| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. ဒုတိယဆန္ဒရာဂသုတ္တံ
10. Dutiyachandarāgasuttaṃ
၁၆၉. သာဝတ္ထိနိဒာနံ။ ဧကမန္တံ နိသိန္နံ ခော အာယသ္မန္တံ ရာဓံ ဘဂဝာ ဧတဒဝောစ – ‘‘ရူပေ ခော, ရာဓ, ယော ဆန္ဒော ယော ရာဂော ယာ နန္ဒီ ယာ တဏ္ဟာ ယေ ဥပယုပာဒာနာ စေတသော အဓိဋ္ဌာနာဘိနိဝေသာနုသယာ, တေ ပဇဟထ။ ဧဝံ တံ ရူပံ ပဟီနံ ဘဝိသ္သတိ ဥစ္ဆိန္နမူလံ တာလာဝတ္ထုကတံ အနဘာဝံကတံ အာယတိံ အနုပ္ပာဒဓမ္မံ။ ဝေဒနာယ ယော ဆန္ဒော ယော ရာဂော ယာ နန္ဒီ ယာ တဏ္ဟာ ယေ ဥပယုပာဒာနာ စေတသော အဓိဋ္ဌာနာဘိနိဝေသာနုသယာ, တေ ပဇဟထ။ ဧဝံ သာ ဝေဒနာ ပဟီနာ ဘဝိသ္သတိ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပာဒဓမ္မာ။ သညာယ။ သင္ခာရေသု ယော ဆန္ဒော ယော ရာဂော ယာ နန္ဒီ ယာ တဏ္ဟာ ယေ ဥပယုပာဒာနာ စေတသော အဓိဋ္ဌာနာဘိနိဝေသာနုသယာ, တေ ပဇဟထ။ ဧဝံ တေ သင္ခာရာ ပဟီနာ ဘဝိသ္သန္တိ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပာဒဓမ္မာ။ ဝိညာဏေ ယော ဆန္ဒော ယော ရာဂော ယာ နန္ဒီ ယာ တဏ္ဟာ ယေ ဥပယုပာဒာနာ စေတသော အဓိဋ္ဌာနာဘိနိဝေသာနုသယာ, တေ ပဇဟထ။ ဧဝံ တံ ဝိညာဏံ ပဟီနံ ဘဝိသ္သတိ ဥစ္ဆိန္နမူလံ တာလာဝတ္ထုကတံ အနဘာဝံကတံ အာယတိံ အနုပ္ပာဒဓမ္မ’’န္တိ။ ဒသမံ။
169. Sāvatthinidānaṃ. Ekamantaṃ nisinnaṃ kho āyasmantaṃ rādhaṃ bhagavā etadavoca – ‘‘rūpe kho, rādha, yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, te pajahatha. Evaṃ taṃ rūpaṃ pahīnaṃ bhavissati ucchinnamūlaṃ tālāvatthukataṃ anabhāvaṃkataṃ āyatiṃ anuppādadhammaṃ. Vedanāya yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, te pajahatha. Evaṃ sā vedanā pahīnā bhavissati ucchinnamūlā tālāvatthukatā anabhāvaṃkatā āyatiṃ anuppādadhammā. Saññāya… saṅkhāresu yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, te pajahatha. Evaṃ te saṅkhārā pahīnā bhavissanti ucchinnamūlā tālāvatthukatā anabhāvaṃkatā āyatiṃ anuppādadhammā. Viññāṇe yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, te pajahatha. Evaṃ taṃ viññāṇaṃ pahīnaṃ bhavissati ucchinnamūlaṃ tālāvatthukataṃ anabhāvaṃkataṃ āyatiṃ anuppādadhamma’’nti. Dasamaṃ.
ရာဓသံယုတ္တသ္သ ပဌမော ဝဂ္ဂော။
Rādhasaṃyuttassa paṭhamo vaggo.
တသ္သုဒ္ဒာနံ –
Tassuddānaṃ –
မာရော သတ္တော ဘဝနေတ္တိ၊ ပရိညေယ္ယာ သမဏာ ဒုဝေ။
Māro satto bhavanetti, pariññeyyā samaṇā duve;
သောတာပန္နော အရဟာ စ၊ ဆန္ဒရာဂာပရေ ဒုဝေတိ။
Sotāpanno arahā ca, chandarāgāpare duveti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂-၁၀. သတ္တသုတ္တာဒိဝဏ္ဏနာ • 2-10. Sattasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂-၁၀. သတ္တသုတ္တာဒိဝဏ္ဏနာ • 2-10. Sattasuttādivaṇṇanā
