| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. দুতিযদুক্খুপ্পাদসুত্তং
10. Dutiyadukkhuppādasuttaṃ
২২. ‘‘যো, ভিক্খৰে, রূপানং উপ্পাদো ঠিতি অভিনিব্বত্তি পাতুভাৰো, দুক্খস্সেসো উপ্পাদো, রোগানং ঠিতি, জরামরণস্স পাতুভাৰো। যো সদ্দানং…পে॰… যো গন্ধানং… যো রসানং… যো ফোট্ঠব্বানং… যো ধম্মানং উপ্পাদো ঠিতি অভিনিব্বত্তি পাতুভাৰো, দুক্খস্সেসো উপ্পাদো, রোগানং ঠিতি, জরামরণস্স পাতুভাৰো।
22. ‘‘Yo, bhikkhave, rūpānaṃ uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo. Yo saddānaṃ…pe… yo gandhānaṃ… yo rasānaṃ… yo phoṭṭhabbānaṃ… yo dhammānaṃ uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo.
‘‘যো চ খো, ভিক্খৰে, রূপানং নিরোধো ৰূপসমো অত্থঙ্গমো, দুক্খস্সেসো নিরোধো, রোগানং ৰূপসমো, জরামরণস্স অত্থঙ্গমো। যো সদ্দানং…পে॰… যো গন্ধানং… যো রসানং… যো ফোট্ঠব্বানং… যো ধম্মানং নিরোধো ৰূপসমো অত্থঙ্গমো, দুক্খস্সেসো নিরোধো, রোগানং ৰূপসমো, জরামরণস্স অত্থঙ্গমো’’তি। দসমং।
‘‘Yo ca kho, bhikkhave, rūpānaṃ nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo. Yo saddānaṃ…pe… yo gandhānaṃ… yo rasānaṃ… yo phoṭṭhabbānaṃ… yo dhammānaṃ nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo’’ti. Dasamaṃ.
যমকৰগ্গো দুতিযো।
Yamakavaggo dutiyo.
তস্সুদ্দানং –
Tassuddānaṃ –
সম্বোধেন দুৰে ৰুত্তা, অস্সাদেন অপরে দুৰে।
Sambodhena duve vuttā, assādena apare duve;
নো চেতেন দুৰে ৰুত্তা, অভিনন্দেন অপরে দুৰে।
No cetena duve vuttā, abhinandena apare duve;
উপ্পাদেন দুৰে ৰুত্তা, ৰগ্গো তেন পৰুচ্চতীতি॥
Uppādena duve vuttā, vaggo tena pavuccatīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭-১০. পঠমাভিনন্দসুত্তাদিৰণ্ণনা • 7-10. Paṭhamābhinandasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭-১০. পঠমাভিনন্দসুত্তাদিৰণ্ণনা • 7-10. Paṭhamābhinandasuttādivaṇṇanā
