| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. দুতিযচেতনাসুত্তং
9. Dutiyacetanāsuttaṃ
৩৯. সাৰত্থিযং ৰিহরতি…পে॰… ‘‘যঞ্চ, ভিক্খৰে, চেতেতি যঞ্চ পকপ্পেতি যঞ্চ অনুসেতি, আরম্মণমেতং হোতি ৰিঞ্ঞাণস্স ঠিতিযা। আরম্মণে সতি পতিট্ঠা ৰিঞ্ঞাণস্স হোতি। তস্মিং পতিট্ঠিতে ৰিঞ্ঞাণে ৰিরূল়্হে নামরূপস্স অৰক্কন্তি হোতি। নামরূপপচ্চযা সল়াযতনং; সল়াযতনপচ্চযা ফস্সো; ফস্সপচ্চযা ৰেদনা…পে॰… তণ্হা… উপাদানং… ভৰো… জাতি… জরামরণং সোকপরিদেৰদুক্খদোমনস্সুপাযাসা সম্ভৰন্তি। এৰমেতস্স কেৰলস্স দুক্খক্খন্ধস্স সমুদযো হোতি’’।
39. Sāvatthiyaṃ viharati…pe… ‘‘yañca, bhikkhave, ceteti yañca pakappeti yañca anuseti, ārammaṇametaṃ hoti viññāṇassa ṭhitiyā. Ārammaṇe sati patiṭṭhā viññāṇassa hoti. Tasmiṃ patiṭṭhite viññāṇe virūḷhe nāmarūpassa avakkanti hoti. Nāmarūpapaccayā saḷāyatanaṃ; saḷāyatanapaccayā phasso; phassapaccayā vedanā…pe… taṇhā… upādānaṃ… bhavo… jāti… jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti’’.
‘‘নো চে, ভিক্খৰে, চেতেতি নো চে পকপ্পেতি, অথ চে অনুসেতি, আরম্মণমেতং হোতি ৰিঞ্ঞাণস্স ঠিতিযা। আরম্মণে সতি পতিট্ঠা ৰিঞ্ঞাণস্স হোতি। তস্মিং পতিট্ঠিতে ৰিঞ্ঞাণে ৰিরূল়্হে নামরূপস্স অৰক্কন্তি হোতি। নামরূপপচ্চযা সল়াযতনং…পে॰… এৰমেতস্স কেৰলস্স দুক্খক্খন্ধস্স সমুদযো হোতি।
‘‘No ce, bhikkhave, ceteti no ce pakappeti, atha ce anuseti, ārammaṇametaṃ hoti viññāṇassa ṭhitiyā. Ārammaṇe sati patiṭṭhā viññāṇassa hoti. Tasmiṃ patiṭṭhite viññāṇe virūḷhe nāmarūpassa avakkanti hoti. Nāmarūpapaccayā saḷāyatanaṃ…pe… evametassa kevalassa dukkhakkhandhassa samudayo hoti.
‘‘যতো চ খো, ভিক্খৰে, নো চেৰ চেতেতি নো চ পকপ্পেতি নো চ অনুসেতি, আরম্মণমেতং ন হোতি ৰিঞ্ঞাণস্স ঠিতিযা। আরম্মণে অসতি পতিট্ঠা ৰিঞ্ঞাণস্স ন হোতি। তদপ্পতিট্ঠিতে ৰিঞ্ঞাণে অৰিরূল়্হে নামরূপস্স অৰক্কন্তি ন হোতি। নামরূপনিরোধা সল়াযতননিরোধো…পে॰… এৰমেতস্স কেৰলস্স দুক্খক্খন্ধস্স নিরোধো হোতী’’তি। নৰমং।
‘‘Yato ca kho, bhikkhave, no ceva ceteti no ca pakappeti no ca anuseti, ārammaṇametaṃ na hoti viññāṇassa ṭhitiyā. Ārammaṇe asati patiṭṭhā viññāṇassa na hoti. Tadappatiṭṭhite viññāṇe avirūḷhe nāmarūpassa avakkanti na hoti. Nāmarūpanirodhā saḷāyatananirodho…pe… evametassa kevalassa dukkhakkhandhassa nirodho hotī’’ti. Navamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. দুতিযচেতনাসুত্তৰণ্ণনা • 9. Dutiyacetanāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. দুতিযচেতনাসুত্তৰণ্ণনা • 9. Dutiyacetanāsuttavaṇṇanā
