| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. து³தியதா⁴ரணஸுத்தங்
6. Dutiyadhāraṇasuttaṃ
1086. ‘‘தா⁴ரேத² நோ தும்ஹே, பி⁴க்க²வே, மயா சத்தாரி அரியஸச்சானி தே³ஸிதானீ’’தி? ஏவங் வுத்தே அஞ்ஞதரோ பி⁴க்கு² ப⁴க³வந்தங் ஏதத³வோச – ‘‘அஹங் கோ², ப⁴ந்தே, தா⁴ரேமி ப⁴க³வதா சத்தாரி அரியஸச்சானி தே³ஸிதானீ’’தி.
1086. ‘‘Dhāretha no tumhe, bhikkhave, mayā cattāri ariyasaccāni desitānī’’ti? Evaṃ vutte aññataro bhikkhu bhagavantaṃ etadavoca – ‘‘ahaṃ kho, bhante, dhāremi bhagavatā cattāri ariyasaccāni desitānī’’ti.
‘‘யதா² கத²ங் பன த்வங், பி⁴க்கு², தா⁴ரேஸி மயா சத்தாரி அரியஸச்சானி தே³ஸிதானீ’’தி? ‘‘து³க்க²ங் க்²வாஹங், ப⁴ந்தே, ப⁴க³வதா பட²மங் அரியஸச்சங் தே³ஸிதங் தா⁴ரேமி. யோ ஹி கோசி, ப⁴ந்தே, ஸமணோ வா ப்³ராஹ்மணோ வா ஏவங் வதெ³ய்ய – ‘நேதங் து³க்க²ங் பட²மங் அரியஸச்சங் யங் ஸமணேன கோ³தமேன தே³ஸிதங். அஹமேதங் து³க்க²ங் பட²மங் அரியஸச்சங் பச்சக்கா²ய அஞ்ஞங் து³க்க²ங் பட²மங் அரியஸச்சங் பஞ்ஞபெஸ்ஸாமீ’தி – நேதங் டா²னங் விஜ்ஜதி. து³க்க²ஸமுத³யங் க்²வாஹங், ப⁴ந்தே, ப⁴க³வதா…பே॰… து³க்க²னிரோத⁴கா³மினிங் படிபத³ங் க்²வாஹங், ப⁴ந்தே, ப⁴க³வதா சதுத்த²ங் அரியஸச்சங் தே³ஸிதங் தா⁴ரேமி. யோ ஹி கோசி, ப⁴ந்தே, ஸமணோ வா ப்³ராஹ்மணோ வா ஏவங் வதெ³ய்ய – ‘நேதங் து³க்க²னிரோத⁴கா³மினீ படிபதா³ சதுத்த²ங் அரியஸச்சங் யங் ஸமணேன கோ³தமேன தே³ஸிதங். அஹமேதங் து³க்க²னிரோத⁴கா³மினிங் படிபத³ங் சதுத்த²ங் அரியஸச்சங் பச்சக்கா²ய அஞ்ஞங் து³க்க²னிரோத⁴கா³மினிங் படிபத³ங் சதுத்த²ங் அரியஸச்சங் பஞ்ஞபெஸ்ஸாமீ’தி – நேதங் டா²னங் விஜ்ஜதி. ஏவங் க்²வாஹங், ப⁴ந்தே, தா⁴ரேமி ப⁴க³வதா சத்தாரி அரியஸச்சானி தே³ஸிதானீ’’தி.
‘‘Yathā kathaṃ pana tvaṃ, bhikkhu, dhāresi mayā cattāri ariyasaccāni desitānī’’ti? ‘‘Dukkhaṃ khvāhaṃ, bhante, bhagavatā paṭhamaṃ ariyasaccaṃ desitaṃ dhāremi. Yo hi koci, bhante, samaṇo vā brāhmaṇo vā evaṃ vadeyya – ‘netaṃ dukkhaṃ paṭhamaṃ ariyasaccaṃ yaṃ samaṇena gotamena desitaṃ. Ahametaṃ dukkhaṃ paṭhamaṃ ariyasaccaṃ paccakkhāya aññaṃ dukkhaṃ paṭhamaṃ ariyasaccaṃ paññapessāmī’ti – netaṃ ṭhānaṃ vijjati. Dukkhasamudayaṃ khvāhaṃ, bhante, bhagavatā…pe… dukkhanirodhagāminiṃ paṭipadaṃ khvāhaṃ, bhante, bhagavatā catutthaṃ ariyasaccaṃ desitaṃ dhāremi. Yo hi koci, bhante, samaṇo vā brāhmaṇo vā evaṃ vadeyya – ‘netaṃ dukkhanirodhagāminī paṭipadā catutthaṃ ariyasaccaṃ yaṃ samaṇena gotamena desitaṃ. Ahametaṃ dukkhanirodhagāminiṃ paṭipadaṃ catutthaṃ ariyasaccaṃ paccakkhāya aññaṃ dukkhanirodhagāminiṃ paṭipadaṃ catutthaṃ ariyasaccaṃ paññapessāmī’ti – netaṃ ṭhānaṃ vijjati. Evaṃ khvāhaṃ, bhante, dhāremi bhagavatā cattāri ariyasaccāni desitānī’’ti.
‘‘ஸாது⁴ ஸாது⁴, பி⁴க்கு²! ஸாது⁴ கோ² த்வங், பி⁴க்கு², தா⁴ரேஸி மயா சத்தாரி அரியஸச்சானி தே³ஸிதானீதி. து³க்க²ங் கோ², பி⁴க்கு², மயா பட²மங் அரியஸச்சங் தே³ஸிதங், ததா² நங் தா⁴ரேஹி. யோ ஹி கோசி, பி⁴க்கு², ஸமணோ வா ப்³ராஹ்மணோ வா ஏவங் வதெ³ய்ய – ‘நேதங் து³க்க²ங் பட²மங் அரியஸச்சங் யங் ஸமணேன கோ³தமேன தே³ஸிதங். அஹமேதங் து³க்க²ங் பட²மங் அரியஸச்சங் பச்சக்கா²ய அஞ்ஞங் து³க்க²ங் பட²மங் அரியஸச்சங் பஞ்ஞபெஸ்ஸாமீ’தி – நேதங் டா²னங் விஜ்ஜதி. து³க்க²ஸமுத³யங் கோ², பி⁴க்கு²…பே॰… து³க்க²னிரோத⁴ங் கோ², பி⁴க்கு²…பே॰… து³க்க²னிரோத⁴கா³மினீ படிபதா³ கோ², பி⁴க்கு², மயா சதுத்த²ங் அரியஸச்சங் தே³ஸிதங், ததா² நங் தா⁴ரேஹி. யோ ஹி கோசி, பி⁴க்கு², ஸமணோ வா ப்³ராஹ்மணோ வா ஏவங் வதெ³ய்ய – ‘நேதங் து³க்க²னிரோத⁴கா³மினீ படிபதா³ சதுத்த²ங் அரியஸச்சங் யங் ஸமணேன கோ³தமேன தே³ஸிதங் . அஹமேதங் து³க்க²னிரோத⁴கா³மினிங் படிபத³ங் சதுத்த²ங் அரியஸச்சங் பச்சக்கா²ய அஞ்ஞங் து³க்க²னிரோத⁴கா³மினிங் படிபத³ங் சதுத்த²ங் அரியஸச்சங் பஞ்ஞபெஸ்ஸாமீ’தி – நேதங் டா²னங் விஜ்ஜதி. ஏவங் கோ² த்வங், பி⁴க்கு², தா⁴ரேஹி மயா சத்தாரி அரியஸச்சானி தே³ஸிதானீதி.
‘‘Sādhu sādhu, bhikkhu! Sādhu kho tvaṃ, bhikkhu, dhāresi mayā cattāri ariyasaccāni desitānīti. Dukkhaṃ kho, bhikkhu, mayā paṭhamaṃ ariyasaccaṃ desitaṃ, tathā naṃ dhārehi. Yo hi koci, bhikkhu, samaṇo vā brāhmaṇo vā evaṃ vadeyya – ‘netaṃ dukkhaṃ paṭhamaṃ ariyasaccaṃ yaṃ samaṇena gotamena desitaṃ. Ahametaṃ dukkhaṃ paṭhamaṃ ariyasaccaṃ paccakkhāya aññaṃ dukkhaṃ paṭhamaṃ ariyasaccaṃ paññapessāmī’ti – netaṃ ṭhānaṃ vijjati. Dukkhasamudayaṃ kho, bhikkhu…pe… dukkhanirodhaṃ kho, bhikkhu…pe… dukkhanirodhagāminī paṭipadā kho, bhikkhu, mayā catutthaṃ ariyasaccaṃ desitaṃ, tathā naṃ dhārehi. Yo hi koci, bhikkhu, samaṇo vā brāhmaṇo vā evaṃ vadeyya – ‘netaṃ dukkhanirodhagāminī paṭipadā catutthaṃ ariyasaccaṃ yaṃ samaṇena gotamena desitaṃ . Ahametaṃ dukkhanirodhagāminiṃ paṭipadaṃ catutthaṃ ariyasaccaṃ paccakkhāya aññaṃ dukkhanirodhagāminiṃ paṭipadaṃ catutthaṃ ariyasaccaṃ paññapessāmī’ti – netaṃ ṭhānaṃ vijjati. Evaṃ kho tvaṃ, bhikkhu, dhārehi mayā cattāri ariyasaccāni desitānīti.
‘‘தஸ்மாதிஹ, பி⁴க்கு², ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. ச²ட்ட²ங்.
‘‘Tasmātiha, bhikkhu, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Chaṭṭhaṃ.
