| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၈. ဒုတိယဆိဂ္ဂဠယုဂသုတ္တဝဏ္ဏနာ
8. Dutiyachiggaḷayugasuttavaṇṇanā
၁၁၁၈. အဋ္ဌမေ မဟာပထဝီတိ စက္ကဝာဠဂဗ္ဘန္တရာ မဟာပထဝီ။ အဓိစ္စမိဒံ, ဘန္တေတိ ဣဒံ အဓိစ္စုပ္ပတ္တိကံ သစေ တံ ယုဂံ န ပူတိ ဘဝေယ္ယ, သမုဒ္ဒေ ဥဒကံ န သုသ္သေယ္ယ, သော စ ကစ္ဆပော န မရေယ္ယ, အပိ နာမ ယဒိစ္ဆာဝသေန သိယာတိ အတ္ထော။
1118. Aṭṭhame mahāpathavīti cakkavāḷagabbhantarā mahāpathavī. Adhiccamidaṃ, bhanteti idaṃ adhiccuppattikaṃ sace taṃ yugaṃ na pūti bhaveyya, samudde udakaṃ na susseyya, so ca kacchapo na mareyya, api nāma yadicchāvasena siyāti attho.
ဧဝံ အဓိစ္စမိဒံ, ဘိက္ခဝေတိ ဧတ္ထ မဟာသီဝတ္ထေရော စတ္တာရိ ယုဂာနိ ဒသ္သေတိ – ပုရတ္ထိမစက္ကဝာဠမုခဝဋ္ဋိယံ ဌိတေန ပုရိသေန ပက္ခိတ္တယုဂသ္သ ဟိ ဆိဂ္ဂဠေန တသ္သ အန္ဓကစ္ဆပသ္သ ဂီဝာယ ပဝေသနံ ဝိယ မနုသ္သပဋိလာဘော အဓိစ္စပဋိလာဘီ။ ဒက္ခိဏစက္ကဝာဠမုခဝဋ္ဋိယံ ဌိတေန ပက္ခိတ္တသ္သ ပန ပရိဗ္ဘမန္တသ္သ ပုရိမယုဂံ ပတ္ဝာ ဆိဂ္ဂဠေန ဆိဂ္ဂဠုပရိ အာရုဠ္ဟသ္သ ဆိဂ္ဂဠေန ဂီဝပ္ပဝေသနံ ဝိယ တထာဂတုပ္ပာဒော အဓိစ္စတရသမ္ဘဝော။ ပစ္ဆိမစက္ကဝာဠမုခဝဋ္ဋိယံ ဌိတေန ပက္ခိတ္တသ္သ ပန ပရိဗ္ဘမန္တသ္သ ပုရိမယုဂဒ္ဝယံ ပတ္ဝာ ဆိဂ္ဂဠေန ဆိဂ္ဂဠုပရိ အာရုဠ္ဟသ္သ ဆိဂ္ဂဠေန ဂီဝပ္ပဝေသနံ ဝိယ တထာဂတပ္ပဝေဒိတသ္သ ဓမ္မဝိနယသ္သ ဒီပနံ အဓိစ္စတရသမ္ဘဝံ။ ဥတ္တရစက္ကဝာဠမုခဝဋ္ဋိယံ ဌိတေန ပက္ခိတ္တသ္သ ပန ပရိဗ္ဘမန္တသ္သ ပုရိမယုဂတ္တယံ ပတ္ဝာ ဆိဂ္ဂဠေန ဆိဂ္ဂဠုပရိ အာရုဠ္ဟသ္သ ဆိဂ္ဂဠေန ဂီဝပ္ပဝေသနံ ဝိယ စတုသစ္စပဋိဝေဓော အတိဝိယ အဓိစ္စတရသမ္ဘဝော ဝေဒိတဗ္ဗော။ နဝမာဒီနိ အဘိသမယသံယုတ္တေ ဝုတ္တနယာနေဝာတိ။
Evaṃ adhiccamidaṃ, bhikkhaveti ettha mahāsīvatthero cattāri yugāni dasseti – puratthimacakkavāḷamukhavaṭṭiyaṃ ṭhitena purisena pakkhittayugassa hi chiggaḷena tassa andhakacchapassa gīvāya pavesanaṃ viya manussapaṭilābho adhiccapaṭilābhī. Dakkhiṇacakkavāḷamukhavaṭṭiyaṃ ṭhitena pakkhittassa pana paribbhamantassa purimayugaṃ patvā chiggaḷena chiggaḷupari āruḷhassa chiggaḷena gīvappavesanaṃ viya tathāgatuppādo adhiccatarasambhavo. Pacchimacakkavāḷamukhavaṭṭiyaṃ ṭhitena pakkhittassa pana paribbhamantassa purimayugadvayaṃ patvā chiggaḷena chiggaḷupari āruḷhassa chiggaḷena gīvappavesanaṃ viya tathāgatappaveditassa dhammavinayassa dīpanaṃ adhiccatarasambhavaṃ. Uttaracakkavāḷamukhavaṭṭiyaṃ ṭhitena pakkhittassa pana paribbhamantassa purimayugattayaṃ patvā chiggaḷena chiggaḷupari āruḷhassa chiggaḷena gīvappavesanaṃ viya catusaccapaṭivedho ativiya adhiccatarasambhavo veditabbo. Navamādīni abhisamayasaṃyutte vuttanayānevāti.
ပပာတဝဂ္ဂော ပဉ္စမော။
Papātavaggo pañcamo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ဒုတိယဆိဂ္ဂဠယုဂသုတ္တံ • 8. Dutiyachiggaḷayugasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. ဒုတိယဆိဂ္ဂဠယုဂသုတ္တဝဏ္ဏနာ • 8. Dutiyachiggaḷayugasuttavaṇṇanā
