| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
2. д̣̇уд̇ияаб̣од̇хисуд̇д̇аван̣н̣анаа
2. Dutiyabodhisuttavaṇṇanā
2. д̣̇уд̇ияз бадиломанд̇и ‘‘авиж̇ж̇аанирод̇хаа сан̇кааранирод̇хо’’д̇иаад̣̇инаа наязна вуд̇д̇о авиж̇ж̇аад̣̇игоязва бажжаяаагааро ануббаад̣̇анирод̇хзна нируж̇жхамаано ад̇д̇ано гад̇д̇аб̣б̣агижжасса агаран̣ад̇о бадиломод̇и вужжад̇и. бавад̇д̇ияаа ваа виломанад̇о бадиломо, анд̇ад̇о бана маж̇жхад̇о ваа бадтааяа аад̣̇им̣ баабзд̇ваа авуд̇д̇ад̇д̇аа ид̇о ан̃н̃знад̇т̇знзд̇т̇а бадиломад̇аа на яуж̇ж̇ад̇и. бадиломанд̇и жа ‘‘висамам̣ жанд̣̇асуурияаа баривад̇д̇анд̇ий’’д̇иаад̣̇ийсу вияа бхааванабум̣саганид̣̇д̣̇зсо. имасмим̣ асад̇и ид̣̇ам̣ на ход̇ийд̇и имасмим̣ авиж̇ж̇аад̣̇игз бажжаяз асад̇и маг̇г̇зна бахийнз ид̣̇ам̣ сан̇каараад̣̇игам̣ палам̣ на ход̇и наббавад̇д̇ад̇и. имасса нирод̇хаа ид̣̇ам̣ нируж̇жхад̇ийд̇и имасса авиж̇ж̇аад̣̇игасса бажжаяасса нирод̇хаа маг̇г̇зна ануббад̇д̇ид̇хаммад̇ам̣ аабаад̣̇ид̇ад̇д̇аа ид̣̇ам̣ сан̇каараад̣̇игам̣ палам̣ нируж̇жхад̇и, наббавад̇д̇ад̇ийд̇и ад̇т̇о. ид̇хааби яат̇аа ‘‘имасмим̣ сад̇и ид̣̇ам̣ ход̇и, имассуббаад̣̇аа ид̣̇ам̣ уббаж̇ж̇ад̇ий’’д̇и зд̇т̇а ‘‘имасмим̣ сад̇иязва, наасад̇и, имасса уббаад̣̇аа зва, на нирод̇хаа’’д̇и анд̇ог̇ад̇ханияамад̇аа д̣̇ассид̇аа. звам̣ имасмим̣ асад̇иязва, на сад̇и, имасса нирод̇хаа зва, на уббаад̣̇аад̇и анд̇ог̇ад̇ханияамад̇аалагкан̣аа д̣̇ассид̇аад̇и взд̣̇ид̇аб̣б̣ам̣. сзсамзд̇т̇а яам̣ вад̇д̇аб̣б̣ам̣, д̇ам̣ батамаб̣од̇хисуд̇д̇аван̣н̣анааяа вуд̇д̇анаяаанусаарзна взд̣̇ид̇аб̣б̣ам̣.
2. Dutiye paṭilomanti ‘‘avijjānirodhā saṅkhāranirodho’’tiādinā nayena vutto avijjādikoyeva paccayākāro anuppādanirodhena nirujjhamāno attano kattabbakiccassa akaraṇato paṭilomoti vuccati. Pavattiyā vā vilomanato paṭilomo, antato pana majjhato vā paṭṭhāya ādiṃ pāpetvā avuttattā ito aññenatthenettha paṭilomatā na yujjati. Paṭilomanti ca ‘‘visamaṃ candasūriyā parivattantī’’tiādīsu viya bhāvanapuṃsakaniddeso. Imasmiṃ asati idaṃ na hotīti imasmiṃ avijjādike paccaye asati maggena pahīne idaṃ saṅkhārādikaṃ phalaṃ na hoti nappavattati. Imassa nirodhā idaṃ nirujjhatīti imassa avijjādikassa paccayassa nirodhā maggena anuppattidhammataṃ āpāditattā idaṃ saṅkhārādikaṃ phalaṃ nirujjhati, nappavattatīti attho. Idhāpi yathā ‘‘imasmiṃ sati idaṃ hoti, imassuppādā idaṃ uppajjatī’’ti ettha ‘‘imasmiṃ satiyeva, nāsati, imassa uppādā eva, na nirodhā’’ti antogadhaniyamatā dassitā. Evaṃ imasmiṃ asatiyeva, na sati, imassa nirodhā eva, na uppādāti antogadhaniyamatālakkhaṇā dassitāti veditabbaṃ. Sesamettha yaṃ vattabbaṃ, taṃ paṭhamabodhisuttavaṇṇanāya vuttanayānusārena veditabbaṃ.
звам̣ яат̇аа бхаг̇аваа бадиломабадижжасамуббаад̣̇ам̣ манаси агааси, д̇ам̣ сан̇кзбзна д̣̇ассзд̇ваа ид̣̇аани вид̇т̇аарзна д̣̇ассзд̇ум̣ ‘‘авиж̇ж̇аанирод̇хаа сан̇кааранирод̇хо’’д̇иаад̣̇и вуд̇д̇ам̣. д̇ад̇т̇а авиж̇ж̇аанирод̇хаад̇и арияамаг̇г̇зна авиж̇ж̇ааяа анавасзсанирод̇хаа, анусаяаббахаанавасзна аг̇г̇амаг̇г̇зна авиж̇ж̇ааяа ажжанд̇асамуг̇гхаадад̇од̇и ад̇т̇о. яад̣̇иби хздтимамаг̇г̇зхи бахийяамаанаа авиж̇ж̇аа ажжанд̇асамуг̇гхаадавасзнзва бахийяад̇и, д̇ат̇ааби на анавасзсад̇о бахийяад̇и. абааяаг̇ааминияаа хи авиж̇ж̇аа батамамаг̇г̇зна бахийяад̇и. д̇ат̇аа сагид̣̇зва имасмим̣ логз саб̣б̣ад̇т̇а жа анарияабхуумияам̣ убабад̇д̇ибажжаяабхууд̇аа авиж̇ж̇аа яат̇ааггамам̣ д̣̇уд̇ияад̇ад̇ияамаг̇г̇зхи бахийяад̇и, на ид̇араад̇и. арахад̇д̇амаг̇г̇знзва хи саа анавасзсам̣ бахийяад̇ийд̇и. сан̇кааранирод̇ход̇и сан̇каараанам̣ ануббаад̣̇анирод̇хо ход̇и. звам̣ нируд̣̇д̇хаанам̣ бана сан̇каараанам̣ нирод̇хаа вин̃н̃аан̣ам̣, вин̃н̃аан̣аад̣̇ийнан̃жа нирод̇хаа наамаруубаад̣̇ийни нируд̣̇д̇хаани зва хонд̇ийд̇и д̣̇ассзд̇ум̣ ‘‘сан̇кааранирод̇хаа вин̃н̃аан̣анирод̇хо’’д̇иаад̣̇им̣ вад̇ваа ‘‘звамзд̇асса гзваласса д̣̇угкагканд̇хасса нирод̇хо ход̇ий’’д̇и вуд̇д̇ам̣. д̇ад̇т̇а яам̣ вад̇д̇аб̣б̣ам̣, д̇ам̣ хздтаа вуд̇д̇анаяамзва.
Evaṃ yathā bhagavā paṭilomapaṭiccasamuppādaṃ manasi akāsi, taṃ saṅkhepena dassetvā idāni vitthārena dassetuṃ ‘‘avijjānirodhā saṅkhāranirodho’’tiādi vuttaṃ. Tattha avijjānirodhāti ariyamaggena avijjāya anavasesanirodhā, anusayappahānavasena aggamaggena avijjāya accantasamugghāṭatoti attho. Yadipi heṭṭhimamaggehi pahīyamānā avijjā accantasamugghāṭavaseneva pahīyati, tathāpi na anavasesato pahīyati. Apāyagāminiyā hi avijjā paṭhamamaggena pahīyati. Tathā sakideva imasmiṃ loke sabbattha ca anariyabhūmiyaṃ upapattipaccayabhūtā avijjā yathākkamaṃ dutiyatatiyamaggehi pahīyati, na itarāti. Arahattamaggeneva hi sā anavasesaṃ pahīyatīti. Saṅkhāranirodhoti saṅkhārānaṃ anuppādanirodho hoti. Evaṃ niruddhānaṃ pana saṅkhārānaṃ nirodhā viññāṇaṃ, viññāṇādīnañca nirodhā nāmarūpādīni niruddhāni eva hontīti dassetuṃ ‘‘saṅkhāranirodhā viññāṇanirodho’’tiādiṃ vatvā ‘‘evametassa kevalassa dukkhakkhandhassa nirodho hotī’’ti vuttaṃ. Tattha yaṃ vattabbaṃ, taṃ heṭṭhā vuttanayameva.
абижзд̇т̇а гин̃жааби ‘‘авиж̇ж̇аанирод̇хаа сан̇кааранирод̇хо, сан̇кааранирод̇хаа вин̃н̃аан̣анирод̇хо’’д̇и зд̇д̇аавад̇ааби сагаласса д̣̇угкагканд̇хасса анавасзсад̇о нирод̇хо вуд̇д̇о ход̇и, д̇ат̇ааби яат̇аа ануломз яасса яасса бажжаяад̇хаммасса ад̇т̇ид̇ааяа яо яо бажжаяуббаннад̇хаммо на нируж̇жхад̇и бавад̇д̇ад̇и зваад̇и имасса ад̇т̇асса д̣̇ассанад̇т̇ам̣ ‘‘авиж̇ж̇аабажжаяаа сан̇каараа…бз… самуд̣̇аяо ход̇ий’’д̇и вуд̇д̇ам̣. звам̣ д̇аббадибагкад̇о д̇асса д̇асса бажжаяад̇хаммасса абхаавз со со бажжаяуббаннад̇хаммо нируж̇жхад̇и наббавад̇д̇ад̇ийд̇и д̣̇ассанад̇т̇ам̣ ид̇ха ‘‘авиж̇ж̇аанирод̇хаа сан̇кааранирод̇хо, сан̇кааранирод̇хаа вин̃н̃аан̣анирод̇хо…бз… д̣̇угкагканд̇хасса нирод̇хо ход̇ий’’д̇и вуд̇д̇ам̣, на бана ануломз вияа гаалад̇д̇аяабарияаабаннасса д̣̇угкагканд̇хасса нирод̇хад̣̇ассанад̇т̇ам̣. анааг̇ад̇ассзва хи арияамаг̇г̇абхааванааяа асад̇и уббаж̇ж̇анаарахасса д̣̇угкагканд̇хасса арияамаг̇г̇абхааванааяа нирод̇хо ижчид̇од̇и аяамби висзсо взд̣̇ид̇аб̣б̣о.
Apicettha kiñcāpi ‘‘avijjānirodhā saṅkhāranirodho, saṅkhāranirodhā viññāṇanirodho’’ti ettāvatāpi sakalassa dukkhakkhandhassa anavasesato nirodho vutto hoti, tathāpi yathā anulome yassa yassa paccayadhammassa atthitāya yo yo paccayuppannadhammo na nirujjhati pavattati evāti imassa atthassa dassanatthaṃ ‘‘avijjāpaccayā saṅkhārā…pe… samudayo hotī’’ti vuttaṃ. Evaṃ tappaṭipakkhato tassa tassa paccayadhammassa abhāve so so paccayuppannadhammo nirujjhati nappavattatīti dassanatthaṃ idha ‘‘avijjānirodhā saṅkhāranirodho, saṅkhāranirodhā viññāṇanirodho…pe… dukkhakkhandhassa nirodho hotī’’ti vuttaṃ, na pana anulome viya kālattayapariyāpannassa dukkhakkhandhassa nirodhadassanatthaṃ. Anāgatasseva hi ariyamaggabhāvanāya asati uppajjanārahassa dukkhakkhandhassa ariyamaggabhāvanāya nirodho icchitoti ayampi viseso veditabbo.
зд̇амад̇т̇ам̣ вид̣̇ид̇ваад̇и явааяам̣ ‘‘авиж̇ж̇аанирод̇хаад̣̇ивасзна сан̇каараад̣̇игасса д̣̇угкагканд̇хасса нирод̇хо ход̇ий’’д̇и вуд̇д̇о, саб̣б̣аагаарзна зд̇амад̇т̇ам̣ вид̣̇ид̇ваа. имам̣ уд̣̇аанам̣ уд̣̇аанзсийд̇и имасмим̣ ад̇т̇з вид̣̇ид̇з ‘‘авиж̇ж̇аанирод̇хаа сан̇кааранирод̇хо’’д̇и звам̣ багаасид̇асса авиж̇ж̇аад̣̇ийнам̣ бажжаяаанам̣ каяасса аваб̣од̇хаанубхаавад̣̇ийбагам̣ уд̣̇аанам̣ уд̣̇аанзсийд̇и ад̇т̇о.
Etamatthaṃ viditvāti yvāyaṃ ‘‘avijjānirodhādivasena saṅkhārādikassa dukkhakkhandhassa nirodho hotī’’ti vutto, sabbākārena etamatthaṃ viditvā. Imaṃ udānaṃ udānesīti imasmiṃ atthe vidite ‘‘avijjānirodhā saṅkhāranirodho’’ti evaṃ pakāsitassa avijjādīnaṃ paccayānaṃ khayassa avabodhānubhāvadīpakaṃ udānaṃ udānesīti attho.
д̇ад̇рааяам̣ сан̇кзбад̇т̇о – яасмаа авиж̇ж̇аад̣̇ийнам̣ бажжаяаанам̣ ануббаад̣̇анирод̇хасан̇каад̇ам̣ каяам̣ авзд̣̇и ан̃н̃ааси бадивиж̇жхи, д̇асмаа зд̇асса вуд̇д̇анаязна аад̇аабино жхааяад̇о б̣раахман̣асса вуд̇д̇аббагаараа б̣од̇хибагкияад̇хаммаа жад̇усажжад̇хаммаа ваа баад̇убхаванд̇и уббаж̇ж̇анд̇и багаасзнд̇и ваа. ат̇а яаа бажжаяанирод̇хасса саммаа авид̣̇ид̇ад̇д̇аа уббаж̇ж̇зяяум̣ буб̣б̣з вуд̇д̇аббабхзд̣̇аа ган̇каа, д̇аа саб̣б̣ааби вабаяанд̇и нируж̇жханд̇ийд̇и. сзсам̣ хздтаа вуд̇д̇анаяамзва.
Tatrāyaṃ saṅkhepattho – yasmā avijjādīnaṃ paccayānaṃ anuppādanirodhasaṅkhātaṃ khayaṃ avedi aññāsi paṭivijjhi, tasmā etassa vuttanayena ātāpino jhāyato brāhmaṇassa vuttappakārā bodhipakkhiyadhammā catusaccadhammā vā pātubhavanti uppajjanti pakāsenti vā. Atha yā paccayanirodhassa sammā aviditattā uppajjeyyuṃ pubbe vuttappabhedā kaṅkhā, tā sabbāpi vapayanti nirujjhantīti. Sesaṃ heṭṭhā vuttanayameva.
д̣̇уд̇ияаб̣од̇хисуд̇д̇аван̣н̣анаа нидтид̇аа.
Dutiyabodhisuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 2. д̣̇уд̇ияаб̣од̇хисуд̇д̇ам̣ • 2. Dutiyabodhisuttaṃ
