤཏི ཛལོ༹གིཾ , པཱཏུཾ ཀཔྤཏི ཨདསཀཾ ནིསཱིདནཾ, ཀཔྤཏི ཛཱཏརཱུཔརཛཏནྟི། ཐེརེན, བྷནྟེ, ཨུཔཛ྄ཛྷཱཡསྶ མཱུལེ བཧུདྷམྨོ ཙ ཝིནཡོ ཙ པརིཡཏྟོ། ཐེརསྶ བྷནྟེ, དྷམྨཉྩ ཝིནཡཉྩ པཙྩཝེཀྑནྟསྶ ཀཐཾ ཧོཏི? ཀེ ནུ ཁོ དྷམྨཝཱདིནོ – པཱཙཱིནཀཱ ཝཱ བྷིཀྑཱུ, པཱཝེཡྻཀཱ ཝཱ’’ཏི? ‘‘ཏཡཱཔི ཁོ, ཨཱཝུསོ, ཨུཔཛ྄ཛྷཱཡསྶ མཱུལེ བཧུ དྷམྨོ ཙ ཝིནཡོ ཙ པརིཡཏྟོ། ཏུཡ྄ཧཾ པན, ཨཱཝུསོ, དྷམྨཉྩ ཝིནཡཉྩ པཙྩཝེཀྑནྟསྶ ཀཐཾ ཧོཏི? ཀེ ནུ ཁོ དྷམྨཝཱདིནོ – པཱཙཱིནཀཱ ཝཱ བྷིཀྑཱུ, པཱཝེཡྻཀཱ ཝཱ’’ཏི? ‘‘མཡ྄ཧཾ ཁོ, བྷནྟེ, དྷམྨཉྩ ཝིནཡཉྩ པཙྩཝེཀྑནྟསྶ ཨེཝཾ ཧོཏི – ཨདྷམྨཝཱདཱི པཱཙཱིནཀཱ བྷིཀྑཱུ, དྷམྨཝཱདཱི པཱཝེཡྻཀཱ བྷིཀྑཱུཏི; ཨཔི ཙཱཧཾ ན ཏཱཝ དིཊྛིཾ ཨཱཝི ཀརོམི, ཨཔྤེཝ ནཱམ མཾ ཨིམསྨིཾ ཨདྷིཀརཎེ སམྨནྣེཡྻཱ’’ཏི། ‘‘མཡ྄ཧམྤི ཁོ, ཨཱཝུསོ, དྷམྨཉྩ ཝིནཡཉྩ པཙྩཝེཀྑནྟསྶ ཨེཝཾ ཧོཏི – ཨདྷམྨཝཱདཱི པཱཙཱིནཀཱ བྷིཀྑཱུ, དྷམྨཝཱདཱི པཱཝེཡྻཀཱ བྷིཀྑཱུཏི; ཨཔི ཙཱཧཾ ན ཏཱཝ དིཊྛིཾ ཨཱཝི ཀརོམི, ཨཔྤེཝ ནཱམ མཾ ཨིམསྨིཾ ཨདྷིཀརཎེ སམྨནྣེཡྻཱ’’ཏི།
‘‘Evaṃ bhante’’ti kho āyasmā sambhūto sāṇavāsī āyasmato revatassa paccassosi. Atha kho āyasmā revato, yasmiṃ vihāre sabbakāmī thero viharati, taṃ vihāraṃ upagacchi. Gabbhe āyasmato sabbakāmissa senāsanaṃ paññattaṃ hoti, gabbhappamukhe āyasmato revatassa. Atha kho āyasmā revato – ayaṃ thero mahallako na nipajjatīti – na seyyaṃ kappesi. Āyasmā sabbakāmī – ayaṃ bhikkhu āgantuko kilanto na nipajjatīti – na seyyaṃ kappesi. Atha kho āyasmā sabbakāmī rattiyā paccūsasamayaṃ paccuṭṭhāya āyasmantaṃ revataṃ etadavoca – ‘‘katamena tvaṃ bhūmi vihārena etarahi bahulaṃ viharasī’’ti? ‘‘Mettāvihārena kho ahaṃ , bhante, etarahi bahulaṃ viharāmī’’ti. ‘‘Kullakavihārena kira tvaṃ bhūmi etarahi bahulaṃ viharasi . Kullakavihāro eso 10 bhūmi yadidaṃ mettā’’ti. ‘‘Pubbepi me, bhante, gihibhūtassa āciṇṇā mettā. Tenāhaṃ etarahipi mettāvihārena bahulaṃ viharāmi, api ca kho mayā cirappattaṃ arahatta’’nti. ‘‘Thero pana, bhante, katamena vihārena etarahi bahulaṃ viharatī’’ti? ‘‘Suññatāvihārena kho ahaṃ bhūmi etarahi bahulaṃ viharāmī’’ti. ‘‘Mahāpurisavihārena kira, bhante, thero etarahi bahulaṃ viharati. Mahāpurisavihāro eso, bhante, yadidaṃ suññatā’’ti. ‘‘Pubbepi me bhūmi gihibhūtassa āciṇṇā suññatā. Tenāhaṃ etarahipi suññatāvihārena bahulaṃ viharāmi, api ca mayā cirappattaṃ arahatta’’nti. Ayañcarahi therānaṃ bhikkhūnaṃ antarākathā vippakatā, athāyasmā sambhūto sāṇavāsī tasmiṃ anuppatto hoti. Atha kho āyasmā sambhūto sāṇavāsī yenāyasmā sabbakāmī tenupasaṅkami, upasaṅkamitvā āyasmantaṃ sabbakāmiṃ abhivādetvā ekamantaṃ nisīdi. Ekamantaṃ nisinno kho āyasmā sambhūto sāṇavāsī āyasmantaṃ sabbakāmiṃ etadavoca – ‘‘ime, bhante, vesālikā vajjiputtakā bhikkhū vesāliyaṃ dasa vatthūni dīpenti – kappati siṅgiloṇakappo, kappati dvaṅgulakappo, kappati gāmantarakappo, kappati āvāsakappo, kappati anumatikappo, kappati āciṇṇakappo, kappati amathitakappo, kappati jaḷogiṃ , pātuṃ kappati adasakaṃ nisīdanaṃ, kappati jātarūparajatanti. Therena, bhante, upajjhāyassa mūle bahudhammo ca vinayo ca pariyatto. Therassa bhante, dhammañca vinayañca paccavekkhantassa kathaṃ hoti? Ke nu kho dhammavādino – pācīnakā vā bhikkhū, pāveyyakā vā’’ti? ‘‘Tayāpi kho, āvuso, upajjhāyassa mūle bahu dhammo ca vinayo ca pariyatto. Tuyhaṃ pana, āvuso, dhammañca vinayañca paccavekkhantassa kathaṃ hoti? Ke nu kho dhammavādino – pācīnakā vā bhikkhū, pāveyyakā vā’’ti? ‘‘Mayhaṃ kho, bhante, dhammañca vinayañca paccavekkhantassa evaṃ hoti – adhammavādī pācīnakā bhikkhū, dhammavādī pāveyyakā bhikkhūti; api cāhaṃ na tāva diṭṭhiṃ āvi karomi, appeva nāma maṃ imasmiṃ adhikaraṇe sammanneyyā’’ti. ‘‘Mayhampi kho, āvuso, dhammañca vinayañca paccavekkhantassa evaṃ hoti – adhammavādī pācīnakā bhikkhū, dhammavādī pāveyyakā bhikkhūti; api cāhaṃ na tāva diṭṭhiṃ āvi karomi, appeva nāma maṃ imasmiṃ adhikaraṇe sammanneyyā’’ti.
༤༥༦. ཨཐ ཁོ སངྒྷོ ཏཾ ཨདྷིཀརཎཾ ཝིནིཙྪིནིཏུཀཱམོ སནྣིཔཏི། ཏསྨིཾ ཁོ པན ཨདྷིཀརཎེ ཝིནིཙྪིཡམཱནེ ཨནགྒཱནི ཙེཝ བྷསྶཱནི ཛཱཡནྟི, ན ཙེཀསྶ བྷཱསིཏསྶ ཨཏྠོ ཝིཉྙཱཡཏི། ཨཐ ཁོ ཨཱཡསྨཱ རེཝཏོ སངྒྷཾ ཉཱཔེསི –
456. Atha kho saṅgho taṃ adhikaraṇaṃ vinicchinitukāmo sannipati. Tasmiṃ kho pana adhikaraṇe vinicchiyamāne anaggāni ceva bhassāni jāyanti, na cekassa bhāsitassa attho viññāyati. Atha kho āyasmā revato saṅghaṃ ñāpesi –
‘‘སུཎཱཏུ མེ, བྷནྟེ, སངྒྷོ། ཨམྷཱཀཾ ཨིམསྨིཾ ཨདྷིཀརཎེ ཝིནིཙྪིཡམཱནེ ཨནགྒཱནི ཙེཝ བྷསྶཱནི ཛཱཡནྟི, ན ཙེཀསྶ བྷཱསིཏསྶ ཨཏྠོ ཝིཉྙཱཡཏི། ཡདི སངྒྷསྶ པཏྟཀལླཾ, སངྒྷོ ཨིམཾ ཨདྷིཀརཎཾ ཨུབྦཱཧིཀཱཡ ཝཱུཔསམེཡྻཱ’’ཏི། སངྒྷོ ཙཏྟཱརོ པཱཙཱིནཀེ བྷིཀྑཱུ, ཙཏྟཱརོ པཱཝེཡྻཀེ བྷིཀྑཱུ ཨུཙྩིནི། པཱཙཱིནཀཱནཾ བྷིཀྑཱུནཾ – ཨཱཡསྨནྟཉྩ སབྦཀཱམིཾ, ཨཱཡསྨནྟཉྩ སཱལ༹ྷཾ, ཨཱཡསྨནྟཉྩ ཁུཛྫསོབྷིཏཾ, ཨཱཡསྨནྟཉྩ ཝཱསབྷགཱམིཀཾ; པཱཝེཡྻཀཱནཾ བྷིཀྑཱུནཾ – ཨཱཡསྨནྟཉྩ རེཝཏཾ, ཨཱཡསྨནྟཉྩ སམྦྷཱུཏཾ སཱཎཝཱསིཾ, ཨཱཡསྨནྟཉྩ ཡསཾ ཀཱཀཎྜཀཔུཏྟཾ, ཨཱཡསྨནྟཉྩ སུམནནྟི། ཨཐ ཁོ ཨཱཡསྨཱ རེཝཏོ སངྒྷཾ ཉཱཔེསི –
‘‘Suṇātu me, bhante, saṅgho. Amhākaṃ imasmiṃ adhikaraṇe vinicchiyamāne anaggāni ceva bhassāni jāyanti, na cekassa bhāsitassa attho viññāyati. Yadi saṅghassa pattakallaṃ, saṅgho imaṃ adhikaraṇaṃ ubbāhikāya vūpasameyyā’’ti. Saṅgho cattāro pācīnake bhikkhū, cattāro pāveyyake bhikkhū uccini. Pācīnakānaṃ bhikkhūnaṃ – āyasmantañca sabbakāmiṃ, āyasmantañca sāḷhaṃ, āyasmantañca khujjasobhitaṃ, āyasmantañca vāsabhagāmikaṃ; pāveyyakānaṃ bhikkhūnaṃ – āyasmantañca revataṃ, āyasmantañca sambhūtaṃ sāṇavāsiṃ, āyasmantañca yasaṃ kākaṇḍakaputtaṃ, āyasmantañca sumananti. Atha kho āyasmā revato saṅghaṃ ñāpesi –
‘‘སུཎཱཏུ མེ, བྷནྟེ, སངྒྷོ། ཨམྷཱཀཾ ཨིམསྨིཾ ཨདྷིཀརཎེ ཝིནིཙྪིཡམཱནེ ཨནགྒཱནི ཙེཝ བྷསྶཱནི ཛཱཡནྟི, ན ཙེཀསྶ བྷཱསིཏསྶ ཨཏྠོ ཝིཉྙཱཡཏི། ཡདི སངྒྷསྶ པཏྟཀལླཾ, སངྒྷོ ཙཏྟཱརོ པཱཙཱིནཀེ བྷིཀྑཱུ, ཙཏྟཱརོ པཱཝེཡྻཀེ བྷིཀྑཱུ སམྨནྣེཡྻ ཨུབྦཱཧིཀཱཡ ཨིམཾ ཨདྷིཀརཎཾ ཝཱུཔསམེཏུཾ། ཨེསཱ ཉཏྟི།
‘‘Suṇātu me, bhante, saṅgho. Amhākaṃ imasmiṃ adhikaraṇe vinicchiyamāne anaggāni ceva bhassāni jāyanti, na cekassa bhāsitassa attho viññāyati. Yadi saṅghassa pattakallaṃ, saṅgho cattāro pācīnake bhikkhū, cattāro pāveyyake bhikkhū sammanneyya ubbāhikāya imaṃ adhikaraṇaṃ vūpasametuṃ. Esā ñatti.
‘‘སུཎཱཏུ མེ, བྷནྟེ, སངྒྷོ། ཨམྷཱཀཾ ཨིམསྨིཾ ཨདྷིཀརཎེ ཝིནིཙྪིཡམཱནེ ཨནགྒཱནི ཙེཝ བྷསྶཱནི ཛཱཡནྟི, ན ཙེཀསྶ བྷཱསིཏསྶ ཨཏྠོ ཝིཉྙཱཡཏི། སངྒྷོ ཙཏྟཱརོ པཱཙཱིནཀེ བྷིཀྑཱུ, ཙཏྟཱརོ པཱཝེཡྻཀེ བྷིཀྑཱུ སམྨནྣཏི ཨུབྦཱཧིཀཱཡ ཨིམཾ ཨདྷིཀརཎཾ ཝཱུཔསམེཏུཾ། ཡསྶཱཡསྨཏོ ཁམཏི ཙཏུནྣཾ པཱཙཱིནཀཱནཾ བྷིཀྑཱུནཾ, ཙཏུནྣཾ པཱཝེཡྻཀཱནཾ བྷིཀྑཱུནཾ སམྨུཏི, ཨུབྦཱཧིཀཱཡ ཨིམཾ ཨདྷིཀརཎཾ ཝཱུཔསམེཏུཾ , སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Amhākaṃ imasmiṃ adhikaraṇe vinicchiyamāne anaggāni ceva bhassāni jāyanti, na cekassa bhāsitassa attho viññāyati. Saṅgho cattāro pācīnake bhikkhū, cattāro pāveyyake bhikkhū sammannati ubbāhikāya imaṃ adhikaraṇaṃ vūpasametuṃ. Yassāyasmato khamati catunnaṃ pācīnakānaṃ bhikkhūnaṃ, catunnaṃ pāveyyakānaṃ bhikkhūnaṃ sammuti, ubbāhikāya imaṃ adhikaraṇaṃ vūpasametuṃ , so tuṇhassa; yassa nakkhamati, so bhāseyya.
‘‘སམྨཏཱ སངྒྷེན ཙཏྟཱརོ པཱཙཱིནཀཱ བྷིཀྑཱུ, ཙཏྟཱརོ པཱཝེཡྻཀཱ བྷིཀྑཱུ, ཨུབྦཱཧིཀཱཡ ཨིམཾ ཨདྷིཀརཎཾ ཝཱུཔསམེཏུཾ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Sammatā saṅghena cattāro pācīnakā bhikkhū, cattāro pāveyyakā bhikkhū, ubbāhikāya imaṃ adhikaraṇaṃ vūpasametuṃ. Khamati saṅghassa, tasmā tuṇhī, evametaṃ dhārayāmī’’ti.
ཏེན ཁོ པན སམཡེན ཨཛིཏོ ནཱམ བྷིཀྑུ དསཝསྶོ སངྒྷསྶ པཱཏིམོཀྑུདྡེསཀོ ཧོཏི། ཨཐ ཁོ སངྒྷོ ཨཱཡསྨནྟམྤི ཨཛིཏཾ སམྨནྣཏི – ཐེརཱནཾ བྷིཀྑཱུནཾ ཨཱསནཔཉྙཱཔཀཾ། ཨཐ ཁོ ཐེརཱནཾ བྷིཀྑཱུནཾ ཨེཏདཧོསི – ‘‘ཀཏྠ ནུ ཁོ མཡཾ ཨིམཾ ཨདྷིཀརཎཾ ཝཱུཔསམེཡྻཱམཱ’’ཏི? ཨཐ ཁོ ཐེརཱནཾ བྷིཀྑཱུནཾ ཨེཏདཧོསི – ‘‘ཨཡཾ ཁོ ཝཱལིཀཱརཱམོ རམཎཱིཡོ ཨཔྤསདྡོ ཨཔྤནིགྒྷོསོ། ཡཾནཱུན མཡཾ ཝཱལིཀཱརཱམེ ཨིམཾ ཨདྷིཀརཎཾ ཝཱུཔསམེཡྻཱམཱ’’ཏི།
Tena kho pana samayena ajito nāma bhikkhu dasavasso saṅghassa pātimokkhuddesako hoti. Atha kho saṅgho āyasmantampi ajitaṃ sammannati – therānaṃ bhikkhūnaṃ āsanapaññāpakaṃ. Atha kho therānaṃ bhikkhūnaṃ etadahosi – ‘‘kattha nu kho mayaṃ imaṃ adhikaraṇaṃ vūpasameyyāmā’’ti? Atha kho therānaṃ bhikkhūnaṃ etadahosi – ‘‘ayaṃ kho vālikārāmo ramaṇīyo appasaddo appanigghoso. Yaṃnūna mayaṃ vālikārāme imaṃ adhikaraṇaṃ vūpasameyyāmā’’ti.
༤༥༧. ཨཐ ཁོ ཐེརཱ བྷིཀྑཱུ ཝཱལིཀཱརཱམཾ ཨགམཾསུ – ཏཾ ཨདྷིཀརཎཾ ཝིནིཙྪིནིཏུཀཱམཱ། ཨཐ ཁོ ཨཱཡསྨཱ རེཝཏོ སངྒྷཾ ཉཱཔེསི –
457. Atha kho therā bhikkhū vālikārāmaṃ agamaṃsu – taṃ adhikaraṇaṃ vinicchinitukāmā. Atha kho āyasmā revato saṅghaṃ ñāpesi –
‘‘སུཎཱཏུ མེ, བྷནྟེ, སངྒྷོ། ཡདི སངྒྷསྶ པཏྟཀལླཾ, ཨཧཾ ཨཱཡསྨནྟཾ སབྦཀཱམིཾ ཝིནཡཾ པུཙྪེཡྻ’’ནྟི།
‘‘Suṇātu me, bhante, saṅgho. Yadi saṅghassa pattakallaṃ, ahaṃ āyasmantaṃ sabbakāmiṃ vinayaṃ puccheyya’’nti.
ཨཱཡསྨཱ སབྦཀཱམཱི སངྒྷཾ ཉཱཔེསི –
Āyasmā sabbakāmī saṅghaṃ ñāpesi –
‘‘སུཎཱཏུ མེ, ཨཱཝུསོ, སངྒྷོ། ཡདི སངྒྷསྶ པཏྟཀལླཾ, ཨཧཾ རེཝཏེན ཝིནཡཾ པུཊྛོ ཝིསྶཛྫེཡྻ’’ནྟི།
‘‘Suṇātu me, āvuso, saṅgho. Yadi saṅghassa pattakallaṃ, ahaṃ revatena vinayaṃ puṭṭho vissajjeyya’’nti.
ཨཐ ཁོ ཨཱཡསྨཱ རེཝཏོ ཨཱཡསྨནྟཾ སབྦཀཱམིཾ ཨེཏདཝོཙ – ‘‘ཀཔྤཏི, བྷནྟེ, སིངྒིལོཎཀཔྤོ’’ཏི? ‘‘ཀོ སོ, ཨཱཝུསོ, སིངྒིལོཎཀཔྤོ’’ཏི? ‘‘ཀཔྤཏི, བྷནྟེ, སིངྒིནཱ ལོཎཾ པརིཧརིཏུཾ – ཡཏྠ ཨལོཎཀཾ བྷཝིསྶཏི ཏཏྠ པརིབྷུཉྫིསྶཱམཱ’’ཏི? ‘‘ནཱཝུསོ, ཀཔྤཏཱི’’ཏི། 11 ‘‘ཀཏྠ པཊིཀྑིཏྟ’’ནྟི? ‘‘སཱཝཏྠིཡཾ, སུཏྟཝིབྷངྒེ’’ཏི། ‘‘ཀིཾ ཨཱཔཛྫཏཱི’’ཏི? ‘‘སནྣིདྷིཀཱརཀབྷོཛནེ པཱཙིཏྟིཡ’’ནྟི།
Atha kho āyasmā revato āyasmantaṃ sabbakāmiṃ etadavoca – ‘‘kappati, bhante, siṅgiloṇakappo’’ti? ‘‘Ko so, āvuso, siṅgiloṇakappo’’ti? ‘‘Kappati, bhante, siṅginā loṇaṃ pariharituṃ – yattha aloṇakaṃ bhavissati tattha paribhuñjissāmā’’ti? ‘‘Nāvuso, kappatī’’ti. 12 ‘‘Kattha paṭikkhitta’’nti? ‘‘Sāvatthiyaṃ, suttavibhaṅge’’ti. ‘‘Kiṃ āpajjatī’’ti? ‘‘Sannidhikārakabhojane pācittiya’’nti.
‘‘སུཎཱཏུ མེ, བྷནྟེ, སངྒྷོ། ཨིདཾ པཋམཾ ཝཏྠུ སངྒྷེན ཝིནིཙྪིཏཾ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ པཋམཾ སལཱཀཾ ནིཀྑིཔཱམི’’།
‘‘Suṇātu me, bhante, saṅgho. Idaṃ paṭhamaṃ vatthu saṅghena vinicchitaṃ. Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ paṭhamaṃ salākaṃ nikkhipāmi’’.
‘‘ཀཔྤཏི, བྷནྟེ, དྭངྒུལཀཔྤོ’’ཏི? ‘‘ཀོ སོ, ཨཱཝུསོ, དྭངྒུལཀཔྤོ’’ཏི? ‘‘ཀཔྤཏི, བྷནྟེ, དྭངྒུལཱཡ ཚཱཡཱཡ ཝཱིཏིཝཏྟཱཡ ཝིཀཱལེ བྷོཛནཾ བྷུཉྫིཏུ’’ནྟི ? ‘‘ནཱཝུསོ, ཀཔྤཏཱི’’ཏི 13། ‘‘ཀཏྠ པཊིཀྑིཏྟ’’ནྟི? ‘‘རཱཛགཧེ, སུཏྟཝིབྷངྒེ’’ཏི། ‘‘ཀིཾ ཨཱཔཛྫཏཱི’’ཏི? ཝིཀཱལབྷོཛནེ པཱཙིཏྟིཡ’’ནྟི།
‘‘Kappati, bhante, dvaṅgulakappo’’ti? ‘‘Ko so, āvuso, dvaṅgulakappo’’ti? ‘‘Kappati, bhante, dvaṅgulāya chāyāya vītivattāya vikāle bhojanaṃ bhuñjitu’’nti ? ‘‘Nāvuso, kappatī’’ti 14. ‘‘Kattha paṭikkhitta’’nti? ‘‘Rājagahe, suttavibhaṅge’’ti. ‘‘Kiṃ āpajjatī’’ti? Vikālabhojane pācittiya’’nti.
‘‘སུཎཱཏུ མེ, བྷནྟེ, སངྒྷོ། ཨིདཾ དུཏིཡཾ ཝཏྠུ སངྒྷེན ཝིནིཙྪིཏཾ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ དུཏིཡཾ སལཱཀཾ ནིཀྑིཔཱམི’’།
‘‘Suṇātu me, bhante, saṅgho. Idaṃ dutiyaṃ vatthu saṅghena vinicchitaṃ. Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ dutiyaṃ salākaṃ nikkhipāmi’’.
‘‘ཀཔྤཏི, བྷནྟེ, གཱམནྟརཀཔྤོ’’ཏི? ‘‘ཀོ སོ, ཨཱཝུསོ, གཱམནྟརཀཔྤོ’’ཏི? ‘‘ཀཔྤཏི, བྷནྟེ – ཨིདཱནི གཱམནྟརཾ གམིསྶཱམཱིཏི – བྷུཏྟཱཝིནཱ པཝཱརིཏེན ཨནཏིརིཏྟཾ བྷོཛནཾ བྷུཉྫིཏུ’’ནྟི? ‘‘ནཱཝུསོ, ཀཔྤཏཱི’’ཏི 15། ‘‘ཀཏྠ པཊིཀྑིཏྟ’’ནྟི? ‘‘སཱཝཏྠིཡཾ, སུཏྟཝིབྷངྒེ’’ཏི། ‘‘ཀིཾ ཨཱཔཛྫཏཱི’’ཏི? ‘‘ཨནཏིརིཏྟབྷོཛནེ པཱཙིཏྟིཡ’’ནྟི།
‘‘Kappati, bhante, gāmantarakappo’’ti? ‘‘Ko so, āvuso, gāmantarakappo’’ti? ‘‘Kappati, bhante – idāni gāmantaraṃ gamissāmīti – bhuttāvinā pavāritena anatirittaṃ bhojanaṃ bhuñjitu’’nti? ‘‘Nāvuso, kappatī’’ti 16. ‘‘Kattha paṭikkhitta’’nti? ‘‘Sāvatthiyaṃ, suttavibhaṅge’’ti. ‘‘Kiṃ āpajjatī’’ti? ‘‘Anatirittabhojane pācittiya’’nti.
‘‘སུཎཱཏུ མེ, བྷནྟེ, སངྒྷོ། ཨིདཾ ཏཏིཡཾ ཝཏྠུ སངྒྷེན ཝིནིཙྪིཏཾ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ ཏཏིཡཾ སལཱཀཾ ནིཀྑིཔཱམི’’།
‘‘Suṇātu me, bhante, saṅgho. Idaṃ tatiyaṃ vatthu saṅghena vinicchitaṃ. Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ tatiyaṃ salākaṃ nikkhipāmi’’.
‘‘ཀཔྤཏི , བྷནྟེ, ཨཱཝཱསཀཔྤོ’’ཏི? ‘‘ཀོ སོ, ཨཱཝུསོ, ཨཱཝཱསཀཔྤོ’’ཏི? ‘‘ཀཔྤཏི བྷནྟེ, སམྦཧུལཱ ཨཱཝཱསཱ སམཱནསཱིམཱ ནཱནུཔོསཐཾ ཀཱཏུ’’ནྟི། ‘‘ནཱཝུསོ, ཀཔྤཏཱི’’ཏི 17། ‘‘ཀཏྠ པཊིཀྑིཏྟ’’ནྟི? ‘‘རཱཛགཧེ, ཨུཔོསཐསཾཡུཏྟེ’’ཏི། ‘‘ཀིཾ ཨཱཔཛྫཏཱི’’ཏི? ‘‘ཝིནཡཱཏིསཱརེ དུཀྐཊ’’ནྟི།
‘‘Kappati , bhante, āvāsakappo’’ti? ‘‘Ko so, āvuso, āvāsakappo’’ti? ‘‘Kappati bhante, sambahulā āvāsā samānasīmā nānuposathaṃ kātu’’nti. ‘‘Nāvuso, kappatī’’ti 18. ‘‘Kattha paṭikkhitta’’nti? ‘‘Rājagahe, uposathasaṃyutte’’ti. ‘‘Kiṃ āpajjatī’’ti? ‘‘Vinayātisāre dukkaṭa’’nti.
‘‘སུཎཱཏུ མེ, བྷནྟེ, སངྒྷོ། ཨིདཾ ཙཏུཏྠཾ ཝཏྠུ སངྒྷེན ཝིནིཙྪིཏཾ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ ཙཏུཏྠཾ སལཱཀཾ ནིཀྑིཔཱམི’’།
‘‘Suṇātu me, bhante, saṅgho. Idaṃ catutthaṃ vatthu saṅghena vinicchitaṃ. Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ catutthaṃ salākaṃ nikkhipāmi’’.
‘‘ཀཔྤཏི, བྷནྟེ, ཨནུམཏིཀཔྤོ’’ཏི? ‘‘ཀོ སོ, ཨཱཝུསོ, ཨནུམཏིཀཔྤོ’’ཏི? ‘‘ཀཔྤཏི, བྷནྟེ, ཝགྒེན སངྒྷེན ཀམྨཾ ཀཱཏུཾ – ཨཱགཏེ བྷིཀྑཱུ ཨནུམཱནེསྶཱམཱ’’ཏི? ‘‘ནཱཝུསོ, ཀཔྤཏཱི’’ཏི 19། ‘‘ཀཏྠ པཊིཀྑིཏྟ’’ནྟི? ‘‘ཙམྤེཡྻཀེ, ཝིནཡཝཏྠུསྨི’’ནྟི། ‘‘ཀིཾ ཨཱཔཛྫཏཱི’’ཏི? ‘‘ཝིནཡཱཏིསཱརེ དུཀྐཊ’’ནྟི།
‘‘Kappati, bhante, anumatikappo’’ti? ‘‘Ko so, āvuso, anumatikappo’’ti? ‘‘Kappati, bhante, vaggena saṅghena kammaṃ kātuṃ – āgate bhikkhū anumānessāmā’’ti? ‘‘Nāvuso, kappatī’’ti 20. ‘‘Kattha paṭikkhitta’’nti? ‘‘Campeyyake, vinayavatthusmi’’nti. ‘‘Kiṃ āpajjatī’’ti? ‘‘Vinayātisāre dukkaṭa’’nti.
‘‘སུཎཱཏུ མེ, བྷནྟེ, སངྒྷོ། ཨིདཾ པཉྩམཾ ཝཏྠུ སངྒྷེན ཝིནིཙྪིཏཾ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ པཉྩམཾ སལཱཀཾ ནིཀྑིཔཱམི’’།
‘‘Suṇātu me, bhante, saṅgho. Idaṃ pañcamaṃ vatthu saṅghena vinicchitaṃ. Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ pañcamaṃ salākaṃ nikkhipāmi’’.
‘‘ཀཔྤཏི, བྷནྟེ, ཨཱཙིཎྞཀཔྤོ’’ཏི? ‘‘ཀོ སོ, ཨཱཝུསོ, ཨཱཙིཎྞཀཔྤོ’’ཏི? ‘‘ཀཔྤཏི, བྷནྟེ – ཨིདཾ མེ ཨུཔཛ྄ཛྷཱཡེན ཨཛ྄ཛྷཱཙིཎྞཾ, ཨིདཾ མེ ཨཱཙརིཡེན ཨཛ྄ཛྷཱཙིཎྞཾ – ཏཾ ཨཛ྄ཛྷཱཙརིཏུ’’ནྟི? ‘‘ཨཱཙིཎྞཀཔྤོ ཁོ, ཨཱཝུསོ, ཨེཀཙྩོ ཀཔྤཏི, ཨེཀཙྩོ ན ཀཔྤཏཱི’’ཏི།
‘‘Kappati, bhante, āciṇṇakappo’’ti? ‘‘Ko so, āvuso, āciṇṇakappo’’ti? ‘‘Kappati, bhante – idaṃ me upajjhāyena ajjhāciṇṇaṃ, idaṃ me ācariyena ajjhāciṇṇaṃ – taṃ ajjhācaritu’’nti? ‘‘Āciṇṇakappo kho, āvuso, ekacco kappati, ekacco na kappatī’’ti.
‘‘སུཎཱཏུ མེ, བྷནྟེ, སངྒྷོ། ཨིདཾ ཚཊྛཾ ཝཏྠུ སངྒྷེན ཝིནིཙྪིཏཾ ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ ཚཊྛཾ སལཱཀཾ ནིཀྑིཔཱམི’’།
‘‘Suṇātu me, bhante, saṅgho. Idaṃ chaṭṭhaṃ vatthu saṅghena vinicchitaṃ . Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ chaṭṭhaṃ salākaṃ nikkhipāmi’’.
‘‘ཀཔྤཏི , བྷནྟེ, ཨམཐིཏཀཔྤོ’’ཏི? ‘‘ཀོ སོ, ཨཱཝུསོ, ཨམཐིཏཀཔྤོ’’ཏི? ‘‘ཀཔྤཏི, བྷནྟེ, ཡཾ ཏཾ ཁཱིརཾ ཁཱིརབྷཱཝཾ ཝིཛཧིཏཾ, ཨསམྤཏྟཾ དདྷིབྷཱཝཾ, ཏཾ བྷུཏྟཱཝིནཱ པཝཱརིཏེན ཨནཏིརིཏྟཾ པཱཏུ’’ནྟི? ‘‘ནཱཝུསོ, ཀཔྤཏཱི’’ཏི 21། ‘‘ཀཏྠ པཊིཀྑིཏྟ’’ནྟི? ‘‘སཱཝཏྠིཡཾ, སུཏྟཝིབྷངྒེ’’ཏི། ‘‘ཀིཾ ཨཱཔཛྫཏཱི’’ཏི? ‘‘ཨནཏིརིཏྟབྷོཛནེ པཱཙིཏྟིཡ’’ནྟི།
‘‘Kappati , bhante, amathitakappo’’ti? ‘‘Ko so, āvuso, amathitakappo’’ti? ‘‘Kappati, bhante, yaṃ taṃ khīraṃ khīrabhāvaṃ vijahitaṃ, asampattaṃ dadhibhāvaṃ, taṃ bhuttāvinā pavāritena anatirittaṃ pātu’’nti? ‘‘Nāvuso, kappatī’’ti 22. ‘‘Kattha paṭikkhitta’’nti? ‘‘Sāvatthiyaṃ, suttavibhaṅge’’ti. ‘‘Kiṃ āpajjatī’’ti? ‘‘Anatirittabhojane pācittiya’’nti.
‘‘སུཎཱཏུ མེ, བྷནྟེ, སངྒྷོ། ཨིདཾ སཏྟམཾ ཝཏྠུ སངྒྷེན ཝིནིཙྪིཏཾ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ སཏྟམཾ སལཱཀཾ ནིཀྑིཔཱམི’’།
‘‘Suṇātu me, bhante, saṅgho. Idaṃ sattamaṃ vatthu saṅghena vinicchitaṃ. Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ sattamaṃ salākaṃ nikkhipāmi’’.
‘‘ཀཔྤཏི, བྷནྟེ, ཛལོ༹གིཾ པཱཏུ’’ནྟི? ‘‘ཀཱ སཱ, ཨཱཝུསོ, ཛལོ༹གཱི’’ཏི? ‘‘ཀཔྤཏི, བྷནྟེ, ཡཱ སཱ སུརཱ ཨཱསུཏཱ ཨསམྤཏྟཱ མཛྫབྷཱཝཾ, སཱ པཱཏུ’’ནྟི? ‘‘ནཱཝུསོ, ཀཔྤཏཱི’’ཏི 23། ‘‘ཀཏྠ པཊིཀྑིཏྟ’’ནྟི? ‘‘ཀོསམྦིཡཾ, སུཏྟཝིབྷངྒེ’’ཏི། ‘‘ཀིཾ ཨཱཔཛྫཏཱི’’ཏི། ‘‘སུརཱམེརཡཔཱནེ པཱཙིཏྟིཡ’’ནྟི།
‘‘Kappati, bhante, jaḷogiṃ pātu’’nti? ‘‘Kā sā, āvuso, jaḷogī’’ti? ‘‘Kappati, bhante, yā sā surā āsutā asampattā majjabhāvaṃ, sā pātu’’nti? ‘‘Nāvuso, kappatī’’ti 24. ‘‘Kattha paṭikkhitta’’nti? ‘‘Kosambiyaṃ, suttavibhaṅge’’ti. ‘‘Kiṃ āpajjatī’’ti. ‘‘Surāmerayapāne pācittiya’’nti.
‘‘སུཎཱཏུ མེ, བྷནྟེ, སངྒྷོ། ཨིདཾ ཨཊྛམཾ ཝཏྠུ སངྒྷེན ཝིནིཙྪིཏཾ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ ཨཊྛམཾ སལཱཀཾ ནིཀྑིཔཱམི’’།
‘‘Suṇātu me, bhante, saṅgho. Idaṃ aṭṭhamaṃ vatthu saṅghena vinicchitaṃ. Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ aṭṭhamaṃ salākaṃ nikkhipāmi’’.
‘‘ཀཔྤཏི, བྷནྟེ, ཨདསཀཾ ནིསཱིདན’’ནྟི? ‘‘ནཱཝུསོ, ཀཔྤཏཱི’’ཏི 25། ‘‘ཀཏྠ པཊིཀྑིཏྟ’’ནྟི? ‘‘སཱཝཏྠིཡཾ, སུཏྟཝིབྷངྒེ’’ཏི། ‘‘ཀིཾ ཨཱཔཛྫཏཱི’’ཏི? ‘‘ཚེདནཀེ པཱཙིཏྟིཡ’’ནྟི།
‘‘Kappati, bhante, adasakaṃ nisīdana’’nti? ‘‘Nāvuso, kappatī’’ti 26. ‘‘Kattha paṭikkhitta’’nti? ‘‘Sāvatthiyaṃ, suttavibhaṅge’’ti. ‘‘Kiṃ āpajjatī’’ti? ‘‘Chedanake pācittiya’’nti.
‘‘སུཎཱཏུ མེ, བྷནྟེ, སངྒྷོ། ཨིདཾ ནཝམཾ ཝཏྠུ སངྒྷེན ཝིནིཙྪིཏཾ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ ནཝམཾ སལཱཀཾ ནིཀྑིཔཱམི’’།
‘‘Suṇātu me, bhante, saṅgho. Idaṃ navamaṃ vatthu saṅghena vinicchitaṃ. Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ navamaṃ salākaṃ nikkhipāmi’’.
‘‘ཀཔྤཏི, བྷནྟེ, ཛཱཏརཱུཔརཛཏ’’ནྟི? ‘‘ནཱཝུསོ, ཀཔྤཏཱི’’ཏི 27། ‘‘ཀཏྠ པཊིཀྑིཏྟ’’ནྟི། ‘‘རཱཛགཧེ, སུཏྟཝིབྷངྒེ’’ཏི། ‘‘ཀིཾ ཨཱཔཛྫཏཱི’’ཏི? ‘‘ཛཱཏརཱུཔརཛཏཔཊིགྒཧཎེ པཱཙིཏྟིཡ’’ནྟི།
‘‘Kappati, bhante, jātarūparajata’’nti? ‘‘Nāvuso, kappatī’’ti 28. ‘‘Kattha paṭikkhitta’’nti. ‘‘Rājagahe, suttavibhaṅge’’ti. ‘‘Kiṃ āpajjatī’’ti? ‘‘Jātarūparajatapaṭiggahaṇe pācittiya’’nti.
‘‘སུཎཱཏུ མེ, བྷནྟེ, སངྒྷོ། ཨིདཾ དསམཾ ཝཏྠུ སངྒྷེན ཝིནིཙྪིཏཾ། ཨིཏིཔིདཾ ཝཏྠུ ཨུདྡྷམྨཾ, ཨུབྦིནཡཾ, ཨཔགཏསཏྠུསཱསནཾ། ཨིདཾ དསམཾ སལཱཀཾ ནིཀྑིཔཱམི།
‘‘Suṇātu me, bhante, saṅgho. Idaṃ dasamaṃ vatthu saṅghena vinicchitaṃ. Itipidaṃ vatthu uddhammaṃ, ubbinayaṃ, apagatasatthusāsanaṃ. Idaṃ dasamaṃ salākaṃ nikkhipāmi.
‘‘སུཎཱཏུ མེ, བྷནྟེ, སངྒྷོ། ཨིམཱནི དས ཝཏྠཱུནི སངྒྷེན ཝིནིཙྪིཏཱནི། ཨིཏིཔིམཱནི དསཝཏྠཱུནི ཨུདྡྷམྨཱནི, ཨུབྦིནཡཱནི, ཨཔགཏསཏྠུསཱསནཱནཱི’’ཏི།
‘‘Suṇātu me, bhante, saṅgho. Imāni dasa vatthūni saṅghena vinicchitāni. Itipimāni dasavatthūni uddhammāni, ubbinayāni, apagatasatthusāsanānī’’ti.
༤༥༨. ‘‘ནིཧཏམེཏཾ, ཨཱཝུསོ, ཨདྷིཀརཎཾ, སནྟཾ ཝཱུཔསནྟཾ སུཝཱུཔསནྟཾ། ཨཔི ཙ མཾ ཏྭཾ, ཨཱཝུསོ, སངྒྷམཛ྄ཛྷེཔི ཨིམཱནི དས ཝཏྠཱུནི པུཙྪེཡྻཱསི – ཏེསཾ བྷིཀྑཱུནཾ སཉྙཏྟིཡཱ’’ཏི། ཨཐ ཁོ ཨཱཡསྨཱ རེཝཏོ ཨཱཡསྨནྟཾ སབྦཀཱམིཾ སངྒྷམཛ྄ཛྷེཔི ཨིམཱནི དས ཝཏྠཱུནི པུཙྪི། པུཊྛོ པུཊྛོ ཨཱཡསྨཱ སབྦཀཱམཱི ཝིསྶཛྫེསི། ཨིམཱཡ ཁོ པན ཝིནཡསངྒཱིཏིཡཱ སཏྟ བྷིཀྑུསཏཱནི ཨནཱུནཱནི ཨནདྷིཀཱནི ཨཧེསུཾ, ཏསྨཱཡཾ ཝིནཡསངྒཱིཏི ‘‘སཏྟསཏིཀཱ’’ཏི ཝུཙྩཏཱིཏི།
458. ‘‘Nihatametaṃ, āvuso, adhikaraṇaṃ, santaṃ vūpasantaṃ suvūpasantaṃ. Api ca maṃ tvaṃ, āvuso, saṅghamajjhepi imāni dasa vatthūni puccheyyāsi – tesaṃ bhikkhūnaṃ saññattiyā’’ti. Atha kho āyasmā revato āyasmantaṃ sabbakāmiṃ saṅghamajjhepi imāni dasa vatthūni pucchi. Puṭṭho puṭṭho āyasmā sabbakāmī vissajjesi. Imāya kho pana vinayasaṅgītiyā satta bhikkhusatāni anūnāni anadhikāni ahesuṃ, tasmāyaṃ vinayasaṅgīti ‘‘sattasatikā’’ti vuccatīti.
དུཏིཡབྷཱཎཝཱརོ ནིཊྛིཏོ།
Dutiyabhāṇavāro niṭṭhito.
སཏྟསཏིཀཀྑནྡྷཀོ དྭཱདསམོ།
Sattasatikakkhandhako dvādasamo.
ཨིམམྷི ཁནྡྷཀེ ཝཏྠཱུ པཉྩཝཱིསཏི།
Imamhi khandhake vatthū pañcavīsati.
ཏསྶུདྡཱནཾ –
Tassuddānaṃ –
དས ཝཏྠཱུནི པཱུརེཏྭཱ, ཀམྨཾ དཱུཏེན པཱཝིསི།
Dasa vatthūni pūretvā, kammaṃ dūtena pāvisi;
ཙཏྟཱརོ པུན རཱུཔཉྩ, ཀོསམྦི ཙ པཱཝེཡྻཀོ༎
Cattāro puna rūpañca, kosambi ca pāveyyako.
མགྒོ སོརེཡྻཾ སངྐསྶཾ, ཀཎྞཀུཛྫཾ ཨུདུམྦརཾ།
Maggo soreyyaṃ saṅkassaṃ, kaṇṇakujjaṃ udumbaraṃ;
སཧཛཱཏི ཙ མཛ྄ཛྷེསི, ཨསྶོསི ཀཾ ནུ ཁོ མཡཾ༎
Sahajāti ca majjhesi, assosi kaṃ nu kho mayaṃ.
སཏྟསཏིཀཀྑནྡྷཀོ ནིཊྛིཏོ།
Sattasatikakkhandhako niṭṭhito.
ཙཱུལ༹ཝགྒཔཱལི༹ ནིཊྛིཏཱ།
Cūḷavaggapāḷi niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / དསཝཏྠུཀཐཱ • Dasavatthukathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / དསཝཏྠུཀཐཱཝཎྞནཱ • Dasavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / དསཝཏྠུཀཐཱཝཎྞནཱ • Dasavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / དསཝཏྠུཀཐཱཝཎྞནཱ • Dasavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / དསཝཏྠུཀཐཱ • Dasavatthukathā
