| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. দুতিযছিগ্গল়যুগসুত্তং
8. Dutiyachiggaḷayugasuttaṃ
১১১৮. ‘‘সেয্যথাপি , ভিক্খৰে, অযং মহাপথৰী একোদকা অস্স। তত্র পুরিসো একচ্ছিগ্গল়ং যুগং পক্খিপেয্য। তমেনং পুরত্থিমো ৰাতো পচ্ছিমেন সংহরেয্য, পচ্ছিমো ৰাতো পুরত্থিমেন সংহরেয্য, উত্তরো ৰাতো দক্খিণেন সংহরেয্য, দক্খিণো ৰাতো উত্তরেন সংহরেয্য। তত্রস্স কাণো কচ্ছপো। সো ৰস্সসতস্স ৰস্সসতস্স অচ্চযেন সকিং সকিং উম্মুজ্জেয্য। তং কিং মঞ্ঞথ, ভিক্খৰে, অপি নু খো কাণো কচ্ছপো ৰস্সসতস্স ৰস্সসতস্স অচ্চযেন সকিং সকিং উম্মুজ্জন্তো অমুস্মিং একচ্ছিগ্গল়ে যুগে গীৰং পৰেসেয্যা’’তি? ‘‘অধিচ্চমিদং, ভন্তে, যং সো কাণো কচ্ছপো ৰস্সসতস্স ৰস্সসতস্স অচ্চযেন সকিং সকিং উম্মুজ্জন্তো অমুস্মিং একচ্ছিগ্গল়ে যুগে গীৰং পৰেসেয্যা’’তি।
1118. ‘‘Seyyathāpi , bhikkhave, ayaṃ mahāpathavī ekodakā assa. Tatra puriso ekacchiggaḷaṃ yugaṃ pakkhipeyya. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya. Tatrassa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Adhiccamidaṃ, bhante, yaṃ so kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti.
‘‘এৰং অধিচ্চমিদং, ভিক্খৰে, যং মনুস্সত্তং লভতি। এৰং অধিচ্চমিদং, ভিক্খৰে, যং তথাগতো লোকে উপ্পজ্জতি অরহং সম্মাসম্বুদ্ধো। এৰং অধিচ্চমিদং, ভিক্খৰে, যং তথাগতপ্পৰেদিতো ধম্মৰিনযো লোকে দিব্বতি। তস্সিদং 1, ভিক্খৰে, মনুস্সত্তং লদ্ধং, তথাগতো লোকে উপ্পন্নো অরহং সম্মাসম্বুদ্ধো, তথাগতপ্পৰেদিতো চ ধম্মৰিনযো লোকে দিব্বতি।
‘‘Evaṃ adhiccamidaṃ, bhikkhave, yaṃ manussattaṃ labhati. Evaṃ adhiccamidaṃ, bhikkhave, yaṃ tathāgato loke uppajjati arahaṃ sammāsambuddho. Evaṃ adhiccamidaṃ, bhikkhave, yaṃ tathāgatappavedito dhammavinayo loke dibbati. Tassidaṃ 2, bhikkhave, manussattaṃ laddhaṃ, tathāgato loke uppanno arahaṃ sammāsambuddho, tathāgatappavedito ca dhammavinayo loke dibbati.
‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। অট্ঠমং।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. দুতিযছিগ্গল়যুগসুত্তৰণ্ণনা • 8. Dutiyachiggaḷayugasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. দুতিযছিগ্গল়যুগসুত্তৰণ্ণনা • 8. Dutiyachiggaḷayugasuttavaṇṇanā
