| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. දුතියදෙවපදසුත්‌තං
5. Dutiyadevapadasuttaṃ
1031. ‘‘චත්‌තාරිමානි, භික්‌ඛවෙ, දෙවානං දෙවපදානි අවිසුද්‌ධානං සත්‌තානං විසුද්‌ධියා අපරියොදාතානං සත්‌තානං පරියොදපනාය.
1031. ‘‘Cattārimāni, bhikkhave, devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘කතමානි චත්‌තාරි? ඉධ, භික්‌ඛවෙ, අරියසාවකො බුද්‌ධෙ අවෙච්‌චප්‌පසාදෙන සමන්‌නාගතො හොති – ඉතිපි සො භගවා…පෙ.… සත්‌ථා දෙවමනුස්‌සානං බුද්‌ධො භගවාති. සො ඉති පටිසඤ්‌චික්‌ඛති – ‘කිං නු ඛො දෙවානං දෙවපද’න්‌ති? සො එවං පජානාති – ‘අබ්‍යාබජ්‌ඣපරමෙ ඛ්‌වාහං එතරහි දෙවෙ සුණාමි. න ච ඛො පනාහං කිඤ්‌චි බ්‍යාබාධෙමි තසං වා ථාවරං වා. අද්‌ධාහං දෙවපදධම්‌මසමන්‌නාගතො විහරාමී’’’ති. ඉදං පඨමං දෙවානං දෙවපදං අවිසුද්‌ධානං සත්‌තානං විසුද්‌ධියා අපරියොදාතානං සත්‌තානං පරියොදපනාය.
‘‘Katamāni cattāri? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So iti paṭisañcikkhati – ‘kiṃ nu kho devānaṃ devapada’nti? So evaṃ pajānāti – ‘abyābajjhaparame khvāhaṃ etarahi deve suṇāmi. Na ca kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’’’ti. Idaṃ paṭhamaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘පුන චපරං, භික්‌ඛවෙ, අරියසාවකො ධම්‌මෙ…පෙ.… සඞ්‌ඝෙ…පෙ.….
‘‘Puna caparaṃ, bhikkhave, ariyasāvako dhamme…pe… saṅghe…pe….
‘‘පුන චපරං, භික්‌ඛවෙ, අරියසාවකො අරියකන්‌තෙහි සීලෙහි සමන්‌නාගතො හොති අඛණ්‌ඩෙහි…පෙ.… සමාධිසංවත්‌තනිකෙහි. සො ඉති පටිසඤ්‌චික්‌ඛති – ‘කිං නු ඛො දෙවානං දෙවපද’න්‌ති ? සො එවං පජානාති – ‘අබ්‍යාබජ්‌ඣපරමෙ ඛ්‌වාහං එතරහි දෙවෙ සුණාමි. න ඛො පනාහං කිඤ්‌චි බ්‍යාබාධෙමි තසං වා ථාවරං වා. අද්‌ධාහං දෙවපදධම්‌මසමන්‌නාගතො විහරාමී’ති. ඉදං චතුත්‌ථං දෙවානං දෙවපදං අවිසුද්‌ධානං සත්‌තානං විසුද්‌ධියා අපරියොදාතානං සත්‌තානං පරියොදපනාය. ඉමානි ඛො, භික්‌ඛවෙ, චත්‌තාරි දෙවානං දෙවපදානි අවිසුද්‌ධානං සත්‌තානං විසුද්‌ධියා අපරියොදාතානං සත්‌තානං පරියොදපනායා’’ති. පඤ්‌චමං.
‘‘Puna caparaṃ, bhikkhave, ariyasāvako ariyakantehi sīlehi samannāgato hoti akhaṇḍehi…pe… samādhisaṃvattanikehi. So iti paṭisañcikkhati – ‘kiṃ nu kho devānaṃ devapada’nti ? So evaṃ pajānāti – ‘abyābajjhaparame khvāhaṃ etarahi deve suṇāmi. Na kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’ti. Idaṃ catutthaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya. Imāni kho, bhikkhave, cattāri devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāyā’’ti. Pañcamaṃ.
