| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༨. དུཏིཡཚིགྒལ༹ཡུགསུཏྟཾ
8. Dutiyachiggaḷayugasuttaṃ
༡༡༡༨. ‘‘སེཡྻཐཱཔི , བྷིཀྑཝེ, ཨཡཾ མཧཱཔཐཝཱི ཨེཀོདཀཱ ཨསྶ། ཏཏྲ པུརིསོ ཨེཀཙྪིགྒལ༹ཾ ཡུགཾ པཀྑིཔེཡྻ། ཏམེནཾ པུརཏྠིམོ ཝཱཏོ པཙྪིམེན སཾཧརེཡྻ, པཙྪིམོ ཝཱཏོ པུརཏྠིམེན སཾཧརེཡྻ, ཨུཏྟརོ ཝཱཏོ དཀྑིཎེན སཾཧརེཡྻ, དཀྑིཎོ ཝཱཏོ ཨུཏྟརེན སཾཧརེཡྻ། ཏཏྲསྶ ཀཱཎོ ཀཙྪཔོ། སོ ཝསྶསཏསྶ ཝསྶསཏསྶ ཨཙྩཡེན སཀིཾ སཀིཾ ཨུམྨུཛྫེཡྻ། ཏཾ ཀིཾ མཉྙཐ, བྷིཀྑཝེ, ཨཔི ནུ ཁོ ཀཱཎོ ཀཙྪཔོ ཝསྶསཏསྶ ཝསྶསཏསྶ ཨཙྩཡེན སཀིཾ སཀིཾ ཨུམྨུཛྫནྟོ ཨམུསྨིཾ ཨེཀཙྪིགྒལེ༹ ཡུགེ གཱིཝཾ པཝེསེཡྻཱ’’ཏི? ‘‘ཨདྷིཙྩམིདཾ, བྷནྟེ, ཡཾ སོ ཀཱཎོ ཀཙྪཔོ ཝསྶསཏསྶ ཝསྶསཏསྶ ཨཙྩཡེན སཀིཾ སཀིཾ ཨུམྨུཛྫནྟོ ཨམུསྨིཾ ཨེཀཙྪིགྒལེ༹ ཡུགེ གཱིཝཾ པཝེསེཡྻཱ’’ཏི།
1118. ‘‘Seyyathāpi , bhikkhave, ayaṃ mahāpathavī ekodakā assa. Tatra puriso ekacchiggaḷaṃ yugaṃ pakkhipeyya. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya. Tatrassa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Adhiccamidaṃ, bhante, yaṃ so kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti.
‘‘ཨེཝཾ ཨདྷིཙྩམིདཾ, བྷིཀྑཝེ, ཡཾ མནུསྶཏྟཾ ལབྷཏི། ཨེཝཾ ཨདྷིཙྩམིདཾ, བྷིཀྑཝེ, ཡཾ ཏཐཱགཏོ ལོཀེ ཨུཔྤཛྫཏི ཨརཧཾ སམྨཱསམྦུདྡྷོ། ཨེཝཾ ཨདྷིཙྩམིདཾ, བྷིཀྑཝེ, ཡཾ ཏཐཱགཏཔྤཝེདིཏོ དྷམྨཝིནཡོ ལོཀེ དིབྦཏི། ཏསྶིདཾ 1, བྷིཀྑཝེ, མནུསྶཏྟཾ ལདྡྷཾ, ཏཐཱགཏོ ལོཀེ ཨུཔྤནྣོ ཨརཧཾ སམྨཱསམྦུདྡྷོ, ཏཐཱགཏཔྤཝེདིཏོ ཙ དྷམྨཝིནཡོ ལོཀེ དིབྦཏི།
‘‘Evaṃ adhiccamidaṃ, bhikkhave, yaṃ manussattaṃ labhati. Evaṃ adhiccamidaṃ, bhikkhave, yaṃ tathāgato loke uppajjati arahaṃ sammāsambuddho. Evaṃ adhiccamidaṃ, bhikkhave, yaṃ tathāgatappavedito dhammavinayo loke dibbati. Tassidaṃ 2, bhikkhave, manussattaṃ laddhaṃ, tathāgato loke uppanno arahaṃ sammāsambuddho, tathāgatappavedito ca dhammavinayo loke dibbati.
‘‘ཏསྨཱཏིཧ, བྷིཀྑཝེ, ‘ཨིདཾ དུཀྑ’ནྟི ཡོགོ ཀརཎཱིཡོ…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡོགོ ཀརཎཱིཡོ’’ཏི། ཨཊྛམཾ།
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༨. དུཏིཡཚིགྒལ༹ཡུགསུཏྟཝཎྞནཱ • 8. Dutiyachiggaḷayugasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༨. དུཏིཡཚིགྒལ༹ཡུགསུཏྟཝཎྞནཱ • 8. Dutiyachiggaḷayugasuttavaṇṇanā
