| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
9. து³தியது³ட்ட²தோ³ஸஸிக்கா²பத³ங்
9. Dutiyaduṭṭhadosasikkhāpadaṃ
391. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன மெத்தியபூ⁴மஜகா பி⁴க்கூ² கி³ஜ்ஜ²கூடா பப்³ப³தா ஓரோஹந்தா அத்³த³ஸங்ஸு ச²க³லகங் 1 அஜிகாய விப்படிபஜ்ஜந்தங். தி³ஸ்வான ஏவமாஹங்ஸு – ‘‘ஹந்த³ மயங், ஆவுஸோ, இமங் ச²க³லகங் த³ப்³ப³ங் மல்லபுத்தங் நாம கரோம. இமங் அஜிகங் மெத்தியங் நாம பி⁴க்கு²னிங் கரோம. ஏவங் மயங் வோஹரிஸ்ஸாம. புப்³பே³ மயங், ஆவுஸோ, த³ப்³ப³ங் மல்லபுத்தங் ஸுதேன அவோசும்ஹா. இதா³னி பன அம்ஹேஹி ஸாமங் தி³ட்டோ² மெத்தியாய பி⁴க்கு²னியா விப்படிபஜ்ஜந்தோ’’தி. தே தங் ச²க³லகங் த³ப்³ப³ங் மல்லபுத்தங் நாம அகங்ஸு. தங் அஜிகங் மெத்தியங் நாம பி⁴க்கு²னிங் அகங்ஸு. தே பி⁴க்கூ²னங் ஆரோசேஸுங் – ‘‘புப்³பே³ மயங், ஆவுஸோ, த³ப்³ப³ங் மல்லபுத்தங் ஸுதேன அவோசும்ஹா. இதா³னி பன அம்ஹேஹி ஸாமங் தி³ட்டோ² மெத்தியாய பி⁴க்கு²னியா விப்படிபஜ்ஜந்தோ’’தி. பி⁴க்கூ² ஏவமாஹங்ஸு – ‘‘மாவுஸோ, ஏவங் அவசுத்த². நாயஸ்மா த³ப்³போ³ மல்லபுத்தோ ஏவங் கரிஸ்ஸதீ’’தி.
391. Tena samayena buddho bhagavā rājagahe viharati veḷuvane kalandakanivāpe. Tena kho pana samayena mettiyabhūmajakā bhikkhū gijjhakūṭā pabbatā orohantā addasaṃsu chagalakaṃ 2 ajikāya vippaṭipajjantaṃ. Disvāna evamāhaṃsu – ‘‘handa mayaṃ, āvuso, imaṃ chagalakaṃ dabbaṃ mallaputtaṃ nāma karoma. Imaṃ ajikaṃ mettiyaṃ nāma bhikkhuniṃ karoma. Evaṃ mayaṃ voharissāma. Pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Te taṃ chagalakaṃ dabbaṃ mallaputtaṃ nāma akaṃsu. Taṃ ajikaṃ mettiyaṃ nāma bhikkhuniṃ akaṃsu. Te bhikkhūnaṃ ārocesuṃ – ‘‘pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Bhikkhū evamāhaṃsu – ‘‘māvuso, evaṃ avacuttha. Nāyasmā dabbo mallaputto evaṃ karissatī’’ti.
அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா ஆயஸ்மந்தங் த³ப்³ப³ங் மல்லபுத்தங் படிபுச்சி² – ‘‘ஸரஸி த்வங், த³ப்³ப³, ஏவரூபங் கத்தா யத²யிமே பி⁴க்கூ² ஆஹங்ஸூ’’தி? ‘‘யதா² மங், ப⁴ந்தே, ப⁴க³வா ஜானாதீ’’தி. து³தியம்பி கோ² ப⁴க³வா…பே॰… ததியம்பி கோ² ப⁴க³வா ஆயஸ்மந்தங் த³ப்³ப³ங் மல்லபுத்தங் ஏதத³வோச – ‘‘ஸரஸி த்வங், த³ப்³ப³, ஏவரூபங் கத்தா யத²யிமே பி⁴க்கூ² ஆஹங்ஸூ’’தி? ‘‘யதா² மங், ப⁴ந்தே, ப⁴க³வா ஜானாதீ’’தி. ‘‘ந கோ², த³ப்³ப³, த³ப்³பா³ ஏவங் நிப்³பே³டெ²ந்தி. ஸசே தயா கதங் கதந்தி வதே³ஹி, ஸசே தயா அகதங் அகதந்தி வதே³ஹீ’’தி. ‘‘யதோ அஹங், ப⁴ந்தே, ஜாதோ நாபி⁴ஜானாமி ஸுபினந்தேனபி மேது²னத⁴ம்மங் படிஸேவிதா, பகே³வ ஜாக³ரோ’’தி! அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி, பி⁴க்கு²வே, இமே பி⁴க்கூ² அனுயுஞ்ஜதா²’’தி. இத³ங் வத்வா ப⁴க³வா உட்டா²யாஸனா விஹாரங் பாவிஸி.
Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ dabbaṃ mallaputtaṃ paṭipucchi – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. Dutiyampi kho bhagavā…pe… tatiyampi kho bhagavā āyasmantaṃ dabbaṃ mallaputtaṃ etadavoca – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. ‘‘Na kho, dabba, dabbā evaṃ nibbeṭhenti. Sace tayā kataṃ katanti vadehi, sace tayā akataṃ akatanti vadehī’’ti. ‘‘Yato ahaṃ, bhante, jāto nābhijānāmi supinantenapi methunadhammaṃ paṭisevitā, pageva jāgaro’’ti! Atha kho bhagavā bhikkhū āmantesi – ‘‘tena hi, bhikkhuve, ime bhikkhū anuyuñjathā’’ti. Idaṃ vatvā bhagavā uṭṭhāyāsanā vihāraṃ pāvisi.
அத² கோ² தே பி⁴க்கூ² மெத்தியபூ⁴மஜகே பி⁴க்கூ² அனுயுஞ்ஜிங்ஸு. தே பி⁴க்கூ²ஹி அனுயுஞ்ஜீயமானா பி⁴க்கூ²னங் ஏதமத்த²ங் ஆரோசேஸுங் – ‘‘கிங் பன தும்ஹே, ஆவுஸோ, ஆயஸ்மந்தங் த³ப்³ப³ங் மல்லபுத்தங் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சிதே³ஸங் லேஸமத்தங் உபாதா³ய பாராஜிகேன த⁴ம்மேன அனுத்³த⁴ங்ஸேதா²’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம மெத்தியபூ⁴மஜகா பி⁴க்கூ² ஆயஸ்மந்தங் த³ப்³ப³ங் மல்லபுத்தங் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸங் லேஸமத்தங் உபாதா³ய பாராஜிகேன த⁴ம்மேன அனுத்³த⁴ங்ஸெஸ்ஸந்தீ’’தி! அத² கோ² தே பி⁴க்கூ² மெத்தியபூ⁴மஜகே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர தும்ஹே, பி⁴க்க²வே, த³ப்³ப³ங் மல்லபுத்தங் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸங் லேஸமத்தங் உபாதா³ய பாராஜிகேன த⁴ம்மேன அனுத்³த⁴ங்ஸேதா²’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம தும்ஹே, மோக⁴புரிஸா, த³ப்³ப³ங் மல்லபுத்தங் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸங் லேஸமத்தங் உபாதா³ய பாராஜிகேன த⁴ம்மேன அனுத்³த⁴ங்ஸெஸ்ஸத²! நேதங், மோக⁴புரிஸா, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Atha kho te bhikkhū mettiyabhūmajake bhikkhū anuyuñjiṃsu. Te bhikkhūhi anuyuñjīyamānā bhikkhūnaṃ etamatthaṃ ārocesuṃ – ‘‘kiṃ pana tumhe, āvuso, āyasmantaṃ dabbaṃ mallaputtaṃ aññabhāgiyassa adhikaraṇassa kiñcidesaṃ lesamattaṃ upādāya pārājikena dhammena anuddhaṃsethā’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma mettiyabhūmajakā bhikkhū āyasmantaṃ dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessantī’’ti! Atha kho te bhikkhū mettiyabhūmajake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsethā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tumhe, moghapurisā, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
392. ‘‘யோ பன பி⁴க்கு² பி⁴க்கு²ங் து³ட்டோ² தோ³ஸோ அப்பதீதோ அஞ்ஞபா⁴கி³யஸ்ஸ அதி⁴கரணஸ்ஸ கிஞ்சிதே³ஸங் லேஸமத்தங் உபாதா³ய பாராஜிகேன த⁴ம்மேன அனுத்³த⁴ங்ஸெய்ய – ‘அப்பேவ நாம நங் இமம்ஹா ப்³ரஹ்மசரியா சாவெய்ய’ந்தி. ததோ அபரேன ஸமயேன ஸமனுக்³கா³ஹீயமானோ வா அஸமனுக்³கா³ஹீயமானோ வா அஞ்ஞபா⁴கி³யஞ்சேவ தங் அதி⁴கரணங் ஹோதி கோசிதே³ஸோ லேஸமத்தோ உபாதி³ன்னோ, பி⁴க்கு² ச தோ³ஸங் பதிட்டா²தி, ஸங்கா⁴தி³ஸேஸோ’’தி.
392.‘‘Yopana bhikkhu bhikkhuṃ duṭṭho doso appatīto aññabhāgiyassaadhikaraṇassa kiñcidesaṃ lesamattaṃ upādāya pārājikena dhammena anuddhaṃseyya – ‘appeva nāma naṃ imamhā brahmacariyā cāveyya’nti. Tato aparena samayena samanuggāhīyamāno vā asamanuggāhīyamāno vā aññabhāgiyañceva taṃ adhikaraṇaṃ hoti kocideso lesamatto upādinno, bhikkhu ca dosaṃ patiṭṭhāti, saṅghādiseso’’ti.
393. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
393.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
பி⁴க்கு²ந்தி அஞ்ஞங் பி⁴க்கு²ங்.
Bhikkhunti aññaṃ bhikkhuṃ.
து³ட்டோ² தோ³ஸோதி குபிதோ அனத்தமனோ அனபி⁴ரத்³தோ⁴ ஆஹதசித்தோ கி²லஜாதோ.
Duṭṭho dosoti kupito anattamano anabhiraddho āhatacitto khilajāto.
அப்பதீதோதி தேன ச கோபேன, தேன ச தோ³ஸேன, தாய ச அனத்தமனதாய, தாய ச அனபி⁴ரத்³தி⁴யா அப்பதீதோ ஹோதி.
Appatītoti tena ca kopena, tena ca dosena, tāya ca anattamanatāya, tāya ca anabhiraddhiyā appatīto hoti.
அஞ்ஞபா⁴கி³யஸ்ஸ அதி⁴கரணஸ்ஸாதி ஆபத்தஞ்ஞபா⁴கி³யங் வா ஹோதி அதி⁴கரணஞ்ஞபா⁴கி³யங் வா. கத²ங் அதி⁴கரணங் அதி⁴கரணஸ்ஸ அஞ்ஞபா⁴கி³யங்? விவாதா³தி⁴கரணங் அனுவாதா³தி⁴கரணஸ்ஸ ஆபத்தாதி⁴கரணஸ்ஸ கிச்சாதி⁴கரணஸ்ஸ அஞ்ஞபா⁴கி³யங். அனுவாதா³தி⁴கரணங் ஆபத்தாதி⁴கரணஸ்ஸ கிச்சாதி⁴கரணஸ்ஸ விவாதா³தி⁴கரணஸ்ஸ அஞ்ஞபா⁴கி³யங். ஆபத்தாதி⁴கரணங் கிச்சாதி⁴கரணஸ்ஸ விவாதா³தி⁴கரணஸ்ஸ அனுவாதா³தி⁴கரணஸ்ஸ அஞ்ஞபா⁴கி³யங். கிச்சாதி⁴கரணங் விவாதா³தி⁴கரணஸ்ஸ அனுவாதா³தி⁴கரணஸ்ஸ ஆபத்தாதி⁴கரணஸ்ஸ அஞ்ஞபா⁴கி³யங். ஏவங் அதி⁴கரணங் அதி⁴கரணஸ்ஸ அஞ்ஞபா⁴கி³யங்.
Aññabhāgiyassa adhikaraṇassāti āpattaññabhāgiyaṃ vā hoti adhikaraṇaññabhāgiyaṃ vā. Kathaṃ adhikaraṇaṃ adhikaraṇassa aññabhāgiyaṃ? Vivādādhikaraṇaṃ anuvādādhikaraṇassa āpattādhikaraṇassa kiccādhikaraṇassa aññabhāgiyaṃ. Anuvādādhikaraṇaṃ āpattādhikaraṇassa kiccādhikaraṇassa vivādādhikaraṇassa aññabhāgiyaṃ. Āpattādhikaraṇaṃ kiccādhikaraṇassa vivādādhikaraṇassa anuvādādhikaraṇassa aññabhāgiyaṃ. Kiccādhikaraṇaṃ vivādādhikaraṇassa anuvādādhikaraṇassa āpattādhikaraṇassa aññabhāgiyaṃ. Evaṃ adhikaraṇaṃ adhikaraṇassa aññabhāgiyaṃ.
கத²ங் அதி⁴கரணங் அதி⁴கரணஸ்ஸ தப்³பா⁴கி³யங்? விவாதா³தி⁴கரணங் விவாதா³தி⁴கரணஸ்ஸ தப்³பா⁴கி³யங். அனுவாதா³தி⁴கரணங் அனுவாதா³தி⁴கரணஸ்ஸ தப்³பா⁴கி³யங். ஆபத்தாதி⁴கரணங் ஆபத்தாதி⁴கரணஸ்ஸ ஸியா தப்³பா⁴கி³யங் ஸியா அஞ்ஞபா⁴கி³யங்.
Kathaṃ adhikaraṇaṃ adhikaraṇassa tabbhāgiyaṃ? Vivādādhikaraṇaṃ vivādādhikaraṇassa tabbhāgiyaṃ. Anuvādādhikaraṇaṃ anuvādādhikaraṇassa tabbhāgiyaṃ. Āpattādhikaraṇaṃ āpattādhikaraṇassa siyā tabbhāgiyaṃ siyā aññabhāgiyaṃ.
கத²ங் ஆபத்தாதி⁴கரணங் ஆபத்தாதி⁴கரணஸ்ஸ அஞ்ஞபா⁴கி³யங்? மேது²னத⁴ம்மபாராஜிகாபத்தி அதி³ன்னாதா³னபாராஜிகாபத்தியா மனுஸ்ஸவிக்³க³ஹபாராஜிகாபத்தியா உத்தரிமனுஸ்ஸத⁴ம்மபாராஜிகாபத்தியா அஞ்ஞபா⁴கி³யா. அதி³ன்னாதா³னபாராஜிகாபத்தி மனுஸ்ஸவிக்³க³ஹபாராஜிகாபத்தியா உத்தரிமனுஸ்ஸத⁴ம்மபாராஜிகாபத்தியா மேது²னத⁴ம்மபாராஜிகாபத்தியா அஞ்ஞபா⁴கி³யா. மனுஸ்ஸவிக்³க³ஹபாராஜிகாபத்தி உத்தரிமனுஸ்ஸத⁴ம்மபாராஜிகாபத்தியா மேது²னத⁴ம்மபாராஜிகாபத்தியா அதி³ன்னாதா³னபாராஜிகாபத்தியா அஞ்ஞபா⁴கி³யா. உத்தரிமனுஸ்ஸத⁴ம்மபாராஜிகாபத்தி மேது²னத⁴ம்மபாராஜிகாபத்தியா அதி³ன்னாதா³னபாராஜிகாபத்தியா மனுஸ்ஸவிக்³க³ஹபாராஜிகாபத்தியா அஞ்ஞபா⁴கி³யா. ஏவங் ஆபத்தாதி⁴கரணங் ஆபத்தாதி⁴கரணஸ்ஸ அஞ்ஞபா⁴கி³யங்.
Kathaṃ āpattādhikaraṇaṃ āpattādhikaraṇassa aññabhāgiyaṃ? Methunadhammapārājikāpatti adinnādānapārājikāpattiyā manussaviggahapārājikāpattiyā uttarimanussadhammapārājikāpattiyā aññabhāgiyā. Adinnādānapārājikāpatti manussaviggahapārājikāpattiyā uttarimanussadhammapārājikāpattiyā methunadhammapārājikāpattiyā aññabhāgiyā. Manussaviggahapārājikāpatti uttarimanussadhammapārājikāpattiyā methunadhammapārājikāpattiyā adinnādānapārājikāpattiyā aññabhāgiyā. Uttarimanussadhammapārājikāpatti methunadhammapārājikāpattiyā adinnādānapārājikāpattiyā manussaviggahapārājikāpattiyā aññabhāgiyā. Evaṃ āpattādhikaraṇaṃ āpattādhikaraṇassa aññabhāgiyaṃ.
கத²ங் ஆபத்தாதி⁴கரணங் ஆபத்தாதி⁴கரணஸ்ஸ தப்³பா⁴கி³யங்? மேது²னத⁴ம்மபாராஜிகாபத்தி மேது²னத⁴ம்மபாராஜிகாபத்தியா தப்³பா⁴கி³யா. அதி³ன்னாதா³னபாராஜிகாபத்தி அதி³ன்னாதா³னபாராஜிகாபத்தியா தப்³பா⁴கி³யா. மனுஸ்ஸவிக்³க³ஹபாராஜிகாபத்தி மனுஸ்ஸவிக்³க³ஹபாராஜிகாபத்தியா தப்³பா⁴கி³யா. உத்தரிமனுஸ்ஸத⁴ம்மபாராஜிகாபத்தி உத்தரிமனுஸ்ஸத⁴ம்மபாராஜிகாபத்தியா தப்³பா⁴கி³யா. ஏவங் ஆபத்தாதி⁴கரணங் ஆபத்தாதி⁴கரணஸ்ஸ தப்³பா⁴கி³யங்.
Kathaṃ āpattādhikaraṇaṃ āpattādhikaraṇassa tabbhāgiyaṃ? Methunadhammapārājikāpatti methunadhammapārājikāpattiyā tabbhāgiyā. Adinnādānapārājikāpatti adinnādānapārājikāpattiyā tabbhāgiyā. Manussaviggahapārājikāpatti manussaviggahapārājikāpattiyā tabbhāgiyā. Uttarimanussadhammapārājikāpatti uttarimanussadhammapārājikāpattiyā tabbhāgiyā. Evaṃ āpattādhikaraṇaṃ āpattādhikaraṇassa tabbhāgiyaṃ.
கிச்சாதி⁴கரணங் கிச்சாதி⁴கரணஸ்ஸ தப்³பா⁴கி³யங். ஏவங் அதி⁴கரணங் அதி⁴கரணஸ்ஸ தப்³பா⁴கி³யங்.
Kiccādhikaraṇaṃ kiccādhikaraṇassa tabbhāgiyaṃ. Evaṃ adhikaraṇaṃ adhikaraṇassa tabbhāgiyaṃ.
394. கிஞ்சி தே³ஸங் லேஸமத்தங் உபாதா³யாதி லேஸோ நாம த³ஸ லேஸா – ஜாதிலேஸோ , நாமலேஸோ, கொ³த்தலேஸோ, லிங்க³லேஸோ, ஆபத்திலேஸோ, பத்தலேஸோ, சீவரலேஸோ, உபஜ்ஜா²யலேஸோ, ஆசரியலேஸோ, ஸேனாஸனலேஸோ.
394.Kiñci desaṃ lesamattaṃ upādāyāti leso nāma dasa lesā – jātileso , nāmaleso, gottaleso, liṅgaleso, āpattileso, pattaleso, cīvaraleso, upajjhāyaleso, ācariyaleso, senāsanaleso.
395. ஜாதிலேஸோ நாம க²த்தியோ தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ. அஞ்ஞங் க²த்தியங் பஸ்ஸித்வா சோதே³தி – ‘‘க²த்தியோ மயா தி³ட்டோ² 3. பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.
395.Jātileso nāma khattiyo diṭṭho hoti pārājikaṃ dhammaṃ ajjhāpajjanto. Aññaṃ khattiyaṃ passitvā codeti – ‘‘khattiyo mayā diṭṭho 4. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
ப்³ராஹ்மணோ தி³ட்டோ² ஹோதி…பே॰… வெஸ்ஸோ தி³ட்டோ² ஹோதி…பே॰… ஸுத்³தோ³ தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ. அஞ்ஞங் ஸுத்³த³ங் பஸ்ஸித்வா சோதே³தி – ‘‘ஸுத்³தோ³ மயா தி³ட்டோ². பாராஜிகங் த⁴ம்மங் அஜ்ஜா²பன்னோஸி , அஸ்ஸமணோஸி, அஸக்யபுத்தியோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Brāhmaṇo diṭṭho hoti…pe… vesso diṭṭho hoti…pe… suddo diṭṭho hoti pārājikaṃ dhammaṃ ajjhāpajjanto. Aññaṃ suddaṃ passitvā codeti – ‘‘suddo mayā diṭṭho. Pārājikaṃ dhammaṃ ajjhāpannosi , assamaṇosi, asakyaputtiyosi’’…pe… āpatti vācāya, vācāya saṅghādisesassa.
396. நாமலேஸோ நாம பு³த்³த⁴ரக்கி²தோ தி³ட்டோ² ஹோதி…பே॰… த⁴ம்மரக்கி²தோ தி³ட்டோ² ஹோதி…பே॰… ஸங்க⁴ரக்கி²தோ தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ . அஞ்ஞங் ஸங்க⁴ரக்கி²தங் பஸ்ஸித்வா சோதே³தி – ‘‘ஸங்க⁴ரக்கி²தோ மயா தி³ட்டோ². பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
396.Nāmaleso nāma buddharakkhito diṭṭho hoti…pe… dhammarakkhito diṭṭho hoti…pe… saṅgharakkhito diṭṭho hoti pārājikaṃ dhammaṃ ajjhāpajjanto . Aññaṃ saṅgharakkhitaṃ passitvā codeti – ‘‘saṅgharakkhito mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
397. கொ³த்தலேஸோ நாம கோ³தமோ தி³ட்டோ² ஹோதி…பே॰… மொக்³க³ல்லானோ தி³ட்டோ² ஹோதி…பே॰… கச்சாயனோ தி³ட்டோ² ஹோதி…பே॰… வாஸிட்டோ² தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ. அஞ்ஞங் வாஸிட்ட²ங் பஸ்ஸித்வா சோதே³தி – ‘‘வாஸிட்டோ² மயா தி³ட்டோ². பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
397.Gottaleso nāma gotamo diṭṭho hoti…pe… moggallāno diṭṭho hoti…pe… kaccāyano diṭṭho hoti…pe… vāsiṭṭho diṭṭho hoti pārājikaṃ dhammaṃ ajjhāpajjanto. Aññaṃ vāsiṭṭhaṃ passitvā codeti – ‘‘vāsiṭṭho mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
398. லிங்க³லேஸோ நாம தீ³கோ⁴ தி³ட்டோ² ஹோதி…பே॰… ரஸ்ஸோ தி³ட்டோ² ஹோதி…பே॰… கண்ஹோ தி³ட்டோ² ஹோதி…பே॰… ஓதா³தோ தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ. அஞ்ஞங் ஓதா³தங் பஸ்ஸித்வா சோதே³தி – ‘‘ஓதா³தோ மயா தி³ட்டோ². பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
398.Liṅgaleso nāma dīgho diṭṭho hoti…pe… rasso diṭṭho hoti…pe… kaṇho diṭṭho hoti…pe… odāto diṭṭho hoti pārājikaṃ dhammaṃ ajjhāpajjanto. Aññaṃ odātaṃ passitvā codeti – ‘‘odāto mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
399. ஆபத்திலேஸோ நாம லஹுகங் ஆபத்திங் ஆபஜ்ஜந்தோ தி³ட்டோ² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி, அஸக்யபுத்தியோஸி…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
399.Āpattileso nāma lahukaṃ āpattiṃ āpajjanto diṭṭho hoti. Tañce pārājikena codeti – ‘‘assamaṇosi, asakyaputtiyosi…pe… āpatti vācāya, vācāya saṅghādisesassa.
400. பத்தலேஸோ நாம லோஹபத்தத⁴ரோ தி³ட்டோ² ஹோதி…பே॰… ஸாடகபத்தத⁴ரோ தி³ட்டோ² ஹோதி…பே॰… ஸும்ப⁴கபத்தத⁴ரோ தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ. அஞ்ஞங் ஸும்ப⁴கபத்தத⁴ரங் பஸ்ஸித்வா சோதே³தி – ‘‘ஸும்ப⁴கபத்தத⁴ரோ மயா தி³ட்டோ². பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
400.Pattaleso nāma lohapattadharo diṭṭho hoti…pe… sāṭakapattadharo diṭṭho hoti…pe… sumbhakapattadharo diṭṭho hoti pārājikaṃ dhammaṃ ajjhāpajjanto. Aññaṃ sumbhakapattadharaṃ passitvā codeti – ‘‘sumbhakapattadharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
401. சீவரலேஸோ நாம பங்ஸுகூலிகோ தி³ட்டோ² ஹோதி…பே॰… க³ஹபதிசீவரத⁴ரோ தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ. அஞ்ஞங் க³ஹபதிசீவரத⁴ரங் பஸ்ஸித்வா சோதே³தி – ‘‘க³ஹபதிசீவரத⁴ரோ மயா தி³ட்டோ². பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
401.Cīvaraleso nāma paṃsukūliko diṭṭho hoti…pe… gahapaticīvaradharo diṭṭho hoti pārājikaṃ dhammaṃ ajjhāpajjanto. Aññaṃ gahapaticīvaradharaṃ passitvā codeti – ‘‘gahapaticīvaradharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
402. உபஜ்ஜா²யலேஸோ நாம இத்த²ன்னாமஸ்ஸ ஸத்³தி⁴விஹாரிகோ தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ. அஞ்ஞங் இத்த²ன்னாமஸ்ஸ ஸத்³தி⁴விஹாரிகங் பஸ்ஸித்வா சோதே³தி – ‘‘இத்த²ன்னாமஸ்ஸ ஸத்³தி⁴விஹாரிகோ மயா தி³ட்டோ². பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
402.Upajjhāyaleso nāma itthannāmassa saddhivihāriko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa saddhivihārikaṃ passitvā codeti – ‘‘itthannāmassa saddhivihāriko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
403. ஆசரியலேஸோ நாம இத்த²ன்னாமஸ்ஸ அந்தேவாஸிகோ தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ. அஞ்ஞங் இத்த²ன்னாமஸ்ஸ அந்தேவாஸிகங் பஸ்ஸித்வா சோதே³தி – ‘‘இத்த²ன்னாமஸ்ஸ அந்தேவாஸிகோ மயா தி³ட்டோ². பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
403.Ācariyaleso nāma itthannāmassa antevāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa antevāsikaṃ passitvā codeti – ‘‘itthannāmassa antevāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
404. ஸேனாஸனலேஸோ நாம இத்த²ன்னாமஸேனாஸனவாஸிகோ தி³ட்டோ² ஹோதி பாராஜிகங் த⁴ம்மங் அஜ்ஜா²பஜ்ஜந்தோ. அஞ்ஞங் இத்த²ன்னாமஸேனாஸனவாஸிகங் பஸ்ஸித்வா சோதே³தி – ‘‘இத்த²ன்னாமஸேனாஸனவாஸிகோ மயா தி³ட்டோ². பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.
404.Senāsanaleso nāma itthannāmasenāsanavāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmasenāsanavāsikaṃ passitvā codeti – ‘‘itthannāmasenāsanavāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
405. பாராஜிகேன த⁴ம்மேனாதி சதுன்னங் அஞ்ஞதரேன.
405.Pārājikena dhammenāti catunnaṃ aññatarena.
அனுத்³த⁴ங்ஸெய்யாதி சோதே³தி வா சோதா³பேதி வா.
Anuddhaṃseyyāti codeti vā codāpeti vā.
அப்பேவ நாம நங் இமம்ஹா ப்³ரஹ்மசரியாசாவெய்யந்தி பி⁴க்கு²பா⁴வா சாவெய்யங், ஸமணத⁴ம்மா சாவெய்யங், ஸீலக்க²ந்தா⁴ சாவெய்யங், தபோகு³ணா சாவெய்யங்.
Appeva nāma naṃ imamhā brahmacariyācāveyyanti bhikkhubhāvā cāveyyaṃ, samaṇadhammā cāveyyaṃ, sīlakkhandhā cāveyyaṃ, tapoguṇā cāveyyaṃ.
ததோ அபரேன ஸமயேனாதி யஸ்மிங் க²ணே அனுத்³த⁴ங்ஸிதோ ஹோதி, தங் க²ணங் தங் லயங் தங் முஹுத்தங் வீதிவத்தே.
Tato aparena samayenāti yasmiṃ khaṇe anuddhaṃsito hoti, taṃ khaṇaṃ taṃ layaṃ taṃ muhuttaṃ vītivatte.
ஸமனுக்³கா³ஹீயமானோதி யேன வத்து²னா அனுத்³த⁴ங்ஸிதோ ஹோதி தஸ்மிங் வத்து²ஸ்மிங் ஸமனுக்³கா³ஹீயமானோ.
Samanuggāhīyamānoti yena vatthunā anuddhaṃsito hoti tasmiṃ vatthusmiṃ samanuggāhīyamāno.
அஸமனுக்³கா³ஹீயமானோதி ந கேனசி வுச்சமானோ.
Asamanuggāhīyamānoti na kenaci vuccamāno.
அதி⁴கரணங் நாம சத்தாரி அதி⁴கரணானி – விவாதா³தி⁴கரணங், அனுவாதா³தி⁴கரணங், ஆபத்தாதி⁴கரணங், கிச்சாதி⁴கரணங்.
Adhikaraṇaṃ nāma cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ.
கோசி தே³ஸோ லேஸமத்தோ உபாதி³ன்னோதி தேஸங் த³ஸன்னங் லேஸானங் அஞ்ஞதரோ லேஸோ உபாதி³ன்னோ ஹோதி.
Kocideso lesamatto upādinnoti tesaṃ dasannaṃ lesānaṃ aññataro leso upādinno hoti.
பி⁴க்கு² ச தோ³ஸங் பதிட்டா²தீதி துச்ச²கங் மயா ப⁴ணிதங், முஸா மயா ப⁴ணிதங், அபூ⁴தங் மயா ப⁴ணிதங், அஜானந்தேன மயா ப⁴ணிதங்.
Bhikkhu ca dosaṃ patiṭṭhātīti tucchakaṃ mayā bhaṇitaṃ, musā mayā bhaṇitaṃ, abhūtaṃ mayā bhaṇitaṃ, ajānantena mayā bhaṇitaṃ.
ஸங்கா⁴தி³ஸேஸோதி …பே॰… தேனபி வுச்சதி ஸங்கா⁴தி³ஸேஸோதி.
Saṅghādisesoti …pe… tenapi vuccati saṅghādisesoti.
406. பி⁴க்கு² ஸங்கா⁴தி³ஸேஸங் அஜ்ஜா²பஜ்ஜந்தோ தி³ட்டோ² ஹோதி, ஸங்கா⁴தி³ஸேஸே ஸங்கா⁴தி³ஸேஸதி³ட்டி² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஏவம்பி ஆபத்தஞ்ஞபா⁴கி³யங் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.
406. Bhikkhu saṅghādisesaṃ ajjhāpajjanto diṭṭho hoti, saṅghādisese saṅghādisesadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
பி⁴க்கு² ஸங்கா⁴தி³ஸேஸங் அஜ்ஜா²பஜ்ஜந்தோ தி³ட்டோ² ஹோதி, ஸங்கா⁴தி³ஸேஸே து²ல்லச்சயதி³ட்டி² ஹோதி…பே॰… பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி… து³ப்³பா⁴ஸிததி³ட்டி² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி’’…பே॰… ஏவம்பி ஆபத்தஞ்ஞபா⁴கி³யங் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
பி⁴க்கு² து²ல்லச்சயங் அஜ்ஜா²பஜ்ஜந்தோ தி³ட்டோ² ஹோதி து²ல்லச்சயே து²ல்லச்சயதி³ட்டி² ஹோதி…பே॰… து²ல்லச்சயே பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி… து³ப்³பா⁴ஸிததி³ட்டி² ஹோதி… ஸங்கா⁴தி³ஸேஸதி³ட்டி² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி’’ …பே॰… ஏவம்பி ஆபத்தஞ்ஞபா⁴கி³யங் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codeti – ‘‘assamaṇosi’’ …pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
பி⁴க்கு² பாசித்தியங்…பே॰… பாடிதே³ஸனீயங்… து³க்கடங்… து³ப்³பா⁴ஸிதங் அஜ்ஜா²பஜ்ஜந்தோ தி³ட்டோ² ஹோதி, து³ப்³பா⁴ஸிதே து³ப்³பா⁴ஸிததி³ட்டி² ஹோதி…பே॰… து³ப்³பா⁴ஸிதே ஸங்கா⁴தி³ஸேஸதி³ட்டி² ஹோதி… து²ல்லச்சயதி³ட்டி² ஹோதி… பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஏவம்பி ஆபத்தஞ்ஞபா⁴கி³யங் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti, dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ஏகேகங் மூலங் காதுன சக்கங் ப³ந்தி⁴தப்³ப³ங்.
Ekekaṃ mūlaṃ kātuna cakkaṃ bandhitabbaṃ.
407. பி⁴க்கு² ஸங்கா⁴தி³ஸேஸங் அஜ்ஜா²பஜ்ஜந்தோ தி³ட்டோ² ஹோதி ஸங்கா⁴தி³ஸேஸே ஸங்கா⁴தி³ஸேஸதி³ட்டி² ஹோதி. தஞ்சே பாராஜிகேன சோதா³பேதி – ‘‘அஸ்ஸமணோஸி’’…பே॰… ஏவம்பி ஆபத்தஞ்ஞபா⁴கி³யங் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.
407. Bhikkhu saṅghādisesaṃ ajjhāpajjanto diṭṭho hoti saṅghādisese saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
பி⁴க்கு² ஸங்கா⁴தி³ஸேஸங் அஜ்ஜா²பஜ்ஜந்தோ தி³ட்டோ² ஹோதி, ஸங்கா⁴தி³ஸேஸே து²ல்லச்சயதி³ட்டி² ஹோதி…பே॰… பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி… து³ப்³பா⁴ஸிததி³ட்டி² ஹோதி. தஞ்சே பாராஜிகேன சோதா³பேதி – ‘‘அஸ்ஸமணோஸி’’…பே॰… ஏவம்பி ஆபத்தஞ்ஞபா⁴கி³யங் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
பி⁴க்கு² து²ல்லச்சயங் அஜ்ஜா²பஜ்ஜந்தோ தி³ட்டோ² ஹோதி து²ல்லச்சயே து²ல்லச்சயதி³ட்டி² ஹோதி…பே॰… து²ல்லச்சயே பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி… து³ப்³பா⁴ஸிததி³ட்டி² ஹோதி… ஸங்கா⁴தி³ஸேஸதி³ட்டி² ஹோதி. தஞ்சே பாராஜிகேன சோதா³பேதி – ‘‘அஸ்ஸமணோஸி’’…பே॰… ஏவம்பி ஆபத்தஞ்ஞபா⁴கி³யங் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
பி⁴க்கு² பாசித்தியங்…பே॰… பாடிதே³ஸனீயங்… து³க்கடங்… து³ப்³பா⁴ஸிதங் அஜ்ஜா²பஜ்ஜந்தோ தி³ட்டோ² ஹோதி து³ப்³பா⁴ஸிதே து³ப்³பா⁴ஸிததி³ட்டி² ஹோதி…பே॰… து³ப்³பா⁴ஸிதே ஸங்கா⁴தி³ஸேஸதி³ட்டி² ஹோதி… து²ல்லச்சயதி³ட்டி² ஹோதி… பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி. தஞ்சே பாராஜிகேன சோதா³பேதி – ‘‘அஸ்ஸமணோஸி , அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஏவம்பி ஆபத்தஞ்ஞபா⁴கி³யங் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codāpeti – ‘‘assamaṇosi , asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
408. அனாபத்தி ததா²ஸஞ்ஞீ சோதே³தி வா சோதா³பேதி வா, உம்மத்தகஸ்ஸ, ஆதி³கம்மிகஸ்ஸாதி.
408. Anāpatti tathāsaññī codeti vā codāpeti vā, ummattakassa, ādikammikassāti.
து³தியது³ட்ட²தோ³ஸஸிக்கா²பத³ங் நிட்டி²தங் நவமங்.
Dutiyaduṭṭhadosasikkhāpadaṃ niṭṭhitaṃ navamaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 9. து³தியது³ட்ட²தோ³ஸஸிக்கா²பத³வண்ணனா • 9. Dutiyaduṭṭhadosasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. து³தியது³ட்ட²தோ³ஸஸிக்கா²பத³வண்ணனா • 9. Dutiyaduṭṭhadosasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. து³தியது³ட்ட²தோ³ஸஸிக்கா²பத³வண்ணனா • 9. Dutiyaduṭṭhadosasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 9. து³தியது³ட்ட²தோ³ஸஸிக்கா²பத³வண்ணனா • 9. Dutiyaduṭṭhadosasikkhāpadavaṇṇanā
