| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
2. д̣̇уд̇ияад̣̇асаб̣аласуд̇д̇аван̣н̣анаа
2. Dutiyadasabalasuttavaṇṇanā
22. д̇ад̇т̇аад̇и д̣̇уд̇ияасуд̇д̇з. д̣̇асахи б̣алзхийд̇и д̣̇асахи анан̃н̃асаад̇хааран̣зхи н̃аан̣аб̣алзхи, д̇аани д̇ат̇ааг̇ад̇ассзва б̣алаанийд̇и д̇ат̇ааг̇ад̇аб̣алаанийд̇и вужжанд̇и. гааман̃жа д̇аани згажжаанам̣ саавагаанамби уббаж̇ж̇анд̇и, яаад̣̇исаани бана б̣уд̣̇д̇хаанам̣ таанаадтаанан̃аан̣аад̣̇ийни уббаж̇ж̇анд̇и, на д̇аад̣̇исаани д̇ад̣̇ан̃н̃зсам̣ гад̣̇аажиби уббаж̇ж̇анд̇ийд̇и. хад̇т̇игулаанусаарзнаад̇и вагкамаанахад̇т̇игулаанусаарзна. гаал̣ааваганд̇и гуласад̣̇д̣̇аабзгкааяа набум̣саганид̣̇д̣̇зсо. зса наяо сзсзсуби. багад̇ихад̇т̇игуланд̇и г̇ирижаранад̣̇ижараванажараад̣̇иббабхзд̣̇аа г̇ожарияагаал̣ааваганаамаа саб̣б̣ааби б̣алзна баагад̇игаа хад̇т̇иж̇аад̇и. д̣̇асаннам̣ бурисаананд̇и т̇аамамаж̇жхимаанам̣ д̣̇асаннам̣ бурисаанам̣. згасса д̇ат̇ааг̇ад̇асса гааяаб̣аланд̇и аанзд̇ваа самб̣анд̇хо. згассаад̇и жа д̇ат̇аа хздтаагат̇ааяам̣ ааг̇ад̇ад̇д̇аа д̣̇зсанаасод̇зна вуд̇д̇ам̣. наарааяанасан̇гхаад̇аб̣аланд̇и зд̇т̇а наараа вужжанд̇и расмияо, д̇аа б̣ахуу наанаавид̇хаа ид̇о уббаж̇ж̇анд̇ийд̇и наарааяанам̣, важ̇ирам̣, д̇асмаа наарааяанасан̇гхаад̇аб̣аланд̇и важ̇ирасан̇гхаад̇аб̣аланд̇и ад̇т̇о. д̇ат̇ааг̇ад̇асса гааяаб̣аланд̇и д̇ат̇ааг̇ад̇асса баагад̇игагааяаб̣алам̣. сан̇г̇ахам̣ на г̇ажчад̇и ад̇д̇ано б̣алаабхаавад̇о, д̇ад̇о звасса б̣аахирагад̇аа лаамагад̇аа жа. д̇ад̣̇убхаяам̣ банасса гааран̣зна д̣̇ассзд̇ум̣ ‘‘зд̇ан̃хи ниссааяаа’’д̇иаад̣̇и вуд̇д̇ам̣. ан̃н̃анд̇и гааяаб̣алад̇о ан̃н̃ам̣ д̇ад̇о висум̣язва. д̣̇асасу таанзсу д̣̇асасу н̃аад̇аб̣б̣адтаанзсу. яаат̇аавабадивзд̇хад̇о саяан̃жа агамбаяам̣, буг̇г̇алан̃жа д̇ам̣саман̇г̇им̣ нзяязсу ад̇хиб̣алам̣ гарод̇ийд̇и ааха ‘‘агамбанадтзна убад̇т̇амбханадтзна жаа’’д̇и.
22.Tatthāti dutiyasutte. Dasahi balehīti dasahi anaññasādhāraṇehi ñāṇabalehi, tāni tathāgatasseva balānīti tathāgatabalānīti vuccanti. Kāmañca tāni ekaccānaṃ sāvakānampi uppajjanti, yādisāni pana buddhānaṃ ṭhānāṭṭhānañāṇādīni uppajjanti, na tādisāni tadaññesaṃ kadācipi uppajjantīti. Hatthikulānusārenāti vakkhamānahatthikulānusārena. Kāḷāvakanti kulasaddāpekkhāya napuṃsakaniddeso. Esa nayo sesesupi. Pakatihatthikulanti giricaranadicaravanacarādippabhedā gocariyakāḷāvakanāmā sabbāpi balena pākatikā hatthijāti. Dasannaṃ purisānanti thāmamajjhimānaṃ dasannaṃ purisānaṃ. Ekassa tathāgatassa kāyabalanti ānetvā sambandho. Ekassāti ca tathā heṭṭhākathāyaṃ āgatattā desanāsotena vuttaṃ. Nārāyanasaṅghātabalanti ettha nārā vuccanti rasmiyo, tā bahū nānāvidhā ito uppajjantīti nārāyanaṃ, vajiraṃ, tasmā nārāyanasaṅghātabalanti vajirasaṅghātabalanti attho. Tathāgatassa kāyabalanti tathāgatassa pākatikakāyabalaṃ. Saṅgahaṃ na gacchati attano balābhāvato, tato evassa bāhirakatā lāmakatā ca. Tadubhayaṃ panassa kāraṇena dassetuṃ ‘‘etañhi nissāyā’’tiādi vuttaṃ. Aññanti kāyabalato aññaṃ tato visuṃyeva. Dasasu ṭhānesu dasasu ñātabbaṭṭhānesu. Yāthāvapaṭivedhato sayañca akampayaṃ, puggalañca taṃsamaṅgiṃ neyyesu adhibalaṃ karotīti āha ‘‘akampanaṭṭhena upatthambhanaṭṭhena cā’’ti.
таанан̃жа таанад̇од̇и гааран̣ан̃жа гааран̣ад̇о. гааран̣ан̃хи яасмаа палам̣ д̇идтад̇и д̇ад̣̇ааяад̇д̇авуд̇д̇ид̇ааяа уббаж̇ж̇ад̇и жзва бавад̇д̇ад̇и жа, д̇асмаа ‘‘таана’’нд̇и вужжад̇и. вибарияааязна адтаананд̇и агааран̣ам̣ взд̣̇ид̇аб̣б̣ам̣. д̇ад̣̇убхаяам̣ бхаг̇аваа язна н̃аан̣зна яз яз д̇хаммаа язсам̣ язсам̣ д̇хаммаанам̣ хзд̇уу бажжаяаа уббаад̣̇ааяа, д̇ам̣ д̇ам̣ таанам̣, яз яз д̇хаммаа язсам̣ язсам̣ д̇хаммаанам̣ на хзд̇уу на бажжаяаа уббаад̣̇ааяа, д̇ам̣ д̇ам̣ адтаананд̇и баж̇аанаад̇и. д̇ам̣ санд̇хааяааха ‘‘таанан̃жа…бз… ж̇аананам̣ зга’’нд̇и. гаммасамаад̣̇аанаананд̇и гаммам̣ самаад̣̇ияид̇ваа гад̇аанам̣ гусалаагусалагаммаанам̣, гамман̃н̃зва ваа гаммасамаад̣̇аанам̣. таанасо хзд̇усод̇и бажжаяад̇о жа хзд̇уд̇о жа. д̇ад̇т̇а г̇ад̇иубад̇хигаалабаяог̇аа вибаагасса таанам̣, гаммам̣ хзд̇у. саб̣б̣ад̇т̇аг̇ааминийбадибад̣̇ааж̇аанананд̇и саб̣б̣аг̇ад̇иг̇ааминияаа аг̇ад̇иг̇ааминияаа жа бадибад̣̇ааяа маг̇г̇асса ж̇аананам̣, б̣ахуусуби мануссзсу згамзва баан̣ам̣ хананд̇зсу ‘‘имасса жзд̇анаа нираяаг̇ааминий бхависсад̇и, имасса д̇иражчаанаяониг̇ааминий’’д̇и иминаа наязна згавад̇т̇усмимби гусалаагусалажзд̇анаасан̇каад̇аанам̣ бадибад̇д̇ийнам̣ авибарийд̇ад̇о сабхааваж̇аананам̣ . анзгад̇хаад̇унаанаад̇хаад̇улогаж̇аанананд̇и жагкуд̇хаад̇уаад̣̇ийхи гаамад̇хаад̇уаад̣̇ийхи ваа б̣ахуд̇хаад̇уно, д̇аасам̣язва д̇хаад̇уунам̣ вибарийд̇ад̇ааяа наанаббагаарад̇хаад̇уно канд̇хааяад̇анад̇хаад̇улогасса ж̇аананам̣. барасад̇д̇аананд̇и барзсам̣ сад̇д̇аанам̣. наанаад̇химуд̇д̇игад̇ааж̇аанананд̇и хийнаад̣̇ийхи ад̇химуд̇д̇ийхи наанаад̇химуд̇д̇игабхаавасса ж̇аананам̣. д̇зсам̣язваад̇и барасад̇д̇аанам̣язва. инд̣̇рияабаробарияад̇д̇аж̇аанананд̇и сад̣̇д̇хаад̣̇ийнам̣ инд̣̇рияаанам̣ барабхаавасса абарабхаавасса вуд̣̇д̇хияаа жзва хаанияаа жа ж̇аананам̣. жхаанавимогкасамаад̇хисамаабад̇д̇ийнанд̇и батамаад̣̇ийнам̣ жад̇уннам̣ жхаанаанам̣, ‘‘руубий руубаани бассад̇ий’’д̇иаад̣̇ийнам̣ адтаннам̣ вимогкаанам̣, савид̇аггасавижаараад̣̇ийнам̣ д̇ин̣н̣ам̣ самаад̇хийнам̣, батамаж̇жхаанасамаабад̇д̇иаад̣̇ийнан̃жа наваннам̣ анубуб̣б̣асамаабад̇д̇ийнам̣. сам̣гилзсавод̣̇аанавудтаанаж̇аанананд̇и хаанабхааг̇ияасса, висзсабхааг̇ияасса ‘‘вод̣̇аанамби вудтаанам̣, д̇амхаа д̇амхаа самаад̇химхаа вудтаанамби вудтаана’’нд̇и (вибха. 828) звам̣ вуд̇д̇абаг̇ун̣аж̇жхаанасса жзва бхаван̇г̇апаласамаабад̇д̇ийнан̃жа ж̇аананам̣. хздтимам̣ хздтиман̃хи баг̇ун̣аж̇жхаанам̣ убаримасса убаримасса бад̣̇адтаанам̣ ход̇и, д̇асмаа вод̣̇аанамби ‘‘вудтаана’’нд̇и вужжад̇и. бхаван̇г̇зна бана саб̣б̣ажхаанзхи вудтаанам̣ ход̇и. паласамаабад̇д̇ияаа нирод̇хасамаабад̇д̇ид̇о вудтаанамзва санд̇хааяа ‘‘д̇амхаа д̇амхаа самаад̇химхаа вудтаана’’нд̇и вуд̇д̇ам̣. буб̣б̣зниваасаж̇аанананд̇и буб̣б̣зниваасаануссад̇ин̃аан̣зна нивудтагканд̇хаанам̣ ж̇аананам̣. жуд̇уубабаад̇аж̇аанананд̇и сад̇д̇аанам̣ жуд̇ияаа убабад̇д̇ияаа жа яаат̇аавад̇о ж̇аананам̣. аяамзд̇т̇а сан̇кзбо, вид̇т̇ааро бана висуд̣̇д̇химаг̇г̇з вуд̇д̇анаязнзва взд̣̇ид̇аб̣б̣о. аасавагкаяаж̇аананам̣ аасавагкаяан̃аан̣ам̣, маг̇г̇ан̃аан̣анд̇и ад̇т̇о. яад̇т̇а банзд̇аани вид̇т̇аарад̇о ааг̇ад̇аани сам̣ван̣н̣ид̇аани, д̇аани д̣̇ассзнд̇о ‘‘абхид̇хаммз банаа’’д̇иаад̣̇имааха.
Ṭhānañcaṭhānatoti kāraṇañca kāraṇato. Kāraṇañhi yasmā phalaṃ tiṭṭhati tadāyattavuttitāya uppajjati ceva pavattati ca, tasmā ‘‘ṭhāna’’nti vuccati. Vipariyāyena aṭṭhānanti akāraṇaṃ veditabbaṃ. Tadubhayaṃ bhagavā yena ñāṇena ye ye dhammā yesaṃ yesaṃ dhammānaṃ hetū paccayā uppādāya, taṃ taṃ ṭhānaṃ, ye ye dhammā yesaṃ yesaṃ dhammānaṃ na hetū na paccayā uppādāya, taṃ taṃ aṭṭhānanti pajānāti. Taṃ sandhāyāha ‘‘ṭhānañca…pe… jānanaṃ eka’’nti. Kammasamādānānanti kammaṃ samādiyitvā katānaṃ kusalākusalakammānaṃ, kammaññeva vā kammasamādānaṃ. Ṭhānaso hetusoti paccayato ca hetuto ca. Tattha gatiupadhikālapayogā vipākassa ṭhānaṃ, kammaṃ hetu. Sabbatthagāminīpaṭipadājānananti sabbagatigāminiyā agatigāminiyā ca paṭipadāya maggassa jānanaṃ, bahūsupi manussesu ekameva pāṇaṃ hanantesu ‘‘imassa cetanā nirayagāminī bhavissati, imassa tiracchānayonigāminī’’ti iminā nayena ekavatthusmimpi kusalākusalacetanāsaṅkhātānaṃ paṭipattīnaṃ aviparītato sabhāvajānanaṃ . Anekadhātunānādhātulokajānananti cakkhudhātuādīhi kāmadhātuādīhi vā bahudhātuno, tāsaṃyeva dhātūnaṃ viparītatāya nānappakāradhātuno khandhāyatanadhātulokassa jānanaṃ. Parasattānanti paresaṃ sattānaṃ. Nānādhimuttikatājānananti hīnādīhi adhimuttīhi nānādhimuttikabhāvassa jānanaṃ. Tesaṃyevāti parasattānaṃyeva. Indriyaparopariyattajānananti saddhādīnaṃ indriyānaṃ parabhāvassa aparabhāvassa vuddhiyā ceva hāniyā ca jānanaṃ. Jhānavimokkhasamādhisamāpattīnanti paṭhamādīnaṃ catunnaṃ jhānānaṃ, ‘‘rūpī rūpāni passatī’’tiādīnaṃ aṭṭhannaṃ vimokkhānaṃ, savitakkasavicārādīnaṃ tiṇṇaṃ samādhīnaṃ, paṭhamajjhānasamāpattiādīnañca navannaṃ anupubbasamāpattīnaṃ. Saṃkilesavodānavuṭṭhānajānananti hānabhāgiyassa, visesabhāgiyassa ‘‘vodānampi vuṭṭhānaṃ, tamhā tamhā samādhimhā vuṭṭhānampi vuṭṭhāna’’nti (vibha. 828) evaṃ vuttapaguṇajjhānassa ceva bhavaṅgaphalasamāpattīnañca jānanaṃ. Heṭṭhimaṃ heṭṭhimañhi paguṇajjhānaṃ uparimassa uparimassa padaṭṭhānaṃ hoti, tasmā vodānampi ‘‘vuṭṭhāna’’nti vuccati. Bhavaṅgena pana sabbajhānehi vuṭṭhānaṃ hoti. Phalasamāpattiyā nirodhasamāpattito vuṭṭhānameva sandhāya ‘‘tamhā tamhā samādhimhā vuṭṭhāna’’nti vuttaṃ. Pubbenivāsajānananti pubbenivāsānussatiñāṇena nivuṭṭhakkhandhānaṃ jānanaṃ. Cutūpapātajānananti sattānaṃ cutiyā upapattiyā ca yāthāvato jānanaṃ. Ayamettha saṅkhepo, vitthāro pana visuddhimagge vuttanayeneva veditabbo. Āsavakkhayajānanaṃ āsavakkhayañāṇaṃ, maggañāṇanti attho. Yattha panetāni vitthārato āgatāni saṃvaṇṇitāni, tāni dassento ‘‘abhidhamme panā’’tiādimāha.
б̣яаамохабхаяавасзна саран̣абариязсанам̣ саараж̇ж̇анам̣ саарад̣̇о, б̣яаамохабхаяам̣. виг̇ад̇о саарад̣̇о зд̇ассаад̇и висаарад̣̇о, д̇асса бхааво взсаараж̇ж̇ам̣. д̇ам̣ бана н̃аан̣асамбад̣̇ам̣ бахаанасамбад̣̇ам̣ д̣̇зсанаависзсасамбад̣̇ам̣ кзмам̣ ниссааяа бавад̇д̇ам̣ жад̇уб̣б̣ид̇хам̣ бажжавзгкан̣аан̃аан̣ам̣. д̇знааха ‘‘жад̇уусу таанзсуу’’д̇иаад̣̇и. жад̇уусууд̇и барабаригаббид̇зсу вад̇т̇уусу. барабаригаббид̇зсу ваа вад̇т̇умад̇д̇зсу жод̣̇анаагааран̣зсу. саммаасамб̣уд̣̇д̇хасса д̇з бадиж̇аанад̇од̇и ‘‘ахам̣ саммаасамб̣уд̣̇д̇хо’’д̇и звам̣ бадиж̇аананд̇зна д̇аяаа. имз д̇хаммаад̇и ‘‘ид̣̇ам̣ бан̃жамам̣ арияасажжам̣, аяам̣ чадто убаад̣̇аанагканд̇хо, ид̣̇ам̣ д̇зрасамам̣ ааяад̇ана’’нд̇и взд̣̇ид̇аб̣б̣аа имз д̇хаммаа. анабхисамб̣уд̣̇д̇хаа аббадивид̣̇д̇хад̇д̇аад̇и.
Byāmohabhayavasena saraṇapariyesanaṃ sārajjanaṃ sārado, byāmohabhayaṃ. Vigato sārado etassāti visārado, tassa bhāvo vesārajjaṃ. Taṃ pana ñāṇasampadaṃ pahānasampadaṃ desanāvisesasampadaṃ khemaṃ nissāya pavattaṃ catubbidhaṃ paccavekkhaṇāñāṇaṃ. Tenāha ‘‘catūsu ṭhānesū’’tiādi. Catūsūti paraparikappitesu vatthūsu. Paraparikappitesu vā vatthumattesu codanākāraṇesu. Sammāsambuddhassa te paṭijānatoti ‘‘ahaṃ sammāsambuddho’’ti evaṃ paṭijānantena tayā. Ime dhammāti ‘‘idaṃ pañcamaṃ ariyasaccaṃ, ayaṃ chaṭṭho upādānakkhandho, idaṃ terasamaṃ āyatana’’nti veditabbā ime dhammā. Anabhisambuddhā appaṭividdhattāti.
д̇ад̇раад̇и д̇асмим̣ анабхисамб̣уд̣̇д̇хад̇хаммасан̇каад̇з жод̣̇анаавад̇т̇усмим̣. гожийд̇и саман̣аад̣̇ийхи ан̃н̃о ваа яо гожи. саха д̇хаммзнаад̇и саха хзд̇унаа. ‘‘д̇хаммабадисамбхид̣̇аа’’д̇иаад̣̇ийсу вияа хзд̇убарияааяо ид̇ха д̇хамма-сад̣̇д̣̇о. хзд̇ууд̇и жа уббад̇д̇исаад̇ханахзд̇у взд̣̇ид̇аб̣б̣о, на гаараго самбаабаго ваа. нимид̇д̇анд̇и гааран̣ам̣, д̇ам̣ банзд̇т̇а жод̣̇анаавад̇т̇умзва. на саманубассаами саммаасамб̣уд̣̇д̇хабхаавад̇о. кзмаббад̇д̇од̇и акзмаббад̇д̇аруубааяа жод̣̇анааяа анубад̣̇д̣̇авам̣ бад̇д̇о нижжалабхааваббад̇д̇о. взсаараж̇ж̇аббад̇д̇од̇и висаарад̣̇абхааваббад̇д̇о. сзсзсуби зсзва наяо. аяам̣ бана висзсо – имз аасаваад̇и гаамаасаваад̣̇ийсу имз наама аасаваа на баригкийн̣аад̇и аасавагкаяаважанзнзд̇т̇а саб̣б̣агилзсаббахаанам̣ вуд̇д̇ам̣. на хи со гилзсо ад̇т̇и, яо саб̣б̣асо аасавзсу кийн̣зсу наббахийязяяа. анд̇арааяигаад̇и анд̇арааяагараа, саг̇г̇авимогкаад̇хиг̇амасса анд̇арааяагараад̇и ад̇т̇о. д̇хаммо хи яо сам̣гилзсад̇о нияяаад̇и, со ‘‘нияяааниго’’д̇и вуд̇д̇о. д̇хаммз нияяанд̇з д̇ам̣саман̇г̇ийбуг̇г̇ало нияяаанигод̇и вохарид̇о ход̇ийд̇и д̇асса бадигкибанд̇о ‘‘со на нияяаад̇ий’’д̇и ааха. гат̇ам̣ бана д̣̇зсанаад̇хаммо нияяаад̇ийд̇и вужжад̇и? нияяаанад̇т̇асамаад̇хаанад̇о, со абхзд̣̇обажаарзна ‘‘нияяаад̇ий’’д̇и вуд̇д̇о. ат̇а ваа ‘‘д̇хаммо д̣̇зсид̇о’’д̇и арияад̇хаммасса ад̇хиббзд̇ад̇д̇аа на гожи вирод̇хо.
Tatrāti tasmiṃ anabhisambuddhadhammasaṅkhāte codanāvatthusmiṃ. Kocīti samaṇādīhi añño vā yo koci. Saha dhammenāti saha hetunā. ‘‘Dhammapaṭisambhidā’’tiādīsu viya hetupariyāyo idha dhamma-saddo. Hetūti ca uppattisādhanahetu veditabbo, na kārako sampāpako vā. Nimittanti kāraṇaṃ, taṃ panettha codanāvatthumeva. Na samanupassāmi sammāsambuddhabhāvato. Khemappattoti akhemappattarūpāya codanāya anupaddavaṃ patto niccalabhāvappatto. Vesārajjappattoti visāradabhāvappatto. Sesesupi eseva nayo. Ayaṃ pana viseso – ime āsavāti kāmāsavādīsu ime nāma āsavā na parikkhīṇāti āsavakkhayavacanenettha sabbakilesappahānaṃ vuttaṃ. Na hi so kileso atthi, yo sabbaso āsavesu khīṇesu nappahīyeyya. Antarāyikāti antarāyakarā, saggavimokkhādhigamassa antarāyakarāti attho. Dhammo hi yo saṃkilesato niyyāti, so ‘‘niyyāniko’’ti vutto. Dhamme niyyante taṃsamaṅgīpuggalo niyyānikoti voharito hotīti tassa paṭikkhipanto ‘‘so na niyyātī’’ti āha. Kathaṃ pana desanādhammo niyyātīti vuccati? Niyyānatthasamādhānato, so abhedopacārena ‘‘niyyātī’’ti vutto. Atha vā ‘‘dhammo desito’’ti ariyadhammassa adhippetattā na koci virodho.
усабхасса ид̣̇анд̇и аасабхам̣, асанд̇асанадтзна аасабхам̣ вияаад̇и аасабхам̣, сздтадтаанам̣ саб̣б̣ан̃н̃уд̇ам̣. аасабхадтаанадтааяид̇ааяа аасабхаа наама буб̣б̣аб̣уд̣̇д̇хаа. саб̣б̣ан̃н̃уд̇абадиж̇аананавасзна абхимукам̣ г̇ажчанд̇и, жад̇ассо ваа барисаа убасан̇гаманд̇ийд̇и аасабхаа. жад̇ассоби хи барисаа б̣уд̣̇д̇хаабхимукаа звам̣ д̇идтанд̇и, на д̇идтанд̇и бараммукаа. ид̣̇амбийд̇и ‘‘усабхо’’д̇и ид̣̇амби бад̣̇ам̣. д̇ассаад̇и нисабхасса. язсам̣ б̣алуббаад̣̇аавадтаанаанам̣ васзна усабхасса аасабхан̣таанам̣ ижчид̇ам̣, д̇ад̇о саад̇исаяаанам̣ зва д̇зсам̣ васзна аасабхан̣таанам̣ ход̇ийд̇и д̣̇адтаб̣б̣ам̣. яам̣ гин̃жи логз убамам̣ наама б̣уд̣̇д̇хаг̇ун̣аанам̣ нид̣̇ассанабхаавзна вужжад̇и, саб̣б̣ам̣ д̇ам̣ нихийнамзва. д̇идтамаано жаад̇и ад̇идтанд̇оби д̇идтамаано зва бадиж̇аанаад̇и наама. убаг̇ажчад̇ийд̇и ануж̇аанаад̇и.
Usabhassa idanti āsabhaṃ, asantasanaṭṭhena āsabhaṃ viyāti āsabhaṃ, seṭṭhaṭṭhānaṃ sabbaññutaṃ. Āsabhaṭṭhānaṭṭhāyitāya āsabhā nāma pubbabuddhā. Sabbaññutapaṭijānanavasena abhimukhaṃ gacchanti, catasso vā parisā upasaṅkamantīti āsabhā. Catassopi hi parisā buddhābhimukhā evaṃ tiṭṭhanti, na tiṭṭhanti parammukhā. Idampīti ‘‘usabho’’ti idampi padaṃ. Tassāti nisabhassa. Yesaṃ baluppādāvaṭṭhānānaṃ vasena usabhassa āsabhaṇṭhānaṃ icchitaṃ, tato sātisayānaṃ eva tesaṃ vasena āsabhaṇṭhānaṃ hotīti daṭṭhabbaṃ. Yaṃ kiñci loke upamaṃ nāma buddhaguṇānaṃ nidassanabhāvena vuccati, sabbaṃ taṃ nihīnameva. Tiṭṭhamāno cāti atiṭṭhantopi tiṭṭhamāno eva paṭijānāti nāma. Upagacchatīti anujānāti.
адта ко имаад̇и ид̣̇ам̣ взсаараж̇ж̇ан̃аан̣асса б̣алад̣̇ассанам̣. яат̇аа хи б̣яад̇д̇ам̣ барисам̣ аж̇жхог̇аахзд̇ваа вин̃н̃уунам̣ жид̇д̇ам̣ аараад̇ханасамад̇т̇ааяа гат̇ааяа д̇хаммагат̇игасса чзгабхааво бан̃н̃ааяад̇и, звам̣ имаа адта барисаа бад̇ваа сад̇т̇у взсаараж̇ж̇ан̃аан̣асса б̣алам̣ баагадам̣ ход̇и. д̇зна вуд̇д̇ам̣ ‘‘барисаасуу’’д̇и. кад̇д̇ияабарисаад̇и кад̇д̇ияаанам̣ саннибад̇ид̇аанам̣ самуухо. зса наяо саб̣б̣ад̇т̇а. маарабарисаад̇и маарагааяигаанам̣ саннибад̇ид̇аанам̣ самуухо. маарасад̣̇исаанам̣ маараанам̣ барисаад̇и маарабарисаа. саб̣б̣аа жзд̇аа барисаа уг̇г̇адтаанад̣̇ассанавасзна г̇ахид̇аа. мануссаа хи ‘‘зд̇т̇а рааж̇аа нисинно’’д̇и вуд̇д̇з багад̇иважанамби вад̇д̇ум̣ на саггонд̇и, гажчзхи сзд̣̇аа мужжанд̇и, звам̣ уг̇г̇аа кад̇д̇ияабарисаа, б̣раахман̣аа д̇ийсу взд̣̇зсу гусалаа хонд̇и, г̇ахабад̇аяо наанаавохаарзсу жа агкаражинд̇ааяа жа гусалаа, саман̣аа сагаваад̣̇абараваад̣̇зсу гусалаа, д̇зсам̣ маж̇жхз д̇хаммагат̇аагат̇анам̣ наама ад̇ивияа бхаарияам̣. д̣̇зваанам̣ уг̇г̇абхаавз вад̇д̇аб̣б̣амзва над̇т̇и. амануссод̇и хи вуд̇д̇амад̇д̇з мануссаанам̣ сагаласарийрам̣ гамбад̇и, д̇зсам̣ руубам̣ д̣̇исвааби сад̣̇д̣̇ам̣ суд̇вааби сад̇д̇аа висан̃н̃ид̇ааби хонд̇и. звам̣ амануссабарисаа уг̇г̇аа. ид̇и жзд̇аа барисаа уг̇г̇адтаанад̣̇ассанавасзна вуд̇д̇аа. гасмаа банзд̇т̇а яаамаад̣̇ибарисаа на г̇ахид̇аад̇и? бхусам̣ гаамаабхиг̇ид̣̇д̇хад̇ааяа яонисоманасигааравирахад̇о. яаамаад̣̇аяо хи ул̣аарул̣аарз гаамз бадисзванд̇аа д̇ад̇т̇аабхиг̇ид̣̇д̇хад̇ааяа д̇хаммассаванааяа сабхаавзна жид̇д̇амби на уббаад̣̇знд̇и, махааб̣од̇хисад̇д̇аанам̣ бана б̣уд̣̇д̇хаанан̃жа аанубхаавзна аагад̣дхияамаанаа гад̣̇аажи нзсам̣ баяирубаасанаад̣̇ийни гаронд̇и д̇аад̣̇исз махаасамаяз. д̇знзва хи вимаанавад̇т̇уд̣̇зсанааби д̇ам̣нимид̇д̇аа б̣ахулаа наахоси. сздтанаад̣̇анд̇и гзнажи аббадихад̇абхаавзна уд̇д̇аманаад̣̇ам̣. абхийд̇анаад̣̇анд̇и взсаараж̇ж̇аяог̇ад̇о гуд̇ожи ниб̣бхаяанаад̣̇ам̣. сийханаад̣̇асуд̇д̇знаад̇и канд̇хияаваг̇г̇з ааг̇ад̇зна сийханаад̣̇асуд̇д̇зна. саханад̇од̇и каманад̇о. хананад̇од̇и вид̇хаманад̇о вид̣̇д̇хам̣санад̇о. яат̇аа ваад̇иаад̣̇и ‘‘сийханаад̣̇асад̣̇исам̣ ваа наад̣̇ам̣ над̣̇ад̇ий’’д̇и сан̇кзбад̇о вуд̇д̇асса ад̇т̇асса вин̃н̃аабанам̣.
Aṭṭhakho imāti idaṃ vesārajjañāṇassa baladassanaṃ. Yathā hi byattaṃ parisaṃ ajjhogāhetvā viññūnaṃ cittaṃ ārādhanasamatthāya kathāya dhammakathikassa chekabhāvo paññāyati, evaṃ imā aṭṭha parisā patvā satthu vesārajjañāṇassa balaṃ pākaṭaṃ hoti. Tena vuttaṃ ‘‘parisāsū’’ti. Khattiyaparisāti khattiyānaṃ sannipatitānaṃ samūho. Esa nayo sabbattha. Māraparisāti mārakāyikānaṃ sannipatitānaṃ samūho. Mārasadisānaṃ mārānaṃ parisāti māraparisā. Sabbā cetā parisā uggaṭṭhānadassanavasena gahitā. Manussā hi ‘‘ettha rājā nisinno’’ti vutte pakativacanampi vattuṃ na sakkonti, kacchehi sedā muccanti, evaṃ uggā khattiyaparisā, brāhmaṇā tīsu vedesu kusalā honti, gahapatayo nānāvohāresu ca akkharacintāya ca kusalā, samaṇā sakavādaparavādesu kusalā, tesaṃ majjhe dhammakathākathanaṃ nāma ativiya bhāriyaṃ. Devānaṃ uggabhāve vattabbameva natthi. Amanussoti hi vuttamatte manussānaṃ sakalasarīraṃ kampati, tesaṃ rūpaṃ disvāpi saddaṃ sutvāpi sattā visaññitāpi honti. Evaṃ amanussaparisā uggā. Iti cetā parisā uggaṭṭhānadassanavasena vuttā. Kasmā panettha yāmādiparisā na gahitāti? Bhusaṃ kāmābhigiddhatāya yonisomanasikāravirahato. Yāmādayo hi uḷāruḷāre kāme paṭisevantā tatthābhigiddhatāya dhammassavanāya sabhāvena cittampi na uppādenti, mahābodhisattānaṃ pana buddhānañca ānubhāvena ākaḍḍhiyamānā kadāci nesaṃ payirupāsanādīni karonti tādise mahāsamaye. Teneva hi vimānavatthudesanāpi taṃnimittā bahulā nāhosi. Seṭṭhanādanti kenaci appaṭihatabhāvena uttamanādaṃ. Abhītanādanti vesārajjayogato kutoci nibbhayanādaṃ. Sīhanādasuttenāti khandhiyavagge āgatena sīhanādasuttena. Sahanatoti khamanato. Hananatoti vidhamanato viddhaṃsanato. Yathā vātiādi ‘‘sīhanādasadisaṃ vā nādaṃ nadatī’’ti saṅkhepato vuttassa atthassa viññāpanaṃ.
зд̇анд̇и ‘‘б̣рахмажагга’’нд̇и зд̇ам̣ бад̣̇ам̣. бан̃н̃аабабхаавид̇анд̇и жирагаалабарибхаавид̇ааяа баарамид̇аабан̃н̃ааяа вибассанаабан̃н̃ааяа жа уббаад̣̇ид̇ам̣. гарун̣аабабхаавид̇анд̇и ‘‘гижчам̣ вад̇ааяам̣ лого аабанно’’д̇иаад̣̇инаяаббавад̇д̇ааяа махаагарун̣ааяа уббаад̣̇ид̇ам̣. яат̇аа абхинигкаманад̇о бабхуд̇и махааб̣од̇хисад̇д̇аанам̣ арияамаг̇г̇аад̇хиг̇аманавирод̇хиний бадибад̇д̇и над̇т̇и, звам̣ д̇усид̇абхаванад̇о нияад̇абхааваабад̇д̇ид̇о жа бадтааяаад̇и д̣̇уд̇ияад̇ад̇ияанаяаа жа г̇ахид̇аа. палагкан̣зд̇и аг̇г̇апалагкан̣з. бадивзд̇ханидтад̇д̇аа арахад̇д̇амаг̇г̇ан̃аан̣ам̣ важ̇ируубамад̇ааязва саад̇исаяо бадивзд̇ход̇и ‘‘палагкан̣з уббаннам̣ наамаа’’д̇и вуд̇д̇ам̣. д̇зна бадилад̣̇д̇хассаби д̣̇зсанаан̃аан̣асса гижжанибпад̇д̇и барасса б̣уж̇жханамад̇д̇зна ход̇ийд̇и ‘‘ан̃н̃аасигон̣д̣ан̃н̃асса сод̇аабад̇д̇и…бз… палагкан̣з бавад̇д̇анам̣ наамаа’’д̇и вуд̇д̇ам̣. д̇ад̇о барам̣ бана яаава бариниб̣б̣аанаа д̣̇зсанаан̃аан̣аббавад̇д̇и, д̇ассзва бавад̇д̇ид̇асса д̇хаммажаггасса таананд̇и взд̣̇ид̇аб̣б̣ам̣ бавад̇д̇ид̇ажаггасса жаггавад̇д̇ино жаггарад̇анасса таанам̣ вияа. убхаяамбийд̇и би-сад̣̇д̣̇зна логияад̣̇зсанаан̃аан̣асса ид̇арзна анан̃н̃асаад̇хааран̣ад̇аавасзна самаанад̇ам̣ самбин̣д̣зд̇и. ураси ж̇аад̇ад̇ааяа урасо самбхууд̇анд̇и орасам̣ н̃аан̣ам̣.
Etanti ‘‘brahmacakka’’nti etaṃ padaṃ. Paññāpabhāvitanti cirakālaparibhāvitāya pāramitāpaññāya vipassanāpaññāya ca uppāditaṃ. Karuṇāpabhāvitanti ‘‘kicchaṃ vatāyaṃ loko āpanno’’tiādinayappavattāya mahākaruṇāya uppāditaṃ. Yathā abhinikkhamanato pabhuti mahābodhisattānaṃ ariyamaggādhigamanavirodhinī paṭipatti natthi, evaṃ tusitabhavanato niyatabhāvāpattito ca paṭṭhāyāti dutiyatatiyanayā ca gahitā. Phalakkhaṇeti aggaphalakkhaṇe. Paṭivedhaniṭṭhattā arahattamaggañāṇaṃ vajirūpamatāyeva sātisayo paṭivedhoti ‘‘phalakkhaṇe uppannaṃ nāmā’’ti vuttaṃ. Tena paṭiladdhassapi desanāñāṇassa kiccanipphatti parassa bujjhanamattena hotīti ‘‘aññāsikoṇḍaññassa sotāpatti…pe… phalakkhaṇe pavattanaṃ nāmā’’ti vuttaṃ. Tato paraṃ pana yāva parinibbānā desanāñāṇappavatti, tasseva pavattitassa dhammacakkassa ṭhānanti veditabbaṃ pavattitacakkassa cakkavattino cakkaratanassa ṭhānaṃ viya. Ubhayampīti pi-saddena lokiyadesanāñāṇassa itarena anaññasādhāraṇatāvasena samānataṃ sampiṇḍeti. Urasi jātatāya uraso sambhūtanti orasaṃ ñāṇaṃ.
ид̇и руубанд̇и зд̇т̇а ид̇и-сад̣̇д̣̇о анавасзсад̇о руубасса саруубанид̣̇ассанад̇т̇од̇и д̇асса ‘‘ид̣̇ам̣ рууба’’нд̇и зд̇зна саад̇хааран̣ад̇о жа саруубанид̣̇ассанамааха. зд̇д̇агам̣ руубанд̇и зд̇зна анавасзсад̇о ‘‘ид̇о уд̣̇д̇хам̣ руубам̣ над̇т̇ий’’д̇и нимид̇д̇асса ан̃н̃асса абхаавам̣. ид̣̇аани д̇амад̇т̇ам̣ вид̇т̇аарад̇о д̣̇ассзд̇ум̣ ‘‘руббанасабхааван̃жзваа’’д̇иаад̣̇и вуд̇д̇ам̣. д̇ад̇т̇а руббанам̣ сийд̇аад̣̇ивирод̇хибажжаяасамавааяз висад̣̇исуббад̇д̇и. аад̣̇и-сад̣̇д̣̇зна аж̇жхад̇д̇игаб̣аахираад̣̇ибхзд̣̇ам̣ сан̇г̇ан̣хаад̇и. лагкан̣а…бз… васзнаад̇и гагкал̣ад̇д̇аад̣̇илагкан̣авасзна санд̇хааран̣аад̣̇ирасавасзна самбадижчанаад̣̇ибажжубадтаанавасзна бхууд̇ад̇д̇аяаад̣̇ибад̣̇адтаанавасзна жа. звам̣ бариг̇г̇ахид̇ассаад̇и звам̣ саад̇хааран̣ад̇о жа лагкан̣аад̣̇ид̇о жа бариг̇г̇ахид̇асса. авиж̇ж̇аасамуд̣̇аяаад̇и авиж̇ж̇ааяа уббаад̣̇аа, ад̇т̇ибхааваад̇и ад̇т̇о. нирод̇хавирод̇хий хи ад̇т̇ибхааво ход̇и, д̇асмаа нирод̇хз асад̇и ад̇т̇ибхааво ход̇и, д̇асмаа буримабхавз сид̣̇д̇хааяа авиж̇ж̇ааяа сад̇и имасмим̣ бхавз руубасса самуд̣̇аяо руубасса уббаад̣̇о ход̇ийд̇и ад̇т̇о. д̇ан̣хаасамуд̣̇аяаа гаммасамуд̣̇аяаад̇и зд̇т̇ааби зсзва наяо. авиж̇ж̇аад̣̇ийхи жа д̇ийхи ад̇ийд̇агаалигад̇д̇аа д̇зсам̣ сахагаарийгааран̣абхууд̇ам̣ убаад̣̇аанамби г̇ахид̇амзваад̇и взд̣̇ид̇аб̣б̣ам̣. бавад̇д̇ибажжаязсу габ̣ал̣ийгаарааахаарасса б̣алавад̇ааяа, со зва г̇ахид̇о, ‘‘аахаарасамуд̣̇аяаа’’д̇и бана г̇ахид̇зна бавад̇д̇ибажжаяад̇аамад̇д̇зна уд̇ужид̇д̇ааниби г̇ахид̇аанзва хонд̇ийд̇и д̣̇ваад̣̇асасамудтаанигам̣ руубасса бажжаяад̇о д̣̇ассанамби бхавид̇аб̣б̣амзваад̇и д̣̇адтаб̣б̣ам̣. ниб̣б̣ад̇д̇илагкан̣анд̇иаад̣̇инаа гаалавасзна уд̣̇аяад̣̇ассанамааха. д̇ад̇т̇а бхууд̇авасзна маг̇г̇з уд̣̇аяам̣ бассид̇ваа тид̇о ид̇ха санд̇ад̇ивасзна ануггамзна кан̣авасзна бассад̇и. авиж̇ж̇аанирод̇хаа руубанирод̇ход̇и аг̇г̇амаг̇г̇ан̃аан̣зна авиж̇ж̇ааяа ануббаад̣̇анирод̇хад̇о анааг̇ад̇асса ануббаад̣̇анирод̇хо ход̇и бажжаяаабхаавз абхаавад̇о. бажжаяанирод̇хзнаад̇и авиж̇ж̇аасан̇каад̇асса бажжаяасса нирод̇хабхаавзна. д̇ан̣хаанирод̇хаад̇и зд̇т̇ааби зсзва наяо. аахааранирод̇хаад̇и бавад̇д̇ибажжаяасса габ̣ал̣ийгаараахаарасса абхааваа. руубанирод̇хаад̇и д̇ам̣самудтаанаруубасса абхааво ход̇и. сзсам̣ хздтаа вуд̇д̇анаяаанусаарзна взд̣̇ид̇аб̣б̣ам̣. вибарин̣аамалагкан̣анд̇и бхавагаалавасзна хзд̇уд̣̇ваяад̣̇ассанам̣. д̇асмаа д̇ам̣ бад̣̇адтаанавасзна баг̇зва бассид̇ваа тид̇о ид̇ха санд̇ад̇ивасзна д̣̇исваа ануггамзна кан̣авасзна бассад̇и.
Iti rūpanti ettha iti-saddo anavasesato rūpassa sarūpanidassanatthoti tassa ‘‘idaṃ rūpa’’nti etena sādhāraṇato ca sarūpanidassanamāha. Ettakaṃ rūpanti etena anavasesato ‘‘ito uddhaṃ rūpaṃ natthī’’ti nimittassa aññassa abhāvaṃ. Idāni tamatthaṃ vitthārato dassetuṃ ‘‘ruppanasabhāvañcevā’’tiādi vuttaṃ. Tattha ruppanaṃ sītādivirodhipaccayasamavāye visadisuppatti. Ādi-saddena ajjhattikabāhirādibhedaṃ saṅgaṇhāti. Lakkhaṇa…pe… vasenāti kakkhaḷattādilakkhaṇavasena sandhāraṇādirasavasena sampaṭicchanādipaccupaṭṭhānavasena bhūtattayādipadaṭṭhānavasena ca. Evaṃ pariggahitassāti evaṃ sādhāraṇato ca lakkhaṇādito ca pariggahitassa. Avijjāsamudayāti avijjāya uppādā, atthibhāvāti attho. Nirodhavirodhī hi atthibhāvo hoti, tasmā nirodhe asati atthibhāvo hoti, tasmā purimabhave siddhāya avijjāya sati imasmiṃ bhave rūpassa samudayo rūpassa uppādo hotīti attho. Taṇhāsamudayā kammasamudayāti etthāpi eseva nayo. Avijjādīhi ca tīhi atītakālikattā tesaṃ sahakārīkāraṇabhūtaṃ upādānampi gahitamevāti veditabbaṃ. Pavattipaccayesu kabaḷīkāraāhārassa balavatāya, so eva gahito, ‘‘āhārasamudayā’’ti pana gahitena pavattipaccayatāmattena utucittānipi gahitāneva hontīti dvādasasamuṭṭhānikaṃ rūpassa paccayato dassanampi bhavitabbamevāti daṭṭhabbaṃ. Nibbattilakkhaṇantiādinā kālavasena udayadassanamāha. Tattha bhūtavasena magge udayaṃ passitvā ṭhito idha santativasena anukkamena khaṇavasena passati. Avijjānirodhā rūpanirodhoti aggamaggañāṇena avijjāya anuppādanirodhato anāgatassa anuppādanirodho hoti paccayābhāve abhāvato. Paccayanirodhenāti avijjāsaṅkhātassa paccayassa nirodhabhāvena. Taṇhānirodhāti etthāpi eseva nayo. Āhāranirodhāti pavattipaccayassa kabaḷīkārāhārassa abhāvā. Rūpanirodhāti taṃsamuṭṭhānarūpassa abhāvo hoti. Sesaṃ heṭṭhā vuttanayānusārena veditabbaṃ. Vipariṇāmalakkhaṇanti bhavakālavasena hetudvayadassanaṃ. Tasmā taṃ padaṭṭhānavasena pageva passitvā ṭhito idha santativasena disvā anukkamena khaṇavasena passati.
ид̇и взд̣̇анаад̇иаад̣̇ийсуби вуд̇д̇анаязна ад̇т̇о взд̣̇ид̇аб̣б̣о. сукаад̣̇ибхзд̣̇анд̇и сукад̣̇угкаад̣̇угкамасукаад̣̇ивибхааг̇ам̣. руубасан̃н̃аад̣̇ибхзд̣̇анд̇и руубасан̃н̃аа, сад̣̇д̣̇а… г̇анд̇ха… раса… подтаб̣б̣а … д̇хаммасан̃н̃аад̣̇ивибхааг̇ам̣. пассаад̣̇ибхзд̣̇анд̇и пассажзд̇анааманасигаараад̣̇ивибхааг̇ам̣. лагкан̣а…бз… васзнаад̇и идтаанубхаваналагкан̣аад̣̇илагкан̣авасзна идтаагаарасамбхог̇арасаад̣̇ирасавасзна гааяигаассаад̣̇аад̣̇ибажжубадтаанавасзна идтаарамман̣аад̣̇ибад̣̇адтаанавасзна. ‘‘пудто взд̣̇зд̇и, пудто сан̃ж̇аанаад̇и, пудто жзд̇зд̇ий’’д̇и (сам̣. ни. 4.93) важанад̇о д̇ийсу взд̣̇анаад̣̇ийсу канд̇хзсу пассасамуд̣̇аяаад̇и вад̇д̇аб̣б̣ам̣. вин̃н̃аан̣аббажжаяаа наамарууба’’нд̇и важанад̇о вин̃н̃аан̣агканд̇хз наамаруубасамуд̣̇аяаад̇и вад̇д̇аб̣б̣ам̣. д̇зсам̣язва васзнаад̇и ‘‘авиж̇ж̇аанирод̇хо взд̣̇анаанирод̇хо’’д̇иаад̣̇инаа д̇зсам̣язва авиж̇ж̇аад̣̇ийнам̣ васзна яож̇зд̇аб̣б̣ам̣.
Iti vedanātiādīsupi vuttanayena attho veditabbo. Sukhādibhedanti sukhadukkhaadukkhamasukhādivibhāgaṃ. Rūpasaññādibhedanti rūpasaññā, sadda… gandha… rasa… phoṭṭhabba … dhammasaññādivibhāgaṃ. Phassādibhedanti phassacetanāmanasikārādivibhāgaṃ. Lakkhaṇa…pe… vasenāti iṭṭhānubhavanalakkhaṇādilakkhaṇavasena iṭṭhākārasambhogarasādirasavasena kāyikaassādādipaccupaṭṭhānavasena iṭṭhārammaṇādipadaṭṭhānavasena. ‘‘Phuṭṭho vedeti, phuṭṭho sañjānāti, phuṭṭho cetetī’’ti (saṃ. ni. 4.93) vacanato tīsu vedanādīsu khandhesu phassasamudayāti vattabbaṃ. Viññāṇappaccayā nāmarūpa’’nti vacanato viññāṇakkhandhe nāmarūpasamudayāti vattabbaṃ. Tesaṃyeva vasenāti ‘‘avijjānirodho vedanānirodho’’tiādinā tesaṃyeva avijjādīnaṃ vasena yojetabbaṃ.
убаад̣̇аанагканд̇хаанам̣ самуд̣̇аяад̇т̇ан̇г̇амавасзна д̇ид̇т̇ияаанам̣ ависаяоби саббад̣̇зсо сийханаад̣̇о д̣̇ассид̇о. ид̣̇аани ниббад̣̇зсо ануломабадиломавасзна сан̇кзбад̇о вид̇т̇аарад̇о бажжаяаагаарависаяо анан̃н̃асаад̇хааран̣о д̣̇ассийяад̇ийд̇и ааха, ‘‘аяамби абаро сийханаад̣̇о’’д̇и. д̇ассаад̇и ‘‘имасмим̣ сад̇ий’’д̇иаад̣̇инаа сан̇кзбад̇о вуд̇д̇абадижжасамуббаад̣̇абаал̣ияаа. зд̇т̇а жа ‘‘имасмим̣ сад̇и ид̣̇ам̣ ход̇и, имасса нирод̇хаа ид̣̇ам̣ ниружхд̇ий’’д̇и авиж̇ж̇аад̣̇ийнам̣ бхаавз сан̇каараад̣̇ийнам̣ бхаавасса, авиж̇ж̇аад̣̇ийнам̣ нирод̇хз сан̇каараад̣̇ийнам̣ нирод̇хасса гат̇анзна буримасмим̣ бажжаяалагкан̣з нияамо д̣̇ассид̇о ‘‘имасмим̣ сад̇и зва, наасад̇и, имасса уббаад̣̇аа зва, наануббаад̣̇аа, нирод̇хаа зва, наанирод̇хаа’’д̇и. д̇знзд̣̇ам̣ лагкан̣ам̣ анд̇ог̇ад̇ханияамам̣ ид̇ха бадижжасамуббаад̣̇асса вуд̇д̇анд̇и д̣̇адтаб̣б̣ам̣. нирод̇ход̇и жа авиж̇ж̇аад̣̇ийнам̣ вирааг̇аа виг̇амзна ааяад̇им̣ ануббаад̣̇о аббавад̇д̇и. д̇ат̇аа хи вуд̇д̇ам̣ ‘‘авиж̇ж̇ааяа д̇взва асзсавирааг̇анирод̇хаа’’д̇иаад̣̇и. нирод̇хавирод̇хий жа уббаад̣̇о, язна со уббаад̣̇анирод̇хавибхааг̇зна вуд̇д̇о ‘‘имасса нирод̇хаа ид̣̇ам̣ нируж̇жхад̇ий’’д̇и. д̇знзд̇ам̣ д̣̇ассзд̇и ‘‘асад̇и нирод̇хз уббаад̣̇о наама, со жзд̇т̇а ад̇т̇ибхаавод̇и вужжад̇ий’’д̇и. ‘‘имасмим̣ сад̇и ид̣̇ам̣ ход̇ий’’д̇и ид̣̇амзва хи лагкан̣ам̣. барияааяанд̇арзна ‘‘имасса уббаад̣̇аа ид̣̇ам̣ уббаж̇ж̇ад̇ий’’д̇и вад̣̇анд̇зна барзна буримам̣ висзсид̇ам̣ ход̇и. д̇асмаа на вад̇д̇амаанам̣язва санд̇хааяа ‘‘имасмим̣ сад̇ий’’д̇и вуд̇д̇ам̣, ат̇а ко маг̇г̇зна анируж̇жханасабхааван̃жаад̇и вин̃н̃ааяад̇и. яасмаа жа ‘‘имасмим̣ асад̇и ид̣̇ам̣ на ход̇и, имасса нирод̇хаа ид̣̇ам̣ нируж̇жхад̇ий’’д̇и д̣̇вид̇хааби уд̣̇д̣̇идтасса лагкан̣асса нид̣̇д̣̇зсам̣ вад̣̇анд̇зна бхаг̇авад̇аа ‘‘авиж̇ж̇ааяа д̇взва асзсавирааг̇анирод̇хаа сан̇кааранирод̇хо’’д̇иаад̣̇инаа нирод̇хова вуд̇д̇о, д̇асмаа над̇т̇ибхаавоби нирод̇хо зваад̇и над̇т̇ибхаававируд̣̇д̇хо ад̇т̇ибхааво анирод̇ход̇и д̣̇ассид̇ам̣ ход̇и. д̇зна анирод̇хасан̇каад̇зна ад̇т̇ибхаавзна уббаад̣̇ам̣ висзсзд̇и. д̇ад̇о ид̇ха на гзвалам̣ ад̇т̇ибхаавамад̇д̇ам̣ уббаад̣̇од̇и ад̇т̇о ад̇хиббзд̇о, ат̇а ко анирод̇хасан̇каад̇о ад̇т̇ибхааво жаад̇и аяамад̇т̇о вибхаавид̇о ход̇и. звамзд̇ам̣ лагкан̣ад̣̇ваяаважанам̣ ан̃н̃аман̃н̃ам̣ висзсанависзсид̇аб̣б̣абхаавзна саад̇т̇аганд̇и взд̣̇ид̇аб̣б̣ам̣. го банааяам̣ анирод̇хо наама, яо ‘‘ад̇т̇ибхааво, уббаад̣̇о’’д̇и жа вуд̇д̇од̇и? аббахийнабхааво жа аниб̣б̣ад̇д̇ид̇апалабхаавзна палуббаад̣̇анаарахад̇аа жаад̇и аяамзд̇т̇а сан̇кзбо. вид̇т̇ааро бана барамад̇т̇ад̣̇ийбанияам̣ уд̣̇аанадтагат̇ааяам̣ (уд̣̇аа. адта. 1). вуд̇д̇анаязна взд̣̇ид̇аб̣б̣о.
Upādānakkhandhānaṃ samudayatthaṅgamavasena titthiyānaṃ avisayopi sappadeso sīhanādo dassito. Idāni nippadeso anulomapaṭilomavasena saṅkhepato vitthārato paccayākāravisayo anaññasādhāraṇo dassīyatīti āha, ‘‘ayampi aparo sīhanādo’’ti. Tassāti ‘‘imasmiṃ satī’’tiādinā saṅkhepato vuttapaṭiccasamuppādapāḷiyā. Ettha ca ‘‘imasmiṃ sati idaṃ hoti, imassa nirodhā idaṃ nirujhtī’’ti avijjādīnaṃ bhāve saṅkhārādīnaṃ bhāvassa, avijjādīnaṃ nirodhe saṅkhārādīnaṃ nirodhassa kathanena purimasmiṃ paccayalakkhaṇe niyamo dassito ‘‘imasmiṃ sati eva, nāsati, imassa uppādā eva, nānuppādā, nirodhā eva, nānirodhā’’ti. Tenedaṃ lakkhaṇaṃ antogadhaniyamaṃ idha paṭiccasamuppādassa vuttanti daṭṭhabbaṃ. Nirodhoti ca avijjādīnaṃ virāgā vigamena āyatiṃ anuppādo appavatti. Tathā hi vuttaṃ ‘‘avijjāya tveva asesavirāganirodhā’’tiādi. Nirodhavirodhī ca uppādo, yena so uppādanirodhavibhāgena vutto ‘‘imassa nirodhā idaṃ nirujjhatī’’ti. Tenetaṃ dasseti ‘‘asati nirodhe uppādo nāma, so cettha atthibhāvoti vuccatī’’ti. ‘‘Imasmiṃ sati idaṃ hotī’’ti idameva hi lakkhaṇaṃ. Pariyāyantarena ‘‘imassa uppādā idaṃ uppajjatī’’ti vadantena parena purimaṃ visesitaṃ hoti. Tasmā na vattamānaṃyeva sandhāya ‘‘imasmiṃ satī’’ti vuttaṃ, atha kho maggena anirujjhanasabhāvañcāti viññāyati. Yasmā ca ‘‘imasmiṃ asati idaṃ na hoti, imassa nirodhā idaṃ nirujjhatī’’ti dvidhāpi uddiṭṭhassa lakkhaṇassa niddesaṃ vadantena bhagavatā ‘‘avijjāya tveva asesavirāganirodhā saṅkhāranirodho’’tiādinā nirodhova vutto, tasmā natthibhāvopi nirodho evāti natthibhāvaviruddho atthibhāvo anirodhoti dassitaṃ hoti. Tena anirodhasaṅkhātena atthibhāvena uppādaṃ viseseti. Tato idha na kevalaṃ atthibhāvamattaṃ uppādoti attho adhippeto, atha kho anirodhasaṅkhāto atthibhāvo cāti ayamattho vibhāvito hoti. Evametaṃ lakkhaṇadvayavacanaṃ aññamaññaṃ visesanavisesitabbabhāvena sātthakanti veditabbaṃ. Ko panāyaṃ anirodho nāma, yo ‘‘atthibhāvo, uppādo’’ti ca vuttoti? Appahīnabhāvo ca anibbattitaphalabhāvena phaluppādanārahatā cāti ayamettha saṅkhepo. Vitthāro pana paramatthadīpaniyaṃ udānaṭṭhakathāyaṃ (udā. aṭṭha. 1). Vuttanayena veditabbo.
бан̃жагканд̇хавибхаж̇анаад̣̇ивасзнаад̇и бан̃жаннам̣ убаад̣̇аанагканд̇хаанам̣ д̣̇ваад̣̇асабад̣̇игасса бажжаяаагаарасса вибхаж̇анавасзна. имасмин̃хи д̣̇асаб̣аласуд̇д̇з д̇хаммасса д̣̇зсид̇аагааро бан̃жагканд̇хабажжаяаагаарамад̇д̇о. д̇знааха ‘‘бан̃жагканд̇хабажжаяаагаарад̇хаммо’’д̇и. аажарияамудтияаа агаран̣зна вибхууд̇о, со бана ад̇т̇ад̇о жа сад̣̇д̣̇ад̇о жа бихид̇о хздтаамукаж̇аад̇о ваа на ход̇ийд̇и ааха ‘‘анигуж̇ж̇ид̇о’’д̇и. вивадод̇и вибхаавид̇о. д̇знааха ‘‘виварид̇ваа табид̇о’’д̇и . багаасид̇од̇и н̃аан̣обхаасзна обхаасид̇о аад̣̇ийбид̇од̇и ааха ‘‘д̣̇ийбид̇о ж̇од̇ид̇о’’д̇и. д̇ад̇т̇а д̇ад̇т̇а чиннабхиннадтаанз. сиб̣б̣ид̇аг̇ан̣тид̇анд̇и ваагам̣ г̇ахзд̇ваа сиб̣б̣ид̇ам̣, сиб̣б̣ид̇ум̣ асаггун̣зяяадтаанз ваагзна г̇ан̣тид̇ан̃жа. чиннабилод̇игаабхаавзна виг̇ад̇абилод̇иго д̇хаммо, д̇асса чиннабилод̇игасса бадиломад̇аа чиннабхиннад̇аабхаавзнаад̇и д̣̇ассзнд̇о ‘‘на хзд̇т̇аа’’д̇иаад̣̇имааха. ниваасанабаарубанам̣ бариг̇г̇ахан̣ам̣. саяам̣ бадибхаанам̣ габбзд̇ваа. вад̣дхзнд̇аа ад̇д̇ано самаяам̣. саман̣агажаваранд̇и саман̣авзсад̇хааран̣авасзна саман̣абадируубад̇ааяа саман̣аанам̣ гажаварабхууд̇ам̣. ад̇д̇ано руубабавад̇д̇ияаа гаран̣д̣ам̣ гужчид̇ам̣ д̇худ̇д̇ам̣ ваад̇и бавад̇д̇зд̇ийд̇и гааран̣д̣аво, д̣̇уссийло. д̇ам̣ гааран̣д̣авам̣. нид̣̇д̇хамат̇аад̇и нийхарат̇а. гасамб̣унд̇и саман̣агасадам̣. абагассат̇аад̇и абагад̣дхат̇а нанд̇и ад̇т̇о. балаабзд̇и балаабасад̣̇исз. д̇ат̇аа хи д̇ан̣д̣уласаарарахид̇о д̇хан̃н̃абадируубаго т̇усамад̇д̇аго балаабод̇и вужжад̇и, звам̣ сийлаад̣̇исаарарахид̇о саман̣абадируубаго балаабо вияаад̇и балаабо, д̣̇уссийло. д̇з балаабз. ваахзт̇аад̇и абанзт̇а. бад̇иссад̇аад̇и б̣аал̣хасад̇ид̇ааяа бад̇иссад̇аа хот̇аад̇и.
Pañcakkhandhavibhajanādivasenāti pañcannaṃ upādānakkhandhānaṃ dvādasapadikassa paccayākārassa vibhajanavasena. Imasmiñhi dasabalasutte dhammassa desitākāro pañcakkhandhapaccayākāramatto. Tenāha ‘‘pañcakkhandhapaccayākāradhammo’’ti. Ācariyamuṭṭhiyā akaraṇena vibhūto, so pana atthato ca saddato ca pihito heṭṭhāmukhajāto vā na hotīti āha ‘‘anikujjito’’ti. Vivaṭoti vibhāvito. Tenāha ‘‘vivaritvā ṭhapito’’ti . Pakāsitoti ñāṇobhāsena obhāsito ādīpitoti āha ‘‘dīpito jotito’’ti. Tattha tattha chinnabhinnaṭṭhāne. Sibbitagaṇṭhitanti vākaṃ gahetvā sibbitaṃ, sibbituṃ asakkuṇeyyaṭṭhāne vākena gaṇṭhitañca. Chinnapilotikābhāvena vigatapilotiko dhammo, tassa chinnapilotikassa paṭilomatā chinnabhinnatābhāvenāti dassento ‘‘na hetthā’’tiādimāha. Nivāsanapārupanaṃ pariggahaṇaṃ. Sayaṃ paṭibhānaṃ kappetvā. Vaḍḍhentā attano samayaṃ. Samaṇakacavaranti samaṇavesadhāraṇavasena samaṇapaṭirūpatāya samaṇānaṃ kacavarabhūtaṃ. Attano rūpapavattiyā karaṇḍaṃ kucchitaṃ dhuttaṃ vāti pavattetīti kāraṇḍavo, dussīlo. Taṃ kāraṇḍavaṃ. Niddhamathāti nīharatha. Kasambunti samaṇakasaṭaṃ. Apakassathāti apakaḍḍhatha nanti attho. Palāpeti palāpasadise. Tathā hi taṇḍulasārarahito dhaññapaṭirūpako thusamattako palāpoti vuccati, evaṃ sīlādisārarahito samaṇapaṭirūpako palāpo viyāti palāpo, dussīlo. Te palāpe. Vāhethāti apanetha. Patissatāti bāḷhasatitāya patissatā hothāti.
сад̣̇д̇хааяа баб̣б̣аж̇ид̇знаад̇и рааж̇уубад̣̇д̣̇аваад̣̇ийхи анубад̣̇д̣̇уд̇зна ‘‘зван̃хи д̇ам̣ од̇ин̣н̣ам̣ ж̇аад̇иаад̣̇исам̣саарабхаяам̣ виж̇иниссаамий’’д̇и вадданиссаран̣ад̇т̇ам̣ ааг̇ад̇ааяа сад̣̇д̇хааяа васзна баб̣б̣аж̇ид̇зна. аажаарагулабуд̇д̇од̇и аажаарзна абхиж̇аад̇о. д̇знааха ‘‘яад̇о гуд̇ожий’’д̇иаад̣̇и. ж̇аад̇игулабуд̇д̇од̇и ж̇аад̇исамбад̇д̇ияаа абхиж̇аад̇о. вин̃н̃уббасад̇т̇аани ан̇г̇аани саммаабад̇хаанияан̇г̇абхаавзна, гааяз жа ж̇ийвид̇з жа нирабзгкабхаавзна вийрияам̣ аарабханд̇асса д̇ат̇аабавад̇д̇авийрияавасзна ‘‘д̇ажо згам̣ ан̇г̇а’’нд̇и вуд̇д̇ам̣. зса наяо сзсзсуби. навасу таанзсу самаад̇хаад̇аб̣б̣анд̇и ‘‘гаалавасзна бан̃жасу, ирияаабат̇авасзна жад̇уусуу’’д̇и звам̣ навасу таанзсу вийрияам̣ самаад̇хаад̇аб̣б̣ам̣ бавад̇д̇зд̇аб̣б̣ам̣.
Saddhāya pabbajitenāti rājūpaddavādīhi anupaddutena ‘‘evañhi taṃ otiṇṇaṃ jātiādisaṃsārabhayaṃ vijinissāmī’’ti vaṭṭanissaraṇatthaṃ āgatāya saddhāya vasena pabbajitena. Ācārakulaputtoti ācārena abhijāto. Tenāha ‘‘yato kutocī’’tiādi. Jātikulaputtoti jātisampattiyā abhijāto. Viññuppasatthāni aṅgāni sammāpadhāniyaṅgabhāvena, kāye ca jīvite ca nirapekkhabhāvena vīriyaṃ ārabhantassa tathāpavattavīriyavasena ‘‘taco ekaṃ aṅga’’nti vuttaṃ. Esa nayo sesesupi. Navasu ṭhānesu samādhātabbanti ‘‘kālavasena pañcasu, iriyāpathavasena catūsū’’ti evaṃ navasu ṭhānesu vīriyaṃ samādhātabbaṃ pavattetabbaṃ.
со д̣̇угкам̣ вихарад̇ийд̇и гусийд̇абуг̇г̇ало нияяаанигасаасанз вийрияаарамбхасса агаран̣зна сааман̃н̃ад̇т̇асса ануббад̇д̇ияаа д̣̇угкам̣ вихарад̇и. сагам̣ ваа ад̇т̇ам̣ сад̣̇ад̇т̇ам̣ га-гаарасса д̣̇а-гаарам̣ гад̇ваа . гусийд̇асса ад̇т̇абарихааяанам̣ муулад̇о бадтааяа д̣̇ассзд̇ум̣ ‘‘ча д̣̇ваарааний’’д̇иаад̣̇и вуд̇д̇ам̣. нисаж̇ж̇аавасзна бийтамад̣̇д̣̇анад̇о бийтамад̣̇д̣̇ано, нирассанаважанам̣ д̇асса, гассажибад̇т̇асса ад̇хааран̣ад̇о гзвалам̣ бийтабхаарабхууд̇од̇и ад̇хиббааяо. ан̃н̃ад̇т̇а бана ‘‘макамад̣̇д̣̇ано’’д̇и вужжад̇и, д̇ад̇т̇а д̣̇аанамижчааяа барзсам̣ макам̣ бассанд̇од̇и ад̇т̇о. лан̣д̣абуурагод̇и гужчибуурам̣ бхун̃ж̇ид̇ваа важжагудибуураго.
So dukkhaṃ viharatīti kusītapuggalo niyyānikasāsane vīriyārambhassa akaraṇena sāmaññatthassa anuppattiyā dukkhaṃ viharati. Sakaṃ vā atthaṃ sadatthaṃ ka-kārassa da-kāraṃ katvā . Kusītassa atthaparihāyanaṃ mūlato paṭṭhāya dassetuṃ ‘‘cha dvārānī’’tiādi vuttaṃ. Nisajjāvasena pīṭhamaddanato pīṭhamaddano, nirassanavacanaṃ tassa, kassacipatthassa adhāraṇato kevalaṃ pīṭhabhārabhūtoti adhippāyo. Aññattha pana ‘‘makhamaddano’’ti vuccati, tattha dānamicchāya paresaṃ makhaṃ passantoti attho. Laṇḍapūrakoti kucchipūraṃ bhuñjitvā vaccakuṭipūrako.
‘‘аарад̣̇д̇хавийрияо’’д̇иаад̣̇ийсу ‘‘гусийд̇о буг̇г̇ало’’д̇и зд̇т̇а вуд̇д̇авибарияааязна ад̇т̇о взд̣̇ид̇аб̣б̣о, аасийсааяа васзна т̇омид̇о. аарад̣̇д̇хавийриязд̇и баг̇г̇ахид̇авийрияз. бахид̇ад̇д̇зд̇и ниб̣б̣аанам̣ бад̇ибзсид̇ажид̇д̇з. зд̇зна саавагаанам̣ саммаабадибад̇д̇им̣ сад̇т̇уванд̣̇анаанисам̣сан̃жа д̣̇ассзси.
‘‘Āraddhavīriyo’’tiādīsu ‘‘kusīto puggalo’’ti ettha vuttavipariyāyena attho veditabbo, āsīsāya vasena thomito. Āraddhavīriyeti paggahitavīriye. Pahitatteti nibbānaṃ patipesitacitte. Etena sāvakānaṃ sammāpaṭipattiṃ satthuvandanānisaṃsañca dassesi.
хийнзнаад̇и вадданиссид̇зна д̇хаммзна. д̇знааха ‘‘хийнааяа сад̣̇д̇хааяаа’’д̇иаад̣̇и. аг̇г̇знаад̇и сздтзна вивадданиссид̇зна д̇хаммзна, ийсагамби гад̇агаалусияавиг̇ад̇адтзна ман̣д̣адтзна жа басаннамби сураад̣̇и на баад̇аб̣б̣ам̣. саасананд̇и барияад̇д̇ибадибад̇д̇ибадивзд̇халагкан̣ам̣ саасанам̣. басаннам̣ виг̇ад̇ад̣̇осамалад̇д̇аа басаад̣̇анияад̇д̇аа жа. баад̇аб̣б̣ан̃жа бад̇д̇зна вияа сукзна барибхун̃ж̇ид̇аб̣б̣ад̇о д̣̇ужжарид̇асаб̣б̣агилзсагасаавамалабан̇гад̣̇осарахид̇ад̇д̇аа жа.
Hīnenāti vaṭṭanissitena dhammena. Tenāha ‘‘hīnāya saddhāyā’’tiādi. Aggenāti seṭṭhena vivaṭṭanissitena dhammena, īsakampi katakālusiyavigataṭṭhena maṇḍaṭṭhena ca pasannampi surādi na pātabbaṃ. Sāsananti pariyattipaṭipattipaṭivedhalakkhaṇaṃ sāsanaṃ. Pasannaṃ vigatadosamalattā pasādaniyattā ca. Pātabbañca pattena viya sukhena paribhuñjitabbato duccaritasabbakilesakasāvamalapaṅkadosarahitattā ca.
ман̣д̣абхууд̇аа б̣од̇хибагкияад̇хаммад̣̇зсанааби д̣̇зсанааман̣д̣о. д̇асса згассзва бана д̣̇зсанааман̣д̣асса бадиг̇г̇аахагаа суббадибаннаа д̣̇осарахид̇аа жад̇ассо барисаа бадиг̇г̇ахаман̣д̣о. маг̇г̇аб̣рахмажарияам̣ д̇аг̇г̇ад̇игад̇д̇аа сагалоби б̣од̇хибагкияад̇хаммарааси б̣рахмажарияаман̣д̣о. д̇знааха ‘‘гад̇амо д̣̇зсанааман̣д̣о’’д̇иаад̣̇и. д̇ад̇т̇а вин̃н̃аад̇аарод̇и сажжаанам̣ абхисамзд̇аавино. д̇ат̇аа хи аад̣̇ид̇о ‘‘жад̇уннам̣ арияасажжаанам̣ аажигкан̣аа’’д̇иаад̣̇и вуд̇д̇ам̣. буб̣б̣абхааг̇з ‘‘ад̇т̇и аяам̣ лого’’д̇иаад̣̇инаа ид̇халогабаралогаг̇ад̇асаммосавиг̇амзна бавад̇д̇о ад̇химогкова ад̇химогкаман̣д̣о. чад̣д̣зд̇ваа самужчзд̣̇авасзна виж̇ахид̇ваа. жад̇убхуумагасса сад̣̇д̇хинд̣̇рияасса ад̇химогкаман̣д̣зна ман̣д̣абхууд̇ам̣ ад̇химогкам̣. аад̣̇и-сад̣̇д̣̇зна ‘‘баг̇г̇ахаман̣д̣о вийрияинд̣̇рияам̣ госаж̇ж̇агасада’’нд̇иаад̣̇им̣ баал̣исзсам̣ сан̇г̇ан̣хаад̇и. зд̇т̇аад̇и зд̇асмим̣ саасанз, ‘‘ман̣д̣асми’’нд̇и ваа важанз. гааран̣аважанам̣, д̇зна ‘‘сад̇т̇аа саммукийбхууд̇о’’д̇и саммукабхааванааяог̇о нираасан̇гапалааваход̇и д̣̇ассзд̇и. д̇знааха ‘‘асаммукаа’’д̇иаад̣̇и. бамаан̣анд̇и ануруубам̣ бхзсаж̇ж̇асса бамаан̣ам̣. уг̇г̇амананд̇и бхзсаж̇ж̇асса ваманам̣ вирзжанам̣, д̇асса ваа васзна д̣̇осад̇хаад̇уунам̣ ваманам̣ вирзжанам̣. звамзваад̇и яат̇аа бхзсаж̇ж̇аман̣д̣ам̣ взж̇ж̇асаммукаа нираасан̇гаа биванд̇и, звамзва ‘‘сад̇т̇аа саммукийбхууд̇о’’д̇и нираасан̇гаа вийрияам̣ гад̇ваа, ман̣д̣абзяяа саасанам̣ биват̇аад̇и яож̇анаа. абхин̃н̃аасамаабад̇д̇ибадилаабхзна саанисам̣саа. маг̇г̇апалаад̇хиг̇аманзна савад̣дхи . барад̇т̇анд̇и ад̇д̇ано д̣̇идтаануг̇ад̇иаабад̇д̇ияаа, д̇ат̇аа саммаабадибаж̇ж̇анд̇аанам̣ барзсам̣ ад̇т̇анд̇и звамзд̇т̇а ад̇т̇о д̣̇адтаб̣б̣о.
Maṇḍabhūtā bodhipakkhiyadhammadesanāpi desanāmaṇḍo. Tassa ekasseva pana desanāmaṇḍassa paṭiggāhakā suppaṭipannā dosarahitā catasso parisā paṭiggahamaṇḍo. Maggabrahmacariyaṃ taggatikattā sakalopi bodhipakkhiyadhammarāsi brahmacariyamaṇḍo. Tenāha ‘‘katamo desanāmaṇḍo’’tiādi. Tattha viññātāroti saccānaṃ abhisametāvino. Tathā hi ādito ‘‘catunnaṃ ariyasaccānaṃ ācikkhaṇā’’tiādi vuttaṃ. Pubbabhāge ‘‘atthi ayaṃ loko’’tiādinā idhalokaparalokagatasammosavigamena pavatto adhimokkhova adhimokkhamaṇḍo. Chaḍḍetvā samucchedavasena vijahitvā. Catubhūmakassa saddhindriyassa adhimokkhamaṇḍena maṇḍabhūtaṃ adhimokkhaṃ. Ādi-saddena ‘‘paggahamaṇḍo vīriyindriyaṃ kosajjakasaṭa’’ntiādiṃ pāḷisesaṃ saṅgaṇhāti. Etthāti etasmiṃ sāsane, ‘‘maṇḍasmi’’nti vā vacane. Kāraṇavacanaṃ, tena ‘‘satthā sammukhībhūto’’ti sammukhabhāvanāyogo nirāsaṅkaphalāvahoti dasseti. Tenāha ‘‘asammukhā’’tiādi. Pamāṇanti anurūpaṃ bhesajjassa pamāṇaṃ. Uggamananti bhesajjassa vamanaṃ virecanaṃ, tassa vā vasena dosadhātūnaṃ vamanaṃ virecanaṃ. Evamevāti yathā bhesajjamaṇḍaṃ vejjasammukhā nirāsaṅkā pivanti, evameva ‘‘satthā sammukhībhūto’’ti nirāsaṅkā vīriyaṃ katvā, maṇḍapeyya sāsanaṃ pivathāti yojanā. Abhiññāsamāpattipaṭilābhena sānisaṃsā. Maggaphalādhigamanena savaḍḍhi. Paratthanti attano diṭṭhānugatiāpattiyā, tathā sammāpaṭipajjantānaṃ paresaṃ atthanti evamettha attho daṭṭhabbo.
д̣̇уд̇ияад̣̇асаб̣аласуд̇д̇аван̣н̣анаа нидтид̇аа.
Dutiyadasabalasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 2. д̣̇уд̇ияад̣̇асаб̣аласуд̇д̇ам̣ • 2. Dutiyadasabalasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 2. д̣̇уд̇ияад̣̇асаб̣аласуд̇д̇аван̣н̣анаа • 2. Dutiyadasabalasuttavaṇṇanā
