| Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൮. ദുതിയഛിഗ്ഗളയുഗസുത്തവണ്ണനാ
8. Dutiyachiggaḷayugasuttavaṇṇanā
൧൧൧൮. അട്ഠമേ മഹാപഥവീതി ചക്കവാളഗബ്ഭന്തരാ മഹാപഥവീ. അധിച്ചമിദം, ഭന്തേതി ഇദം അധിച്ചുപ്പത്തികം സചേ തം യുഗം ന പൂതി ഭവേയ്യ, സമുദ്ദേ ഉദകം ന സുസ്സേയ്യ, സോ ച കച്ഛപോ ന മരേയ്യ, അപി നാമ യദിച്ഛാവസേന സിയാതി അത്ഥോ.
1118. Aṭṭhame mahāpathavīti cakkavāḷagabbhantarā mahāpathavī. Adhiccamidaṃ, bhanteti idaṃ adhiccuppattikaṃ sace taṃ yugaṃ na pūti bhaveyya, samudde udakaṃ na susseyya, so ca kacchapo na mareyya, api nāma yadicchāvasena siyāti attho.
ഏവം അധിച്ചമിദം, ഭിക്ഖവേതി ഏത്ഥ മഹാസീവത്ഥേരോ ചത്താരി യുഗാനി ദസ്സേതി – പുരത്ഥിമചക്കവാളമുഖവട്ടിയം ഠിതേന പുരിസേന പക്ഖിത്തയുഗസ്സ ഹി ഛിഗ്ഗളേന തസ്സ അന്ധകച്ഛപസ്സ ഗീവായ പവേസനം വിയ മനുസ്സപടിലാഭോ അധിച്ചപടിലാഭീ. ദക്ഖിണചക്കവാളമുഖവട്ടിയം ഠിതേന പക്ഖിത്തസ്സ പന പരിബ്ഭമന്തസ്സ പുരിമയുഗം പത്വാ ഛിഗ്ഗളേന ഛിഗ്ഗളുപരി ആരുള്ഹസ്സ ഛിഗ്ഗളേന ഗീവപ്പവേസനം വിയ തഥാഗതുപ്പാദോ അധിച്ചതരസമ്ഭവോ. പച്ഛിമചക്കവാളമുഖവട്ടിയം ഠിതേന പക്ഖിത്തസ്സ പന പരിബ്ഭമന്തസ്സ പുരിമയുഗദ്വയം പത്വാ ഛിഗ്ഗളേന ഛിഗ്ഗളുപരി ആരുള്ഹസ്സ ഛിഗ്ഗളേന ഗീവപ്പവേസനം വിയ തഥാഗതപ്പവേദിതസ്സ ധമ്മവിനയസ്സ ദീപനം അധിച്ചതരസമ്ഭവം. ഉത്തരചക്കവാളമുഖവട്ടിയം ഠിതേന പക്ഖിത്തസ്സ പന പരിബ്ഭമന്തസ്സ പുരിമയുഗത്തയം പത്വാ ഛിഗ്ഗളേന ഛിഗ്ഗളുപരി ആരുള്ഹസ്സ ഛിഗ്ഗളേന ഗീവപ്പവേസനം വിയ ചതുസച്ചപടിവേധോ അതിവിയ അധിച്ചതരസമ്ഭവോ വേദിതബ്ബോ. നവമാദീനി അഭിസമയസംയുത്തേ വുത്തനയാനേവാതി.
Evaṃ adhiccamidaṃ, bhikkhaveti ettha mahāsīvatthero cattāri yugāni dasseti – puratthimacakkavāḷamukhavaṭṭiyaṃ ṭhitena purisena pakkhittayugassa hi chiggaḷena tassa andhakacchapassa gīvāya pavesanaṃ viya manussapaṭilābho adhiccapaṭilābhī. Dakkhiṇacakkavāḷamukhavaṭṭiyaṃ ṭhitena pakkhittassa pana paribbhamantassa purimayugaṃ patvā chiggaḷena chiggaḷupari āruḷhassa chiggaḷena gīvappavesanaṃ viya tathāgatuppādo adhiccatarasambhavo. Pacchimacakkavāḷamukhavaṭṭiyaṃ ṭhitena pakkhittassa pana paribbhamantassa purimayugadvayaṃ patvā chiggaḷena chiggaḷupari āruḷhassa chiggaḷena gīvappavesanaṃ viya tathāgatappaveditassa dhammavinayassa dīpanaṃ adhiccatarasambhavaṃ. Uttaracakkavāḷamukhavaṭṭiyaṃ ṭhitena pakkhittassa pana paribbhamantassa purimayugattayaṃ patvā chiggaḷena chiggaḷupari āruḷhassa chiggaḷena gīvappavesanaṃ viya catusaccapaṭivedho ativiya adhiccatarasambhavo veditabbo. Navamādīni abhisamayasaṃyutte vuttanayānevāti.
പപാതവഗ്ഗോ പഞ്ചമോ.
Papātavaggo pañcamo.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൮. ദുതിയഛിഗ്ഗളയുഗസുത്തം • 8. Dutiyachiggaḷayugasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൮. ദുതിയഛിഗ്ഗളയുഗസുത്തവണ്ണനാ • 8. Dutiyachiggaḷayugasuttavaṇṇanā
