| Library / Tipiṭaka / तिपिटक • Tipiṭaka / संयुत्तनिकाय (अट्ठकथा) • Saṃyuttanikāya (aṭṭhakathā) |
८. दुतियछिग्गळयुगसुत्तवण्णना
8. Dutiyachiggaḷayugasuttavaṇṇanā
१११८. अट्ठमे महापथवीति चक्कवाळगब्भन्तरा महापथवी। अधिच्चमिदं, भन्तेति इदं अधिच्चुप्पत्तिकं सचे तं युगं न पूति भवेय्य, समुद्दे उदकं न सुस्सेय्य, सो च कच्छपो न मरेय्य, अपि नाम यदिच्छावसेन सियाति अत्थो।
1118. Aṭṭhame mahāpathavīti cakkavāḷagabbhantarā mahāpathavī. Adhiccamidaṃ, bhanteti idaṃ adhiccuppattikaṃ sace taṃ yugaṃ na pūti bhaveyya, samudde udakaṃ na susseyya, so ca kacchapo na mareyya, api nāma yadicchāvasena siyāti attho.
एवं अधिच्चमिदं, भिक्खवेति एत्थ महासीवत्थेरो चत्तारि युगानि दस्सेति – पुरत्थिमचक्कवाळमुखवट्टियं ठितेन पुरिसेन पक्खित्तयुगस्स हि छिग्गळेन तस्स अन्धकच्छपस्स गीवाय पवेसनं विय मनुस्सपटिलाभो अधिच्चपटिलाभी। दक्खिणचक्कवाळमुखवट्टियं ठितेन पक्खित्तस्स पन परिब्भमन्तस्स पुरिमयुगं पत्वा छिग्गळेन छिग्गळुपरि आरुळ्हस्स छिग्गळेन गीवप्पवेसनं विय तथागतुप्पादो अधिच्चतरसम्भवो। पच्छिमचक्कवाळमुखवट्टियं ठितेन पक्खित्तस्स पन परिब्भमन्तस्स पुरिमयुगद्वयं पत्वा छिग्गळेन छिग्गळुपरि आरुळ्हस्स छिग्गळेन गीवप्पवेसनं विय तथागतप्पवेदितस्स धम्मविनयस्स दीपनं अधिच्चतरसम्भवं। उत्तरचक्कवाळमुखवट्टियं ठितेन पक्खित्तस्स पन परिब्भमन्तस्स पुरिमयुगत्तयं पत्वा छिग्गळेन छिग्गळुपरि आरुळ्हस्स छिग्गळेन गीवप्पवेसनं विय चतुसच्चपटिवेधो अतिविय अधिच्चतरसम्भवो वेदितब्बो। नवमादीनि अभिसमयसंयुत्ते वुत्तनयानेवाति।
Evaṃ adhiccamidaṃ, bhikkhaveti ettha mahāsīvatthero cattāri yugāni dasseti – puratthimacakkavāḷamukhavaṭṭiyaṃ ṭhitena purisena pakkhittayugassa hi chiggaḷena tassa andhakacchapassa gīvāya pavesanaṃ viya manussapaṭilābho adhiccapaṭilābhī. Dakkhiṇacakkavāḷamukhavaṭṭiyaṃ ṭhitena pakkhittassa pana paribbhamantassa purimayugaṃ patvā chiggaḷena chiggaḷupari āruḷhassa chiggaḷena gīvappavesanaṃ viya tathāgatuppādo adhiccatarasambhavo. Pacchimacakkavāḷamukhavaṭṭiyaṃ ṭhitena pakkhittassa pana paribbhamantassa purimayugadvayaṃ patvā chiggaḷena chiggaḷupari āruḷhassa chiggaḷena gīvappavesanaṃ viya tathāgatappaveditassa dhammavinayassa dīpanaṃ adhiccatarasambhavaṃ. Uttaracakkavāḷamukhavaṭṭiyaṃ ṭhitena pakkhittassa pana paribbhamantassa purimayugattayaṃ patvā chiggaḷena chiggaḷupari āruḷhassa chiggaḷena gīvappavesanaṃ viya catusaccapaṭivedho ativiya adhiccatarasambhavo veditabbo. Navamādīni abhisamayasaṃyutte vuttanayānevāti.
पपातवग्गो पञ्चमो।
Papātavaggo pañcamo.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ८. दुतियछिग्गळयुगसुत्तं • 8. Dutiyachiggaḷayugasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ८. दुतियछिग्गळयुगसुत्तवण्णना • 8. Dutiyachiggaḷayugasuttavaṇṇanā
