| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. து³தியதே³வபத³ஸுத்தங்
5. Dutiyadevapadasuttaṃ
1031. ‘‘சத்தாரிமானி, பி⁴க்க²வே, தே³வானங் தே³வபதா³னி அவிஸுத்³தா⁴னங் ஸத்தானங் விஸுத்³தி⁴யா அபரியோதா³தானங் ஸத்தானங் பரியோத³பனாய.
1031. ‘‘Cattārimāni, bhikkhave, devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘கதமானி சத்தாரி? இத⁴, பி⁴க்க²வே, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. ஸோ இதி படிஸஞ்சிக்க²தி – ‘கிங் நு கோ² தே³வானங் தே³வபத³’ந்தி? ஸோ ஏவங் பஜானாதி – ‘அப்³யாப³ஜ்ஜ²பரமே க்²வாஹங் ஏதரஹி தே³வே ஸுணாமி. ந ச கோ² பனாஹங் கிஞ்சி ப்³யாபா³தே⁴மி தஸங் வா தா²வரங் வா. அத்³தா⁴ஹங் தே³வபத³த⁴ம்மஸமன்னாக³தோ விஹராமீ’’’தி. இத³ங் பட²மங் தே³வானங் தே³வபத³ங் அவிஸுத்³தா⁴னங் ஸத்தானங் விஸுத்³தி⁴யா அபரியோதா³தானங் ஸத்தானங் பரியோத³பனாய.
‘‘Katamāni cattāri? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So iti paṭisañcikkhati – ‘kiṃ nu kho devānaṃ devapada’nti? So evaṃ pajānāti – ‘abyābajjhaparame khvāhaṃ etarahi deve suṇāmi. Na ca kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’’’ti. Idaṃ paṭhamaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘புன சபரங், பி⁴க்க²வே, அரியஸாவகோ த⁴ம்மே…பே॰… ஸங்கே⁴…பே॰….
‘‘Puna caparaṃ, bhikkhave, ariyasāvako dhamme…pe… saṅghe…pe….
‘‘புன சபரங், பி⁴க்க²வே, அரியஸாவகோ அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. ஸோ இதி படிஸஞ்சிக்க²தி – ‘கிங் நு கோ² தே³வானங் தே³வபத³’ந்தி ? ஸோ ஏவங் பஜானாதி – ‘அப்³யாப³ஜ்ஜ²பரமே க்²வாஹங் ஏதரஹி தே³வே ஸுணாமி. ந கோ² பனாஹங் கிஞ்சி ப்³யாபா³தே⁴மி தஸங் வா தா²வரங் வா. அத்³தா⁴ஹங் தே³வபத³த⁴ம்மஸமன்னாக³தோ விஹராமீ’தி. இத³ங் சதுத்த²ங் தே³வானங் தே³வபத³ங் அவிஸுத்³தா⁴னங் ஸத்தானங் விஸுத்³தி⁴யா அபரியோதா³தானங் ஸத்தானங் பரியோத³பனாய. இமானி கோ², பி⁴க்க²வே, சத்தாரி தே³வானங் தே³வபதா³னி அவிஸுத்³தா⁴னங் ஸத்தானங் விஸுத்³தி⁴யா அபரியோதா³தானங் ஸத்தானங் பரியோத³பனாயா’’தி. பஞ்சமங்.
‘‘Puna caparaṃ, bhikkhave, ariyasāvako ariyakantehi sīlehi samannāgato hoti akhaṇḍehi…pe… samādhisaṃvattanikehi. So iti paṭisañcikkhati – ‘kiṃ nu kho devānaṃ devapada’nti ? So evaṃ pajānāti – ‘abyābajjhaparame khvāhaṃ etarahi deve suṇāmi. Na kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’ti. Idaṃ catutthaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya. Imāni kho, bhikkhave, cattāri devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāyā’’ti. Pañcamaṃ.
