| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. து³தியத³ஸப³லஸுத்தங்
2. Dutiyadasabalasuttaṃ
22. ஸாவத்தி²யங் விஹரதி…பே॰… ‘‘த³ஸப³லஸமன்னாக³தோ, பி⁴க்க²வே, ததா²க³தோ சதூஹி ச வேஸாரஜ்ஜேஹி ஸமன்னாக³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங் பவத்தெத்தி – ‘இதி ரூபங் இதி ரூபஸ்ஸ ஸமுத³யோ இதி ரூபஸ்ஸ அத்த²ங்க³மோ, இதி வேத³னா இதி வேத³னாய ஸமுத³யோ இதி வேத³னாய அத்த²ங்க³மோ, இதி ஸஞ்ஞா இதி ஸஞ்ஞாய ஸமுத³யோ இதி ஸஞ்ஞாய அத்த²ங்க³மோ, இதி ஸங்கா²ரா இதி ஸங்கா²ரானங் ஸமுத³யோ இதி ஸங்கா²ரானங் அத்த²ங்க³மோ, இதி விஞ்ஞாணங் இதி விஞ்ஞாணஸ்ஸ ஸமுத³யோ இதி விஞ்ஞாணஸ்ஸ அத்த²ங்க³மோ. இதி இமஸ்மிங் ஸதி இத³ங் ஹோதி, இமஸ்ஸுப்பாதா³ இத³ங் உப்பஜ்ஜதி; இமஸ்மிங் அஸதி இத³ங் ந ஹோதி இமஸ்ஸ நிரோதா⁴ இத³ங் நிருஜ்ஜ²தி. யதி³த³ங் அவிஜ்ஜாபச்சயா ஸங்கா²ரா; ஸங்கா²ரபச்சயா விஞ்ஞாணங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴; ஸங்கா²ரனிரோதா⁴ விஞ்ஞாணனிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி’’’.
22. Sāvatthiyaṃ viharati…pe… ‘‘dasabalasamannāgato, bhikkhave, tathāgato catūhi ca vesārajjehi samannāgato āsabhaṃ ṭhānaṃ paṭijānāti, parisāsu sīhanādaṃ nadati, brahmacakkaṃ pavattetti – ‘iti rūpaṃ iti rūpassa samudayo iti rūpassa atthaṅgamo, iti vedanā iti vedanāya samudayo iti vedanāya atthaṅgamo, iti saññā iti saññāya samudayo iti saññāya atthaṅgamo, iti saṅkhārā iti saṅkhārānaṃ samudayo iti saṅkhārānaṃ atthaṅgamo, iti viññāṇaṃ iti viññāṇassa samudayo iti viññāṇassa atthaṅgamo. Iti imasmiṃ sati idaṃ hoti, imassuppādā idaṃ uppajjati; imasmiṃ asati idaṃ na hoti imassa nirodhā idaṃ nirujjhati. Yadidaṃ avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hoti’’’.
‘‘ஏவங் ஸ்வாக்கா²தோ, பி⁴க்க²வே, மயா த⁴ம்மோ உத்தானோ விவடோ பகாஸிதோ சி²ன்னபிலோதிகோ. ஏவங் ஸ்வாக்கா²தே கோ², பி⁴க்க²வே, மயா த⁴ம்மே உத்தானே விவடே பகாஸிதே சி²ன்னபிலோதிகே அலமேவ ஸத்³தா⁴பப்³ப³ஜிதேன குலபுத்தேன வீரியங் ஆரபி⁴துங் – ‘காமங் தசோ ச ந்ஹாரு 1 ச அட்டி² ச அவஸிஸ்ஸது, ஸரீரே உபஸுஸ்ஸது 2 மங்ஸலோஹிதங். யங் தங் புரிஸதா²மேன புரிஸவீரியேன புரிஸபரக்கமேன பத்தப்³ப³ங், ந தங் அபாபுணித்வா வீரியஸ்ஸ ஸண்டா²னங் ப⁴விஸ்ஸதீ’’’தி.
‘‘Evaṃ svākkhāto, bhikkhave, mayā dhammo uttāno vivaṭo pakāsito chinnapilotiko. Evaṃ svākkhāte kho, bhikkhave, mayā dhamme uttāne vivaṭe pakāsite chinnapilotike alameva saddhāpabbajitena kulaputtena vīriyaṃ ārabhituṃ – ‘kāmaṃ taco ca nhāru 3 ca aṭṭhi ca avasissatu, sarīre upasussatu 4 maṃsalohitaṃ. Yaṃ taṃ purisathāmena purisavīriyena purisaparakkamena pattabbaṃ, na taṃ apāpuṇitvā vīriyassa saṇṭhānaṃ bhavissatī’’’ti.
‘‘து³க்க²ங் , பி⁴க்க²வே, குஸீதோ விஹரதி வோகிண்ணோ பாபகேஹி அகுஸலேஹி த⁴ம்மேஹி, மஹந்தஞ்ச ஸத³த்த²ங் பரிஹாபேதி. ஆரத்³த⁴வீரியோ ச கோ², பி⁴க்க²வே, ஸுக²ங் விஹரதி பவிவித்தோ பாபகேஹி அகுஸலேஹி த⁴ம்மேஹி, மஹந்தஞ்ச ஸத³த்த²ங் பரிபூரேதி. ந, பி⁴க்க²வே, ஹீனேன அக்³க³ஸ்ஸ பத்தி ஹோதி. அக்³கே³ன ச கோ², பி⁴க்க²வே, அக்³க³ஸ்ஸ பத்தி ஹோதி. மண்ட³பெய்யமித³ங், பி⁴க்க²வே, ப்³ரஹ்மசரியங், ஸத்தா² ஸம்முகீ²பூ⁴தோ. தஸ்மாதிஹ, பி⁴க்க²வே, வீரியங் ஆரப⁴த² அப்பத்தஸ்ஸ பத்தியா, அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாய. ‘ஏவங் நோ அயங் அம்ஹாகங் பப்³ப³ஜ்ஜா அவஞ்ஜா² ப⁴விஸ்ஸதி ஸப²லா ஸஉத்³ரயா. யேஸஞ்ச 5 மயங் பரிபு⁴ஞ்ஜாம சீவர-பிண்ட³பாதஸேனாஸன-கி³லானப்பச்சயபே⁴ஸஜ்ஜபரிக்கா²ரங் தேஸங் தே காரா அம்ஹேஸு மஹப்ப²லா ப⁴விஸ்ஸந்தி மஹானிஸங்ஸா’தி – ஏவஞ்ஹி வோ, பி⁴க்க²வே, ஸிக்கி²தப்³ப³ங். அத்தத்த²ங் வா ஹி, பி⁴க்க²வே, ஸம்பஸ்ஸமானேன அலமேவ அப்பமாதே³ன ஸம்பாதே³துங்; பரத்த²ங் வா ஹி, பி⁴க்க²வே, ஸம்பஸ்ஸமானேன அலமேவ அப்பமாதே³ன ஸம்பாதே³துங்; உப⁴யத்த²ங் வா ஹி, பி⁴க்க²வே, ஸம்பஸ்ஸமானேன அலமேவ அப்பமாதே³ன ஸம்பாதே³து’’ந்தி. து³தியங்.
‘‘Dukkhaṃ , bhikkhave, kusīto viharati vokiṇṇo pāpakehi akusalehi dhammehi, mahantañca sadatthaṃ parihāpeti. Āraddhavīriyo ca kho, bhikkhave, sukhaṃ viharati pavivitto pāpakehi akusalehi dhammehi, mahantañca sadatthaṃ paripūreti. Na, bhikkhave, hīnena aggassa patti hoti. Aggena ca kho, bhikkhave, aggassa patti hoti. Maṇḍapeyyamidaṃ, bhikkhave, brahmacariyaṃ, satthā sammukhībhūto. Tasmātiha, bhikkhave, vīriyaṃ ārabhatha appattassa pattiyā, anadhigatassa adhigamāya, asacchikatassa sacchikiriyāya. ‘Evaṃ no ayaṃ amhākaṃ pabbajjā avañjhā bhavissati saphalā saudrayā. Yesañca 6 mayaṃ paribhuñjāma cīvara-piṇḍapātasenāsana-gilānappaccayabhesajjaparikkhāraṃ tesaṃ te kārā amhesu mahapphalā bhavissanti mahānisaṃsā’ti – evañhi vo, bhikkhave, sikkhitabbaṃ. Attatthaṃ vā hi, bhikkhave, sampassamānena alameva appamādena sampādetuṃ; paratthaṃ vā hi, bhikkhave, sampassamānena alameva appamādena sampādetuṃ; ubhayatthaṃ vā hi, bhikkhave, sampassamānena alameva appamādena sampādetu’’nti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. து³தியத³ஸப³லஸுத்தவண்ணனா • 2. Dutiyadasabalasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. து³தியத³ஸப³லஸுத்தவண்ணனா • 2. Dutiyadasabalasuttavaṇṇanā
