| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. දුතියභවසුත්‌තං
7. Dutiyabhavasuttaṃ
78. අථ ඛො ආයස්‌මා ආනන්‌දො යෙන භගවා තෙනුපසඞ්‌කමි…පෙ.… ආයස්‌මා ආනන්‌දො භගවන්‌තං එතදවොච – ‘‘භවො, භවොති, භන්‌තෙ, වුච්‌චති. කිත්‌තාවතා නු ඛො, භන්‌තෙ, භවො හොතී’’ති?
78. Atha kho āyasmā ānando yena bhagavā tenupasaṅkami…pe… āyasmā ānando bhagavantaṃ etadavoca – ‘‘bhavo, bhavoti, bhante, vuccati. Kittāvatā nu kho, bhante, bhavo hotī’’ti?
‘‘කාමධාතුවෙපක්‌කඤ්‌ච, ආනන්‌ද, කම්‌මං නාභවිස්‌ස, අපි නු ඛො කාමභවො පඤ්‌ඤායෙථා’’ති? ‘‘නො හෙතං භන්‌තෙ’’. ‘‘ඉති ඛො, ආනන්‌ද, කම්‌මං ඛෙත්‌තං, විඤ්‌ඤාණං බීජං, තණ්‌හා ස්‌නෙහො. අවිජ්‌ජානීවරණානං සත්‌තානං තණ්‌හාසංයොජනානං හීනාය ධාතුයා චෙතනා පතිට්‌ඨිතා පත්‌ථනා පතිට්‌ඨිතා එවං ආයතිං පුනබ්‌භවාභිනිබ්‌බත්‌ති හොති’’.
‘‘Kāmadhātuvepakkañca, ānanda, kammaṃ nābhavissa, api nu kho kāmabhavo paññāyethā’’ti? ‘‘No hetaṃ bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ hīnāya dhātuyā cetanā patiṭṭhitā patthanā patiṭṭhitā evaṃ āyatiṃ punabbhavābhinibbatti hoti’’.
‘‘රූපධාතුවෙපක්‌කඤ්‌ච, ආනන්‌ද, කම්‌මං නාභවිස්‌ස, අපි නු ඛො රූපභවො පඤ්‌ඤායෙථා’’ති? ‘‘නො හෙතං, භන්‌තෙ’’. ‘‘ඉති ඛො, ආනන්‌ද, කම්‌මං ඛෙත්‌තං, විඤ්‌ඤාණං බීජං, තණ්‌හා ස්‌නෙහො. අවිජ්‌ජානීවරණානං සත්‌තානං තණ්‌හාසංයොජනානං මජ්‌ඣිමාය ධාතුයා චෙතනා පතිට්‌ඨිතා පත්‌ථනා පතිට්‌ඨිතා එවං ආයතිං පුනබ්‌භවාභිනිබ්‌බත්‌ති හොති’’.
‘‘Rūpadhātuvepakkañca, ānanda, kammaṃ nābhavissa, api nu kho rūpabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ majjhimāya dhātuyā cetanā patiṭṭhitā patthanā patiṭṭhitā evaṃ āyatiṃ punabbhavābhinibbatti hoti’’.
‘‘අරූපධාතුවෙපක්‌කඤ්‌ච, ආනන්‌ද, කම්‌මං නාභවිස්‌ස, අපි නු ඛො අරූපභවො පඤ්‌ඤායෙථා’’ති? ‘‘නො හෙතං, භන්‌තෙ’’. ‘‘ඉති ඛො, ආනන්‌ද, කම්‌මං ඛෙත්‌තං, විඤ්‌ඤාණං බීජං, තණ්‌හා ස්‌නෙහො. අවිජ්‌ජානීවරණානං සත්‌තානං තණ්‌හාසංයොජනානං පණීතාය ධාතුයා චෙතනා පතිට්‌ඨිතා පත්‌ථනා පතිට්‌ඨිතා එවං ආයතිං පුනබ්‌භවාභිනිබ්‌බත්‌ති හොති. එවං ඛො, ආනන්‌ද, භවො හොතී’’ති. සත්‌තමං.
‘‘Arūpadhātuvepakkañca, ānanda, kammaṃ nābhavissa, api nu kho arūpabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ paṇītāya dhātuyā cetanā patiṭṭhitā patthanā patiṭṭhitā evaṃ āyatiṃ punabbhavābhinibbatti hoti. Evaṃ kho, ānanda, bhavo hotī’’ti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. දුතියභවසුත්‌තවණ්‌ණනා • 7. Dutiyabhavasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6-7. පඨමභවසුත්‌තාදිවණ්‌ණනා • 6-7. Paṭhamabhavasuttādivaṇṇanā
