| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. து³தியசேதனாஸுத்தங்
9. Dutiyacetanāsuttaṃ
39. ஸாவத்தி²யங் விஹரதி…பே॰… ‘‘யஞ்ச, பி⁴க்க²வே, சேதேதி யஞ்ச பகப்பேதி யஞ்ச அனுஸேதி, ஆரம்மணமேதங் ஹோதி விஞ்ஞாணஸ்ஸ டி²தியா. ஆரம்மணே ஸதி பதிட்டா² விஞ்ஞாணஸ்ஸ ஹோதி. தஸ்மிங் பதிட்டி²தே விஞ்ஞாணே விரூள்ஹே நாமரூபஸ்ஸ அவக்கந்தி ஹோதி. நாமரூபபச்சயா ஸளாயதனங்; ஸளாயதனபச்சயா ப²ஸ்ஸோ; ப²ஸ்ஸபச்சயா வேத³னா…பே॰… தண்ஹா… உபாதா³னங்… ப⁴வோ… ஜாதி… ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி’’.
39. Sāvatthiyaṃ viharati…pe… ‘‘yañca, bhikkhave, ceteti yañca pakappeti yañca anuseti, ārammaṇametaṃ hoti viññāṇassa ṭhitiyā. Ārammaṇe sati patiṭṭhā viññāṇassa hoti. Tasmiṃ patiṭṭhite viññāṇe virūḷhe nāmarūpassa avakkanti hoti. Nāmarūpapaccayā saḷāyatanaṃ; saḷāyatanapaccayā phasso; phassapaccayā vedanā…pe… taṇhā… upādānaṃ… bhavo… jāti… jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti’’.
‘‘நோ சே, பி⁴க்க²வே, சேதேதி நோ சே பகப்பேதி, அத² சே அனுஸேதி, ஆரம்மணமேதங் ஹோதி விஞ்ஞாணஸ்ஸ டி²தியா. ஆரம்மணே ஸதி பதிட்டா² விஞ்ஞாணஸ்ஸ ஹோதி. தஸ்மிங் பதிட்டி²தே விஞ்ஞாணே விரூள்ஹே நாமரூபஸ்ஸ அவக்கந்தி ஹோதி. நாமரூபபச்சயா ஸளாயதனங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.
‘‘No ce, bhikkhave, ceteti no ce pakappeti, atha ce anuseti, ārammaṇametaṃ hoti viññāṇassa ṭhitiyā. Ārammaṇe sati patiṭṭhā viññāṇassa hoti. Tasmiṃ patiṭṭhite viññāṇe virūḷhe nāmarūpassa avakkanti hoti. Nāmarūpapaccayā saḷāyatanaṃ…pe… evametassa kevalassa dukkhakkhandhassa samudayo hoti.
‘‘யதோ ச கோ², பி⁴க்க²வே, நோ சேவ சேதேதி நோ ச பகப்பேதி நோ ச அனுஸேதி, ஆரம்மணமேதங் ந ஹோதி விஞ்ஞாணஸ்ஸ டி²தியா. ஆரம்மணே அஸதி பதிட்டா² விஞ்ஞாணஸ்ஸ ந ஹோதி. தத³ப்பதிட்டி²தே விஞ்ஞாணே அவிரூள்ஹே நாமரூபஸ்ஸ அவக்கந்தி ந ஹோதி. நாமரூபனிரோதா⁴ ஸளாயதனநிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. நவமங்.
‘‘Yato ca kho, bhikkhave, no ceva ceteti no ca pakappeti no ca anuseti, ārammaṇametaṃ na hoti viññāṇassa ṭhitiyā. Ārammaṇe asati patiṭṭhā viññāṇassa na hoti. Tadappatiṭṭhite viññāṇe avirūḷhe nāmarūpassa avakkanti na hoti. Nāmarūpanirodhā saḷāyatananirodho…pe… evametassa kevalassa dukkhakkhandhassa nirodho hotī’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. து³தியசேதனாஸுத்தவண்ணனா • 9. Dutiyacetanāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. து³தியசேதனாஸுத்தவண்ணனா • 9. Dutiyacetanāsuttavaṇṇanā
