| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༢. དུཏིཡདསབལསུཏྟཝཎྞནཱ
2. Dutiyadasabalasuttavaṇṇanā
༢༢. ཏཏྠཱཏི དུཏིཡསུཏྟེ། དསཧི བལེཧཱིཏི དསཧི ཨནཉྙསཱདྷཱརཎེཧི ཉཱཎབལེཧི, ཏཱནི ཏཐཱགཏསྶེཝ བལཱནཱིཏི ཏཐཱགཏབལཱནཱིཏི ཝུཙྩནྟི། ཀཱམཉྩ ཏཱནི ཨེཀཙྩཱནཾ སཱཝཀཱནམྤི ཨུཔྤཛྫནྟི, ཡཱདིསཱནི པན བུདྡྷཱནཾ ཋཱནཱཊྛཱནཉཱཎཱདཱིནི ཨུཔྤཛྫནྟི, ན ཏཱདིསཱནི ཏདཉྙེསཾ ཀདཱཙིཔི ཨུཔྤཛྫནྟཱིཏི། ཧཏྠིཀུལཱནུསཱརེནཱཏི ཝཀྑམཱནཧཏྠིཀུལཱནུསཱརེན། ཀཱལཱ༹ཝཀནྟི ཀུལསདྡཱཔེཀྑཱཡ ནཔུཾསཀནིདྡེསོ། ཨེས ནཡོ སེསེསུཔི། པཀཏིཧཏྠིཀུལནྟི གིརིཙརནདིཙརཝནཙརཱདིཔྤབྷེདཱ གོཙརིཡཀཱལཱ༹ཝཀནཱམཱ སབྦཱཔི བལེན པཱཀཏིཀཱ ཧཏྠིཛཱཏི། དསནྣཾ པུརིསཱནནྟི ཐཱམམཛ྄ཛྷིམཱནཾ དསནྣཾ པུརིསཱནཾ། ཨེཀསྶ ཏཐཱགཏསྶ ཀཱཡབལནྟི ཨཱནེཏྭཱ སམྦནྡྷོ། ཨེཀསྶཱཏི ཙ ཏཐཱ ཧེཊྛཱཀཐཱཡཾ ཨཱགཏཏྟཱ དེསནཱསོཏེན ཝུཏྟཾ། ནཱརཱཡནསངྒྷཱཏབལནྟི ཨེཏྠ ནཱརཱ ཝུཙྩནྟི རསྨིཡོ, ཏཱ བཧཱུ ནཱནཱཝིདྷཱ ཨིཏོ ཨུཔྤཛྫནྟཱིཏི ནཱརཱཡནཾ, ཝཛིརཾ, ཏསྨཱ ནཱརཱཡནསངྒྷཱཏབལནྟི ཝཛིརསངྒྷཱཏབལནྟི ཨཏྠོ། ཏཐཱགཏསྶ ཀཱཡབལནྟི ཏཐཱགཏསྶ པཱཀཏིཀཀཱཡབལཾ། སངྒཧཾ ན གཙྪཏི ཨཏྟནོ བལཱབྷཱཝཏོ, ཏཏོ ཨེཝསྶ བཱཧིརཀཏཱ ལཱམཀཏཱ ཙ། ཏདུབྷཡཾ པནསྶ ཀཱརཎེན དསྶེཏུཾ ‘‘ཨེཏཉྷི ནིསྶཱཡཱ’’ཏིཨཱདི ཝུཏྟཾ། ཨཉྙནྟི ཀཱཡབལཏོ ཨཉྙཾ ཏཏོ ཝིསུཾཡེཝ། དསསུ ཋཱནེསུ དསསུ ཉཱཏབྦཊྛཱནེསུ། ཡཱཐཱཝཔཊིཝེདྷཏོ སཡཉྩ ཨཀམྤཡཾ, པུགྒལཉྩ ཏཾསམངྒིཾ ནེཡྻེསུ ཨདྷིབལཾ ཀརོཏཱིཏི ཨཱཧ ‘‘ཨཀམྤནཊྛེན ཨུཔཏྠམྦྷནཊྛེན ཙཱ’’ཏི།
22.Tatthāti dutiyasutte. Dasahi balehīti dasahi anaññasādhāraṇehi ñāṇabalehi, tāni tathāgatasseva balānīti tathāgatabalānīti vuccanti. Kāmañca tāni ekaccānaṃ sāvakānampi uppajjanti, yādisāni pana buddhānaṃ ṭhānāṭṭhānañāṇādīni uppajjanti, na tādisāni tadaññesaṃ kadācipi uppajjantīti. Hatthikulānusārenāti vakkhamānahatthikulānusārena. Kāḷāvakanti kulasaddāpekkhāya napuṃsakaniddeso. Esa nayo sesesupi. Pakatihatthikulanti giricaranadicaravanacarādippabhedā gocariyakāḷāvakanāmā sabbāpi balena pākatikā hatthijāti. Dasannaṃ purisānanti thāmamajjhimānaṃ dasannaṃ purisānaṃ. Ekassa tathāgatassa kāyabalanti ānetvā sambandho. Ekassāti ca tathā heṭṭhākathāyaṃ āgatattā desanāsotena vuttaṃ. Nārāyanasaṅghātabalanti ettha nārā vuccanti rasmiyo, tā bahū nānāvidhā ito uppajjantīti nārāyanaṃ, vajiraṃ, tasmā nārāyanasaṅghātabalanti vajirasaṅghātabalanti attho. Tathāgatassa kāyabalanti tathāgatassa pākatikakāyabalaṃ. Saṅgahaṃ na gacchati attano balābhāvato, tato evassa bāhirakatā lāmakatā ca. Tadubhayaṃ panassa kāraṇena dassetuṃ ‘‘etañhi nissāyā’’tiādi vuttaṃ. Aññanti kāyabalato aññaṃ tato visuṃyeva. Dasasu ṭhānesu dasasu ñātabbaṭṭhānesu. Yāthāvapaṭivedhato sayañca akampayaṃ, puggalañca taṃsamaṅgiṃ neyyesu adhibalaṃ karotīti āha ‘‘akampanaṭṭhena upatthambhanaṭṭhena cā’’ti.
ཋཱནཉྩ ཋཱནཏོཏི ཀཱརཎཉྩ ཀཱརཎཏོ། ཀཱརཎཉྷི ཡསྨཱ ཕལཾ ཏིཊྛཏི ཏདཱཡཏྟཝུཏྟིཏཱཡ ཨུཔྤཛྫཏི ཙེཝ པཝཏྟཏི ཙ, ཏསྨཱ ‘‘ཋཱན’’ནྟི ཝུཙྩཏི། ཝིཔརིཡཱཡེན ཨཊྛཱནནྟི ཨཀཱརཎཾ ཝེདིཏབྦཾ། ཏདུབྷཡཾ བྷགཝཱ ཡེན ཉཱཎེན ཡེ ཡེ དྷམྨཱ ཡེསཾ ཡེསཾ དྷམྨཱནཾ ཧེཏཱུ པཙྩཡཱ ཨུཔྤཱདཱཡ, ཏཾ ཏཾ ཋཱནཾ, ཡེ ཡེ དྷམྨཱ ཡེསཾ ཡེསཾ དྷམྨཱནཾ ན ཧེཏཱུ ན པཙྩཡཱ ཨུཔྤཱདཱཡ, ཏཾ ཏཾ ཨཊྛཱནནྟི པཛཱནཱཏི། ཏཾ སནྡྷཱཡཱཧ ‘‘ཋཱནཉྩ…པེ॰… ཛཱནནཾ ཨེཀ’’ནྟི། ཀམྨསམཱདཱནཱནནྟི ཀམྨཾ སམཱདིཡིཏྭཱ ཀཏཱནཾ ཀུསལཱཀུསལཀམྨཱནཾ, ཀམྨཉྙེཝ ཝཱ ཀམྨསམཱདཱནཾ། ཋཱནསོ ཧེཏུསོཏི པཙྩཡཏོ ཙ ཧེཏུཏོ ཙ། ཏཏྠ གཏིཨུཔདྷིཀཱལཔཡོགཱ ཝིཔཱཀསྶ ཋཱནཾ, ཀམྨཾ ཧེཏུ། སབྦཏྠགཱམིནཱིཔཊིཔདཱཛཱནནནྟི སབྦགཏིགཱམིནིཡཱ ཨགཏིགཱམིནིཡཱ ཙ པཊིཔདཱཡ མགྒསྶ ཛཱནནཾ, བཧཱུསུཔི མནུསྶེསུ ཨེཀམེཝ པཱཎཾ ཧནནྟེསུ ‘‘ཨིམསྶ ཙེཏནཱ ནིརཡགཱམིནཱི བྷཝིསྶཏི, ཨིམསྶ ཏིརཙྪཱནཡོནིགཱམིནཱི’’ཏི ཨིམིནཱ ནཡེན ཨེཀཝཏྠུསྨིམྤི ཀུསལཱཀུསལཙེཏནཱསངྑཱཏཱནཾ པཊིཔཏྟཱིནཾ ཨཝིཔརཱིཏཏོ སབྷཱཝཛཱནནཾ ། ཨནེཀདྷཱཏུནཱནཱདྷཱཏུལོཀཛཱནནནྟི ཙཀྑུདྷཱཏུཨཱདཱིཧི ཀཱམདྷཱཏུཨཱདཱིཧི ཝཱ བཧུདྷཱཏུནོ, ཏཱསཾཡེཝ དྷཱཏཱུནཾ ཝིཔརཱིཏཏཱཡ ནཱནཔྤཀཱརདྷཱཏུནོ ཁནྡྷཱཡཏནདྷཱཏུལོཀསྶ ཛཱནནཾ། པརསཏྟཱནནྟི པརེསཾ སཏྟཱནཾ། ནཱནཱདྷིམུཏྟིཀཏཱཛཱནནནྟི ཧཱིནཱདཱིཧི ཨདྷིམུཏྟཱིཧི ནཱནཱདྷིམུཏྟིཀབྷཱཝསྶ ཛཱནནཾ། ཏེསཾཡེཝཱཏི པརསཏྟཱནཾཡེཝ། ཨིནྡྲིཡཔརོཔརིཡཏྟཛཱནནནྟི སདྡྷཱདཱིནཾ ཨིནྡྲིཡཱནཾ པརབྷཱཝསྶ ཨཔརབྷཱཝསྶ ཝུདྡྷིཡཱ ཙེཝ ཧཱནིཡཱ ཙ ཛཱནནཾ། ཛྷཱནཝིམོཀྑསམཱདྷིསམཱཔཏྟཱིནནྟི པཋམཱདཱིནཾ ཙཏུནྣཾ ཛྷཱནཱནཾ, ‘‘རཱུཔཱི རཱུཔཱནི པསྶཏཱི’’ཏིཨཱདཱིནཾ ཨཊྛནྣཾ ཝིམོཀྑཱནཾ, སཝིཏཀྐསཝིཙཱརཱདཱིནཾ ཏིཎྞཾ སམཱདྷཱིནཾ, པཋམཛ྄ཛྷཱནསམཱཔཏྟིཨཱདཱིནཉྩ ནཝནྣཾ ཨནུཔུབྦསམཱཔཏྟཱིནཾ། སཾཀིལེསཝོདཱནཝུཊྛཱནཛཱནནནྟི ཧཱནབྷཱགིཡསྶ, ཝིསེསབྷཱགིཡསྶ ‘‘ཝོདཱནམྤི ཝུཊྛཱནཾ, ཏམྷཱ ཏམྷཱ སམཱདྷིམྷཱ ཝུཊྛཱནམྤི ཝུཊྛཱན’’ནྟི (ཝིབྷ॰ ༨༢༨) ཨེཝཾ ཝུཏྟཔགུཎཛ྄ཛྷཱནསྶ ཙེཝ བྷཝངྒཕལསམཱཔཏྟཱིནཉྩ ཛཱནནཾ། ཧེཊྛིམཾ ཧེཊྛིམཉྷི པགུཎཛ྄ཛྷཱནཾ ཨུཔརིམསྶ ཨུཔརིམསྶ པདཊྛཱནཾ ཧོཏི, ཏསྨཱ ཝོདཱནམྤི ‘‘ཝུཊྛཱན’’ནྟི ཝུཙྩཏི། བྷཝངྒེན པན སབྦཛྷཱནེཧི ཝུཊྛཱནཾ ཧོཏི། ཕལསམཱཔཏྟིཡཱ ནིརོདྷསམཱཔཏྟིཏོ ཝུཊྛཱནམེཝ སནྡྷཱཡ ‘‘ཏམྷཱ ཏམྷཱ སམཱདྷིམྷཱ ཝུཊྛཱན’’ནྟི ཝུཏྟཾ། པུབྦེནིཝཱསཛཱནནནྟི པུབྦེནིཝཱསཱནུསྶཏིཉཱཎེན ནིཝུཊྛཀྑནྡྷཱནཾ ཛཱནནཾ། ཙུཏཱུཔཔཱཏཛཱནནནྟི སཏྟཱནཾ ཙུཏིཡཱ ཨུཔཔཏྟིཡཱ ཙ ཡཱཐཱཝཏོ ཛཱནནཾ། ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ ཝུཏྟནཡེནེཝ ཝེདིཏབྦོ། ཨཱསཝཀྑཡཛཱནནཾ ཨཱསཝཀྑཡཉཱཎཾ, མགྒཉཱཎནྟི ཨཏྠོ། ཡཏྠ པནེཏཱནི ཝིཏྠཱརཏོ ཨཱགཏཱནི སཾཝཎྞིཏཱནི, ཏཱནི དསྶེནྟོ ‘‘ཨབྷིདྷམྨེ པནཱ’’ཏིཨཱདིམཱཧ།
Ṭhānañcaṭhānatoti kāraṇañca kāraṇato. Kāraṇañhi yasmā phalaṃ tiṭṭhati tadāyattavuttitāya uppajjati ceva pavattati ca, tasmā ‘‘ṭhāna’’nti vuccati. Vipariyāyena aṭṭhānanti akāraṇaṃ veditabbaṃ. Tadubhayaṃ bhagavā yena ñāṇena ye ye dhammā yesaṃ yesaṃ dhammānaṃ hetū paccayā uppādāya, taṃ taṃ ṭhānaṃ, ye ye dhammā yesaṃ yesaṃ dhammānaṃ na hetū na paccayā uppādāya, taṃ taṃ aṭṭhānanti pajānāti. Taṃ sandhāyāha ‘‘ṭhānañca…pe… jānanaṃ eka’’nti. Kammasamādānānanti kammaṃ samādiyitvā katānaṃ kusalākusalakammānaṃ, kammaññeva vā kammasamādānaṃ. Ṭhānaso hetusoti paccayato ca hetuto ca. Tattha gatiupadhikālapayogā vipākassa ṭhānaṃ, kammaṃ hetu. Sabbatthagāminīpaṭipadājānananti sabbagatigāminiyā agatigāminiyā ca paṭipadāya maggassa jānanaṃ, bahūsupi manussesu ekameva pāṇaṃ hanantesu ‘‘imassa cetanā nirayagāminī bhavissati, imassa tiracchānayonigāminī’’ti iminā nayena ekavatthusmimpi kusalākusalacetanāsaṅkhātānaṃ paṭipattīnaṃ aviparītato sabhāvajānanaṃ . Anekadhātunānādhātulokajānananti cakkhudhātuādīhi kāmadhātuādīhi vā bahudhātuno, tāsaṃyeva dhātūnaṃ viparītatāya nānappakāradhātuno khandhāyatanadhātulokassa jānanaṃ. Parasattānanti paresaṃ sattānaṃ. Nānādhimuttikatājānananti hīnādīhi adhimuttīhi nānādhimuttikabhāvassa jānanaṃ. Tesaṃyevāti parasattānaṃyeva. Indriyaparopariyattajānananti saddhādīnaṃ indriyānaṃ parabhāvassa aparabhāvassa vuddhiyā ceva hāniyā ca jānanaṃ. Jhānavimokkhasamādhisamāpattīnanti paṭhamādīnaṃ catunnaṃ jhānānaṃ, ‘‘rūpī rūpāni passatī’’tiādīnaṃ aṭṭhannaṃ vimokkhānaṃ, savitakkasavicārādīnaṃ tiṇṇaṃ samādhīnaṃ, paṭhamajjhānasamāpattiādīnañca navannaṃ anupubbasamāpattīnaṃ. Saṃkilesavodānavuṭṭhānajānananti hānabhāgiyassa, visesabhāgiyassa ‘‘vodānampi vuṭṭhānaṃ, tamhā tamhā samādhimhā vuṭṭhānampi vuṭṭhāna’’nti (vibha. 828) evaṃ vuttapaguṇajjhānassa ceva bhavaṅgaphalasamāpattīnañca jānanaṃ. Heṭṭhimaṃ heṭṭhimañhi paguṇajjhānaṃ uparimassa uparimassa padaṭṭhānaṃ hoti, tasmā vodānampi ‘‘vuṭṭhāna’’nti vuccati. Bhavaṅgena pana sabbajhānehi vuṭṭhānaṃ hoti. Phalasamāpattiyā nirodhasamāpattito vuṭṭhānameva sandhāya ‘‘tamhā tamhā samādhimhā vuṭṭhāna’’nti vuttaṃ. Pubbenivāsajānananti pubbenivāsānussatiñāṇena nivuṭṭhakkhandhānaṃ jānanaṃ. Cutūpapātajānananti sattānaṃ cutiyā upapattiyā ca yāthāvato jānanaṃ. Ayamettha saṅkhepo, vitthāro pana visuddhimagge vuttanayeneva veditabbo. Āsavakkhayajānanaṃ āsavakkhayañāṇaṃ, maggañāṇanti attho. Yattha panetāni vitthārato āgatāni saṃvaṇṇitāni, tāni dassento ‘‘abhidhamme panā’’tiādimāha.
བྱཱམོཧབྷཡཝསེན སརཎཔརིཡེསནཾ སཱརཛྫནཾ སཱརདོ, བྱཱམོཧབྷཡཾ། ཝིགཏོ སཱརདོ ཨེཏསྶཱཏི ཝིསཱརདོ, ཏསྶ བྷཱཝོ ཝེསཱརཛྫཾ། ཏཾ པན ཉཱཎསམྤདཾ པཧཱནསམྤདཾ དེསནཱཝིསེསསམྤདཾ ཁེམཾ ནིསྶཱཡ པཝཏྟཾ ཙཏུབྦིདྷཾ པཙྩཝེཀྑཎཱཉཱཎཾ། ཏེནཱཧ ‘‘ཙཏཱུསུ ཋཱནེསཱུ’’ཏིཨཱདི། ཙཏཱུསཱུཏི པརཔརིཀཔྤིཏེསུ ཝཏྠཱུསུ། པརཔརིཀཔྤིཏེསུ ཝཱ ཝཏྠུམཏྟེསུ ཙོདནཱཀཱརཎེསུ། སམྨཱསམྦུདྡྷསྶ ཏེ པཊིཛཱནཏོཏི ‘‘ཨཧཾ སམྨཱསམྦུདྡྷོ’’ཏི ཨེཝཾ པཊིཛཱནནྟེན ཏཡཱ། ཨིམེ དྷམྨཱཏི ‘‘ཨིདཾ པཉྩམཾ ཨརིཡསཙྩཾ, ཨཡཾ ཚཊྛོ ཨུཔཱདཱནཀྑནྡྷོ, ཨིདཾ ཏེརསམཾ ཨཱཡཏན’’ནྟི ཝེདིཏབྦཱ ཨིམེ དྷམྨཱ། ཨནབྷིསམྦུདྡྷཱ ཨཔྤཊིཝིདྡྷཏྟཱཏི།
Byāmohabhayavasena saraṇapariyesanaṃ sārajjanaṃ sārado, byāmohabhayaṃ. Vigato sārado etassāti visārado, tassa bhāvo vesārajjaṃ. Taṃ pana ñāṇasampadaṃ pahānasampadaṃ desanāvisesasampadaṃ khemaṃ nissāya pavattaṃ catubbidhaṃ paccavekkhaṇāñāṇaṃ. Tenāha ‘‘catūsu ṭhānesū’’tiādi. Catūsūti paraparikappitesu vatthūsu. Paraparikappitesu vā vatthumattesu codanākāraṇesu. Sammāsambuddhassa te paṭijānatoti ‘‘ahaṃ sammāsambuddho’’ti evaṃ paṭijānantena tayā. Ime dhammāti ‘‘idaṃ pañcamaṃ ariyasaccaṃ, ayaṃ chaṭṭho upādānakkhandho, idaṃ terasamaṃ āyatana’’nti veditabbā ime dhammā. Anabhisambuddhā appaṭividdhattāti.
ཏཏྲཱཏི ཏསྨིཾ ཨནབྷིསམྦུདྡྷདྷམྨསངྑཱཏེ ཙོདནཱཝཏྠུསྨིཾ། ཀོཙཱིཏི སམཎཱདཱིཧི ཨཉྙོ ཝཱ ཡོ ཀོཙི། སཧ དྷམྨེནཱཏི སཧ ཧེཏུནཱ། ‘‘དྷམྨཔཊིསམྦྷིདཱ’’ཏིཨཱདཱིསུ ཝིཡ ཧེཏུཔརིཡཱཡོ ཨིདྷ དྷམྨ-སདྡོ། ཧེཏཱུཏི ཙ ཨུཔྤཏྟིསཱདྷནཧེཏུ ཝེདིཏབྦོ, ན ཀཱརཀོ སམྤཱཔཀོ ཝཱ། ནིམིཏྟནྟི ཀཱརཎཾ, ཏཾ པནེཏྠ ཙོདནཱཝཏྠུམེཝ། ན སམནུཔསྶཱམི སམྨཱསམྦུདྡྷབྷཱཝཏོ། ཁེམཔྤཏྟོཏི ཨཁེམཔྤཏྟརཱུཔཱཡ ཙོདནཱཡ ཨནུཔདྡཝཾ པཏྟོ ནིཙྩལབྷཱཝཔྤཏྟོ། ཝེསཱརཛྫཔྤཏྟོཏི ཝིསཱརདབྷཱཝཔྤཏྟོ། སེསེསུཔི ཨེསེཝ ནཡོ། ཨཡཾ པན ཝིསེསོ – ཨིམེ ཨཱསཝཱཏི ཀཱམཱསཝཱདཱིསུ ཨིམེ ནཱམ ཨཱསཝཱ ན པརིཀྑཱིཎཱཏི ཨཱསཝཀྑཡཝཙནེནེཏྠ སབྦཀིལེསཔྤཧཱནཾ ཝུཏྟཾ། ན ཧི སོ ཀིལེསོ ཨཏྠི, ཡོ སབྦསོ ཨཱསཝེསུ ཁཱིཎེསུ ནཔྤཧཱིཡེཡྻ། ཨནྟརཱཡིཀཱཏི ཨནྟརཱཡཀརཱ, སགྒཝིམོཀྑཱདྷིགམསྶ ཨནྟརཱཡཀརཱཏི ཨཏྠོ། དྷམྨོ ཧི ཡོ སཾཀིལེསཏོ ནིཡྻཱཏི, སོ ‘‘ནིཡྻཱནིཀོ’’ཏི ཝུཏྟོ། དྷམྨེ ནིཡྻནྟེ ཏཾསམངྒཱིཔུགྒལོ ནིཡྻཱནིཀོཏི ཝོཧརིཏོ ཧོཏཱིཏི ཏསྶ པཊིཀྑིཔནྟོ ‘‘སོ ན ནིཡྻཱཏཱི’’ཏི ཨཱཧ། ཀཐཾ པན དེསནཱདྷམྨོ ནིཡྻཱཏཱིཏི ཝུཙྩཏི? ནིཡྻཱནཏྠསམཱདྷཱནཏོ, སོ ཨབྷེདོཔཙཱརེན ‘‘ནིཡྻཱཏཱི’’ཏི ཝུཏྟོ། ཨཐ ཝཱ ‘‘དྷམྨོ དེསིཏོ’’ཏི ཨརིཡདྷམྨསྶ ཨདྷིཔྤེཏཏྟཱ ན ཀོཙི ཝིརོདྷོ།
Tatrāti tasmiṃ anabhisambuddhadhammasaṅkhāte codanāvatthusmiṃ. Kocīti samaṇādīhi añño vā yo koci. Saha dhammenāti saha hetunā. ‘‘Dhammapaṭisambhidā’’tiādīsu viya hetupariyāyo idha dhamma-saddo. Hetūti ca uppattisādhanahetu veditabbo, na kārako sampāpako vā. Nimittanti kāraṇaṃ, taṃ panettha codanāvatthumeva. Na samanupassāmi sammāsambuddhabhāvato. Khemappattoti akhemappattarūpāya codanāya anupaddavaṃ patto niccalabhāvappatto. Vesārajjappattoti visāradabhāvappatto. Sesesupi eseva nayo. Ayaṃ pana viseso – ime āsavāti kāmāsavādīsu ime nāma āsavā na parikkhīṇāti āsavakkhayavacanenettha sabbakilesappahānaṃ vuttaṃ. Na hi so kileso atthi, yo sabbaso āsavesu khīṇesu nappahīyeyya. Antarāyikāti antarāyakarā, saggavimokkhādhigamassa antarāyakarāti attho. Dhammo hi yo saṃkilesato niyyāti, so ‘‘niyyāniko’’ti vutto. Dhamme niyyante taṃsamaṅgīpuggalo niyyānikoti voharito hotīti tassa paṭikkhipanto ‘‘so na niyyātī’’ti āha. Kathaṃ pana desanādhammo niyyātīti vuccati? Niyyānatthasamādhānato, so abhedopacārena ‘‘niyyātī’’ti vutto. Atha vā ‘‘dhammo desito’’ti ariyadhammassa adhippetattā na koci virodho.
ཨུསབྷསྶ ཨིདནྟི ཨཱསབྷཾ, ཨསནྟསནཊྛེན ཨཱསབྷཾ ཝིཡཱཏི ཨཱསབྷཾ, སེཊྛཊྛཱནཾ སབྦཉྙུཏཾ། ཨཱསབྷཊྛཱནཊྛཱཡིཏཱཡ ཨཱསབྷཱ ནཱམ པུབྦབུདྡྷཱ། སབྦཉྙུཏཔཊིཛཱནནཝསེན ཨབྷིམུཁཾ གཙྪནྟི, ཙཏསྶོ ཝཱ པརིསཱ ཨུཔསངྐམནྟཱིཏི ཨཱསབྷཱ། ཙཏསྶོཔི ཧི པརིསཱ བུདྡྷཱབྷིམུཁཱ ཨེཝཾ ཏིཊྛནྟི, ན ཏིཊྛནྟི པརམྨུཁཱ། ཨིདམྤཱིཏི ‘‘ཨུསབྷོ’’ཏི ཨིདམྤི པདཾ། ཏསྶཱཏི ནིསབྷསྶ། ཡེསཾ བལུཔྤཱདཱཝཊྛཱནཱནཾ ཝསེན ཨུསབྷསྶ ཨཱསབྷཎྛཱནཾ ཨིཙྪིཏཾ, ཏཏོ སཱཏིསཡཱནཾ ཨེཝ ཏེསཾ ཝསེན ཨཱསབྷཎྛཱནཾ ཧོཏཱིཏི དཊྛབྦཾ། ཡཾ ཀིཉྩི ལོཀེ ཨུཔམཾ ནཱམ བུདྡྷགུཎཱནཾ ནིདསྶནབྷཱཝེན ཝུཙྩཏི, སབྦཾ ཏཾ ནིཧཱིནམེཝ། ཏིཊྛམཱནོ ཙཱཏི ཨཏིཊྛནྟོཔི ཏིཊྛམཱནོ ཨེཝ པཊིཛཱནཱཏི ནཱམ། ཨུཔགཙྪཏཱིཏི ཨནུཛཱནཱཏི།
Usabhassa idanti āsabhaṃ, asantasanaṭṭhena āsabhaṃ viyāti āsabhaṃ, seṭṭhaṭṭhānaṃ sabbaññutaṃ. Āsabhaṭṭhānaṭṭhāyitāya āsabhā nāma pubbabuddhā. Sabbaññutapaṭijānanavasena abhimukhaṃ gacchanti, catasso vā parisā upasaṅkamantīti āsabhā. Catassopi hi parisā buddhābhimukhā evaṃ tiṭṭhanti, na tiṭṭhanti parammukhā. Idampīti ‘‘usabho’’ti idampi padaṃ. Tassāti nisabhassa. Yesaṃ baluppādāvaṭṭhānānaṃ vasena usabhassa āsabhaṇṭhānaṃ icchitaṃ, tato sātisayānaṃ eva tesaṃ vasena āsabhaṇṭhānaṃ hotīti daṭṭhabbaṃ. Yaṃ kiñci loke upamaṃ nāma buddhaguṇānaṃ nidassanabhāvena vuccati, sabbaṃ taṃ nihīnameva. Tiṭṭhamāno cāti atiṭṭhantopi tiṭṭhamāno eva paṭijānāti nāma. Upagacchatīti anujānāti.
ཨཊྛ ཁོ ཨིམཱཏི ཨིདཾ ཝེསཱརཛྫཉཱཎསྶ བལདསྶནཾ། ཡཐཱ ཧི བྱཏྟཾ པརིསཾ ཨཛ྄ཛྷོགཱཧེཏྭཱ ཝིཉྙཱུནཾ ཙིཏྟཾ ཨཱརཱདྷནསམཏྠཱཡ ཀཐཱཡ དྷམྨཀཐིཀསྶ ཚེཀབྷཱཝོ པཉྙཱཡཏི, ཨེཝཾ ཨིམཱ ཨཊྛ པརིསཱ པཏྭཱ སཏྠུ ཝེསཱརཛྫཉཱཎསྶ བལཾ པཱཀཊཾ ཧོཏི། ཏེན ཝུཏྟཾ ‘‘པརིསཱསཱུ’’ཏི། ཁཏྟིཡཔརིསཱཏི ཁཏྟིཡཱནཾ སནྣིཔཏིཏཱནཾ སམཱུཧོ། ཨེས ནཡོ སབྦཏྠ། མཱརཔརིསཱཏི མཱརཀཱཡིཀཱནཾ སནྣིཔཏིཏཱནཾ སམཱུཧོ། མཱརསདིསཱནཾ མཱརཱནཾ པརིསཱཏི མཱརཔརིསཱ། སབྦཱ ཙེཏཱ པརིསཱ ཨུགྒཊྛཱནདསྶནཝསེན གཧིཏཱ། མནུསྶཱ ཧི ‘‘ཨེཏྠ རཱཛཱ ནིསིནྣོ’’ཏི ཝུཏྟེ པཀཏིཝཙནམྤི ཝཏྟུཾ ན སཀྐོནྟི, ཀཙྪེཧི སེདཱ མུཙྩནྟི, ཨེཝཾ ཨུགྒཱ ཁཏྟིཡཔརིསཱ, བྲཱཧྨཎཱ ཏཱིསུ ཝེདེསུ ཀུསལཱ ཧོནྟི, གཧཔཏཡོ ནཱནཱཝོཧཱརེསུ ཙ ཨཀྑརཙིནྟཱཡ ཙ ཀུསལཱ, སམཎཱ སཀཝཱདཔརཝཱདེསུ ཀུསལཱ, ཏེསཾ མཛ྄ཛྷེ དྷམྨཀཐཱཀཐནཾ ནཱམ ཨཏིཝིཡ བྷཱརིཡཾ། དེཝཱནཾ ཨུགྒབྷཱཝེ ཝཏྟབྦམེཝ ནཏྠི། ཨམནུསྶོཏི ཧི ཝུཏྟམཏྟེ མནུསྶཱནཾ སཀལསརཱིརཾ ཀམྤཏི, ཏེསཾ རཱུཔཾ དིསྭཱཔི སདྡཾ སུཏྭཱཔི སཏྟཱ ཝིསཉྙིཏཱཔི ཧོནྟི། ཨེཝཾ ཨམནུསྶཔརིསཱ ཨུགྒཱ། ཨིཏི ཙེཏཱ པརིསཱ ཨུགྒཊྛཱནདསྶནཝསེན ཝུཏྟཱ། ཀསྨཱ པནེཏྠ ཡཱམཱདིཔརིསཱ ན གཧིཏཱཏི? བྷུསཾ ཀཱམཱབྷིགིདྡྷཏཱཡ ཡོནིསོམནསིཀཱརཝིརཧཏོ། ཡཱམཱདཡོ ཧི ཨུལཱ༹རུལཱ༹རེ ཀཱམེ པཊིསེཝནྟཱ ཏཏྠཱབྷིགིདྡྷཏཱཡ དྷམྨསྶཝནཱཡ སབྷཱཝེན ཙིཏྟམྤི ན ཨུཔྤཱདེནྟི, མཧཱབོདྷིསཏྟཱནཾ པན བུདྡྷཱནཉྩ ཨཱནུབྷཱཝེན ཨཱཀཌྜྷིཡམཱནཱ ཀདཱཙི ནེསཾ པཡིརུཔཱསནཱདཱིནི ཀརོནྟི ཏཱདིསེ མཧཱསམཡེ། ཏེནེཝ ཧི ཝིམཱནཝཏྠུདེསནཱཔི ཏཾནིམིཏྟཱ བཧུལཱ ནཱཧོསི། སེཊྛནཱདནྟི ཀེནཙི ཨཔྤཊིཧཏབྷཱཝེན ཨུཏྟམནཱདཾ། ཨབྷཱིཏནཱདནྟི ཝེསཱརཛྫཡོགཏོ ཀུཏོཙི ནིབྦྷཡནཱདཾ། སཱིཧནཱདསུཏྟེནཱཏི ཁནྡྷིཡཝགྒེ ཨཱགཏེན སཱིཧནཱདསུཏྟེན། སཧནཏོཏི ཁམནཏོ། ཧནནཏོཏི ཝིདྷམནཏོ ཝིདྡྷཾསནཏོ། ཡཐཱ ཝཱཏིཨཱདི ‘‘སཱིཧནཱདསདིསཾ ཝཱ ནཱདཾ ནདཏཱི’’ཏི སངྑེཔཏོ ཝུཏྟསྶ ཨཏྠསྶ ཝིཉྙཱཔནཾ།
Aṭṭhakho imāti idaṃ vesārajjañāṇassa baladassanaṃ. Yathā hi byattaṃ parisaṃ ajjhogāhetvā viññūnaṃ cittaṃ ārādhanasamatthāya kathāya dhammakathikassa chekabhāvo paññāyati, evaṃ imā aṭṭha parisā patvā satthu vesārajjañāṇassa balaṃ pākaṭaṃ hoti. Tena vuttaṃ ‘‘parisāsū’’ti. Khattiyaparisāti khattiyānaṃ sannipatitānaṃ samūho. Esa nayo sabbattha. Māraparisāti mārakāyikānaṃ sannipatitānaṃ samūho. Mārasadisānaṃ mārānaṃ parisāti māraparisā. Sabbā cetā parisā uggaṭṭhānadassanavasena gahitā. Manussā hi ‘‘ettha rājā nisinno’’ti vutte pakativacanampi vattuṃ na sakkonti, kacchehi sedā muccanti, evaṃ uggā khattiyaparisā, brāhmaṇā tīsu vedesu kusalā honti, gahapatayo nānāvohāresu ca akkharacintāya ca kusalā, samaṇā sakavādaparavādesu kusalā, tesaṃ majjhe dhammakathākathanaṃ nāma ativiya bhāriyaṃ. Devānaṃ uggabhāve vattabbameva natthi. Amanussoti hi vuttamatte manussānaṃ sakalasarīraṃ kampati, tesaṃ rūpaṃ disvāpi saddaṃ sutvāpi sattā visaññitāpi honti. Evaṃ amanussaparisā uggā. Iti cetā parisā uggaṭṭhānadassanavasena vuttā. Kasmā panettha yāmādiparisā na gahitāti? Bhusaṃ kāmābhigiddhatāya yonisomanasikāravirahato. Yāmādayo hi uḷāruḷāre kāme paṭisevantā tatthābhigiddhatāya dhammassavanāya sabhāvena cittampi na uppādenti, mahābodhisattānaṃ pana buddhānañca ānubhāvena ākaḍḍhiyamānā kadāci nesaṃ payirupāsanādīni karonti tādise mahāsamaye. Teneva hi vimānavatthudesanāpi taṃnimittā bahulā nāhosi. Seṭṭhanādanti kenaci appaṭihatabhāvena uttamanādaṃ. Abhītanādanti vesārajjayogato kutoci nibbhayanādaṃ. Sīhanādasuttenāti khandhiyavagge āgatena sīhanādasuttena. Sahanatoti khamanato. Hananatoti vidhamanato viddhaṃsanato. Yathā vātiādi ‘‘sīhanādasadisaṃ vā nādaṃ nadatī’’ti saṅkhepato vuttassa atthassa viññāpanaṃ.
ཨེཏནྟི ‘‘བྲཧྨཙཀྐ’’ནྟི ཨེཏཾ པདཾ། པཉྙཱཔབྷཱཝིཏནྟི ཙིརཀཱལཔརིབྷཱཝིཏཱཡ པཱརམིཏཱཔཉྙཱཡ ཝིཔསྶནཱཔཉྙཱཡ ཙ ཨུཔྤཱདིཏཾ། ཀརུཎཱཔབྷཱཝིཏནྟི ‘‘ཀིཙྪཾ ཝཏཱཡཾ ལོཀོ ཨཱཔནྣོ’’ཏིཨཱདིནཡཔྤཝཏྟཱཡ མཧཱཀརུཎཱཡ ཨུཔྤཱདིཏཾ། ཡཐཱ ཨབྷིནིཀྑམནཏོ པབྷུཏི མཧཱབོདྷིསཏྟཱནཾ ཨརིཡམགྒཱདྷིགམནཝིརོདྷིནཱི པཊིཔཏྟི ནཏྠི, ཨེཝཾ ཏུསིཏབྷཝནཏོ ནིཡཏབྷཱཝཱཔཏྟིཏོ ཙ པཊྛཱཡཱཏི དུཏིཡཏཏིཡནཡཱ ཙ གཧིཏཱ། ཕལཀྑཎེཏི ཨགྒཕལཀྑཎེ། པཊིཝེདྷནིཊྛཏྟཱ ཨརཧཏྟམགྒཉཱཎཾ ཝཛིརཱུཔམཏཱཡེཝ སཱཏིསཡོ པཊིཝེདྷོཏི ‘‘ཕལཀྑཎེ ཨུཔྤནྣཾ ནཱམཱ’’ཏི ཝུཏྟཾ། ཏེན པཊིལདྡྷསྶཔི དེསནཱཉཱཎསྶ ཀིཙྩནིཔྥཏྟི པརསྶ བུཛ྄ཛྷནམཏྟེན ཧོཏཱིཏི ‘‘ཨཉྙཱསིཀོཎྜཉྙསྶ སོཏཱཔཏྟི…པེ॰… ཕལཀྑཎེ པཝཏྟནཾ ནཱམཱ’’ཏི ཝུཏྟཾ། ཏཏོ པརཾ པན ཡཱཝ པརིནིབྦཱནཱ དེསནཱཉཱཎཔྤཝཏྟི, ཏསྶེཝ པཝཏྟིཏསྶ དྷམྨཙཀྐསྶ ཋཱནནྟི ཝེདིཏབྦཾ པཝཏྟིཏཙཀྐསྶ ཙཀྐཝཏྟིནོ ཙཀྐརཏནསྶ ཋཱནཾ ཝིཡ། ཨུབྷཡམྤཱིཏི པི-སདྡེན ལོཀིཡདེསནཱཉཱཎསྶ ཨིཏརེན ཨནཉྙསཱདྷཱརཎཏཱཝསེན སམཱནཏཾ སམྤིཎྜེཏི། ཨུརསི ཛཱཏཏཱཡ ཨུརསོ སམྦྷཱུཏནྟི ཨོརསཾ ཉཱཎཾ།
Etanti ‘‘brahmacakka’’nti etaṃ padaṃ. Paññāpabhāvitanti cirakālaparibhāvitāya pāramitāpaññāya vipassanāpaññāya ca uppāditaṃ. Karuṇāpabhāvitanti ‘‘kicchaṃ vatāyaṃ loko āpanno’’tiādinayappavattāya mahākaruṇāya uppāditaṃ. Yathā abhinikkhamanato pabhuti mahābodhisattānaṃ ariyamaggādhigamanavirodhinī paṭipatti natthi, evaṃ tusitabhavanato niyatabhāvāpattito ca paṭṭhāyāti dutiyatatiyanayā ca gahitā. Phalakkhaṇeti aggaphalakkhaṇe. Paṭivedhaniṭṭhattā arahattamaggañāṇaṃ vajirūpamatāyeva sātisayo paṭivedhoti ‘‘phalakkhaṇe uppannaṃ nāmā’’ti vuttaṃ. Tena paṭiladdhassapi desanāñāṇassa kiccanipphatti parassa bujjhanamattena hotīti ‘‘aññāsikoṇḍaññassa sotāpatti…pe… phalakkhaṇe pavattanaṃ nāmā’’ti vuttaṃ. Tato paraṃ pana yāva parinibbānā desanāñāṇappavatti, tasseva pavattitassa dhammacakkassa ṭhānanti veditabbaṃ pavattitacakkassa cakkavattino cakkaratanassa ṭhānaṃ viya. Ubhayampīti pi-saddena lokiyadesanāñāṇassa itarena anaññasādhāraṇatāvasena samānataṃ sampiṇḍeti. Urasi jātatāya uraso sambhūtanti orasaṃ ñāṇaṃ.
ཨིཏི རཱུཔནྟི ཨེཏྠ ཨིཏི-སདྡོ ཨནཝསེསཏོ རཱུཔསྶ སརཱུཔནིདསྶནཏྠོཏི ཏསྶ ‘‘ཨིདཾ རཱུཔ’’ནྟི ཨེཏེན སཱདྷཱརཎཏོ ཙ སརཱུཔནིདསྶནམཱཧ། ཨེཏྟཀཾ རཱུཔནྟི ཨེཏེན ཨནཝསེསཏོ ‘‘ཨིཏོ ཨུདྡྷཾ རཱུཔཾ ནཏྠཱི’’ཏི ནིམིཏྟསྶ ཨཉྙསྶ ཨབྷཱཝཾ། ཨིདཱནི ཏམཏྠཾ ཝིཏྠཱརཏོ དསྶེཏུཾ ‘‘རུཔྤནསབྷཱཝཉྩེཝཱ’’ཏིཨཱདི ཝུཏྟཾ། ཏཏྠ རུཔྤནཾ སཱིཏཱདིཝིརོདྷིཔཙྩཡསམཝཱཡེ ཝིསདིསུཔྤཏྟི། ཨཱདི-སདྡེན ཨཛ྄ཛྷཏྟིཀབཱཧིརཱདིབྷེདཾ སངྒཎྷཱཏི། ལཀྑཎ…པེ॰… ཝསེནཱཏི ཀཀྑལ༹ཏྟཱདིལཀྑཎཝསེན སནྡྷཱརཎཱདིརསཝསེན སམྤཊིཙྪནཱདིཔཙྩུཔཊྛཱནཝསེན བྷཱུཏཏྟཡཱདིཔདཊྛཱནཝསེན ཙ། ཨེཝཾ པརིགྒཧིཏསྶཱཏི ཨེཝཾ སཱདྷཱརཎཏོ ཙ ལཀྑཎཱདིཏོ ཙ པརིགྒཧིཏསྶ། ཨཝིཛྫཱསམུདཡཱཏི ཨཝིཛྫཱཡ ཨུཔྤཱདཱ, ཨཏྠིབྷཱཝཱཏི ཨཏྠོ། ནིརོདྷཝིརོདྷཱི ཧི ཨཏྠིབྷཱཝོ ཧོཏི, ཏསྨཱ ནིརོདྷེ ཨསཏི ཨཏྠིབྷཱཝོ ཧོཏི, ཏསྨཱ པུརིམབྷཝེ སིདྡྷཱཡ ཨཝིཛྫཱཡ སཏི ཨིམསྨིཾ བྷཝེ རཱུཔསྶ སམུདཡོ རཱུཔསྶ ཨུཔྤཱདོ ཧོཏཱིཏི ཨཏྠོ། ཏཎྷཱསམུདཡཱ ཀམྨསམུདཡཱཏི ཨེཏྠཱཔི ཨེསེཝ ནཡོ། ཨཝིཛྫཱདཱིཧི ཙ ཏཱིཧི ཨཏཱིཏཀཱལིཀཏྟཱ ཏེསཾ སཧཀཱརཱིཀཱརཎབྷཱུཏཾ ཨུཔཱདཱནམྤི གཧིཏམེཝཱཏི ཝེདིཏབྦཾ། པཝཏྟིཔཙྩཡེསུ ཀབལཱི༹ཀཱརཨཱཧཱརསྶ བལཝཏཱཡ, སོ ཨེཝ གཧིཏོ, ‘‘ཨཱཧཱརསམུདཡཱ’’ཏི པན གཧིཏེན པཝཏྟིཔཙྩཡཏཱམཏྟེན ཨུཏུཙིཏྟཱནིཔི གཧིཏཱནེཝ ཧོནྟཱིཏི དྭཱདསསམུཊྛཱནིཀཾ རཱུཔསྶ པཙྩཡཏོ དསྶནམྤི བྷཝིཏབྦམེཝཱཏི དཊྛབྦཾ། ནིབྦཏྟིལཀྑཎནྟིཨཱདིནཱ ཀཱལཝསེན ཨུདཡདསྶནམཱཧ། ཏཏྠ བྷཱུཏཝསེན མགྒེ ཨུདཡཾ པསྶིཏྭཱ ཋིཏོ ཨིདྷ སནྟཏིཝསེན ཨནུཀྐམེན ཁཎཝསེན པསྶཏི། ཨཝིཛྫཱནིརོདྷཱ རཱུཔནིརོདྷོཏི ཨགྒམགྒཉཱཎེན ཨཝིཛྫཱཡ ཨནུཔྤཱདནིརོདྷཏོ ཨནཱགཏསྶ ཨནུཔྤཱདནིརོདྷོ ཧོཏི པཙྩཡཱབྷཱཝེ ཨབྷཱཝཏོ། པཙྩཡནིརོདྷེནཱཏི ཨཝིཛྫཱསངྑཱཏསྶ པཙྩཡསྶ ནིརོདྷབྷཱཝེན། ཏཎྷཱནིརོདྷཱཏི ཨེཏྠཱཔི ཨེསེཝ ནཡོ། ཨཱཧཱརནིརོདྷཱཏི པཝཏྟིཔཙྩཡསྶ ཀབལཱི༹ཀཱརཱཧཱརསྶ ཨབྷཱཝཱ། རཱུཔནིརོདྷཱཏི ཏཾསམུཊྛཱནརཱུཔསྶ ཨབྷཱཝོ ཧོཏི། སེསཾ ཧེཊྛཱ ཝུཏྟནཡཱནུསཱརེན ཝེདིཏབྦཾ། ཝིཔརིཎཱམལཀྑཎནྟི བྷཝཀཱལཝསེན ཧེཏུདྭཡདསྶནཾ། ཏསྨཱ ཏཾ པདཊྛཱནཝསེན པགེཝ པསྶིཏྭཱ ཋིཏོ ཨིདྷ སནྟཏིཝསེན དིསྭཱ ཨནུཀྐམེན ཁཎཝསེན པསྶཏི།
Iti rūpanti ettha iti-saddo anavasesato rūpassa sarūpanidassanatthoti tassa ‘‘idaṃ rūpa’’nti etena sādhāraṇato ca sarūpanidassanamāha. Ettakaṃ rūpanti etena anavasesato ‘‘ito uddhaṃ rūpaṃ natthī’’ti nimittassa aññassa abhāvaṃ. Idāni tamatthaṃ vitthārato dassetuṃ ‘‘ruppanasabhāvañcevā’’tiādi vuttaṃ. Tattha ruppanaṃ sītādivirodhipaccayasamavāye visadisuppatti. Ādi-saddena ajjhattikabāhirādibhedaṃ saṅgaṇhāti. Lakkhaṇa…pe… vasenāti kakkhaḷattādilakkhaṇavasena sandhāraṇādirasavasena sampaṭicchanādipaccupaṭṭhānavasena bhūtattayādipadaṭṭhānavasena ca. Evaṃ pariggahitassāti evaṃ sādhāraṇato ca lakkhaṇādito ca pariggahitassa. Avijjāsamudayāti avijjāya uppādā, atthibhāvāti attho. Nirodhavirodhī hi atthibhāvo hoti, tasmā nirodhe asati atthibhāvo hoti, tasmā purimabhave siddhāya avijjāya sati imasmiṃ bhave rūpassa samudayo rūpassa uppādo hotīti attho. Taṇhāsamudayā kammasamudayāti etthāpi eseva nayo. Avijjādīhi ca tīhi atītakālikattā tesaṃ sahakārīkāraṇabhūtaṃ upādānampi gahitamevāti veditabbaṃ. Pavattipaccayesu kabaḷīkāraāhārassa balavatāya, so eva gahito, ‘‘āhārasamudayā’’ti pana gahitena pavattipaccayatāmattena utucittānipi gahitāneva hontīti dvādasasamuṭṭhānikaṃ rūpassa paccayato dassanampi bhavitabbamevāti daṭṭhabbaṃ. Nibbattilakkhaṇantiādinā kālavasena udayadassanamāha. Tattha bhūtavasena magge udayaṃ passitvā ṭhito idha santativasena anukkamena khaṇavasena passati. Avijjānirodhā rūpanirodhoti aggamaggañāṇena avijjāya anuppādanirodhato anāgatassa anuppādanirodho hoti paccayābhāve abhāvato. Paccayanirodhenāti avijjāsaṅkhātassa paccayassa nirodhabhāvena. Taṇhānirodhāti etthāpi eseva nayo. Āhāranirodhāti pavattipaccayassa kabaḷīkārāhārassa abhāvā. Rūpanirodhāti taṃsamuṭṭhānarūpassa abhāvo hoti. Sesaṃ heṭṭhā vuttanayānusārena veditabbaṃ. Vipariṇāmalakkhaṇanti bhavakālavasena hetudvayadassanaṃ. Tasmā taṃ padaṭṭhānavasena pageva passitvā ṭhito idha santativasena disvā anukkamena khaṇavasena passati.
ཨིཏི ཝེདནཱཏིཨཱདཱིསུཔི ཝུཏྟནཡེན ཨཏྠོ ཝེདིཏབྦོ། སུཁཱདིབྷེདནྟི སུཁདུཀྑཨདུཀྑམསུཁཱདིཝིབྷཱགཾ། རཱུཔསཉྙཱདིབྷེདནྟི རཱུཔསཉྙཱ, སདྡ… གནྡྷ… རས… ཕོཊྛབྦ … དྷམྨསཉྙཱདིཝིབྷཱགཾ། ཕསྶཱདིབྷེདནྟི ཕསྶཙེཏནཱམནསིཀཱརཱདིཝིབྷཱགཾ། ལཀྑཎ…པེ॰… ཝསེནཱཏི ཨིཊྛཱནུབྷཝནལཀྑཎཱདིལཀྑཎཝསེན ཨིཊྛཱཀཱརསམྦྷོགརསཱདིརསཝསེན ཀཱཡིཀཨསྶཱདཱདིཔཙྩུཔཊྛཱནཝསེན ཨིཊྛཱརམྨཎཱདིཔདཊྛཱནཝསེན། ‘‘ཕུཊྛོ ཝེདེཏི, ཕུཊྛོ སཉྫཱནཱཏི, ཕུཊྛོ ཙེཏེཏཱི’’ཏི (སཾ॰ ནི॰ ༤.༩༣) ཝཙནཏོ ཏཱིསུ ཝེདནཱདཱིསུ ཁནྡྷེསུ ཕསྶསམུདཡཱཏི ཝཏྟབྦཾ། ཝིཉྙཱཎཔྤཙྩཡཱ ནཱམརཱུཔ’’ནྟི ཝཙནཏོ ཝིཉྙཱཎཀྑནྡྷེ ནཱམརཱུཔསམུདཡཱཏི ཝཏྟབྦཾ། ཏེསཾཡེཝ ཝསེནཱཏི ‘‘ཨཝིཛྫཱནིརོདྷོ ཝེདནཱནིརོདྷོ’’ཏིཨཱདིནཱ ཏེསཾཡེཝ ཨཝིཛྫཱདཱིནཾ ཝསེན ཡོཛེཏབྦཾ།
Iti vedanātiādīsupi vuttanayena attho veditabbo. Sukhādibhedanti sukhadukkhaadukkhamasukhādivibhāgaṃ. Rūpasaññādibhedanti rūpasaññā, sadda… gandha… rasa… phoṭṭhabba … dhammasaññādivibhāgaṃ. Phassādibhedanti phassacetanāmanasikārādivibhāgaṃ. Lakkhaṇa…pe… vasenāti iṭṭhānubhavanalakkhaṇādilakkhaṇavasena iṭṭhākārasambhogarasādirasavasena kāyikaassādādipaccupaṭṭhānavasena iṭṭhārammaṇādipadaṭṭhānavasena. ‘‘Phuṭṭho vedeti, phuṭṭho sañjānāti, phuṭṭho cetetī’’ti (saṃ. ni. 4.93) vacanato tīsu vedanādīsu khandhesu phassasamudayāti vattabbaṃ. Viññāṇappaccayā nāmarūpa’’nti vacanato viññāṇakkhandhe nāmarūpasamudayāti vattabbaṃ. Tesaṃyeva vasenāti ‘‘avijjānirodho vedanānirodho’’tiādinā tesaṃyeva avijjādīnaṃ vasena yojetabbaṃ.
ཨུཔཱདཱནཀྑནྡྷཱནཾ སམུདཡཏྠངྒམཝསེན ཏིཏྠིཡཱནཾ ཨཝིསཡོཔི སཔྤདེསོ སཱིཧནཱདོ དསྶིཏོ། ཨིདཱནི ནིཔྤདེསོ ཨནུལོམཔཊིལོམཝསེན སངྑེཔཏོ ཝིཏྠཱརཏོ པཙྩཡཱཀཱརཝིསཡོ ཨནཉྙསཱདྷཱརཎོ དསྶཱིཡཏཱིཏི ཨཱཧ, ‘‘ཨཡམྤི ཨཔརོ སཱིཧནཱདོ’’ཏི། ཏསྶཱཏི ‘‘ཨིམསྨིཾ སཏཱི’’ཏིཨཱདིནཱ སངྑེཔཏོ ཝུཏྟཔཊིཙྩསམུཔྤཱདཔཱལི༹ཡཱ། ཨེཏྠ ཙ ‘‘ཨིམསྨིཾ སཏི ཨིདཾ ཧོཏི, ཨིམསྶ ནིརོདྷཱ ཨིདཾ ནིརུཛྷྟཱི’’ཏི ཨཝིཛྫཱདཱིནཾ བྷཱཝེ སངྑཱརཱདཱིནཾ བྷཱཝསྶ, ཨཝིཛྫཱདཱིནཾ ནིརོདྷེ སངྑཱརཱདཱིནཾ ནིརོདྷསྶ ཀཐནེན པུརིམསྨིཾ པཙྩཡལཀྑཎེ ནིཡམོ དསྶིཏོ ‘‘ཨིམསྨིཾ སཏི ཨེཝ, ནཱསཏི, ཨིམསྶ ཨུཔྤཱདཱ ཨེཝ, ནཱནུཔྤཱདཱ, ནིརོདྷཱ ཨེཝ, ནཱནིརོདྷཱ’’ཏི། ཏེནེདཾ ལཀྑཎཾ ཨནྟོགདྷནིཡམཾ ཨིདྷ པཊིཙྩསམུཔྤཱདསྶ ཝུཏྟནྟི དཊྛབྦཾ། ནིརོདྷོཏི ཙ ཨཝིཛྫཱདཱིནཾ ཝིརཱགཱ ཝིགམེན ཨཱཡཏིཾ ཨནུཔྤཱདོ ཨཔྤཝཏྟི། ཏཐཱ ཧི ཝུཏྟཾ ‘‘ཨཝིཛྫཱཡ ཏྭེཝ ཨསེསཝིརཱགནིརོདྷཱ’’ཏིཨཱདི། ནིརོདྷཝིརོདྷཱི ཙ ཨུཔྤཱདོ, ཡེན སོ ཨུཔྤཱདནིརོདྷཝིབྷཱགེན ཝུཏྟོ ‘‘ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི། ཏེནེཏཾ དསྶེཏི ‘‘ཨསཏི ནིརོདྷེ ཨུཔྤཱདོ ནཱམ, སོ ཙེཏྠ ཨཏྠིབྷཱཝོཏི ཝུཙྩཏཱི’’ཏི། ‘‘ཨིམསྨིཾ སཏི ཨིདཾ ཧོཏཱི’’ཏི ཨིདམེཝ ཧི ལཀྑཎཾ། པརིཡཱཡནྟརེན ‘‘ཨིམསྶ ཨུཔྤཱདཱ ཨིདཾ ཨུཔྤཛྫཏཱི’’ཏི ཝདནྟེན པརེན པུརིམཾ ཝིསེསིཏཾ ཧོཏི། ཏསྨཱ ན ཝཏྟམཱནཾཡེཝ སནྡྷཱཡ ‘‘ཨིམསྨིཾ སཏཱི’’ཏི ཝུཏྟཾ, ཨཐ ཁོ མགྒེན ཨནིརུཛ྄ཛྷནསབྷཱཝཉྩཱཏི ཝིཉྙཱཡཏི། ཡསྨཱ ཙ ‘‘ཨིམསྨིཾ ཨསཏི ཨིདཾ ན ཧོཏི, ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི དྭིདྷཱཔི ཨུདྡིཊྛསྶ ལཀྑཎསྶ ནིདྡེསཾ ཝདནྟེན བྷགཝཏཱ ‘‘ཨཝིཛྫཱཡ ཏྭེཝ ཨསེསཝིརཱགནིརོདྷཱ སངྑཱརནིརོདྷོ’’ཏིཨཱདིནཱ ནིརོདྷོཝ ཝུཏྟོ, ཏསྨཱ ནཏྠིབྷཱཝོཔི ནིརོདྷོ ཨེཝཱཏི ནཏྠིབྷཱཝཝིརུདྡྷོ ཨཏྠིབྷཱཝོ ཨནིརོདྷོཏི དསྶིཏཾ ཧོཏི། ཏེན ཨནིརོདྷསངྑཱཏེན ཨཏྠིབྷཱཝེན ཨུཔྤཱདཾ ཝིསེསེཏི། ཏཏོ ཨིདྷ ན ཀེཝལཾ ཨཏྠིབྷཱཝམཏྟཾ ཨུཔྤཱདོཏི ཨཏྠོ ཨདྷིཔྤེཏོ, ཨཐ ཁོ ཨནིརོདྷསངྑཱཏོ ཨཏྠིབྷཱཝོ ཙཱཏི ཨཡམཏྠོ ཝིབྷཱཝིཏོ ཧོཏི། ཨེཝམེཏཾ ལཀྑཎདྭཡཝཙནཾ ཨཉྙམཉྙཾ ཝིསེསནཝིསེསིཏབྦབྷཱཝེན སཱཏྠཀནྟི ཝེདིཏབྦཾ། ཀོ པནཱཡཾ ཨནིརོདྷོ ནཱམ, ཡོ ‘‘ཨཏྠིབྷཱཝོ, ཨུཔྤཱདོ’’ཏི ཙ ཝུཏྟོཏི? ཨཔྤཧཱིནབྷཱཝོ ཙ ཨནིབྦཏྟིཏཕལབྷཱཝེན ཕལུཔྤཱདནཱརཧཏཱ ཙཱཏི ཨཡམེཏྠ སངྑེཔོ། ཝིཏྠཱརོ པན པརམཏྠདཱིཔནིཡཾ ཨུདཱནཊྛཀཐཱཡཾ (ཨུདཱ॰ ཨཊྛ॰ ༡)། ཝུཏྟནཡེན ཝེདིཏབྦོ།
Upādānakkhandhānaṃ samudayatthaṅgamavasena titthiyānaṃ avisayopi sappadeso sīhanādo dassito. Idāni nippadeso anulomapaṭilomavasena saṅkhepato vitthārato paccayākāravisayo anaññasādhāraṇo dassīyatīti āha, ‘‘ayampi aparo sīhanādo’’ti. Tassāti ‘‘imasmiṃ satī’’tiādinā saṅkhepato vuttapaṭiccasamuppādapāḷiyā. Ettha ca ‘‘imasmiṃ sati idaṃ hoti, imassa nirodhā idaṃ nirujhtī’’ti avijjādīnaṃ bhāve saṅkhārādīnaṃ bhāvassa, avijjādīnaṃ nirodhe saṅkhārādīnaṃ nirodhassa kathanena purimasmiṃ paccayalakkhaṇe niyamo dassito ‘‘imasmiṃ sati eva, nāsati, imassa uppādā eva, nānuppādā, nirodhā eva, nānirodhā’’ti. Tenedaṃ lakkhaṇaṃ antogadhaniyamaṃ idha paṭiccasamuppādassa vuttanti daṭṭhabbaṃ. Nirodhoti ca avijjādīnaṃ virāgā vigamena āyatiṃ anuppādo appavatti. Tathā hi vuttaṃ ‘‘avijjāya tveva asesavirāganirodhā’’tiādi. Nirodhavirodhī ca uppādo, yena so uppādanirodhavibhāgena vutto ‘‘imassa nirodhā idaṃ nirujjhatī’’ti. Tenetaṃ dasseti ‘‘asati nirodhe uppādo nāma, so cettha atthibhāvoti vuccatī’’ti. ‘‘Imasmiṃ sati idaṃ hotī’’ti idameva hi lakkhaṇaṃ. Pariyāyantarena ‘‘imassa uppādā idaṃ uppajjatī’’ti vadantena parena purimaṃ visesitaṃ hoti. Tasmā na vattamānaṃyeva sandhāya ‘‘imasmiṃ satī’’ti vuttaṃ, atha kho maggena anirujjhanasabhāvañcāti viññāyati. Yasmā ca ‘‘imasmiṃ asati idaṃ na hoti, imassa nirodhā idaṃ nirujjhatī’’ti dvidhāpi uddiṭṭhassa lakkhaṇassa niddesaṃ vadantena bhagavatā ‘‘avijjāya tveva asesavirāganirodhā saṅkhāranirodho’’tiādinā nirodhova vutto, tasmā natthibhāvopi nirodho evāti natthibhāvaviruddho atthibhāvo anirodhoti dassitaṃ hoti. Tena anirodhasaṅkhātena atthibhāvena uppādaṃ viseseti. Tato idha na kevalaṃ atthibhāvamattaṃ uppādoti attho adhippeto, atha kho anirodhasaṅkhāto atthibhāvo cāti ayamattho vibhāvito hoti. Evametaṃ lakkhaṇadvayavacanaṃ aññamaññaṃ visesanavisesitabbabhāvena sātthakanti veditabbaṃ. Ko panāyaṃ anirodho nāma, yo ‘‘atthibhāvo, uppādo’’ti ca vuttoti? Appahīnabhāvo ca anibbattitaphalabhāvena phaluppādanārahatā cāti ayamettha saṅkhepo. Vitthāro pana paramatthadīpaniyaṃ udānaṭṭhakathāyaṃ (udā. aṭṭha. 1). Vuttanayena veditabbo.
པཉྩཀྑནྡྷཝིབྷཛནཱདིཝསེནཱཏི པཉྩནྣཾ ཨུཔཱདཱནཀྑནྡྷཱནཾ དྭཱདསཔདིཀསྶ པཙྩཡཱཀཱརསྶ ཝིབྷཛནཝསེན། ཨིམསྨིཉྷི དསབལསུཏྟེ དྷམྨསྶ དེསིཏཱཀཱརོ པཉྩཀྑནྡྷཔཙྩཡཱཀཱརམཏྟོ། ཏེནཱཧ ‘‘པཉྩཀྑནྡྷཔཙྩཡཱཀཱརདྷམྨོ’’ཏི། ཨཱཙརིཡམུཊྛིཡཱ ཨཀརཎེན ཝིབྷཱུཏོ, སོ པན ཨཏྠཏོ ཙ སདྡཏོ ཙ པིཧིཏོ ཧེཊྛཱམུཁཛཱཏོ ཝཱ ན ཧོཏཱིཏི ཨཱཧ ‘‘ཨནིཀུཛྫིཏོ’’ཏི། ཝིཝཊོཏི ཝིབྷཱཝིཏོ། ཏེནཱཧ ‘‘ཝིཝརིཏྭཱ ཋཔིཏོ’’ཏི ། པཀཱསིཏོཏི ཉཱཎོབྷཱསེན ཨོབྷཱསིཏོ ཨཱདཱིཔིཏོཏི ཨཱཧ ‘‘དཱིཔིཏོ ཛོཏིཏོ’’ཏི། ཏཏྠ ཏཏྠ ཚིནྣབྷིནྣཊྛཱནེ། སིབྦིཏགཎྛིཏནྟི ཝཱཀཾ གཧེཏྭཱ སིབྦིཏཾ, སིབྦིཏུཾ ཨསཀྐུཎེཡྻཊྛཱནེ ཝཱཀེན གཎྛིཏཉྩ། ཚིནྣཔིལོཏིཀཱབྷཱཝེན ཝིགཏཔིལོཏིཀོ དྷམྨོ, ཏསྶ ཚིནྣཔིལོཏིཀསྶ པཊིལོམཏཱ ཚིནྣབྷིནྣཏཱབྷཱཝེནཱཏི དསྶེནྟོ ‘‘ན ཧེཏྠཱ’’ཏིཨཱདིམཱཧ། ནིཝཱསནཔཱརུཔནཾ པརིགྒཧཎཾ། སཡཾ པཊིབྷཱནཾ ཀཔྤེཏྭཱ། ཝཌྜྷེནྟཱ ཨཏྟནོ སམཡཾ། སམཎཀཙཝརནྟི སམཎཝེསདྷཱརཎཝསེན སམཎཔཊིརཱུཔཏཱཡ སམཎཱནཾ ཀཙཝརབྷཱུཏཾ། ཨཏྟནོ རཱུཔཔཝཏྟིཡཱ ཀརཎྜཾ ཀུཙྪིཏཾ དྷུཏྟཾ ཝཱཏི པཝཏྟེཏཱིཏི ཀཱརཎྜཝོ, དུསྶཱིལོ། ཏཾ ཀཱརཎྜཝཾ། ནིདྡྷམཐཱཏི ནཱིཧརཐ། ཀསམྦུནྟི སམཎཀསཊཾ། ཨཔཀསྶཐཱཏི ཨཔཀཌྜྷཐ ནནྟི ཨཏྠོ། པལཱཔེཏི པལཱཔསདིསེ། ཏཐཱ ཧི ཏཎྜུལསཱརརཧིཏོ དྷཉྙཔཊིརཱུཔཀོ ཐུསམཏྟཀོ པལཱཔོཏི ཝུཙྩཏི, ཨེཝཾ སཱིལཱདིསཱརརཧིཏོ སམཎཔཊིརཱུཔཀོ པལཱཔོ ཝིཡཱཏི པལཱཔོ, དུསྶཱིལོ། ཏེ པལཱཔེ། ཝཱཧེཐཱཏི ཨཔནེཐ། པཏིསྶཏཱཏི བཱལ༹ྷསཏིཏཱཡ པཏིསྶཏཱ ཧོཐཱཏི།
Pañcakkhandhavibhajanādivasenāti pañcannaṃ upādānakkhandhānaṃ dvādasapadikassa paccayākārassa vibhajanavasena. Imasmiñhi dasabalasutte dhammassa desitākāro pañcakkhandhapaccayākāramatto. Tenāha ‘‘pañcakkhandhapaccayākāradhammo’’ti. Ācariyamuṭṭhiyā akaraṇena vibhūto, so pana atthato ca saddato ca pihito heṭṭhāmukhajāto vā na hotīti āha ‘‘anikujjito’’ti. Vivaṭoti vibhāvito. Tenāha ‘‘vivaritvā ṭhapito’’ti . Pakāsitoti ñāṇobhāsena obhāsito ādīpitoti āha ‘‘dīpito jotito’’ti. Tattha tattha chinnabhinnaṭṭhāne. Sibbitagaṇṭhitanti vākaṃ gahetvā sibbitaṃ, sibbituṃ asakkuṇeyyaṭṭhāne vākena gaṇṭhitañca. Chinnapilotikābhāvena vigatapilotiko dhammo, tassa chinnapilotikassa paṭilomatā chinnabhinnatābhāvenāti dassento ‘‘na hetthā’’tiādimāha. Nivāsanapārupanaṃ pariggahaṇaṃ. Sayaṃ paṭibhānaṃ kappetvā. Vaḍḍhentā attano samayaṃ. Samaṇakacavaranti samaṇavesadhāraṇavasena samaṇapaṭirūpatāya samaṇānaṃ kacavarabhūtaṃ. Attano rūpapavattiyā karaṇḍaṃ kucchitaṃ dhuttaṃ vāti pavattetīti kāraṇḍavo, dussīlo. Taṃ kāraṇḍavaṃ. Niddhamathāti nīharatha. Kasambunti samaṇakasaṭaṃ. Apakassathāti apakaḍḍhatha nanti attho. Palāpeti palāpasadise. Tathā hi taṇḍulasārarahito dhaññapaṭirūpako thusamattako palāpoti vuccati, evaṃ sīlādisārarahito samaṇapaṭirūpako palāpo viyāti palāpo, dussīlo. Te palāpe. Vāhethāti apanetha. Patissatāti bāḷhasatitāya patissatā hothāti.
སདྡྷཱཡ པབྦཛིཏེནཱཏི རཱཛཱུཔདྡཝཱདཱིཧི ཨནུཔདྡུཏེན ‘‘ཨེཝཉྷི ཏཾ ཨོཏིཎྞཾ ཛཱཏིཨཱདིསཾསཱརབྷཡཾ ཝིཛིནིསྶཱམཱི’’ཏི ཝཊྚནིསྶརཎཏྠཾ ཨཱགཏཱཡ སདྡྷཱཡ ཝསེན པབྦཛིཏེན། ཨཱཙཱརཀུལཔུཏྟོཏི ཨཱཙཱརེན ཨབྷིཛཱཏོ། ཏེནཱཧ ‘‘ཡཏོ ཀུཏོཙཱི’’ཏིཨཱདི། ཛཱཏིཀུལཔུཏྟོཏི ཛཱཏིསམྤཏྟིཡཱ ཨབྷིཛཱཏོ། ཝིཉྙུཔྤསཏྠཱནི ཨངྒཱནི སམྨཱཔདྷཱནིཡངྒབྷཱཝེན, ཀཱཡེ ཙ ཛཱིཝིཏེ ཙ ནིརཔེཀྑབྷཱཝེན ཝཱིརིཡཾ ཨཱརབྷནྟསྶ ཏཐཱཔཝཏྟཝཱིརིཡཝསེན ‘‘ཏཙོ ཨེཀཾ ཨངྒ’’ནྟི ཝུཏྟཾ། ཨེས ནཡོ སེསེསུཔི། ནཝསུ ཋཱནེསུ སམཱདྷཱཏབྦནྟི ‘‘ཀཱལཝསེན པཉྩསུ, ཨིརིཡཱཔཐཝསེན ཙཏཱུསཱུ’’ཏི ཨེཝཾ ནཝསུ ཋཱནེསུ ཝཱིརིཡཾ སམཱདྷཱཏབྦཾ པཝཏྟེཏབྦཾ།
Saddhāya pabbajitenāti rājūpaddavādīhi anupaddutena ‘‘evañhi taṃ otiṇṇaṃ jātiādisaṃsārabhayaṃ vijinissāmī’’ti vaṭṭanissaraṇatthaṃ āgatāya saddhāya vasena pabbajitena. Ācārakulaputtoti ācārena abhijāto. Tenāha ‘‘yato kutocī’’tiādi. Jātikulaputtoti jātisampattiyā abhijāto. Viññuppasatthāni aṅgāni sammāpadhāniyaṅgabhāvena, kāye ca jīvite ca nirapekkhabhāvena vīriyaṃ ārabhantassa tathāpavattavīriyavasena ‘‘taco ekaṃ aṅga’’nti vuttaṃ. Esa nayo sesesupi. Navasu ṭhānesu samādhātabbanti ‘‘kālavasena pañcasu, iriyāpathavasena catūsū’’ti evaṃ navasu ṭhānesu vīriyaṃ samādhātabbaṃ pavattetabbaṃ.
སོ དུཀྑཾ ཝིཧརཏཱིཏི ཀུསཱིཏཔུགྒལོ ནིཡྻཱནིཀསཱསནེ ཝཱིརིཡཱརམྦྷསྶ ཨཀརཎེན སཱམཉྙཏྠསྶ ཨནུཔྤཏྟིཡཱ དུཀྑཾ ཝིཧརཏི། སཀཾ ཝཱ ཨཏྠཾ སདཏྠཾ ཀ-ཀཱརསྶ ད-ཀཱརཾ ཀཏྭཱ ། ཀུསཱིཏསྶ ཨཏྠཔརིཧཱཡནཾ མཱུལཏོ པཊྛཱཡ དསྶེཏུཾ ‘‘ཚ དྭཱརཱནཱི’’ཏིཨཱདི ཝུཏྟཾ། ནིསཛྫཱཝསེན པཱིཋམདྡནཏོ པཱིཋམདྡནོ, ནིརསྶནཝཙནཾ ཏསྶ, ཀསྶཙིཔཏྠསྶ ཨདྷཱརཎཏོ ཀེཝལཾ པཱིཋབྷཱརབྷཱུཏོཏི ཨདྷིཔྤཱཡོ། ཨཉྙཏྠ པན ‘‘མཁམདྡནོ’’ཏི ཝུཙྩཏི, ཏཏྠ དཱནམིཙྪཱཡ པརེསཾ མཁཾ པསྶནྟོཏི ཨཏྠོ། ལཎྜཔཱུརཀོཏི ཀུཙྪིཔཱུརཾ བྷུཉྫིཏྭཱ ཝཙྩཀུཊིཔཱུརཀོ།
So dukkhaṃ viharatīti kusītapuggalo niyyānikasāsane vīriyārambhassa akaraṇena sāmaññatthassa anuppattiyā dukkhaṃ viharati. Sakaṃ vā atthaṃ sadatthaṃ ka-kārassa da-kāraṃ katvā . Kusītassa atthaparihāyanaṃ mūlato paṭṭhāya dassetuṃ ‘‘cha dvārānī’’tiādi vuttaṃ. Nisajjāvasena pīṭhamaddanato pīṭhamaddano, nirassanavacanaṃ tassa, kassacipatthassa adhāraṇato kevalaṃ pīṭhabhārabhūtoti adhippāyo. Aññattha pana ‘‘makhamaddano’’ti vuccati, tattha dānamicchāya paresaṃ makhaṃ passantoti attho. Laṇḍapūrakoti kucchipūraṃ bhuñjitvā vaccakuṭipūrako.
‘‘ཨཱརདྡྷཝཱིརིཡོ’’ཏིཨཱདཱིསུ ‘‘ཀུསཱིཏོ པུགྒལོ’’ཏི ཨེཏྠ ཝུཏྟཝིཔརིཡཱཡེན ཨཏྠོ ཝེདིཏབྦོ, ཨཱསཱིསཱཡ ཝསེན ཐོམིཏོ། ཨཱརདྡྷཝཱིརིཡེཏི པགྒཧིཏཝཱིརིཡེ། པཧིཏཏྟེཏི ནིབྦཱནཾ པཏིཔེསིཏཙིཏྟེ། ཨེཏེན སཱཝཀཱནཾ སམྨཱཔཊིཔཏྟིཾ སཏྠུཝནྡནཱནིསཾསཉྩ དསྶེསི།
‘‘Āraddhavīriyo’’tiādīsu ‘‘kusīto puggalo’’ti ettha vuttavipariyāyena attho veditabbo, āsīsāya vasena thomito. Āraddhavīriyeti paggahitavīriye. Pahitatteti nibbānaṃ patipesitacitte. Etena sāvakānaṃ sammāpaṭipattiṃ satthuvandanānisaṃsañca dassesi.
ཧཱིནེནཱཏི ཝཊྚནིསྶིཏེན དྷམྨེན། ཏེནཱཧ ‘‘ཧཱིནཱཡ སདྡྷཱཡཱ’’ཏིཨཱདི། ཨགྒེནཱཏི སེཊྛེན ཝིཝཊྚནིསྶིཏེན དྷམྨེན, ཨཱིསཀམྤི ཀཏཀཱལུསིཡཝིགཏཊྛེན མཎྜཊྛེན ཙ པསནྣམྤི སུརཱདི ན པཱཏབྦཾ། སཱསནནྟི པརིཡཏྟིཔཊིཔཏྟིཔཊིཝེདྷལཀྑཎཾ སཱསནཾ། པསནྣཾ ཝིགཏདོསམལཏྟཱ པསཱདནིཡཏྟཱ ཙ། པཱཏབྦཉྩ པཏྟེན ཝིཡ སུཁེན པརིབྷུཉྫིཏབྦཏོ དུཙྩརིཏསབྦཀིལེསཀསཱཝམལཔངྐདོསརཧིཏཏྟཱ ཙ།
Hīnenāti vaṭṭanissitena dhammena. Tenāha ‘‘hīnāya saddhāyā’’tiādi. Aggenāti seṭṭhena vivaṭṭanissitena dhammena, īsakampi katakālusiyavigataṭṭhena maṇḍaṭṭhena ca pasannampi surādi na pātabbaṃ. Sāsananti pariyattipaṭipattipaṭivedhalakkhaṇaṃ sāsanaṃ. Pasannaṃ vigatadosamalattā pasādaniyattā ca. Pātabbañca pattena viya sukhena paribhuñjitabbato duccaritasabbakilesakasāvamalapaṅkadosarahitattā ca.
མཎྜབྷཱུཏཱ བོདྷིཔཀྑིཡདྷམྨདེསནཱཔི དེསནཱམཎྜོ། ཏསྶ ཨེཀསྶེཝ པན དེསནཱམཎྜསྶ པཊིགྒཱཧཀཱ སུཔྤཊིཔནྣཱ དོསརཧིཏཱ ཙཏསྶོ པརིསཱ པཊིགྒཧམཎྜོ། མགྒབྲཧྨཙརིཡཾ ཏགྒཏིཀཏྟཱ སཀལོཔི བོདྷིཔཀྑིཡདྷམྨརཱསི བྲཧྨཙརིཡམཎྜོ། ཏེནཱཧ ‘‘ཀཏམོ དེསནཱམཎྜོ’’ཏིཨཱདི། ཏཏྠ ཝིཉྙཱཏཱརོཏི སཙྩཱནཾ ཨབྷིསམེཏཱཝིནོ། ཏཐཱ ཧི ཨཱདིཏོ ‘‘ཙཏུནྣཾ ཨརིཡསཙྩཱནཾ ཨཱཙིཀྑཎཱ’’ཏིཨཱདི ཝུཏྟཾ། པུབྦབྷཱགེ ‘‘ཨཏྠི ཨཡཾ ལོཀོ’’ཏིཨཱདིནཱ ཨིདྷལོཀཔརལོཀགཏསམྨོསཝིགམེན པཝཏྟོ ཨདྷིམོཀྑོཝ ཨདྷིམོཀྑམཎྜོ། ཚཌྜེཏྭཱ སམུཙྪེདཝསེན ཝིཛཧིཏྭཱ། ཙཏུབྷཱུམཀསྶ སདྡྷིནྡྲིཡསྶ ཨདྷིམོཀྑམཎྜེན མཎྜབྷཱུཏཾ ཨདྷིམོཀྑཾ། ཨཱདི-སདྡེན ‘‘པགྒཧམཎྜོ ཝཱིརིཡིནྡྲིཡཾ ཀོསཛྫཀསཊ’’ནྟིཨཱདིཾ པཱལི༹སེསཾ སངྒཎྷཱཏི། ཨེཏྠཱཏི ཨེཏསྨིཾ སཱསནེ, ‘‘མཎྜསྨི’’ནྟི ཝཱ ཝཙནེ། ཀཱརཎཝཙནཾ, ཏེན ‘‘སཏྠཱ སམྨུཁཱིབྷཱུཏོ’’ཏི སམྨུཁབྷཱཝནཱཡོགོ ནིརཱསངྐཕལཱཝཧོཏི དསྶེཏི། ཏེནཱཧ ‘‘ཨསམྨུཁཱ’’ཏིཨཱདི། པམཱཎནྟི ཨནུརཱུཔཾ བྷེསཛྫསྶ པམཱཎཾ། ཨུགྒམནནྟི བྷེསཛྫསྶ ཝམནཾ ཝིརེཙནཾ, ཏསྶ ཝཱ ཝསེན དོསདྷཱཏཱུནཾ ཝམནཾ ཝིརེཙནཾ། ཨེཝམེཝཱཏི ཡཐཱ བྷེསཛྫམཎྜཾ ཝེཛྫསམྨུཁཱ ནིརཱསངྐཱ པིཝནྟི, ཨེཝམེཝ ‘‘སཏྠཱ སམྨུཁཱིབྷཱུཏོ’’ཏི ནིརཱསངྐཱ ཝཱིརིཡཾ ཀཏྭཱ, མཎྜཔེཡྻ སཱསནཾ པིཝཐཱཏི ཡོཛནཱ། ཨབྷིཉྙཱསམཱཔཏྟིཔཊིལཱབྷེན སཱནིསཾསཱ། མགྒཕལཱདྷིགམནེན སཝཌྜྷི ། པརཏྠནྟི ཨཏྟནོ དིཊྛཱནུགཏིཨཱཔཏྟིཡཱ, ཏཐཱ སམྨཱཔཊིཔཛྫནྟཱནཾ པརེསཾ ཨཏྠནྟི ཨེཝམེཏྠ ཨཏྠོ དཊྛབྦོ།
Maṇḍabhūtā bodhipakkhiyadhammadesanāpi desanāmaṇḍo. Tassa ekasseva pana desanāmaṇḍassa paṭiggāhakā suppaṭipannā dosarahitā catasso parisā paṭiggahamaṇḍo. Maggabrahmacariyaṃ taggatikattā sakalopi bodhipakkhiyadhammarāsi brahmacariyamaṇḍo. Tenāha ‘‘katamo desanāmaṇḍo’’tiādi. Tattha viññātāroti saccānaṃ abhisametāvino. Tathā hi ādito ‘‘catunnaṃ ariyasaccānaṃ ācikkhaṇā’’tiādi vuttaṃ. Pubbabhāge ‘‘atthi ayaṃ loko’’tiādinā idhalokaparalokagatasammosavigamena pavatto adhimokkhova adhimokkhamaṇḍo. Chaḍḍetvā samucchedavasena vijahitvā. Catubhūmakassa saddhindriyassa adhimokkhamaṇḍena maṇḍabhūtaṃ adhimokkhaṃ. Ādi-saddena ‘‘paggahamaṇḍo vīriyindriyaṃ kosajjakasaṭa’’ntiādiṃ pāḷisesaṃ saṅgaṇhāti. Etthāti etasmiṃ sāsane, ‘‘maṇḍasmi’’nti vā vacane. Kāraṇavacanaṃ, tena ‘‘satthā sammukhībhūto’’ti sammukhabhāvanāyogo nirāsaṅkaphalāvahoti dasseti. Tenāha ‘‘asammukhā’’tiādi. Pamāṇanti anurūpaṃ bhesajjassa pamāṇaṃ. Uggamananti bhesajjassa vamanaṃ virecanaṃ, tassa vā vasena dosadhātūnaṃ vamanaṃ virecanaṃ. Evamevāti yathā bhesajjamaṇḍaṃ vejjasammukhā nirāsaṅkā pivanti, evameva ‘‘satthā sammukhībhūto’’ti nirāsaṅkā vīriyaṃ katvā, maṇḍapeyya sāsanaṃ pivathāti yojanā. Abhiññāsamāpattipaṭilābhena sānisaṃsā. Maggaphalādhigamanena savaḍḍhi. Paratthanti attano diṭṭhānugatiāpattiyā, tathā sammāpaṭipajjantānaṃ paresaṃ atthanti evamettha attho daṭṭhabbo.
དུཏིཡདསབལསུཏྟཝཎྞནཱ ནིཊྛིཏཱ།
Dutiyadasabalasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༢. དུཏིཡདསབལསུཏྟཾ • 2. Dutiyadasabalasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. དུཏིཡདསབལསུཏྟཝཎྞནཱ • 2. Dutiyadasabalasuttavaṇṇanā
