| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१०. दुतियब्रह्मचरियसुत्तं
10. Dutiyabrahmacariyasuttaṃ
४०. सावत्थिनिदानं। ‘‘ब्रह्मचरियञ्च वो, भिक्खवे, देसेस्सामि, ब्रह्मचरियत्थञ्च। तं सुणाथ। कतमञ्च, भिक्खवे, ब्रह्मचरियं? अयमेव अरियो अट्ठङ्गिको मग्गो, सेय्यथिदं – सम्मादिट्ठि…पे॰… सम्मासमाधि। इदं वुच्चति, भिक्खवे, ब्रह्मचरियं। कतमो च, भिक्खवे, ब्रह्मचरियत्थो? यो खो, भिक्खवे, रागक्खयो दोसक्खयो मोहक्खयो – अयं वुच्चति, भिक्खवे, ब्रह्मचरियत्थो’’ति। दसमं।
40. Sāvatthinidānaṃ. ‘‘Brahmacariyañca vo, bhikkhave, desessāmi, brahmacariyatthañca. Taṃ suṇātha. Katamañca, bhikkhave, brahmacariyaṃ? Ayameva ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhi. Idaṃ vuccati, bhikkhave, brahmacariyaṃ. Katamo ca, bhikkhave, brahmacariyattho? Yo kho, bhikkhave, rāgakkhayo dosakkhayo mohakkhayo – ayaṃ vuccati, bhikkhave, brahmacariyattho’’ti. Dasamaṃ.
पटिपत्तिवग्गो चतुत्थो।
Paṭipattivaggo catuttho.
तस्सुद्दानं –
Tassuddānaṃ –
पटिपत्ति पटिपन्नो च, विरद्धञ्च पारंगमा।
Paṭipatti paṭipanno ca, viraddhañca pāraṃgamā;
सामञ्ञेन च द्वे वुत्ता, ब्रह्मञ्ञा अपरे दुवे।
Sāmaññena ca dve vuttā, brahmaññā apare duve;
ब्रह्मचरियेन द्वे वुत्ता, वग्गो तेन पवुच्चतीति॥
Brahmacariyena dve vuttā, vaggo tena pavuccatīti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ४. पटिपत्तिवग्गवण्णना • 4. Paṭipattivaggavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ४. पटिपत्तिवग्गवण्णना • 4. Paṭipattivaggavaṇṇanā
