| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. து³தியசி²க்³க³ளயுக³ஸுத்தவண்ணனா
8. Dutiyachiggaḷayugasuttavaṇṇanā
1118. அட்ட²மே மஹாபத²வீதி சக்கவாளக³ப்³ப⁴ந்தரா மஹாபத²வீ. அதி⁴ச்சமித³ங், ப⁴ந்தேதி இத³ங் அதி⁴ச்சுப்பத்திகங் ஸசே தங் யுக³ங் ந பூதி ப⁴வெய்ய, ஸமுத்³தே³ உத³கங் ந ஸுஸ்ஸெய்ய, ஸோ ச கச்ச²போ ந மரெய்ய, அபி நாம யதி³ச்சா²வஸேன ஸியாதி அத்தோ².
1118. Aṭṭhame mahāpathavīti cakkavāḷagabbhantarā mahāpathavī. Adhiccamidaṃ, bhanteti idaṃ adhiccuppattikaṃ sace taṃ yugaṃ na pūti bhaveyya, samudde udakaṃ na susseyya, so ca kacchapo na mareyya, api nāma yadicchāvasena siyāti attho.
ஏவங் அதி⁴ச்சமித³ங், பி⁴க்க²வேதி எத்த² மஹாஸீவத்தே²ரோ சத்தாரி யுகா³னி த³ஸ்ஸேதி – புரத்தி²மசக்கவாளமுக²வட்டியங் டி²தேன புரிஸேன பக்கி²த்தயுக³ஸ்ஸ ஹி சி²க்³க³ளேன தஸ்ஸ அந்த⁴கச்ச²பஸ்ஸ கீ³வாய பவேஸனங் விய மனுஸ்ஸபடிலாபோ⁴ அதி⁴ச்சபடிலாபீ⁴. த³க்கி²ணசக்கவாளமுக²வட்டியங் டி²தேன பக்கி²த்தஸ்ஸ பன பரிப்³ப⁴மந்தஸ்ஸ புரிமயுக³ங் பத்வா சி²க்³க³ளேன சி²க்³க³ளுபரி ஆருள்ஹஸ்ஸ சி²க்³க³ளேன கீ³வப்பவேஸனங் விய ததா²க³துப்பாதோ³ அதி⁴ச்சதரஸம்ப⁴வோ. பச்சி²மசக்கவாளமுக²வட்டியங் டி²தேன பக்கி²த்தஸ்ஸ பன பரிப்³ப⁴மந்தஸ்ஸ புரிமயுக³த்³வயங் பத்வா சி²க்³க³ளேன சி²க்³க³ளுபரி ஆருள்ஹஸ்ஸ சி²க்³க³ளேன கீ³வப்பவேஸனங் விய ததா²க³தப்பவேதி³தஸ்ஸ த⁴ம்மவினயஸ்ஸ தீ³பனங் அதி⁴ச்சதரஸம்ப⁴வங். உத்தரசக்கவாளமுக²வட்டியங் டி²தேன பக்கி²த்தஸ்ஸ பன பரிப்³ப⁴மந்தஸ்ஸ புரிமயுக³த்தயங் பத்வா சி²க்³க³ளேன சி²க்³க³ளுபரி ஆருள்ஹஸ்ஸ சி²க்³க³ளேன கீ³வப்பவேஸனங் விய சதுஸச்சபடிவேதோ⁴ அதிவிய அதி⁴ச்சதரஸம்ப⁴வோ வேதி³தப்³போ³. நவமாதீ³னி அபி⁴ஸமயஸங்யுத்தே வுத்தனயானேவாதி.
Evaṃ adhiccamidaṃ, bhikkhaveti ettha mahāsīvatthero cattāri yugāni dasseti – puratthimacakkavāḷamukhavaṭṭiyaṃ ṭhitena purisena pakkhittayugassa hi chiggaḷena tassa andhakacchapassa gīvāya pavesanaṃ viya manussapaṭilābho adhiccapaṭilābhī. Dakkhiṇacakkavāḷamukhavaṭṭiyaṃ ṭhitena pakkhittassa pana paribbhamantassa purimayugaṃ patvā chiggaḷena chiggaḷupari āruḷhassa chiggaḷena gīvappavesanaṃ viya tathāgatuppādo adhiccatarasambhavo. Pacchimacakkavāḷamukhavaṭṭiyaṃ ṭhitena pakkhittassa pana paribbhamantassa purimayugadvayaṃ patvā chiggaḷena chiggaḷupari āruḷhassa chiggaḷena gīvappavesanaṃ viya tathāgatappaveditassa dhammavinayassa dīpanaṃ adhiccatarasambhavaṃ. Uttaracakkavāḷamukhavaṭṭiyaṃ ṭhitena pakkhittassa pana paribbhamantassa purimayugattayaṃ patvā chiggaḷena chiggaḷupari āruḷhassa chiggaḷena gīvappavesanaṃ viya catusaccapaṭivedho ativiya adhiccatarasambhavo veditabbo. Navamādīni abhisamayasaṃyutte vuttanayānevāti.
பபாதவக்³கோ³ பஞ்சமோ.
Papātavaggo pañcamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. து³தியசி²க்³க³ளயுக³ஸுத்தங் • 8. Dutiyachiggaḷayugasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. து³தியசி²க்³க³ளயுக³ஸுத்தவண்ணனா • 8. Dutiyachiggaḷayugasuttavaṇṇanā
