| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༥. དུཏིཡདེཝཔདསུཏྟཾ
5. Dutiyadevapadasuttaṃ
༡༠༣༡. ‘‘ཙཏྟཱརིམཱནི, བྷིཀྑཝེ, དེཝཱནཾ དེཝཔདཱནི ཨཝིསུདྡྷཱནཾ སཏྟཱནཾ ཝིསུདྡྷིཡཱ ཨཔརིཡོདཱཏཱནཾ སཏྟཱནཾ པརིཡོདཔནཱཡ།
1031. ‘‘Cattārimāni, bhikkhave, devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘ཀཏམཱནི ཙཏྟཱརི? ཨིདྷ, བྷིཀྑཝེ, ཨརིཡསཱཝཀོ བུདྡྷེ ཨཝེཙྩཔྤསཱདེན སམནྣཱགཏོ ཧོཏི – ཨིཏིཔི སོ བྷགཝཱ…པེ॰… སཏྠཱ དེཝམནུསྶཱནཾ བུདྡྷོ བྷགཝཱཏི། སོ ཨིཏི པཊིསཉྩིཀྑཏི – ‘ཀིཾ ནུ ཁོ དེཝཱནཾ དེཝཔད’ནྟི? སོ ཨེཝཾ པཛཱནཱཏི – ‘ཨབྱཱབཛ྄ཛྷཔརམེ ཁྭཱཧཾ ཨེཏརཧི དེཝེ སུཎཱམི། ན ཙ ཁོ པནཱཧཾ ཀིཉྩི བྱཱབཱདྷེམི ཏསཾ ཝཱ ཐཱཝརཾ ཝཱ། ཨདྡྷཱཧཾ དེཝཔདདྷམྨསམནྣཱགཏོ ཝིཧརཱམཱི’’’ཏི། ཨིདཾ པཋམཾ དེཝཱནཾ དེཝཔདཾ ཨཝིསུདྡྷཱནཾ སཏྟཱནཾ ཝིསུདྡྷིཡཱ ཨཔརིཡོདཱཏཱནཾ སཏྟཱནཾ པརིཡོདཔནཱཡ།
‘‘Katamāni cattāri? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So iti paṭisañcikkhati – ‘kiṃ nu kho devānaṃ devapada’nti? So evaṃ pajānāti – ‘abyābajjhaparame khvāhaṃ etarahi deve suṇāmi. Na ca kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’’’ti. Idaṃ paṭhamaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘པུན ཙཔརཾ, བྷིཀྑཝེ, ཨརིཡསཱཝཀོ དྷམྨེ…པེ॰… སངྒྷེ…པེ॰…།
‘‘Puna caparaṃ, bhikkhave, ariyasāvako dhamme…pe… saṅghe…pe….
‘‘པུན ཙཔརཾ, བྷིཀྑཝེ, ཨརིཡསཱཝཀོ ཨརིཡཀནྟེཧི སཱིལེཧི སམནྣཱགཏོ ཧོཏི ཨཁཎྜེཧི…པེ॰… སམཱདྷིསཾཝཏྟནིཀེཧི། སོ ཨིཏི པཊིསཉྩིཀྑཏི – ‘ཀིཾ ནུ ཁོ དེཝཱནཾ དེཝཔད’ནྟི ? སོ ཨེཝཾ པཛཱནཱཏི – ‘ཨབྱཱབཛ྄ཛྷཔརམེ ཁྭཱཧཾ ཨེཏརཧི དེཝེ སུཎཱམི། ན ཁོ པནཱཧཾ ཀིཉྩི བྱཱབཱདྷེམི ཏསཾ ཝཱ ཐཱཝརཾ ཝཱ། ཨདྡྷཱཧཾ དེཝཔདདྷམྨསམནྣཱགཏོ ཝིཧརཱམཱི’ཏི། ཨིདཾ ཙཏུཏྠཾ དེཝཱནཾ དེཝཔདཾ ཨཝིསུདྡྷཱནཾ སཏྟཱནཾ ཝིསུདྡྷིཡཱ ཨཔརིཡོདཱཏཱནཾ སཏྟཱནཾ པརིཡོདཔནཱཡ། ཨིམཱནི ཁོ, བྷིཀྑཝེ, ཙཏྟཱརི དེཝཱནཾ དེཝཔདཱནི ཨཝིསུདྡྷཱནཾ སཏྟཱནཾ ཝིསུདྡྷིཡཱ ཨཔརིཡོདཱཏཱནཾ སཏྟཱནཾ པརིཡོདཔནཱཡཱ’’ཏི། པཉྩམཾ།
‘‘Puna caparaṃ, bhikkhave, ariyasāvako ariyakantehi sīlehi samannāgato hoti akhaṇḍehi…pe… samādhisaṃvattanikehi. So iti paṭisañcikkhati – ‘kiṃ nu kho devānaṃ devapada’nti ? So evaṃ pajānāti – ‘abyābajjhaparame khvāhaṃ etarahi deve suṇāmi. Na kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’ti. Idaṃ catutthaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya. Imāni kho, bhikkhave, cattāri devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāyā’’ti. Pañcamaṃ.
