| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. দুতিযধারণসুত্তং
6. Dutiyadhāraṇasuttaṃ
১০৮৬. ‘‘ধারেথ নো তুম্হে, ভিক্খৰে, মযা চত্তারি অরিযসচ্চানি দেসিতানী’’তি? এৰং ৰুত্তে অঞ্ঞতরো ভিক্খু ভগৰন্তং এতদৰোচ – ‘‘অহং খো, ভন্তে, ধারেমি ভগৰতা চত্তারি অরিযসচ্চানি দেসিতানী’’তি।
1086. ‘‘Dhāretha no tumhe, bhikkhave, mayā cattāri ariyasaccāni desitānī’’ti? Evaṃ vutte aññataro bhikkhu bhagavantaṃ etadavoca – ‘‘ahaṃ kho, bhante, dhāremi bhagavatā cattāri ariyasaccāni desitānī’’ti.
‘‘যথা কথং পন ত্ৰং, ভিক্খু, ধারেসি মযা চত্তারি অরিযসচ্চানি দেসিতানী’’তি? ‘‘দুক্খং খ্ৰাহং, ভন্তে, ভগৰতা পঠমং অরিযসচ্চং দেসিতং ধারেমি। যো হি কোচি, ভন্তে, সমণো ৰা ব্রাহ্মণো ৰা এৰং ৰদেয্য – ‘নেতং দুক্খং পঠমং অরিযসচ্চং যং সমণেন গোতমেন দেসিতং। অহমেতং দুক্খং পঠমং অরিযসচ্চং পচ্চক্খায অঞ্ঞং দুক্খং পঠমং অরিযসচ্চং পঞ্ঞপেস্সামী’তি – নেতং ঠানং ৰিজ্জতি। দুক্খসমুদযং খ্ৰাহং, ভন্তে, ভগৰতা…পে॰… দুক্খনিরোধগামিনিং পটিপদং খ্ৰাহং, ভন্তে, ভগৰতা চতুত্থং অরিযসচ্চং দেসিতং ধারেমি। যো হি কোচি, ভন্তে, সমণো ৰা ব্রাহ্মণো ৰা এৰং ৰদেয্য – ‘নেতং দুক্খনিরোধগামিনী পটিপদা চতুত্থং অরিযসচ্চং যং সমণেন গোতমেন দেসিতং। অহমেতং দুক্খনিরোধগামিনিং পটিপদং চতুত্থং অরিযসচ্চং পচ্চক্খায অঞ্ঞং দুক্খনিরোধগামিনিং পটিপদং চতুত্থং অরিযসচ্চং পঞ্ঞপেস্সামী’তি – নেতং ঠানং ৰিজ্জতি। এৰং খ্ৰাহং, ভন্তে, ধারেমি ভগৰতা চত্তারি অরিযসচ্চানি দেসিতানী’’তি।
‘‘Yathā kathaṃ pana tvaṃ, bhikkhu, dhāresi mayā cattāri ariyasaccāni desitānī’’ti? ‘‘Dukkhaṃ khvāhaṃ, bhante, bhagavatā paṭhamaṃ ariyasaccaṃ desitaṃ dhāremi. Yo hi koci, bhante, samaṇo vā brāhmaṇo vā evaṃ vadeyya – ‘netaṃ dukkhaṃ paṭhamaṃ ariyasaccaṃ yaṃ samaṇena gotamena desitaṃ. Ahametaṃ dukkhaṃ paṭhamaṃ ariyasaccaṃ paccakkhāya aññaṃ dukkhaṃ paṭhamaṃ ariyasaccaṃ paññapessāmī’ti – netaṃ ṭhānaṃ vijjati. Dukkhasamudayaṃ khvāhaṃ, bhante, bhagavatā…pe… dukkhanirodhagāminiṃ paṭipadaṃ khvāhaṃ, bhante, bhagavatā catutthaṃ ariyasaccaṃ desitaṃ dhāremi. Yo hi koci, bhante, samaṇo vā brāhmaṇo vā evaṃ vadeyya – ‘netaṃ dukkhanirodhagāminī paṭipadā catutthaṃ ariyasaccaṃ yaṃ samaṇena gotamena desitaṃ. Ahametaṃ dukkhanirodhagāminiṃ paṭipadaṃ catutthaṃ ariyasaccaṃ paccakkhāya aññaṃ dukkhanirodhagāminiṃ paṭipadaṃ catutthaṃ ariyasaccaṃ paññapessāmī’ti – netaṃ ṭhānaṃ vijjati. Evaṃ khvāhaṃ, bhante, dhāremi bhagavatā cattāri ariyasaccāni desitānī’’ti.
‘‘সাধু সাধু, ভিক্খু! সাধু খো ত্ৰং, ভিক্খু, ধারেসি মযা চত্তারি অরিযসচ্চানি দেসিতানীতি। দুক্খং খো, ভিক্খু, মযা পঠমং অরিযসচ্চং দেসিতং, তথা নং ধারেহি। যো হি কোচি, ভিক্খু, সমণো ৰা ব্রাহ্মণো ৰা এৰং ৰদেয্য – ‘নেতং দুক্খং পঠমং অরিযসচ্চং যং সমণেন গোতমেন দেসিতং। অহমেতং দুক্খং পঠমং অরিযসচ্চং পচ্চক্খায অঞ্ঞং দুক্খং পঠমং অরিযসচ্চং পঞ্ঞপেস্সামী’তি – নেতং ঠানং ৰিজ্জতি। দুক্খসমুদযং খো, ভিক্খু…পে॰… দুক্খনিরোধং খো, ভিক্খু…পে॰… দুক্খনিরোধগামিনী পটিপদা খো, ভিক্খু, মযা চতুত্থং অরিযসচ্চং দেসিতং, তথা নং ধারেহি। যো হি কোচি, ভিক্খু, সমণো ৰা ব্রাহ্মণো ৰা এৰং ৰদেয্য – ‘নেতং দুক্খনিরোধগামিনী পটিপদা চতুত্থং অরিযসচ্চং যং সমণেন গোতমেন দেসিতং । অহমেতং দুক্খনিরোধগামিনিং পটিপদং চতুত্থং অরিযসচ্চং পচ্চক্খায অঞ্ঞং দুক্খনিরোধগামিনিং পটিপদং চতুত্থং অরিযসচ্চং পঞ্ঞপেস্সামী’তি – নেতং ঠানং ৰিজ্জতি। এৰং খো ত্ৰং, ভিক্খু, ধারেহি মযা চত্তারি অরিযসচ্চানি দেসিতানীতি।
‘‘Sādhu sādhu, bhikkhu! Sādhu kho tvaṃ, bhikkhu, dhāresi mayā cattāri ariyasaccāni desitānīti. Dukkhaṃ kho, bhikkhu, mayā paṭhamaṃ ariyasaccaṃ desitaṃ, tathā naṃ dhārehi. Yo hi koci, bhikkhu, samaṇo vā brāhmaṇo vā evaṃ vadeyya – ‘netaṃ dukkhaṃ paṭhamaṃ ariyasaccaṃ yaṃ samaṇena gotamena desitaṃ. Ahametaṃ dukkhaṃ paṭhamaṃ ariyasaccaṃ paccakkhāya aññaṃ dukkhaṃ paṭhamaṃ ariyasaccaṃ paññapessāmī’ti – netaṃ ṭhānaṃ vijjati. Dukkhasamudayaṃ kho, bhikkhu…pe… dukkhanirodhaṃ kho, bhikkhu…pe… dukkhanirodhagāminī paṭipadā kho, bhikkhu, mayā catutthaṃ ariyasaccaṃ desitaṃ, tathā naṃ dhārehi. Yo hi koci, bhikkhu, samaṇo vā brāhmaṇo vā evaṃ vadeyya – ‘netaṃ dukkhanirodhagāminī paṭipadā catutthaṃ ariyasaccaṃ yaṃ samaṇena gotamena desitaṃ . Ahametaṃ dukkhanirodhagāminiṃ paṭipadaṃ catutthaṃ ariyasaccaṃ paccakkhāya aññaṃ dukkhanirodhagāminiṃ paṭipadaṃ catutthaṃ ariyasaccaṃ paññapessāmī’ti – netaṃ ṭhānaṃ vijjati. Evaṃ kho tvaṃ, bhikkhu, dhārehi mayā cattāri ariyasaccāni desitānīti.
‘‘তস্মাতিহ, ভিক্খু, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। ছট্ঠং।
‘‘Tasmātiha, bhikkhu, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Chaṭṭhaṃ.
