| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. து³தியத⁴ம்மகதி²கஸுத்தங்
4. Dutiyadhammakathikasuttaṃ
116. ஸாவத்தி²னிதா³னங். ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘‘த⁴ம்மகதி²கோ த⁴ம்மகதி²கோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, த⁴ம்மகதி²கோ ஹோதி, கித்தாவதா த⁴ம்மானுத⁴ம்மப்படிபன்னோ ஹோதி, கித்தாவதா தி³ட்ட²த⁴ம்மனிப்³பா³னப்பத்தோ ஹோதீ’’தி? ‘‘ரூபஸ்ஸ சே, பி⁴க்கு², நிப்³பி³தா³ய விராகா³ய நிரோதா⁴ய த⁴ம்மங் தே³ஸேதி, ‘த⁴ம்மகதி²கோ பி⁴க்கூ²’தி அலங் வசனாய. ரூபஸ்ஸ சே, பி⁴க்கு², நிப்³பி³தா³ய விராகா³ய நிரோதா⁴ய படிபன்னோ ஹோதி, ‘த⁴ம்மானுத⁴ம்மப்படிபன்னோ பி⁴க்கூ²’தி அலங் வசனாய. ரூபஸ்ஸ சே, பி⁴க்கு², நிப்³பி³தா³ விராகா³ நிரோதா⁴ அனுபாதா³விமுத்தோ ஹோதி, ‘தி³ட்ட²த⁴ம்மனிப்³பா³னப்பத்தோ பி⁴க்கூ²’தி அலங் வசனாய. வேத³னாய சே, பி⁴க்கு²…பே॰… ஸஞ்ஞாய சே, பி⁴க்கு²… ஸங்கா²ரானங் சே, பி⁴க்கு²… விஞ்ஞாணஸ்ஸ சே, பி⁴க்கு², நிப்³பி³தா³ய விராகா³ய நிரோதா⁴ய த⁴ம்மங் தே³ஸேதி, ‘த⁴ம்மகதி²கோ பி⁴க்கூ²’தி அலங் வசனாய. விஞ்ஞாணஸ்ஸ சே, பி⁴க்கு², நிப்³பி³தா³ய விராகா³ய நிரோதா⁴ய படிபன்னோ ஹோதி, ‘த⁴ம்மானுத⁴ம்மப்படிபன்னோ பி⁴க்கூ²’தி அலங் வசனாய. விஞ்ஞாணஸ்ஸ சே, பி⁴க்கு², நிப்³பி³தா³ விராகா³ நிரோதா⁴ அனுபாதா³விமுத்தோ ஹோதி, ‘தி³ட்ட²த⁴ம்மனிப்³பா³னப்பத்தோ பி⁴க்கூ²’தி அலங் வசனாயா’’தி. சதுத்த²ங்.
116. Sāvatthinidānaṃ. Ekamantaṃ nisinno kho so bhikkhu bhagavantaṃ etadavoca – ‘‘‘dhammakathiko dhammakathiko’ti, bhante, vuccati. Kittāvatā nu kho, bhante, dhammakathiko hoti, kittāvatā dhammānudhammappaṭipanno hoti, kittāvatā diṭṭhadhammanibbānappatto hotī’’ti? ‘‘Rūpassa ce, bhikkhu, nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃ vacanāya. Rūpassa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃ vacanāya. Rūpassa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃ vacanāya. Vedanāya ce, bhikkhu…pe… saññāya ce, bhikkhu… saṅkhārānaṃ ce, bhikkhu… viññāṇassa ce, bhikkhu, nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃ vacanāya. Viññāṇassa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃ vacanāya. Viññāṇassa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃ vacanāyā’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. து³தியத⁴ம்மகதி²கஸுத்தவண்ணனா • 4. Dutiyadhammakathikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. து³தியத⁴ம்மகதி²கஸுத்தவண்ணனா • 4. Dutiyadhammakathikasuttavaṇṇanā
