| Library / Tipiṭaka / তিপিটক • Tipiṭaka / ধম্মসঙ্গণি-অট্ঠকথা • Dhammasaṅgaṇi-aṭṭhakathā |
দুতিযচিত্তং
Dutiyacittaṃ
১৪৬. ইদানি দুতিযচিত্তাদীনি দস্সেতুং পুন ‘‘কতমে ধম্মা’’তিআদি আরদ্ধং। তেসু সব্বেসুপি পঠমচিত্তে ৰুত্তনযেনেৰ তযো তযো মহাৰারা ৰেদিতব্বা। ন কেৰলঞ্চ মহাৰারা এৰ, পঠমচিত্তে ৰুত্তসদিসানং সব্বপদানং অত্থোপি ৰুত্তনযেনেৰ ৰেদিতব্বো। ইতো পরম্পি অপুব্বপদৰণ্ণনংযেৰ করিস্সাম। ইমস্মিং তাৰ দুতিযচিত্তনিদ্দেসে সসঙ্খারেনাতি ইদমেৰ অপুব্বং। তস্সত্থো – সহ সঙ্খারেনাতি সসঙ্খারো। তেন সসঙ্খারেন সপ্পযোগেন সউপাযেন পচ্চযগণেনাতি অত্থো। যেন হি আরম্মণাদিনা পচ্চযগণেন পঠমং মহাচিত্তং উপ্পজ্জতি, তেনেৰ সপ্পযোগেন সউপাযেন ইদং উপ্পজ্জতি।
146. Idāni dutiyacittādīni dassetuṃ puna ‘‘katame dhammā’’tiādi āraddhaṃ. Tesu sabbesupi paṭhamacitte vuttanayeneva tayo tayo mahāvārā veditabbā. Na kevalañca mahāvārā eva, paṭhamacitte vuttasadisānaṃ sabbapadānaṃ atthopi vuttanayeneva veditabbo. Ito parampi apubbapadavaṇṇanaṃyeva karissāma. Imasmiṃ tāva dutiyacittaniddese sasaṅkhārenāti idameva apubbaṃ. Tassattho – saha saṅkhārenāti sasaṅkhāro. Tena sasaṅkhārena sappayogena saupāyena paccayagaṇenāti attho. Yena hi ārammaṇādinā paccayagaṇena paṭhamaṃ mahācittaṃ uppajjati, teneva sappayogena saupāyena idaṃ uppajjati.
তস্সেৰং উপ্পত্তি ৰেদিতব্বা – ইধেকচ্চো ভিক্খু ৰিহারপচ্চন্তে ৰসমানো চেতিযঙ্গণসম্মজ্জনৰেলায ৰা থেরুপট্ঠানৰেলায ৰা সম্পত্তায, ধম্মসৰনদিৰসে ৰা সম্পত্তে ‘ময্হং গন্ত্ৰা পচ্চাগচ্ছতো অতিদূরং ভৰিস্সতি, ন গমিস্সামী’তি চিন্তেত্ৰা পুন চিন্তেতি – ‘ভিক্খুস্স নাম চেতিযঙ্গণং ৰা থেরুপট্ঠানং ৰা ধম্মসৰনং ৰা অগন্তুং অসারুপ্পং, গমিস্সামী’তি গচ্ছতি। তস্সেৰং অত্তনো পযোগেন ৰা, পরেন ৰা ৰত্তাদীনং অকরণে চ আদীনৰং করণে চ আনিসংসং দস্সেত্ৰা ওৰদিযমানস্স, নিগ্গহৰসেনেৰ ৰা ‘এহি, ইদং করোহী’তি কারিযমানস্স উপ্পন্নং কুসলচিত্তং সসঙ্খারেন পচ্চযগণেন উপ্পন্নং নাম হোতীতি।
Tassevaṃ uppatti veditabbā – idhekacco bhikkhu vihārapaccante vasamāno cetiyaṅgaṇasammajjanavelāya vā therupaṭṭhānavelāya vā sampattāya, dhammasavanadivase vā sampatte ‘mayhaṃ gantvā paccāgacchato atidūraṃ bhavissati, na gamissāmī’ti cintetvā puna cinteti – ‘bhikkhussa nāma cetiyaṅgaṇaṃ vā therupaṭṭhānaṃ vā dhammasavanaṃ vā agantuṃ asāruppaṃ, gamissāmī’ti gacchati. Tassevaṃ attano payogena vā, parena vā vattādīnaṃ akaraṇe ca ādīnavaṃ karaṇe ca ānisaṃsaṃ dassetvā ovadiyamānassa, niggahavaseneva vā ‘ehi, idaṃ karohī’ti kāriyamānassa uppannaṃ kusalacittaṃ sasaṅkhārena paccayagaṇena uppannaṃ nāma hotīti.
দুতিযচিত্তং।
Dutiyacittaṃ.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধম্মসঙ্গণীপাল়ি • Dhammasaṅgaṇīpāḷi / কামাৰচরকুসলং • Kāmāvacarakusalaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / দুতিযচিত্তাদিৰণ্ণনা • Dutiyacittādivaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-অনুটীকা • Dhammasaṅgaṇī-anuṭīkā / সুঞ্ঞতৰারাদিৰণ্ণনা • Suññatavārādivaṇṇanā
