| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౬. దుతియధారణసుత్తం
6. Dutiyadhāraṇasuttaṃ
౧౦౮౬. ‘‘ధారేథ నో తుమ్హే, భిక్ఖవే, మయా చత్తారి అరియసచ్చాని దేసితానీ’’తి? ఏవం వుత్తే అఞ్ఞతరో భిక్ఖు భగవన్తం ఏతదవోచ – ‘‘అహం ఖో, భన్తే, ధారేమి భగవతా చత్తారి అరియసచ్చాని దేసితానీ’’తి.
1086. ‘‘Dhāretha no tumhe, bhikkhave, mayā cattāri ariyasaccāni desitānī’’ti? Evaṃ vutte aññataro bhikkhu bhagavantaṃ etadavoca – ‘‘ahaṃ kho, bhante, dhāremi bhagavatā cattāri ariyasaccāni desitānī’’ti.
‘‘యథా కథం పన త్వం, భిక్ఖు, ధారేసి మయా చత్తారి అరియసచ్చాని దేసితానీ’’తి? ‘‘దుక్ఖం ఖ్వాహం, భన్తే, భగవతా పఠమం అరియసచ్చం దేసితం ధారేమి. యో హి కోచి, భన్తే, సమణో వా బ్రాహ్మణో వా ఏవం వదేయ్య – ‘నేతం దుక్ఖం పఠమం అరియసచ్చం యం సమణేన గోతమేన దేసితం. అహమేతం దుక్ఖం పఠమం అరియసచ్చం పచ్చక్ఖాయ అఞ్ఞం దుక్ఖం పఠమం అరియసచ్చం పఞ్ఞపేస్సామీ’తి – నేతం ఠానం విజ్జతి. దుక్ఖసముదయం ఖ్వాహం, భన్తే, భగవతా…పే॰… దుక్ఖనిరోధగామినిం పటిపదం ఖ్వాహం, భన్తే, భగవతా చతుత్థం అరియసచ్చం దేసితం ధారేమి. యో హి కోచి, భన్తే, సమణో వా బ్రాహ్మణో వా ఏవం వదేయ్య – ‘నేతం దుక్ఖనిరోధగామినీ పటిపదా చతుత్థం అరియసచ్చం యం సమణేన గోతమేన దేసితం. అహమేతం దుక్ఖనిరోధగామినిం పటిపదం చతుత్థం అరియసచ్చం పచ్చక్ఖాయ అఞ్ఞం దుక్ఖనిరోధగామినిం పటిపదం చతుత్థం అరియసచ్చం పఞ్ఞపేస్సామీ’తి – నేతం ఠానం విజ్జతి. ఏవం ఖ్వాహం, భన్తే, ధారేమి భగవతా చత్తారి అరియసచ్చాని దేసితానీ’’తి.
‘‘Yathā kathaṃ pana tvaṃ, bhikkhu, dhāresi mayā cattāri ariyasaccāni desitānī’’ti? ‘‘Dukkhaṃ khvāhaṃ, bhante, bhagavatā paṭhamaṃ ariyasaccaṃ desitaṃ dhāremi. Yo hi koci, bhante, samaṇo vā brāhmaṇo vā evaṃ vadeyya – ‘netaṃ dukkhaṃ paṭhamaṃ ariyasaccaṃ yaṃ samaṇena gotamena desitaṃ. Ahametaṃ dukkhaṃ paṭhamaṃ ariyasaccaṃ paccakkhāya aññaṃ dukkhaṃ paṭhamaṃ ariyasaccaṃ paññapessāmī’ti – netaṃ ṭhānaṃ vijjati. Dukkhasamudayaṃ khvāhaṃ, bhante, bhagavatā…pe… dukkhanirodhagāminiṃ paṭipadaṃ khvāhaṃ, bhante, bhagavatā catutthaṃ ariyasaccaṃ desitaṃ dhāremi. Yo hi koci, bhante, samaṇo vā brāhmaṇo vā evaṃ vadeyya – ‘netaṃ dukkhanirodhagāminī paṭipadā catutthaṃ ariyasaccaṃ yaṃ samaṇena gotamena desitaṃ. Ahametaṃ dukkhanirodhagāminiṃ paṭipadaṃ catutthaṃ ariyasaccaṃ paccakkhāya aññaṃ dukkhanirodhagāminiṃ paṭipadaṃ catutthaṃ ariyasaccaṃ paññapessāmī’ti – netaṃ ṭhānaṃ vijjati. Evaṃ khvāhaṃ, bhante, dhāremi bhagavatā cattāri ariyasaccāni desitānī’’ti.
‘‘సాధు సాధు, భిక్ఖు! సాధు ఖో త్వం, భిక్ఖు, ధారేసి మయా చత్తారి అరియసచ్చాని దేసితానీతి. దుక్ఖం ఖో, భిక్ఖు, మయా పఠమం అరియసచ్చం దేసితం, తథా నం ధారేహి. యో హి కోచి, భిక్ఖు, సమణో వా బ్రాహ్మణో వా ఏవం వదేయ్య – ‘నేతం దుక్ఖం పఠమం అరియసచ్చం యం సమణేన గోతమేన దేసితం. అహమేతం దుక్ఖం పఠమం అరియసచ్చం పచ్చక్ఖాయ అఞ్ఞం దుక్ఖం పఠమం అరియసచ్చం పఞ్ఞపేస్సామీ’తి – నేతం ఠానం విజ్జతి. దుక్ఖసముదయం ఖో, భిక్ఖు…పే॰… దుక్ఖనిరోధం ఖో, భిక్ఖు…పే॰… దుక్ఖనిరోధగామినీ పటిపదా ఖో, భిక్ఖు, మయా చతుత్థం అరియసచ్చం దేసితం, తథా నం ధారేహి. యో హి కోచి, భిక్ఖు, సమణో వా బ్రాహ్మణో వా ఏవం వదేయ్య – ‘నేతం దుక్ఖనిరోధగామినీ పటిపదా చతుత్థం అరియసచ్చం యం సమణేన గోతమేన దేసితం . అహమేతం దుక్ఖనిరోధగామినిం పటిపదం చతుత్థం అరియసచ్చం పచ్చక్ఖాయ అఞ్ఞం దుక్ఖనిరోధగామినిం పటిపదం చతుత్థం అరియసచ్చం పఞ్ఞపేస్సామీ’తి – నేతం ఠానం విజ్జతి. ఏవం ఖో త్వం, భిక్ఖు, ధారేహి మయా చత్తారి అరియసచ్చాని దేసితానీతి.
‘‘Sādhu sādhu, bhikkhu! Sādhu kho tvaṃ, bhikkhu, dhāresi mayā cattāri ariyasaccāni desitānīti. Dukkhaṃ kho, bhikkhu, mayā paṭhamaṃ ariyasaccaṃ desitaṃ, tathā naṃ dhārehi. Yo hi koci, bhikkhu, samaṇo vā brāhmaṇo vā evaṃ vadeyya – ‘netaṃ dukkhaṃ paṭhamaṃ ariyasaccaṃ yaṃ samaṇena gotamena desitaṃ. Ahametaṃ dukkhaṃ paṭhamaṃ ariyasaccaṃ paccakkhāya aññaṃ dukkhaṃ paṭhamaṃ ariyasaccaṃ paññapessāmī’ti – netaṃ ṭhānaṃ vijjati. Dukkhasamudayaṃ kho, bhikkhu…pe… dukkhanirodhaṃ kho, bhikkhu…pe… dukkhanirodhagāminī paṭipadā kho, bhikkhu, mayā catutthaṃ ariyasaccaṃ desitaṃ, tathā naṃ dhārehi. Yo hi koci, bhikkhu, samaṇo vā brāhmaṇo vā evaṃ vadeyya – ‘netaṃ dukkhanirodhagāminī paṭipadā catutthaṃ ariyasaccaṃ yaṃ samaṇena gotamena desitaṃ . Ahametaṃ dukkhanirodhagāminiṃ paṭipadaṃ catutthaṃ ariyasaccaṃ paccakkhāya aññaṃ dukkhanirodhagāminiṃ paṭipadaṃ catutthaṃ ariyasaccaṃ paññapessāmī’ti – netaṃ ṭhānaṃ vijjati. Evaṃ kho tvaṃ, bhikkhu, dhārehi mayā cattāri ariyasaccāni desitānīti.
‘‘తస్మాతిహ, భిక్ఖు, ‘ఇదం దుక్ఖ’న్తి యోగో కరణీయో…పే॰… ‘అయం దుక్ఖనిరోధగామినీ పటిపదా’తి యోగో కరణీయో’’తి. ఛట్ఠం.
‘‘Tasmātiha, bhikkhu, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Chaṭṭhaṃ.
