| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৭. দুতিযভৰসুত্তং
7. Dutiyabhavasuttaṃ
৭৮. অথ খো আযস্মা আনন্দো যেন ভগৰা তেনুপসঙ্কমি…পে॰… আযস্মা আনন্দো ভগৰন্তং এতদৰোচ – ‘‘ভৰো, ভৰোতি, ভন্তে, ৰুচ্চতি। কিত্তাৰতা নু খো, ভন্তে, ভৰো হোতী’’তি?
78. Atha kho āyasmā ānando yena bhagavā tenupasaṅkami…pe… āyasmā ānando bhagavantaṃ etadavoca – ‘‘bhavo, bhavoti, bhante, vuccati. Kittāvatā nu kho, bhante, bhavo hotī’’ti?
‘‘কামধাতুৰেপক্কঞ্চ, আনন্দ, কম্মং নাভৰিস্স, অপি নু খো কামভৰো পঞ্ঞাযেথা’’তি? ‘‘নো হেতং ভন্তে’’। ‘‘ইতি খো, আনন্দ, কম্মং খেত্তং, ৰিঞ্ঞাণং বীজং, তণ্হা স্নেহো। অৰিজ্জানীৰরণানং সত্তানং তণ্হাসংযোজনানং হীনায ধাতুযা চেতনা পতিট্ঠিতা পত্থনা পতিট্ঠিতা এৰং আযতিং পুনব্ভৰাভিনিব্বত্তি হোতি’’।
‘‘Kāmadhātuvepakkañca, ānanda, kammaṃ nābhavissa, api nu kho kāmabhavo paññāyethā’’ti? ‘‘No hetaṃ bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ hīnāya dhātuyā cetanā patiṭṭhitā patthanā patiṭṭhitā evaṃ āyatiṃ punabbhavābhinibbatti hoti’’.
‘‘রূপধাতুৰেপক্কঞ্চ, আনন্দ, কম্মং নাভৰিস্স, অপি নু খো রূপভৰো পঞ্ঞাযেথা’’তি? ‘‘নো হেতং, ভন্তে’’। ‘‘ইতি খো, আনন্দ, কম্মং খেত্তং, ৰিঞ্ঞাণং বীজং, তণ্হা স্নেহো। অৰিজ্জানীৰরণানং সত্তানং তণ্হাসংযোজনানং মজ্ঝিমায ধাতুযা চেতনা পতিট্ঠিতা পত্থনা পতিট্ঠিতা এৰং আযতিং পুনব্ভৰাভিনিব্বত্তি হোতি’’।
‘‘Rūpadhātuvepakkañca, ānanda, kammaṃ nābhavissa, api nu kho rūpabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ majjhimāya dhātuyā cetanā patiṭṭhitā patthanā patiṭṭhitā evaṃ āyatiṃ punabbhavābhinibbatti hoti’’.
‘‘অরূপধাতুৰেপক্কঞ্চ, আনন্দ, কম্মং নাভৰিস্স, অপি নু খো অরূপভৰো পঞ্ঞাযেথা’’তি? ‘‘নো হেতং, ভন্তে’’। ‘‘ইতি খো, আনন্দ, কম্মং খেত্তং, ৰিঞ্ঞাণং বীজং, তণ্হা স্নেহো। অৰিজ্জানীৰরণানং সত্তানং তণ্হাসংযোজনানং পণীতায ধাতুযা চেতনা পতিট্ঠিতা পত্থনা পতিট্ঠিতা এৰং আযতিং পুনব্ভৰাভিনিব্বত্তি হোতি। এৰং খো, আনন্দ, ভৰো হোতী’’তি। সত্তমং।
‘‘Arūpadhātuvepakkañca, ānanda, kammaṃ nābhavissa, api nu kho arūpabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ paṇītāya dhātuyā cetanā patiṭṭhitā patthanā patiṭṭhitā evaṃ āyatiṃ punabbhavābhinibbatti hoti. Evaṃ kho, ānanda, bhavo hotī’’ti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. দুতিযভৰসুত্তৰণ্ণনা • 7. Dutiyabhavasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬-৭. পঠমভৰসুত্তাদিৰণ্ণনা • 6-7. Paṭhamabhavasuttādivaṇṇanā
