| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. து³தியசி²க்³க³ளயுக³ஸுத்தங்
8. Dutiyachiggaḷayugasuttaṃ
1118. ‘‘ஸெய்யதா²பி , பி⁴க்க²வே, அயங் மஹாபத²வீ ஏகோத³கா அஸ்ஸ. தத்ர புரிஸோ ஏகச்சி²க்³க³ளங் யுக³ங் பக்கி²பெய்ய. தமேனங் புரத்தி²மோ வாதோ பச்சி²மேன ஸங்ஹரெய்ய, பச்சி²மோ வாதோ புரத்தி²மேன ஸங்ஹரெய்ய, உத்தரோ வாதோ த³க்கி²ணேன ஸங்ஹரெய்ய, த³க்கி²ணோ வாதோ உத்தரேன ஸங்ஹரெய்ய. தத்ரஸ்ஸ காணோ கச்ச²போ. ஸோ வஸ்ஸஸதஸ்ஸ வஸ்ஸஸதஸ்ஸ அச்சயேன ஸகிங் ஸகிங் உம்முஜ்ஜெய்ய. தங் கிங் மஞ்ஞத², பி⁴க்க²வே, அபி நு கோ² காணோ கச்ச²போ வஸ்ஸஸதஸ்ஸ வஸ்ஸஸதஸ்ஸ அச்சயேன ஸகிங் ஸகிங் உம்முஜ்ஜந்தோ அமுஸ்மிங் ஏகச்சி²க்³க³ளே யுகே³ கீ³வங் பவேஸெய்யா’’தி? ‘‘அதி⁴ச்சமித³ங், ப⁴ந்தே, யங் ஸோ காணோ கச்ச²போ வஸ்ஸஸதஸ்ஸ வஸ்ஸஸதஸ்ஸ அச்சயேன ஸகிங் ஸகிங் உம்முஜ்ஜந்தோ அமுஸ்மிங் ஏகச்சி²க்³க³ளே யுகே³ கீ³வங் பவேஸெய்யா’’தி.
1118. ‘‘Seyyathāpi , bhikkhave, ayaṃ mahāpathavī ekodakā assa. Tatra puriso ekacchiggaḷaṃ yugaṃ pakkhipeyya. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya. Tatrassa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Adhiccamidaṃ, bhante, yaṃ so kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti.
‘‘ஏவங் அதி⁴ச்சமித³ங், பி⁴க்க²வே, யங் மனுஸ்ஸத்தங் லப⁴தி. ஏவங் அதி⁴ச்சமித³ங், பி⁴க்க²வே, யங் ததா²க³தோ லோகே உப்பஜ்ஜதி அரஹங் ஸம்மாஸம்பு³த்³தோ⁴. ஏவங் அதி⁴ச்சமித³ங், பி⁴க்க²வே, யங் ததா²க³தப்பவேதி³தோ த⁴ம்மவினயோ லோகே தி³ப்³ப³தி. தஸ்ஸித³ங் 1, பி⁴க்க²வே, மனுஸ்ஸத்தங் லத்³த⁴ங், ததா²க³தோ லோகே உப்பன்னோ அரஹங் ஸம்மாஸம்பு³த்³தோ⁴, ததா²க³தப்பவேதி³தோ ச த⁴ம்மவினயோ லோகே தி³ப்³ப³தி.
‘‘Evaṃ adhiccamidaṃ, bhikkhave, yaṃ manussattaṃ labhati. Evaṃ adhiccamidaṃ, bhikkhave, yaṃ tathāgato loke uppajjati arahaṃ sammāsambuddho. Evaṃ adhiccamidaṃ, bhikkhave, yaṃ tathāgatappavedito dhammavinayo loke dibbati. Tassidaṃ 2, bhikkhave, manussattaṃ laddhaṃ, tathāgato loke uppanno arahaṃ sammāsambuddho, tathāgatappavedito ca dhammavinayo loke dibbati.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. அட்ட²மங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. து³தியசி²க்³க³ளயுக³ஸுத்தவண்ணனா • 8. Dutiyachiggaḷayugasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. து³தியசி²க்³க³ளயுக³ஸுத்தவண்ணனா • 8. Dutiyachiggaḷayugasuttavaṇṇanā
