| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. দুতিযদীঘচারিকসুত্তং
2. Dutiyadīghacārikasuttaṃ
২২২. ‘‘পঞ্চিমে , ভিক্খৰে, আদীনৰা দীঘচারিকং অনৰত্থচারিকং অনুযুত্তস্স ৰিহরতো। কতমে পঞ্চ? অনধিগতং নাধিগচ্ছতি, অধিগতা পরিহাযতি, অধিগতেনেকচ্চেন অৰিসারদো হোতি, গাল়্হং রোগাতঙ্কং ফুসতি, ন চ মিত্তৰা হোতি। ইমে খো, ভিক্খৰে, পঞ্চ আদীনৰা দীঘচারিকং অনৰত্থচারিকং অনুযুত্তস্স ৰিহরতো।
222. ‘‘Pañcime , bhikkhave, ādīnavā dīghacārikaṃ anavatthacārikaṃ anuyuttassa viharato. Katame pañca? Anadhigataṃ nādhigacchati, adhigatā parihāyati, adhigatenekaccena avisārado hoti, gāḷhaṃ rogātaṅkaṃ phusati, na ca mittavā hoti. Ime kho, bhikkhave, pañca ādīnavā dīghacārikaṃ anavatthacārikaṃ anuyuttassa viharato.
‘‘পঞ্চিমে, ভিক্খৰে, আনিসংসা সমৰত্থচারে। কতমে পঞ্চ? অনধিগতং অধিগচ্ছতি, অধিগতা ন পরিহাযতি, অধিগতেনেকচ্চেন ৰিসারদো হোতি, ন গাল়্হং রোগাতঙ্কং ফুসতি, মিত্তৰা চ হোতি। ইমে খো, ভিক্খৰে, পঞ্চ আনিসংসা সমৰত্থচারে’’তি। দুতিযং।
‘‘Pañcime, bhikkhave, ānisaṃsā samavatthacāre. Katame pañca? Anadhigataṃ adhigacchati, adhigatā na parihāyati, adhigatenekaccena visārado hoti, na gāḷhaṃ rogātaṅkaṃ phusati, mittavā ca hoti. Ime kho, bhikkhave, pañca ānisaṃsā samavatthacāre’’ti. Dutiyaṃ.
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. পঠমদীঘচারিকসুত্তাদিৰণ্ণনা • 1-10. Paṭhamadīghacārikasuttādivaṇṇanā
