| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. දුතියඡිග්‌ගළයුගසුත්‌තං
8. Dutiyachiggaḷayugasuttaṃ
1118. ‘‘සෙය්‍යථාපි , භික්‌ඛවෙ, අයං මහාපථවී එකොදකා අස්‌ස. තත්‍ර පුරිසො එකච්‌ඡිග්‌ගළං යුගං පක්‌ඛිපෙය්‍ය. තමෙනං පුරත්‌ථිමො වාතො පච්‌ඡිමෙන සංහරෙය්‍ය, පච්‌ඡිමො වාතො පුරත්‌ථිමෙන සංහරෙය්‍ය, උත්‌තරො වාතො දක්‌ඛිණෙන සංහරෙය්‍ය, දක්‌ඛිණො වාතො උත්‌තරෙන සංහරෙය්‍ය. තත්‍රස්‌ස කාණො කච්‌ඡපො. සො වස්‌සසතස්‌ස වස්‌සසතස්‌ස අච්‌චයෙන සකිං සකිං උම්‌මුජ්‌ජෙය්‍ය. තං කිං මඤ්‌ඤථ, භික්‌ඛවෙ, අපි නු ඛො කාණො කච්‌ඡපො වස්‌සසතස්‌ස වස්‌සසතස්‌ස අච්‌චයෙන සකිං සකිං උම්‌මුජ්‌ජන්‌තො අමුස්‌මිං එකච්‌ඡිග්‌ගළෙ යුගෙ ගීවං පවෙසෙය්‍යා’’ති? ‘‘අධිච්‌චමිදං, භන්‌තෙ, යං සො කාණො කච්‌ඡපො වස්‌සසතස්‌ස වස්‌සසතස්‌ස අච්‌චයෙන සකිං සකිං උම්‌මුජ්‌ජන්‌තො අමුස්‌මිං එකච්‌ඡිග්‌ගළෙ යුගෙ ගීවං පවෙසෙය්‍යා’’ති.
1118. ‘‘Seyyathāpi , bhikkhave, ayaṃ mahāpathavī ekodakā assa. Tatra puriso ekacchiggaḷaṃ yugaṃ pakkhipeyya. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya. Tatrassa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Adhiccamidaṃ, bhante, yaṃ so kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti.
‘‘එවං අධිච්‌චමිදං, භික්‌ඛවෙ, යං මනුස්‌සත්‌තං ලභති. එවං අධිච්‌චමිදං, භික්‌ඛවෙ, යං තථාගතො ලොකෙ උප්‌පජ්‌ජති අරහං සම්‌මාසම්‌බුද්‌ධො. එවං අධිච්‌චමිදං, භික්‌ඛවෙ, යං තථාගතප්‌පවෙදිතො ධම්‌මවිනයො ලොකෙ දිබ්‌බති. තස්‌සිදං 1, භික්‌ඛවෙ, මනුස්‌සත්‌තං ලද්‌ධං, තථාගතො ලොකෙ උප්‌පන්‌නො අරහං සම්‌මාසම්‌බුද්‌ධො, තථාගතප්‌පවෙදිතො ච ධම්‌මවිනයො ලොකෙ දිබ්‌බති.
‘‘Evaṃ adhiccamidaṃ, bhikkhave, yaṃ manussattaṃ labhati. Evaṃ adhiccamidaṃ, bhikkhave, yaṃ tathāgato loke uppajjati arahaṃ sammāsambuddho. Evaṃ adhiccamidaṃ, bhikkhave, yaṃ tathāgatappavedito dhammavinayo loke dibbati. Tassidaṃ 2, bhikkhave, manussattaṃ laddhaṃ, tathāgato loke uppanno arahaṃ sammāsambuddho, tathāgatappavedito ca dhammavinayo loke dibbati.
‘‘තස්‌මාතිහ, භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. අට්‌ඨමං.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. දුතියඡිග්‌ගළයුගසුත්‌තවණ්‌ණනා • 8. Dutiyachiggaḷayugasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. දුතියඡිග්‌ගළයුගසුත්‌තවණ්‌ණනා • 8. Dutiyachiggaḷayugasuttavaṇṇanā
