| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
೨. ದುತಿಯಚಕ್ಕಾನುವತ್ತನಸುತ್ತವಣ್ಣನಾ
2. Dutiyacakkānuvattanasuttavaṇṇanā
೧೩೨. ದುತಿಯೇ ಚಕ್ಕವತ್ತಿವತ್ತನ್ತಿ ದಸವಿಧಂ, ದ್ವಾದಸವಿಧಂ ವಾ ಚಕ್ಕವತ್ತಿಭಾವಾವಹಂ ವತ್ತಂ। ತತ್ಥ ಅನ್ತೋಜನಸ್ಮಿಂ ಬಲಕಾಯೇ ಧಮ್ಮಿಕಾಯೇವ ರಕ್ಖಾವರಣಗುತ್ತಿಯಾ ಸಂವಿಧಾನಂ, ಖತ್ತಿಯೇಸು, ಅನುಯನ್ತೇಸು, ಬ್ರಾಹ್ಮಣಗಹಪತಿಕೇಸು, ನೇಗಮಜಾನಪದೇಸು, ಸಮಣಬ್ರಾಹ್ಮಣೇಸು, ಮಿಗಪಕ್ಖೀಸು, ಅಧಮ್ಮಿಕಪಟಿಕ್ಖೇಪೋ, ಅಧನಾನಂ ಧನಾನುಪ್ಪದಾನಂ, ಸಮಣಬ್ರಾಹ್ಮಣೇ ಉಪಸಙ್ಕಮಿತ್ವಾ ಪಞ್ಹಪುಚ್ಛನನ್ತಿ ಇದಂ ದಸವಿಧಂ ಚಕ್ಕವತ್ತಿವತ್ತಂ। ಇದಮೇವ ಚ ಗಹಪತಿಕೇ ಪಕ್ಖಿಜಾತೇ ಚ ವಿಸುಂ ಕತ್ವಾ ಗಹಣವಸೇನ ದ್ವಾದಸವಿಧಂ। ಪಿತರಾ ಪವತ್ತಿತಮೇವ ಅನುಪ್ಪವತ್ತೇತೀತಿ ದಸವಿಧಂ ವಾ ದ್ವಾದಸವಿಧಂ ವಾ ಚಕ್ಕವತ್ತಿವತ್ತಂ ಪೂರೇತ್ವಾ ನಿಸಿನ್ನಸ್ಸ ಪುತ್ತಸ್ಸ ಅಞ್ಞಂ ಪಾತುಭವತಿ, ಸೋ ತಂ ಪವತ್ತೇತಿ। ರತನಮಯತ್ತಾ ಪನ ಸದಿಸಟ್ಠೇನ ತದೇವೇತನ್ತಿ ಕತ್ವಾ ‘‘ಪಿತರಾ ಪವತ್ತಿತ’’ನ್ತಿ ವುತ್ತಂ। ಯಸ್ಮಾ ವಾ ಸೋ ‘‘ಅಪ್ಪೋಸ್ಸುಕ್ಕೋ, ತ್ವಂ ದೇವ, ಹೋಹಿ, ಅಹಮನುಸಾಸಿಸ್ಸಾಮೀ’’ತಿ ಆಹ। ತಸ್ಮಾ ಪಿತರಾ ಪವತ್ತಿತಂ ಆಣಾಚಕ್ಕಂ ಅನುಪ್ಪವತ್ತೇತಿ ನಾಮಾತಿ ಏವಮೇತ್ಥ ಅತ್ಥೋ ದಟ್ಠಬ್ಬೋ। ಯಞ್ಹಿ ಅತ್ತನೋ ಪುಞ್ಞಾನುಭಾವಸಿದ್ಧಂ ಚಕ್ಕರತನಂ, ತಂ ನಿಪ್ಪರಿಯಾಯತೋ ತೇನ ಪವತ್ತಿತಂ ನಾಮ, ನೇತರನ್ತಿ ಪಠಮನಯೋ ವುತ್ತೋ। ಯಸ್ಮಾ ಪವತ್ತಿತಸ್ಸೇವ ಅನುವತ್ತನಂ, ಪಠಮನಯೋ ಚ ತಂಸದಿಸೇ ತಬ್ಬೋಹಾರವಸೇನ ವುತ್ತೋತಿ ತಂ ಅನಾದಿಯಿತ್ವಾ ದುತಿಯನಯೋ ವುತ್ತೋ।
132. Dutiye cakkavattivattanti dasavidhaṃ, dvādasavidhaṃ vā cakkavattibhāvāvahaṃ vattaṃ. Tattha antojanasmiṃ balakāye dhammikāyeva rakkhāvaraṇaguttiyā saṃvidhānaṃ, khattiyesu, anuyantesu, brāhmaṇagahapatikesu, negamajānapadesu, samaṇabrāhmaṇesu, migapakkhīsu, adhammikapaṭikkhepo, adhanānaṃ dhanānuppadānaṃ, samaṇabrāhmaṇe upasaṅkamitvā pañhapucchananti idaṃ dasavidhaṃ cakkavattivattaṃ. Idameva ca gahapatike pakkhijāte ca visuṃ katvā gahaṇavasena dvādasavidhaṃ. Pitarā pavattitameva anuppavattetīti dasavidhaṃ vā dvādasavidhaṃ vā cakkavattivattaṃ pūretvā nisinnassa puttassa aññaṃ pātubhavati, so taṃ pavatteti. Ratanamayattā pana sadisaṭṭhena tadevetanti katvā ‘‘pitarā pavattita’’nti vuttaṃ. Yasmā vā so ‘‘appossukko, tvaṃ deva, hohi, ahamanusāsissāmī’’ti āha. Tasmā pitarā pavattitaṃ āṇācakkaṃ anuppavatteti nāmāti evamettha attho daṭṭhabbo. Yañhi attano puññānubhāvasiddhaṃ cakkaratanaṃ, taṃ nippariyāyato tena pavattitaṃ nāma, netaranti paṭhamanayo vutto. Yasmā pavattitasseva anuvattanaṃ, paṭhamanayo ca taṃsadise tabbohāravasena vuttoti taṃ anādiyitvā dutiyanayo vutto.
ದುತಿಯಚಕ್ಕಾನುವತ್ತನಸುತ್ತವಣ್ಣನಾ ನಿಟ್ಠಿತಾ।
Dutiyacakkānuvattanasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೨. ದುತಿಯಚಕ್ಕಾನುವತ್ತನಸುತ್ತಂ • 2. Dutiyacakkānuvattanasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೨. ದುತಿಯಚಕ್ಕಾನುವತ್ತನಸುತ್ತವಣ್ಣನಾ • 2. Dutiyacakkānuvattanasuttavaṇṇanā
